ಲಾಲ್‌ಬಾಗ್‌ನಲ್ಲಿ ಫಲಪುಷ್ಪ ಪ್ರದರ್ಶನಕ್ಕೆ ಕುಮಾರಸ್ವಾಮಿ ಚಾಲನೆ: ಗಮನ ಸೆಳೆಯುತ್ತಿರುವ ಮಹಾತ್ಮ ಗಾಂಧೀಜಿ

ಬೆಂಗಳೂರು, ಜ.18: ಗಣರಾಜ್ಯೋತ್ಸವದ ಅಂಗವಾಗಿ ನಗರದ ಲಾಲ್‌ಬಾಗ್‌ನಲ್ಲಿ ಹಮ್ಮಿಕೊಂಡಿರುವ ಫಲಪುಷ್ಪ ಪ್ರದರ್ಶನವನ್ನು ಮಹಾತ್ಮ ಗಾಂಧೀಜಿ ಅವರ 150ನೇ ಜನ್ಮ ದಿನಾಚರಣೆಯ ಸ್ಮರಣಾರ್ಥ ಅವರಿಗೆ ಅರ್ಪಿಸಲಾಗಿದ್ದು, ನೋಡುಗರನ್ನು ಸೆಳೆಯುತ್ತಿದೆ.

ಕೆಂಪು-ಶ್ವೇತವರ್ಣದ ಸಬರಮತಿ ಆಶ್ರಮ, ಅದರ ಮುಂದೆ ಧ್ಯಾನಸ್ಥರಾಗಿ ಕೂತ ಬಾಪು, ದಂಡಿ ಸತ್ಯಾಗ್ರಹ, ಬಾಪು ಮನೆ, ರಾಜಘಾಟ್ ಸೇರಿದಂತೆ ಗಾಂಧಿಯ ಹುಟ್ಟಿನಿಂದ ಅಂತ್ಯದವರೆಗಿನ ವಿವಿಧ ಚಿತ್ರಣಗಳನ್ನು ಇಲ್ಲಿನ ಗಾಜಿನ ಮನೆಯಲ್ಲಿ ಹೂಗಳ ಮೂಲಕ ಅರಳಿಸಲಾಗಿದ್ದು, ಶುಕ್ರವಾರ ಮುಖ್ಯಮಂತ್ರಿ ಕುಮಾರಸ್ವಾಮಿ ಅದಕ್ಕೆ ಚಾಲನೆ ನೀಡಿ, ಪುಷ್ಪಪ್ರದರ್ಶನ ಕಂಡು ಆಶ್ಚರ್ಯ ವ್ಯಕ್ತಪಡಿಸಿದರು.

ರಾಜ್ಯ ತೋಟಗಾರಿಕೆ ಇಲಾಖೆ ಹಾಗೂ ಮೈಸೂರು ಉದ್ಯಾನ ಕಲಾಸಂಘಗಳ ಸಹಯೋಗದೊಂದಿಗೆ ಲಾಲ್‌ಬಾಗ್‌ನಲ್ಲಿ 10 ದಿನಗಳ ಲಪುಷ್ಪ ಪ್ರದರ್ಶನ ಏರ್ಪಡಿಸಲಾಗಿದೆ. ಇದನ್ನು ಉದ್ಘಾಟಿಸಲು ಆಗಮಿಸಿದ್ದ ಮುಖ್ಯಮಂತ್ರಿಗಳಿಗೂ ಪುಷ್ಪ ಸೊಬಗು ಬೆರಗು ಮೂಡಿಸಿತು.

