'ಫೋನ್ ಕರೆಗಳಲ್ಲಿ ಸಮಸ್ಯೆಗಳು ಪುನರಾವರ್ತನೆಯಾಗದಂತೆ ನೋಡಿಕೊಳ್ಳಬೇಕಿದೆ'

ಮಂಗಳೂರು, ಜ.4: ಪೊಲೀಸ್ ಇಲಾಖೆ ಮತ್ತು ಜನಸಾಮಾನ್ಯರ ಮಧ್ಯೆ ಸಂವಹನವಾಗಿರುವ ಪೊಲೀಸ್ ಫೋನ್ ಇನ್ ಕಾರ್ಯಕ್ರಮವು ಅತ್ಯಂತ ಪರಿಣಾಮಕಾರಿಯಾಗಿದೆ ಎಂಬುದಕ್ಕೆ ಜನರ ಸ್ಪಂದನೆಯೇ ಸಾಕ್ಷಿಯಾಗಿದೆ. ಆದರೆ 100ನೆ ಫೋನ್ ಇನ್ ಕಾರ್ಯಕ್ರಮದಲ್ಲೂ ಕೆಲವು ಸಮಸ್ಯೆಗಳು ಪುನರಾವರ್ತನೆಯಾಗುತ್ತಿರುವುದು ಶೋಭೆಯಲ್ಲ. ಹಾಗಾಗಿ ಸಮಸ್ಯೆಗಳನ್ನು ಹೊತ್ತುಕೊಂಡು ಬರುವ ಫೋನ್ ಕರೆಗಳಲ್ಲಿ ಸಮಸ್ಯೆಗಳು ಪುನರಾವರ್ತನೆ ಯಾಗದಂತೆ ನೋಡಿಕೊಳ್ಳಬೇಕಿದೆ ಎಂದು ಪೊಲೀಸ್ ಆಯುಕ್ತ ಟಿ.ಅರ್.ಸುರೇಶ್ ಹೇಳಿದರು.

100ನೆ ವಿಶೇಷ ಪೊಲೀಸ್ ಫೋನ್ ಇನ್ ಕಾರ್ಯಕ್ರಮದ ಪ್ರಯುಕ್ತ ಶುಕ್ರವಾರ ಪೊಲೀಸ್ ಆಯುಕ್ತಾಲಯದಲ್ಲಿ ಪೊಲೀಸ್ ಇಲಾಖೆ, ಮನಪಾ, ಸಾರಿಗೆ, ಕೆಎಸ್ಸಾರ್ಟಿಸಿ ಹಾಗೂ ಪತ್ರಕರ್ತರ ಸಮ್ಮುಖ ನಡೆದ ಸಂವಾದ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಅವರು ಮಾತನಾಡಿದರು.

ಯಾವುದೇ ಸಮಸ್ಯೆಗೆ ಪರಿಹಾರ ಇಲ್ಲ ಎಂದಲ್ಲ. ಅದನ್ನು ಪರಿಹರಿಸುವ ಮನಸ್ಸು ಬೇಕಷ್ಟೆ. ಶಾಶ್ವತ ಪರಿಹಾರ ಕಂಡುಕೊಂಡರಷ್ಟೇ ಸಮಸ್ಯೆಗಳು ಪುನರಾವರ್ತನೆಯಾಗದಂತೆ ತಡೆಗಟ್ಟಬಹುದು. ಬಸ್ಸಿನಲ್ಲಿ ಕಂಡೆಕ್ಟರ್ ಟಿಕೆಟ್ ಕೊಡುತ್ತಿಲ್ಲ, ಉಡಾಫೆಯಿಂದ ವರ್ತಿಸುತ್ತಾರೆ, ಮಹಿಳೆಯರ, ವಿಕಲಚೇತನರ, ಹಿರಿಯ ನಾಗರಿಕರ ಸೀಟುಗಳನ್ನು ಇತರರು ಆಕ್ರಮಿಸಿಕೊಂಡಿರುತ್ತಾರೆ, ರವಿವಾರದಂತೆ ಬಸ್‌ಗಳ ಟ್ರಿಪ್ ಕಟ್ ಮಾಡುತ್ತಾರೆ ಇತ್ಯಾದಿ ದೂರುಗಳು ಬಾರದ ಫೋನ್ ಇನ್ ಕಾರ್ಯಕ್ರಮವೇ ಇಲ್ಲ. ಎಲ್ಲಾ ಕಾರ್ಯಕ್ರಮಗಳಲ್ಲೂ ಕೂಡ ಇಂತಹ ದೂರುಗಳು ಬಂದಾಗ ಮುಜುಗರ ಆಗುತ್ತದೆ. ಇಲಾಖೆ ಏನೂ ಮಾಡಿಲ್ಲವೇ ಎಂಬ ಭಾವನೆ ಬರುತ್ತದೆ. ಹಾಗಾಗಿ ಇವುಗಳನ್ನು ಕಾನೂನು ವ್ಯಾಪ್ತಿಯಲ್ಲಿ ಪರಿಹರಿಸುವ ಬದಲು ಜಾಗೃತಿ ಮೂಡಿಸುವ ಅಗತ್ಯವಿದೆ ಎಂದು ಟಿ.ಆರ್.ಸುರೇಶ್ ನುಡಿದರು.

