ಬೆಂಗಳೂರು: ಪೆರಿಫೆರಲ್ ರಿಂಗ್ ರಸ್ತೆ ಜಾಗತಿಕ ಟೆಂಡರ್ ಮಾರ್ಚ್ಗೆ ಮುಂದೂಡಿಕೆ
ಬೆಂಗಳೂರು, ಫೆ.6 : ನಗರದ ಪೆರಿಫೆರಲ್ ರಿಂಗ್ ರಸ್ತೆ(ಪಿಆರ್ಆರ್) ನಿರ್ಮಾಣಕ್ಕೆ ಸಂಬಂಧಿಸಿದ ಜಾಗತಿಕ ಟೆಂಡರ್ ಪ್ರಕ್ರಿಯೆ ಮರು ಸರ್ವೆಯು ವಿಳಂಬವಾಗಿದ್ದು ಮಾರ್ಚ್ಗೆ ಮುಂದೂಡಿಕೆಯಾಗಿದೆ.
ಹಲವಾರು ವರ್ಷಗಳಿಂದ ಈ ರಿಂಗ್ ರೋಡ್ ಯೋಜನೆ ನಿರ್ಮಾಣಕ್ಕೆ ಹಲವಾರು ಅಡೆ ತಡೆಗಳು ಎದುರಾಗಿದ್ದವು. ಆದರೆ, ಕಳೆದ ವರ್ಷದಲ್ಲಿ ಬಹುತೇಕ ಅಡ್ಡಿಗಳೆಲ್ಲವೂ ನಿವಾರಣೆಗೊಂಡಿದ್ದವು. ಅಲ್ಲದೆ, ಸರಕಾರದಿಂದಲೇ ಅನುದಾನ ನೀಡುವ ಭರವಸೆ ನೀಡಿದ್ದರಿಂದ 2019 ರ ಫೆಬ್ರವರಿಯ ಮೊದಲ ವಾರದಲ್ಲಿ ಟೆಂಡರ್ ಆಹ್ವಾನಕ್ಕೂ ಸಿದ್ಧತೆ ಮಾಡಿಕೊಳ್ಳುವಂತೆ ಮುಖ್ಯಮಂತ್ರಿ ಸೂಚನೆಯನ್ನೂ ನೀಡಿದ್ದರು. ಆದರೆ, ಮರು ಸರ್ವೆ ವರದಿ ಇನ್ನೂ ಅಂತಿಮವಾಗಿಲ್ಲದಿದ್ದರಿಂದ ಅದನ್ನು ಚಾಲನೆ ಮಾಡಲು ಮತ್ತಷ್ಟು ವಿಳಂಬವಾಗಿದೆ. ವರದಿಯು ಫೆಬ್ರವರಿ ಅಂತ್ಯದೊಳಗೆ ಪೂರ್ಣಗೊಳ್ಳಲಿದ್ದು, ಮಾರ್ಚ್ನಲ್ಲಿ ಟೆಂಡರ್ ಪ್ರಕ್ರಿಯೆ ಆರಂಭವಾಗಲಿದೆ ಎಂದು ಅಂದಾಜಿಸಲಾಗಿದೆ.
ಒಟ್ಟು 65 ಕಿ.ಮೀ. ಉದ್ದದ ರಿಂಗ್ ರೋಡ್ ಮಾರ್ಗದಲ್ಲಿ ಕೆಲವೆಡೆ ಕಟ್ಟಡಗಳನ್ನು ನಿರ್ಮಿಸಲಾಗಿದೆ. ಮಾರ್ಗ ಹಾದು ಹೋಗುವ ಯಲಹಂಕ ಬಳಿಯ ವೆಂಕಟಾಲ, ಹೆಬ್ಬುಗೋಡಿ ಹಾಗೂ ಎಲೆಕ್ಟ್ರಾನಿಕ್ ಸಿಟಿ ಭಾಗದಲ್ಲಿ ಸ್ಥಳೀಯರ ವಿರೋಧದಿಂದ ಪೊಲೀಸ್ ಕಾವಲಿನಲ್ಲಿ ಸರ್ವೆ ನಡೆಸಲಾಗಿದೆ. ಇದು ಸೇರಿದಂತೆ ಮರಗಳ ಎಣಿಕೆ ಹಾಗೂ ಹಾಲಿ ಸ್ಥಿತಿಗತಿ ಕುರಿತು ಮಾಹಿತಿಯನ್ನು ಕಲೆ ಹಾಕಿದ್ದು, ಇದನ್ನಾಧರಿಸಿ ಡಿಪಿಆರ್ ಸಿದ್ಧಗೊಳ್ಳಲಿದೆ ಎಂದು ಮೂಲಗಳು ಹೇಳಿವೆ.
ಬಿಡಿಎ ಪರಿಷ್ಕೃತ ಡಿಪಿಆರ್ ಅನ್ನು ಪರಿಶೀಲಿಸಿದ ಬಳಿಕ ಸರಕಾರಕ್ಕೆ ಕಳುಹಿಸಿ, ಒಪ್ಪಿಗೆ ಪಡೆಯಬೇಕು. ಅನಂತರ ಬೃಹತ್ ಮಟ್ಟದ ಟೆಂಡರ್ ಆಗಿರುವುದರಿಂದ ಸಚಿವ ಸಂಪುಟ ಒಪ್ಪಿಗೆಯೂ ಪಡೆಯಬೇಕು. ಹೀಗಾಗಿ, ನಗರಾಭಿವೃದ್ಧಿ ಇಲಾಖೆಯಿಂದ ಪ್ರಸ್ತಾವನೆ ಸಂಪುಟ ಶಾಖೆಗೆ ರವಾನಿಸಬೇಕಾಗಿದೆ ಎಂದು ಹೇಳಲಾಗುತ್ತಿದೆ.
ಯೋಜನಾ ವೆಚ್ಚದಲ್ಲಿ ಏರಿಕೆ?: 2015ರ ದರ ಪಟ್ಟಿಯಂತೆ ಒಟ್ಟು ವೆಚ್ಚ 11,950 ಕೋಟಿ ರೂ. ಅಂದಾಜಿಸಲಾಗಿತ್ತು. ಕಳೆದ ವರ್ಷ ಸಂಪುಟ ಸಭೆಯ ತೀರ್ಮಾನದ ವೇಳೆ ವೆಚ್ಚವು 17,061 ಕೋಟಿ ರೂ.ಗೆ ಏರಿದೆ. ಈಗ ಪರಿಷ್ಕೃತ ಡಿಪಿಆರ್ ಸಿದ್ಧಗೊಳ್ಳುತ್ತಿದ್ದು, ವೆಚ್ಚದ ಮೊತ್ತ ಮತ್ತಷ್ಟು ಹೆಚ್ಚುವ ಸಾಧ್ಯತೆ ಇದೆ. ನಿಗದಿತ ಅವಧಿಯೊಳಗೆ ಕಾಮಗಾರಿ ಪೂರ್ಣಗೊಳ್ಳದಿದ್ದಲ್ಲಿ ವೆಚ್ಚವು 20 ಸಾವಿರ ಕೋಟಿ ರೂ. ಏರಿದರೂ ಅಚ್ಚರಿ ಪಡಬೇಕಿಲ್ಲ ಎಂಬುದಾಗಿ ತಜ್ಞರು ಅಂದಾಜಿಸಿದ್ದಾರೆ.