ಉದ್ಘಾಟನೆ ಬಳಿಕ ಮಾತನಾಡಿದ ಸಿಎಂ ಎಚ್.ಡಿ. ಕುಮಾರಸ್ವಾಮಿ, ಮಹಾತ್ಮ ಗಾಂಧೀಜಿಯ ಆದರ್ಶಗಳನ್ನು ನೆನಪಿಸುವ ಫಲಪುಷ್ಪ ಪ್ರದರ್ಶನ ಈ ಬಾರಿ ವಿಶೇಷವಾಗಿದೆ. ಸಾರ್ವಜನಿಕರು ಮುಖ್ಯವಾಗಿ ವಿದ್ಯಾರ್ಥಿಗಳು ಇಂತಹ ಪ್ರದರ್ಶನಗಳನ್ನು ವೀಕ್ಷಿಸಬೇಕು. ಗಾಂಧೀಜಿಯವರ ಜೀವನ ಚರಿತ್ರೆ, ನಡವಳಿಕೆ, ಸಿದ್ಧಾಂತಗಳನ್ನು ಬಿಂಬಿಸುವ ಪ್ರದರ್ಶನ ಇದಾಗಿದ್ದು, ತೋಟಗಾರಿಕೆ ಇಲಾಖೆ ಅಭಿನಂದನಾರ್ಹವಾದುದು ಎಂದು ಶ್ಲಾಘಿಸಿದರು.

ಗಾಜಿನ ಮನೆಯ ಮಧ್ಯಭಾಗದಲ್ಲಿ ಪ್ರದರ್ಶನದ ಪ್ರಮುಖ ಆಕರ್ಷಣೆಯಾಗಿ ಪುಷ್ಪಗಳಿಂದ ಸಬರಮತಿ ಆಶ್ರಮ ಮೈದಳೆದಿದೆ. 35 ಅಡಿ ಉದ್ದ, 20 ಅಡಿ ಅಗಿಲ ಹಾಗೂ 16 ಅಡಿ ಎತ್ತರದ ಆಶ್ರಮದ ಪ್ರತಿರೂಪವನ್ನು ನಿರ್ಮಿಸಿದ್ದಾರೆ. ಇದಕ್ಕೆ 1.2 ಲಕ್ಷದಂತೆ 2 ಬಾರಿಗೆ 2.4 ಲಕ್ಷ ಕೆಂಪು ಗುಲಾಬಿ ಪುಷ್ಪ, ಒಂದು ಬಾರಿಗೆ 1.6 ಲಕ್ಷ ಬಿಳಿ ಸೇವಂತಿಗೆ ಹೂವುಗಳಂತೆ 2 ಬಾರಿಗೆ 3.2 ಲಕ್ಷ ಶ್ವೇತ ವರ್ಣದ ಸೇವಂತಿಗೆ ಹೂಗಳು ಹಾಗೂ ಒಂದು ಬಾರಿಗೆ 40 ಸಾವಿರದಂತೆ 2 ಬಾರಿಗೆ 80 ಸಾವಿರ ಕಿತ್ತಳೆ ಬಣ್ಣದ ಗುಲಾಬಿ ಹೂವುಗಳನ್ನು ಬಳಸಲಾಗುವುದು. ಒಟ್ಟಾರೆ 6.4 ಲಕ್ಷ ಹೂವುಗಳಿಂದ ಸಬರಮತಿ ಆಶ್ರಮ ರೂಪುಗೊಂಡಿದೆ.

ಕಾರ್ಯಕ್ರಮದಲ್ಲಿ ಸಚಿವ ಎಂ.ಸಿ. ಮನಗೂಳಿ, ಮೇಯರ್ ಗಂಗಾಂಬಿಕೆ ಮಲ್ಲಿಕಾರ್ಜುನ್, ವಿಧಾನ ಪರಿಷತ್ ಸದಸ್ಯ ಟಿ.ಎ. ಶರವಣ, ತೋಟಗಾರಿಕೆ ಇಲಾಖೆ ನಿರ್ದೇಶಕ ಜಂಟಿ ನಿರ್ದೇಶಕ ಡಾ. ಎಂ. ಜಗದೀಶ್ ಸೇರಿದಂತೆ ಹಲವರು ಉಪಸ್ಥಿತರಿದ್ದರು.