ನಗರದ ಫುಟ್‌ಪಾತ್ ಅವ್ಯವಸ್ಥೆ, ಪಾರ್ಕಿಂಗ್ ಸಮಸ್ಯೆಗಳು ಸಂಚಾರ ಸುವ್ಯವಸ್ಥೆಗೆ ದೊಡ್ಡಮಟ್ಟದ ಸಮಸ್ಯೆಯಾಗಿ ಕಾಡುತ್ತಿದ್ದು, ಇದಕ್ಕೆ ಪರಿಹಾರ ಕಲ್ಪಿಸುವ ನಿಟ್ಟಿನಲ್ಲಿ ನಗರ ಪೊಲೀಸ್ ಕಮಿಷನರ್-ಮಹಾನಗರಪಾಲಿಕೆ ಆಯುಕ್ತರು ಜಂಟಿಯಾಗಿ ಕಾರ್ಯಾಚರಣೆ ನಡೆಸಲು ಕಾರ್ಯಕ್ರಮದಲ್ಲಿ ತೀರ್ಮಾನಿಸಲಾಯಿತು.

ಸಂವಾದ ಕಾರ್ಯಕ್ರಮದಲ್ಲಿ ಪತ್ರಕರ್ತ ಅನಿಲ್ ಶಾಸಿ ಮಾತನಾಡಿ, ಫೋನ್ ಇನ್ ಕಾರ್ಯಕ್ರಮ ಯಶಸ್ವಿಯಾಗಿ ನಡೆದುಕೊಂಡು ಬಂದಿದೆಯಾದರೂ ಮೀನಿನ ಲಾರಿನಲ್ಲಿ ನೀರು ರಸ್ತೆಗೆ ಬಿಡುವ ಸಮಸ್ಯೆ ಸೇರಿದಂತೆ ಕೆಲವು ಸಮಯಗಳು ಇನ್ನೂ ಜೀವಂತವಾಗಿ ಉಳಿದಿದೆ. ಇದು ಮಾತ್ರವಲ್ಲದೆ ಅನ್ಯ ರಾಜ್ಯಗಳಲ್ಲಿರುವಂತೆ ಮೀನಿನ ತ್ಯಾಜ್ಯ ನೀರು ಬಿಡಲು ಮನಪಾದಿಂದಲೇ ಪರ್ಯಾಯ ವ್ಯವಸ್ಥೆ ಮಾಡಬೇಕು ಎಂದು ಆಗ್ರಹಿಸಿದರು.

