ಈ ವಿಮಾನಯಾನ ಸಂಸ್ಥೆಯ 5 ಪೈಲಟ್ ಗಳು 10ನೆ ತರಗತಿ ಉತ್ತೀರ್ಣರಾಗಿಲ್ಲ !
ಲಾಹೋರ್, ಡಿ.30: ಪಾಕಿಸ್ತಾನ್ ಇಂಟರ್ನ್ಯಾಶನಲ್ ಏರ್ಲೈನ್ಸ್ (ಪಿಐಎ)ನ ಐದು ಮಂದಿ ಪೈಲಟ್ಗಳು 10ನೇ ತರಗತಿಯನ್ನು ಕೂಡಾ ಪಾಸ್ ಮಾಡಿಲ್ಲವೆಂದು, ಪಾಕಿಸ್ತಾನದ ಈ ಸರಕಾರಿ ಸ್ವಾಮ್ಯದ ವಾಯುಯಾನ ಸಂಸ್ಥೆಯು ಶನಿವಾರ ಸುಪ್ರೀಂಕೋರ್ಟ್ಗೆ ತಿಳಿಸಿದೆ. ಏಳು ಮಂದಿ ಪೈಲಟ್ಗಳ ಶೈಕ್ಷಣಿಕ ಅರ್ಹತೆಯು ನಕಲಿಯೆಂದು ಪತ್ತೆಯಾದ ಹಿನ್ನೆಲೆಯಲ್ಲಿ ಅದು ನ್ಯಾಯಾಲಯದ ಮುಂದೆ ಈ ಹೇಳಿಕೆ ನೀಡಿದೆ.
ಮೆಟ್ರಿಕ್ ಪಾಸ್ ಮಾಡಿರದ ವ್ಯಕ್ತಿ ಬಸ್ ಕೂಡಾ ಚಲಾಯಿಸಲು ಸಾಧ್ಯವಿಲ್ಲ. ಹೀಗಿರುವ ಈ ಅವಿದ್ಯಾವಂತ ಮಂದಿ ವಿಮಾನಗಳನ್ನು ಹಾರಿಸುವ ಮೂಲಕ ಜನರ ಪ್ರಾಣವನ್ನು ಅಪಾಯಕ್ಕೆ ದೂಡಿದ್ದಾರೆ ಎಂದು ಈ ಸಂದರ್ಭ ಪ್ರಕರಣದ ಆಲಿಕೆ ನಡೆಸಿದ ಮುಖ್ಯ ನ್ಯಾಯಮೂರ್ತಿ ಅಹ್ಸಾನ್ ಅವರು ಆತಂಕ ವ್ಯಕ್ತಪಡಿಸಿದ್ದಾರೆಂದು ಡಾನ್ ಪತ್ರಿಕೆ ವರದಿ ಮಾಡಿದೆ.
ತಮ್ಮ ಅಧಿಕೃತ ದಾಖಲೆಗಳನ್ನು ಸಲ್ಲಿಸದೆಯೇ ಉದ್ಯೋಗದಲ್ಲಿದ್ದ ಪಿಐಎನ ಕನಿಷ್ಠ 50 ಮಂದಿ ಉದ್ಯೋಗಿಗಳನ್ನು ಅಮಾನತಿನಲ್ಲಿರಿಸಲಾಗಿದೆಯೆಂದು, ಪಾಕ್ ಸುಪ್ರೀಂಕೋರ್ಟ್ನ ತ್ರಿಸದಸ್ಯ ಪೀಠಕ್ಕೆ ವಾಯುಯಾನ ಸಂಸ್ಥೆಯು ತಿಳಿಸಿರುವುದಾಗಿ ಪತ್ರಿಕಾ ವರದಿ ಹೇಳಿದೆ.
