ಇರಾನಿ ಕಪ್: ಶೇಷ ಭಾರತ 330 ರನ್‌ಗೆ ಆಲೌಟ್

ನಾಗ್ಪುರ, ಫೆ.12: ಭಾರತದ ಟೆಸ್ಟ್ ಸ್ಪೆಷಲಿಸ್ಟ್ ಹನುಮ ವಿಹಾರಿ ಅವರ ಆಕರ್ಷಕ ಶತಕ (114)ಹಾಗೂ ಆರಂಭಿಕ ಆಟಗಾರ ಮಾಯಾಂಕ್ ಅಗರ್ವಾಲ್ ಅರ್ಧಶತಕ(95)ದ ಕೊಡುಗೆ ಹೊರತಾಗಿಯೂ ಶೇಷ ಭಾರತ ತಂಡ ರಣಜಿ ಚಾಂಪಿಯನ್ ವಿದರ್ಭ ತಂಡದ ವಿರುದ್ಧ ಬ್ಯಾಟಿಂಗ್ ಕುಸಿತಕ್ಕೆ ಒಳಗಾಗಿದೆ.

ಆರಂಭದಲ್ಲಿ ಉತ್ತಮ ಸ್ಥಿತಿಯಲ್ಲಿದ್ದ ಶೇಷ ಭಾರತ ಮೊದಲ ದಿನದಾಟದಂತ್ಯಕ್ಕೆ ಪ್ರಥಮ ಇನಿಂಗ್ಸ್‌ನಲ್ಲಿ 330 ರನ್ ಗಳಿಸಿ ಆಲೌಟಾಗಿದೆ.

ಇಲ್ಲಿನ ಜಮ್ತಾದಲ್ಲಿರುವ ವಿದರ್ಭ ಕ್ರಿಕೆಟ್ ಅಸೋಸಿಯೇಶನ್ ಸ್ಟೇಡಿಯಂನಲ್ಲಿ ಮಂಗಳವಾರ ಟಾಸ್ ಜಯಿಸಿದ ಶೇಷ ಭಾರತ ತಂಡದ ನಾಯಕ ಅಜಿಂಕ್ಯ ರಹಾನೆ ಮೊದಲು ಬ್ಯಾಟಂಗ್ ಆಯ್ದುಕೊಂಡರು.

ಒಂದು ಹಂತದಲ್ಲಿ 1 ವಿಕೆಟ್ ನಷ್ಟದಲ್ಲಿ 171 ರನ್ ಗಳಿಸಿ ಸುಭದ್ರವಾಗಿದ್ದ ಶೇಷ ಭಾರತ 159 ರನ್ ಸೇರಿಸುವಷ್ಟರಲ್ಲಿ ಉಳಿದ 9 ವಿಕೆಟ್‌ಗಳನ್ನು ಕಳೆದುಕೊಂಡಿತು. ಲಂಚ್ ವಿರಾಮದ ಬಳಿಕ 4 ಹಾಗೂ ಟೀ ವಿರಾಮದ ಬಳಿಕ 5 ವಿಕೆಟ್‌ಗಳನ್ನು ಕಳೆದುಕೊಂಡಿತು. ದಿನದಾಟ ಮುಗಿಯಲು ಕೆಲವೇ ನಿಮಿಷ ಬಾಕಿ ಇರುವಾಗ 89.4 ಓವರ್‌ಗಳಲ್ಲಿ 330 ರನ್ ಗಳಿಸಿ ಸರ್ವಪತನ ಕಂಡಿತು.

ಶೇಷ ಭಾರತ 46 ರನ್ ಗಳಿಸುವಷ್ಟರಲ್ಲಿ ಆರಂಭಿಕ ಆಟಗಾರ ಅಮೋಲ್‌ಪ್ರೀತ್ ಸಿಂಗ್(15) ವಿಕೆಟನ್ನು ಕಳೆದುಕೊಂಡಿತು. ಆಗ ಮೂರನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಮಾಡಿದ ಹನುಮ ವಿಹಾರಿ ಕುಸಿಯುತ್ತಿದ್ದ ಬ್ಯಾಟಿಂಗ್‌ಗೆ ತಡೆಗೋಡೆಯಾಗಿ ನಿಂತರು. ಪೆವಿಲಿಯನ್‌ಗೆ ಸೇರಿದ 8ನೇ ದಾಂಡಿಗನಾದ ವಿಹಾರಿ 211 ಎಸೆತಗಳ ಇನಿಂಗ್ಸ್‌ನಲ್ಲಿ 11 ಬೌಂಡರಿ ಹಾಗೂ 2 ಭರ್ಜರಿ ಸಿಕ್ಸರ್ ಸಿಡಿಸಿದರು. ಇದು ಪ್ರಥಮ ದರ್ಜೆ ಕ್ರಿಕೆಟ್‌ನಲ್ಲಿ ವಿಹಾರಿ ಗಳಿಸಿದ 16ನೇ ಶತಕವಾಗಿದೆ.