ಜ.27ರವರೆಗೆ ಪ್ರದರ್ಶನ

ಗಣರಾಜ್ಯೋತ್ಸವದ ಅಂಗವಾಗಿ ಶುಕ್ರವಾರದಿಂದ ಆರಂಭವಾಗಿರುವ ಫಲಪುಷ್ಪ ಪ್ರದರ್ಶನ ಜ.27 ರವರೆಗೂ ನಡೆಯಲಿದ್ದು, ಬೆಳಗ್ಗೆ 9 ರಿಂದ ಸಂಜೆ 6.30 ರವರೆಗೂ ತೆರೆಯಲಾಗಿರುತ್ತದೆ. ಪ್ರವೇಶ ಶುಲ್ಕ 70 ರೂ., ಮಕ್ಕಳಿಗೆ 20 ರೂ. ನಿಗದಿ ಮಾಡಲಾಗಿದೆ.

ಸಿದ್ಧಗಂಗಾ ಶ್ರೀಗೆ ಭಾರತರತ್ನ ನೀಡಬೇಕು

ತುಮಕೂರಿನ ಸಿದ್ದಗಂಗಾ ಮಠದ ನಡೆದಾಡುವ ದೇವರು ಎಂದೇ ಖ್ಯಾತರಾದ ಸಿದ್ಧಗಂಗಾ ಶ್ರೀಗೆ ‘ಭಾರತ ರತ್ನ’ ನೀಡಬೇಕು ಎಂದು ಪ್ರಧಾನಿ ನರೇಂದ್ರಮೋದಿ ಮತ್ತು ರಾಷ್ಟ್ರಪತಿಗಳನ್ನು ಖುದ್ದು ಭೇಟಿ ನೀಡಿ ಮನವಿ ಸಲ್ಲಿಸುತ್ತೇನೆ. ಸಿದ್ದಗಂಗಾ ಶ್ರೀಗಳಿಗೆ ಭಾರತ ರತ್ನ ನೀಡಬೇಕು ಎಂದು 2006ರಲ್ಲಿ ಅಂದಿನ ರಾಷ್ಟ್ರಪತಿಗಳಾದ ಎ.ಪಿ.ಜೆ.ಅಬ್ದುಲ್ ಕಲಾಂ ಅವರಿಗೆ ಮನವಿ ಸಲ್ಲಿಸಿದ್ದೆ. ಅದೇ ರೀತಿಯಲ್ಲಿ ಈಗಲೇ ಮನವಿ ಮಾಡಲಾಗುವುದು.

-ಎಚ್.ಡಿ.ಕುಮಾರಸ್ವಾಮಿ, ಮುಖ್ಯಮಂತ್ರಿ

ಗಮನ ಸೆಳೆಯುತ್ತಿರುವ ಜೀವವುಳ್ಳ ಗಾಂಧಿ

ಲಾಲ್‌ಬಾಗ್‌ನ ಫಲಪುಷ್ಪ ಪ್ರದರ್ಶನದ ಎದುರು ಗಾಂಧಿಯನ್ನೇ ಹೋಲುತ್ತಿರುವಂತೆ ವೇಮಗಲ್‌ನ ಸೋಮಶೇಖರ್ ಎಂಬುವವರು ಇಲ್ಲಿನ ಗಾಜಿನ ಮನೆಯಲ್ಲಿ ನಿರ್ಮಿಸಿರುವ ಸಬರಮತಿ ಆಶ್ರಮದ ಮುಂದೆ ಮರದ ಕುಟೀರದಲ್ಲಿ ಕುಳಿತಿದ್ದಾರೆ. 75 ವರ್ಷದವರಾದ ಅವರು, ಗಾಂಧಿಯಂತೆ ಕನ್ನಡಕ ಧರಿಸಿದ್ದು, ಬಿಳಿ ಪಂಚೆ, ಶಾಲು ಹೊದ್ದು, ಕೈಯಲ್ಲೊಂದು ಕೋಲು ಹಿಡಿದಿದ್ದಾರೆ. ಅವರು ಎಲ್ಲರ ಗಮನ ಸೆಳೆಯುತ್ತಿದ್ದು, ಅವರ ಜತೆಗೆ ನಿಂತು ಸೆಲ್ಫಿ ಕ್ಲಿಕ್ಕಿಸಿಕೊಳ್ಳುತ್ತಿದ್ದ ದೃಶ್ಯ ಕಂಡು ಬಂತು.