ಸಜ್ಜನ್ ಕುಮಾರ್ ಕುರಿತು ಕೋರ್ಟ್ ತೀರ್ಪಿನಲ್ಲಿ 2002ರ ಗುಜರಾತ್ ದಂಗೆಗಳು ಉಲ್ಲೇಖವಾಗಿದ್ದೇಕೆ...?

ಹೊಸದಿಲ್ಲಿ,ಡಿ.17: ಕಾಂಗ್ರೆಸ್ ನಾಯಕ ಸಜ್ಜನ್ ಕುಮಾರ್ ಅವರನ್ನು 198ರ ಸಿಖ್ ವಿರೋಧಿ ದಂಗೆ ಪ್ರಕರಣದಲ್ಲಿ ಅಪರಾಧಿಯೆಂದು ಸೋಮವಾರ ಘೋಷಿಸಿರುವ ದಿಲ್ಲಿ ಉಚ್ಚ ನ್ಯಾಯಾಲಯದ ತೀರ್ಪು ಇತರ ಸಾಮೂಹಿಕ ಹತ್ಯಾಕಾಂಡಗಳನ್ನೂ ಪ್ರಸ್ತಾಪಿಸಿದೆ. ಇಂತಹ ಘಟನೆಗಳಲ್ಲಿ ಪಾತಕಿಗಳು ರಾಜಕೀಯ ಕೃಪಾಶ್ರಯ ಹೊಂದಿರುವುದರಿಂದ ಮತ್ತು ಶಿಕ್ಷೆಯಿಂದ ನುಣುಚಿಕೊಳ್ಳಲು ಯಶಸ್ವಿಯಾಗುವುದರಿಂದ ಅವರನ್ನು ಕಾನೂನಿನ ಶಿಕ್ಷೆಗೆ ಗುರಿಪಡಿಸುವುದು ಸವಾಲಿನ ಕೆಲಸವಾಗಿದೆ ಎಂದಿರುವ ತೀರ್ಪು,ಮಾನವತೆಯ ವಿರುದ್ಧದ ಅಪರಾಧಗಳಾಗಲೀ ನರಮೇಧಗಳಾಗಲೀ ನಮ್ಮ ದೇಶೀಯ ಕಾನೂನಿನ ಭಾಗವಾಗಿಲ್ಲ ಮತ್ತು ಈ ಲೋಪವನ್ನು ತಕ್ಷಣವೇ ಸರಿಪಡಿಸಬೇಕಾದ ಅಗತ್ಯವಿದೆ ಎಂದು ಹೇಳಿದೆ.

ಸ್ವತಂತ್ರ ಭಾರತದ ಇತಿಹಾಸದಲ್ಲಿ ಅಲ್ಪಸಂಖ್ಯಾತ ಸಮುದಾಯವನ್ನು ಗುರಿಯಾಗಿಸಿಕೊಂಡು ನಡೆದ ಇಂತಹ ಇತರ ಘಟನೆಗಳನ್ನು ನ್ಯಾಯಾಲಯವು ಪಟ್ಟಿ ಮಾಡಿದೆ.