ಸಿಂಗ್ ಔಟಾದಾಗ ಕ್ರೀಸ್‌ಗಿಳಿದ ವಿಹಾರಿ ರಾಷ್ಟ್ರೀಯ ತಂಡದ ಸಹಪಾಠಿ ಮಾಯಾಂಕ್ ಅಗರ್ವಾಲ್(95 ರನ್, 134 ಎಸೆತ, 10 ಬೌಂಡರಿ, 3 ಸಿಕ್ಸರ್)ಅವರೊಂದಿಗೆ 2ನೇ ವಿಕೆಟ್‌ಗೆ ಅಮೂಲ್ಯ 125 ರನ್ ಜೊತೆಯಾಟ ನಡೆಸಿದರು. ಕಳೆದ ವರ್ಷ ಆಸ್ಟ್ರೇಲಿಯ ವಿರುದ್ಧ ಬಾಕ್ಸಿಂಗ್ ಡೇ ಟೆಸ್ಟ್‌ನಲ್ಲಿ ಭಾರತ ತಂಡದಲ್ಲಿ ಚೊಚ್ಚಲ ಪಂದ್ಯ ಆಡಿದ್ದ ಅಗರ್ವಾಲ್ ಶತಕದಿಂದ ವಂಚಿತರಾದರು.

ಹೈದರಾಬಾದ್ ತಂಡದ ಪರ 17ನೇ ವಯಸ್ಸಿನಲ್ಲಿ ಪ್ರಥಮ ದರ್ಜೆ ಕ್ರಿಕೆಟಿಗೆ ಕಾಲಿಟ್ಟಿದ್ದ ವಿಹಾರಿ ಕ್ರೀಸ್‌ನಲ್ಲಿ ತನ್ನ ತಾಳ್ಮೆ ಪ್ರದರ್ಶಿಸಿದರು. 96 ರನ್ ಗಳಿಸಿದ್ದಾಗ ಆದಿತ್ಯ ಸರ್ವಾಟೆ ಬೌಲಿಂಗ್‌ನಲ್ಲಿ ಮುನ್ನುಗ್ಗಿ ಆಡಿದ ವಿಹಾರಿ 188 ಎಸೆತಗಳಲ್ಲಿ ಶತಕ ಪೂರೈಸಿದರು.

ವಿಹಾರಿ ಕೊನೆಗೂ 114 ರನ್‌ಗೆ ಸರ್ವಾಟೆ ಎಸೆತದಲ್ಲಿ ಸ್ಲಿಪ್‌ನಲ್ಲಿ ಫೀಲ್ಡಿಂಗ್ ನಿರತ ವಿದರ್ಭ ನಾಯಕ ಫೈಝ್ ಫಝಲ್‌ಗೆ ಕ್ಯಾಚ್ ನೀಡಿ ನಿರ್ಗಮಿಸಿದರು. ವಿಹಾರಿ ಕಳೆದ ವರ್ಷ ಇರಾನಿ ಟ್ರೋಫಿಯಲ್ಲಿ 183 ರನ್ ಗಳಿಸುವ ಮೂಲಕ ಭಾರತೀಯ ಟೆಸ್ಟ್ ತಂಡಕ್ಕೆ ಎಂಟ್ರಿ ಪಡೆದಿದ್ದರು. 24ರ ಹರೆಯದ ವಿಹಾರಿ 18 ವರ್ಷಗಳ ಬಳಿಕ ಭಾರತೀಯ ಟೆಸ್ಟ್ ತಂಡದಲ್ಲಿ ಸ್ಥಾನ ಪಡೆದ ಆಂಧ್ರದ ಮೊದಲ ಆಟಗಾರ ಎನಿಸಿಕೊಂಡಿದ್ದರು.

ರಣಜಿ ಚಾಂಪಿಯನ್ ವಿದರ್ಭ ಬೆಳಗ್ಗಿನ ಅವಧಿಯ ಆಟದಲ್ಲಿ ನೀರಸ ಪ್ರದರ್ಶನ ನೀಡಿದ್ದರೂ ಆ ಬಳಿಕ ತಿರುಗೇಟು ನೀಡಿತು. 1 ವಿಕೆಟ್ ನಷ್ಟಕ್ಕೆ 170 ರನ್ ಗಳಿಸಿ ಸುಸ್ಥಿತಿಯಲ್ಲಿದ್ದ ಶೇಷ ಭಾರತ ತಂಡವನ್ನು 330 ರನ್‌ಗೆ ನಿಯಂತ್ರಿಸುವಲ್ಲಿ ಯಶಸ್ವಿಯಾಯಿತು. ಮಧ್ಯಮ ಕ್ರಮಾಂಕದಲ್ಲಿ ನಾಯಕ ಅಜಿಂಕ್ಯ ರಹಾನೆ(13), ಶ್ರೇಯಸ್ ಅಯ್ಯರ್(19), ಇಶಾನ್ ಕಿಶನ್(2), ಕೆ. ಗೌತಮ್(7), ಧರ್ಮೇಂದ್ರ ಜಡೇಜ(6) ಸಂಪೂರ್ಣ ವಿಫಲರಾದರು.

ರಣಜಿಯಲ್ಲಿ ಮಿಂಚಿದ್ದ ಸ್ಪಿನ್ನರ್ ಆದಿತ್ಯ ಸರ್ವಾಟೆ (3-99)ಹಾಗೂ ಅಕ್ಷಯ್ ವಖಾರೆ (3-62)ತಲಾ 3 ವಿಕೆಟ್‌ಗಳನ್ನು ಉರುಳಿಸಿ ಭಾರತ ತಂಡಕ್ಕೆ ಸಾಕಷ್ಟು ಹಾನಿ ಮಾಡಿದರು. ಗುರ್ಬಾನಿ 58 ರನ್ ನೀಡಿ 2 ವಿಕೆಟ್ ಪಡೆದು ಸರ್ವಾಟೆ ಹಾಗೂ ವಖಾರೆಗೆ ಸಾಥ್ ನೀಡಿದರು.