ಮೋಹನ್ಲಾಲ್ ಒಡಿಯನ್ನಲ್ಲಿ ಮಮ್ಮುಟ್ಟಿಯ ಧ್ವನಿ
ಮೋಹನ್ಲಾಲ್ ಅವರ ಬಹುನಿರೀಕ್ಷಿತ ಚಿತ್ರ ‘ಒಡಿಯನ್’ಗೆ ಮಮ್ಮುಟ್ಟಿ ಧ್ವನಿ ನೀಡಲಿದ್ದಾರೆ ಎಂಬ ಮಾತುಗಳು ಸಿನೆಮಾದ ಚಿತ್ರೀಕರಣ ಆರಂಭವಾದ ದಿನದಿಂದಲೂ ಕೇಳಿಬರುತ್ತಿತ್ತು. ಇದೀಗ ಈ ಸುದ್ದಿ ನಿಜವಾಗಿದೆ. ಚಿತ್ರದ ನಿರ್ದೇಶಕ ವಿ.ಎ.ಶ್ರೀಕುಮಾರ್ ಈ ಬಗ್ಗೆ ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಂಡಿದ್ದು ಇಬ್ಬರ ಫೊಟೊಗಳ ಜೊತೆಗೆ ಮಮ್ಮುಟ್ಟಿಗೆ ಧನ್ಯವಾದ ಸೂಚಿಸಿದ್ದಾರೆ.
“ಧನ್ಯವಾದಗಳು ಮಮ್ಮುಟ್ಟಿಯವರೇ. ಇದು ಕನಸು ನಿಜವಾದ ಕ್ಷಣ. ನಿಮ್ಮ ಸಿಡಿಲಬ್ಬರದ ಧ್ವನಿಯೊಂದಿಗೆ ನನ್ನ ‘ಒಡಿಯನ್’ ಸಂಪೂರ್ಣಗೊಂಡಿದೆ” ಎಂದು ಶ್ರೀಕುಮಾರ್ ಬರೆದಿದ್ದಾರೆ.
ಈ ಹಿಂದೆ ಅನೇಕ ಜಾಹೀರಾತುಗಳನ್ನು ನಿರ್ದೇಶಿಸಿರುವ ಶ್ರೀಕುಮಾರ್ ‘ಒಡಿಯನ್’ ಸಿನೆಮಾದ ಮೂಲಕ ಸಿನೆಮಾ ನಿರ್ದೇಶನಕ್ಕೆ ಪಾದಾರ್ಪಣೆ ಮಾಡುತ್ತಿದ್ದಾರೆ. ಈ ಸಿನೆಮಾದಲ್ಲಿ ಮಲಯಾಳಂ ಸೂಪರ್ಸ್ಟಾರ್ ಮೋಹನ್ಲಾಲ್ ಮುಖ್ಯ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದು ಇತರ ಅನೇಕ ಪ್ರಸಿದ್ಧ ನಟ-ನಟಿಯರು ಅಭಿನಯಿಸಿದ್ದಾರೆ. ಒಡಿಯನ್ನಲ್ಲಿ ಪ್ರಕಾಶ್ ರೈ ಒಂದು ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಇಪ್ಪತ್ತು ವರ್ಷಗಳ ಹಿಂದೆ ಮಣಿರತ್ನಂ ನಿರ್ದೇಶನದ ಇರುವರ್ ಸಿನೆಮಾದಲ್ಲಿ ಮೋಹನ್ಲಾಲ್ ಮತ್ತು ಪ್ರಕಾಶ್ ರೈ ಜೊತೆಯಾಗಿ ನಟಿಸಿದ್ದರು.
ಮಂಜು ವಾರಿಯರ್ ಈ ಚಿತ್ರದಲ್ಲಿ ಮೋಹನ್ಲಾಲ್ಗೆ ನಾಯಕಿಯಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ಉಳಿದಂತೆ ಇನೊಸೆಂಟ್, ಸಿದ್ದೀಕ್,ಮನೋಜ್ ಜೋಶಿ,ನಂದು, ಕೈಲಾಶ್,ಶ್ರೀಜಯ ನಾಯರ್, ಸನಾ ಅಲ್ತಾಫ್ ಮತ್ತು ಅಪ್ಪಣಿ ಶರತ್ ನಟಿಸುತ್ತಿದ್ದಾರೆ. ಈ ಚಿತ್ರದ ಚಿತ್ರಕತೆಯನ್ನು ರಾಷ್ಟ್ರ ಪ್ರಶಸ್ತಿ ಪುರಸ್ಕ್ರತ ಕೆ.ಹರಿಕೃಷ್ಣನ್ ಬರೆದಿದ್ದಾರೆ. ದುಬಾರಿ ವೆಚ್ಚದಲ್ಲಿ ನಿರ್ಮಾಣವಾಗುತ್ತಿರುವ ‘ಒಡಿಯನ್’ಗೆ ಆಶಿರ್ವಾದ್ ಸಿನೆಮಾಸ್ ಲಾಂಛನದಡಿ ಆ್ಯಂಟನಿ ಪೆರುಂಬವೂರ್ ಹಣ ಹೂಡಿದ್ದಾರೆ. ಚಿತ್ರಕ್ಕೆ ಎಂ.ಜಯಚಂದ್ರನ್ ಸಂಗೀತ ನೀಡಿದ್ದು ಸ್ಯಾಮ್ ಸಿ.ಎಸ್ ಹಿನ್ನೆಲೆ ಸಂಗೀತ ರಚಿಸಿದ್ದಾರೆ.
ಶಾಜಿ ಕುಮಾರ್ ಅವರ ಛಾಯಾಗ್ರಹಣವಿದ್ದು ಜಾನ್ ಕುಟ್ಟಿ ಸಂಕಲನಕಾರರಾಗಿದ್ದಾರೆ. ಡಿಸೆಂಬರ್ 14ರಂದು ತೆರೆಕಾಣಲಿರುವ ‘ಒಡಿಯನ್’ ಸಿನೆಮಾದ ಬಗ್ಗೆ ತಯಾರಕರ ಜೊತೆಗೆ ಸಿನಿರಸಿಕರಿಗೂ ಸಾಕಷ್ಟು ನಿರೀಕ್ಷೆಯಿದ್ದು ಚಿತ್ರದ ಟಿಕೆಟ್ ಅಡ್ವಾನ್ಸ್ ಬುಕಿಂಗ್ ಈಗಾಗಲೇ ಆರಂಭವಾಗಿದೆ. ಈ ಸಿನೆಮಾ ಜಗತ್ತಿನಾದ್ಯಂತ ಏಕಕಾಲದಲ್ಲಿ ಬಿಡುಗಡೆಯಾಗಲಿದ್ದು ಟಿಕೆಟ್ಗಳು ಬಿಸಿ ದೋಸೆಯಂತೆ ಮಾರಾಟವಾಗಿವೆ ಎಂದು ಸಿನೆಮಾ ಮೂಲಗಳು ತಿಳಿಸಿವೆ.