ದಿಲ್ಲಿಯೊಂದರಲ್ಲೇ 2,733 ಮತ್ತು ದೇಶಾದ್ಯಂತ ಸುಮಾರು 3,350 ಸಿಕ್ಖರನ್ನು ಬರ್ಬರವಾಗಿ ಹತ್ಯೆಗೈದ ನವೆಂಬರ್ 1984ರ ದಂಗೆಗಳು ಸಾಮೂಹಿಕ ಅಪರಾಧದ ಮೊದಲ ಘಟನೆಯಲ್ಲ,ದುರದೃಷ್ಟವಶಾತ್ ಕೊನೆಯ ಘಟನೆಯೂ ಅಲ್ಲ. ದೇಶದ ವಿಭಜನೆಯ ಸಂದರ್ಭದಲ್ಲಿ ಪಂಜಾಬ್,ದಿಲ್ಲಿ ಮತ್ತು ಇತರೆಡೆಗಳಲ್ಲಿ ನಡೆದಿದ್ದ ನರಮೇಧಗಳು 1984ರ ನವೆಂಬರ್‌ನಲ್ಲಿ ನಡೆದಿದ್ದ ಅಮಾಯಕ ಸಿಕ್ಖರ ಹತ್ಯೆಗಳಷ್ಟೇ ಯಾತನದಾಯಕ ನೆನಪುಗಳಾಗಿ ಉಳಿದುಕೊಂಡಿವೆ. 1993ಲ್ಲಿ ಮುಂಬೈ,2002ರಲ್ಲಿ ಗುಜರಾತ್,2008ರಲ್ಲಿ ಒಡಿಶಾದ ಕಂಧಮಾಲ್‌ನಲ್ಲಿ ಮತ್ತು 2013ರಲ್ಲಿ ಉತ್ತರ ಪ್ರದೇಶದ ಮುಝಫ್ಫರ್‌ನಗರದಲ್ಲಿ ನಡೆದಿದ್ದ ನರಮೇಧಗಳು ಸಮಾನ ಸ್ವರೂಪವನ್ನು ಹೊಂದಿದ್ದವು. ಇವು ಇಂತಹ ಕೆಲವು ಪ್ರಕರಣಗಳಷ್ಟೇ ಎಂದು ನ್ಯಾಯಾಲಯವು ಹೇಳಿದೆ.

ಅಲ್ಪಸಂಖ್ಯಾತರನ್ನು ಗುರಿಯಾಗಿಸಿಕೊಂಡಿದ್ದು ಮತ್ತು ಕಾನೂನು ಜಾರಿ ಸಂಸ್ಥೆಗಳ ಬೆಂಬಲದೊಂದಿಗೆ ರಾಜಕೀಯ ನಾಯಕರು ದಾಳಿಗಳ ನೇತೃತ್ವ ವಹಿಸಿದ್ದು ಈ ಎಲ್ಲ ಸಾಮೂಹಿಕ ಅಪರಾಧಗಳಲ್ಲಿಯ ಸಮಾನ ಅಂಶವಾಗಿತ್ತು ಎಂದು ನ್ಯಾಯಾಲಯವು ಹೇಳಿದೆ.

ಎಲ್ಲ ವಿಚಾರಣೆಗಳು ಖುಲಾಸೆಗಳಲ್ಲಿ ಅಂತ್ಯಗೊಂಡಿದ್ದರಿಂದ ತಮ್ಮನ್ನು ಸಂಪೂರ್ಣವಾಗಿ ಕಡೆಗಣಿಸಲಾಗಿದೆ ಎಂದು 1984ರ ಸಿಖ್ ವಿರೋಧಿ ದಂಗೆಗಳ ಸಂತ್ರಸ್ತರು ಭಾವಿಸಲು 2006ವರೆಗೂ ಎಲ್ಲ ಕಾರಣಗಳೂ ಇದ್ದವು ಎಂದು ಹೇಳಿರುವ ದಿಲ್ಲಿ ಉಚ್ಚ ನ್ಯಾಯಾಲಯವು,2002ರ ಗುಜರಾತ್ ದಂಗೆಗಳ ಪ್ರಕರಣಗಳಲ್ಲಿ ಸರ್ವೋಚ್ಚ ನ್ಯಾಯಾಲಯವು ವಿಶೇಷ ತನಿಖಾ ತಂಡ(ಸಿಟ್)ವನ್ನು ರಚಿಸಿದ್ದರೆ,1984ರ ದಂಗೆಗಳ ಕುರಿತು ತನಿಖೆಯನ್ನು ನಡೆಸಲು 2007ರವರೆಗೂ ಸಿಟ್ ರಚನೆಯಾಗಿರಲಿಲ್ಲ ಎಂದು ಬೆಟ್ಟು ಮಾಡಿದೆ.