ಇದಕ್ಕೆ ಮಂಗಳೂರು ನಗರ ಪೊಲೀಸ್ ಕಮಿಷನರ್ ಟಿ.ಆರ್. ಸುರೇಶ್ ಪ್ರತಿಕ್ರಿಯಿಸಿ ಮೀನಿನ ಲಾರಿಗಳ ಬಗ್ಗೆ ಪದೇ ಪದೇ ದೂರುಗಳು ಬರುತ್ತಿದ್ದು, ಇದನ್ನು ಬಗೆಹರಿಸುವ ನಿಟ್ಟಿನಲ್ಲಿ ಮುಂದಿನ ದಿನಗಳಲ್ಲಿ ತಂಡವಾಗಿ ಕಾರ್ಯಾಚರಿಸಲಾಗುವುದು ಎಂದರು.

ಪತ್ರಕರ್ತ ವಿಜಯ್ ಕೋಟ್ಯಾನ್ ಪಡು ಸಂವಾದದಲ್ಲಿ ಮಾತನಾಡಿ, ಫೋನ್ ಇನ್ ಕಾರ್ಯಕ್ರಮದಲ್ಲಿ ಪದೇ ಪದೇ ಬರುತ್ತಿರುವ ಬೀದಿ ವ್ಯಾಪಾರಿಗಳ ಸಮಸ್ಯೆ, ವಾಣಿಜ್ಯ ಕಟ್ಟಡ ಪಾರ್ಕಿಂಗ್ ಅತಿಕ್ರಮಣ, ಬಸ್ ಟಿಕೇಟ್ ಸಮಸ್ಯೆ ಬಗ್ಗೆ ಇನ್ನೂ ಪರಿಹಾರವಾಗಿಲ್ಲ ಎಂದರು.

ಮನಪಾ ಆಯುಕ್ತ ಟಿ.ಆರ್.ಸುರೇಶ್ ಪ್ರತಿಕ್ರಿಯಿಸಿ ಬೀದಿ ವ್ಯಾಪಾರಿಗಳಿಗೆ ಈಗಾಗಲೇ ಗುರುತು ಪತ್ರ ನೀಡಿ ನಗರದ ಮಧ್ಯಭಾಗದಲ್ಲಿಯೇ ಪ್ರತ್ಯೇಕ ಜಾಗ ಗೊತ್ತುಪಡಿಸಲಾಗಿದ್ದರೂ ಅಲ್ಲಿಗೆ ಅವರು ತೆರಳುತ್ತಿಲ್ಲ. ನಗರ ಸಂಚಾರಕ್ಕೆ ಅಡಚಣೆಯಾಗುವ ಬೀದಿ ವ್ಯಾಪಾರಿಗಳನ್ನು ತೆರವು ಮಾಡುವುದು ಅನಿವಾರ್ಯವಾಗಿದೆ. ಈ ನಿಟ್ಟಿಲ್ಲಿ ಮುಂದಿನ ದಿನಗಳಲ್ಲಿ ಪೊಲೀಸ್ ಮತ್ತು ಮನಪಾ ಆಡಳಿತ ನಿಗದಿತ ಜಾಗಕ್ಕೆ ತೆರಳಲು ಸಲಹೆ ನೀಡುತ್ತೇವೆ. ಅದಕ್ಕೂ ಸ್ಪಂದಿಸದಿದಲ್ಲಿ ಎಲ್ಲರನ್ನು ತೆರವು ಮಾಡಲು ಕಠಿಣ ಕ್ರಮಕೈಗೊಳ್ಳಲಿದ್ದೇವೆ ಎಂದರು.

ನಗರದ ಕೆಲವೊಂದು ವಾಣಿಜ್ಯ ಸಂಕೀರ್ಣಗಳಲ್ಲಿ ಪಾರ್ಕಿಂಗ್ ಜಾಗವು ವಾಣಿಜ್ಯ ಉದ್ದೇಶಕ್ಕೆ ಬಳಕೆ ಮಾಡುವ ಬಗ್ಗೆ ಪ್ರತಿಕ್ರಿಯಿಸಿದ ಮುಹಮ್ಮದ್ ನಝೀರ್ 2011ರ ಬಳಿಕ ನಿರ್ಮಾಣವಾದ ಕಟ್ಟಡಗಳಲ್ಲಿ ಈ ರೀತಿಯ ಅತಿಕ್ರಮಣವಾಗದಂತೆ ಮನಪಾ ಎಚ್ಚರವಹಿಸಿದೆ ಮತ್ತು ಮುಂದಿನ ದಿನಗಳಲ್ಲಿ ಇದನ್ನು ಕಾಯ್ದುಕೊಳ್ಳಲಾಗುವುದು ಎಂದರು.