ಪಿಐಎ ವಾಯುಯಾನಸಂಸ್ಥೆಯ ಪೈಲಟ್ ಹಾಗೂ ಇತರ ಸಿಬ್ಬಂದಿಯ ಪದವಿಗಳ ದೃಢೀಕರಣಪತ್ರಕ್ಕೆ ಸಂಬಂಧಿಸಿದ ವಿಷಯವನ್ನು ನ್ಯಾಯಪೀಠವು ವಿಚಾರಣೆಗೆ ಕೈಗೆತ್ತಿಕೊಂಡಿತ್ತು. ಆದರೆ ಈ ಪದವಿಗಳ ದೃಢೀಕರಣ ಪ್ರಕ್ರಿಯೆಯನ್ನು ನಡೆಸಲು ಶೈಕ್ಷಣಿಕ ಮಂಡಳಿಗಳು ಹಾಗೂ ವಿಶ್ವವಿದ್ಯಾನಿಲಯಗಳು ಸಹಕರಿಸುತ್ತಿಲ್ಲವೆಂದು ಪಾಕ್ ನಾಗರಿಕ ವಾಯು ಯಾನ ಪ್ರಾಧಿಕಾರ (ಸಿಎಎ) ತಿಳಿಸಿದೆ. ಪಿಐಎನ 4321 ಉದ್ಯೋಗಿಗಳ ಪ್ರಕರಣಗಳನ್ನು ದೃಢೀಕರಿಸಲಾಗಿದ್ದರೆ, ಉಳಿದ 402 ಪ್ರಕರಣಗಳು ಇನ್ನೂ ವಿಚಾರಣೆಗೆ ಬಾಕಿಯುಳಿದಿವೆ.
ನೇಮಕಗೊಂಡ ಎಲ್ಲಾ 498 ಪೈಲಟ್ಗಳು ಹಾಗೂ ಅವರ ಪರವಾನಗಿ ಪರೀಕ್ಷೆಯ ಫಲಿತಾಂಶದ ವಿವರಗಳನ್ನು ತನಗೆ ಸಲ್ಲಿಸುವಂತೆ ನ್ಯಾಯಮೂರ್ತಿ ನಿಸಾರ್, ಪಿಐಎಗೆ ತಿಳಿಸಿದರು.
ಪಿಐಎನಿಂದ 50 ಉದ್ಯೋಗಿಗಳ ವಜಾ
ಪಾಕಿಸ್ತಾನದ ರಾಷ್ಟ್ರೀಯ ವಾಯುಯಾನ ಸಂಸ್ಥೆ ಪಿಐಎ ಮೂವರು ಪೈಲಟ್ಗಳು ಸೇರಿದಂತೆ 50 ಮಂದಿ ಉದ್ಯೋಗಿಗಳ ನೇಮಕಾತಿಯ ಗುತ್ತಿಗೆ ಒಪ್ಪಂದಗಳನ್ನು ರದ್ದುಪಡಿಸಿದೆ. ಈ ಉದ್ಯೋಗಿಗಳು ನಕಲಿ ಪದವಿ ಪ್ರಮಾಣಪತ್ರಗಳನ್ನು ಹೊಂದಿರುವ ಹಿನ್ನೆಲೆಯಲ್ಲಿ ಅವರನ್ನು ಸೇವೆಯಿಂದ ವಜಾಗೊಳಿಸಲಾಗಿದೆಯೆಂದು ಅದು ಹೇಳಿದೆ.
ನಕಲಿ ಪದವಿ ಪ್ರಮಾಣ ಪತ್ರಗಳನ್ನು ಹೊಂದಿರುವ ಪೈಲಟ್ಗಳು ಹಾಗೂ ಇತರ ಕ್ಯಾಬಿನ್ ಉದ್ಯೋಗಿಗಳ ವಿರುದ್ಧ ಪಾಕಿಸ್ತಾನದ ಸುಪ್ರೀಂಕೋರ್ಟ್ನಲ್ಲಿ ವಿಚಾರಣೆ ನಡೆಯುತ್ತಿರುವಾಗಲೇ ಪಿಐಎ ಈ ಆದೇಶ ಹೊರಡಿಸಿದೆ.