ಪತ್ರಕರ್ತ ಆತ್ಮಭೂಷಣ್ ಮಾತನಾಡಿ, ಕೆಲವು ಸಿಟಿ ಮತ್ತು ಸರ್ವೀಸ್ ಬಸ್‌ಗಳು ಟ್ರಾಫಿಕ್ ದಟ್ಟಣೆ ಸಂದರ್ಭ ಕೆಲವು ಕಡೆ ರೂಟ್ ಬದಲಿಸಿ ಸಂಚರಿಸುತ್ತದೆ. ಇದರಿಂದ ಪ್ರಯಾಣಿಕರಿಗೆ ತೊಂದರೆಯಾಗುತ್ತದೆ ಎಂದರು.

ಪತ್ರಕರ್ತ ಅನ್ಸಾರ್ ಇನೋಳಿ ಮಾತನಾಡಿ ತಲಪಾಡಿಯಲ್ಲಿ ನಿಲ್ಲಿಸಲಾದ ಗ್ಯಾಸ್, ಇಂಧನ ಟ್ಯಾಂಕರ್‌ನಡಿ ಗ್ಯಾಸ್‌ಸ್ಟೌ ಬಳಸಿ ಅಡುಗೆ ಮಾಡುವ ಬಗ್ಗೆ ಗಮನಸೆಳೆದರು.

ಪತ್ರಕರ್ತ ಜಿತೇಂದ್ರ ಕುಂದೇಶ್ವರ ಮಾತನಾಡಿ, ಪೊಲೀಸ್ ಇಲಾಖೆ ಬಗ್ಗೆ ಕೆಲವೊಂದು ವಿಚಾರದಲ್ಲಿ ತಪ್ಪು ಮಾಹಿತಿ ರವಾನೆಯಾಗುತ್ತಿದ್ದು, ಅದನ್ನು ಹೋಗಲಾಡಿಸಬೇಕು, ಸಿಬ್ಬಂದಿ ಯಾವುದೇ ಅವ್ಯವಹಾರದಲ್ಲಿ ಸಿಕ್ಕಿಬಿದ್ದಲ್ಲಿ ಆ ತನಿಖೆಯ ಪ್ರಗತಿ ಬಗ್ಗೆ ಮಾಹಿತಿ ನೀಡಬೇಕು ಎಂದರು. ಇದಕ್ಕೆ ಕಮಿಷನರ್ ಸಹಮತ ವ್ಯಕ್ತಪಡಿಸಿದರು.

ಈ ಸಂದರ್ಭ ಡಿಸಿಪಿಗಳಾದ ಹನುಮಂತರಾಯ, ಉಮಾಪ್ರಶಾಂತ್, ಕೆಎಸ್ಸಾರ್ಟಿಸಿ ಮಂಗಳೂರು ವಿಭಾಗೀಯ ಅಧಿಕಾರಿ ದೀಪಕ್ ಕುಮಾರ್, ಆರ್‌ಟಿಒ ಜಾನ್ ಮಿಸ್ಕಿತ್, ಪತ್ರಕರ್ತರ ಸಂಘದ ಅಧ್ಯಕ್ಷ ಶ್ರೀನಿವಾಸ ನಾಯಕ್ ಇಂದಾಜೆ, ಕೆನರಾ ಬಸ್ ಮಾಲಕರ ಸಂಘದ ಅಧ್ಯಕ್ಷ ರಾಜವರ್ಮ ಬಲ್ಲಾಳ್, ದ.ಕ.ಜಿಲ್ಲಾ ಬಸ್ ಮಾಲಕರ ಸಂಘದ ಅಧ್ಯಕ್ಷ ದಿಲ್‌ರಾಜ್ ಆಳ್ವ ಉಪಸ್ಥಿತರಿದ್ದರು.