ಬಿಬಿಎಂಪಿ ಬಜೆಟ್: ಮತದಾರರ ಓಲೈಕೆಗಾಗಿ ಭರಪೂರ ಕೊಡುಗೆ

ಬೆಂಗಳೂರು, ಫೆ. 18: ಮುಂದಿನ ಲೋಕಸಭಾ ಚುನಾವಣೆಯನ್ನು ಗಮನದಲ್ಲಿಟ್ಟಿಕೊಂಡು ನಗರದ ಮತದಾರರನ್ನು ಓಲೈಸಿಕೊಳ್ಳುವ ಸಲುವಾಗಿ ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆಯ 2019-20 ನೆ ಸಾಲಿನ ಆಯವ್ಯಯದಲ್ಲಿ ಭರಪೂರ ಕೊಡುಗೆಗಳನ್ನು ಘೋಷಣೆ ಮಾಡಿದ್ದಾರೆ.

3500 ಕೋಟಿ ತೆರಿಗೆ ಸಂಗ್ರಹದ ಗುರಿಯನ್ನಿಟ್ಟುಕೊಂಡು, ಸುಮಾರು ನೂರು ಕೋಟಿಯಷ್ಟು ಬಾಕಿ ತೆರಿಗೆ ವಸೂಲಿ, ವಿದ್ಯಾಸಂಸ್ಥೆಗಳಿಗೆ ಪೂರ್ಣ ಪ್ರಮಾಣದ ತೆರಿಗೆ ಸೇರಿದಂತೆ ಮತ್ತಿತರೆ ಜನಪ್ರಿಯ ಯೋಜನೆಗಳನ್ನು ಒಳಗೊಂಡ 10,691.82 ಕೋಟಿ ಮೊತ್ತದ 2019-20 ನೆ ಸಾಲಿನ ಬೆಂಗಳೂರು ಮಹಾನಗರ ಪಾಲಿಕೆಯ ಬಜೆಟ್ ಅನ್ನು ತೆರಿಗೆ ಮತ್ತು ಆರ್ಥಿಕ ಸ್ಥಾಯಿ ಸಮಿತಿ ಅಧ್ಯಕ್ಷೆ ಹೇಮಲತಾ ಗೋಪಾಲಯ್ಯ ಮಂಡಿಸಿದರು.

ಮಹಿಳೆಯರಿಗೆ, ವಿದ್ಯಾರ್ಥಿಗಳಿಗೆ ಹೆಚ್ಚಿನ ಮಹತ್ವ ನೀಡಿರುವ ಬಜೆಟ್‌ನಲ್ಲಿ, ಮಹಾಲಕ್ಷ್ಮಿ ಯೋಜನೆ ಅಡಿ 1 ಲಕ್ಷದ ಬಾಂಡ್, ಅನ್ನಪೂರ್ಣೇಶ್ವರಿ ಯೋಜನೆ ಅಡಿಯಲ್ಲಿ ಶೇ.50 ರಷ್ಟು ಸಬ್ಸಿಡಿಯಲ್ಲಿ ಸಂಚಾರಿ ಕ್ಯಾಂಟೀನ್, ಪೌರ ಕಾರ್ಮಿಕರಿಗೆ ಹಾಗೂ ದ್ವಿತೀಯ ಪಿಯುಸಿ ವಿದ್ಯಾರ್ಥಿಗಳಿಗೆ ಬಿಸಿಯೂಟ, ಬೀದಿ ಬದಿ ವ್ಯಾಪಾರಿಗಳಿಗೆ ಸಹಾಯ ಸೇರಿದಂತೆ ಅನೇಕ ಮಹತ್ತರ ಯೋಜನೆಗಳನ್ನು ಘೋಷಿಸಲಾಗಿದೆ.

ಸಾಮಾಜಿಕ ಕಾರ್ಯಕ್ರಮಗಳಿಗಾಗಿ ಮಹಿಳಾ ಸದಸ್ಯರಿಗೆ 10 ಲಕ್ಷ ರೂಪಾಯಿಗಳ ವಿಶೇಷ ಅನುದಾನವನ್ನು ಬಜೆಟ್‌ನಲ್ಲಿ ಪ್ರಕಟಿಸಿರುವುದಾಗಿ ಹೇಮಲತಾ ಗೋಪಾಲಯ್ಯ ತಿಳಿಸಿದರು. ಡಾ.ಶಿವಕುಮಾರ ಸ್ವಾಮೀಜಿ ಹೆಸರಿನಲ್ಲಿ ಶಿಕ್ಷಣ ಕ್ಷೇತ್ರದಲ್ಲಿ ಗಣನೀಯ ಸಾಧನೆ ಮಾಡಿರುವ ಶಿಕ್ಷಣ ಸಂಸ್ಥೆಗಳ ಸಂಘಗಳಿಗೆ ಪ್ರಶಸ್ತಿ, ತುಮಕೂರು ರಸ್ತೆಯಲ್ಲಿ ಸ್ವಾಮೀಜಿಗಳ ಪುತ್ಥಳಿ ಸ್ಥಾಪನೆ, ಎಲ್ಲಾ ವಲಯಗಳಲ್ಲಿ ದೋಬಿಘಾಟ್‌ಗಳ ಅಭಿವೃದ್ಧಿಗಾಗಿ ನೆರವು, ಸಮುದಾಯ ಭವನಗಳ ನಿರ್ವಹಣೆ, ಸ್ಮಶಾನಗಳ ನಿರ್ಮಾಣ ದಸರಾ ಹಬ್ಬ, ಕಡಲೇಕಾಯಿ ಪರಿಷೆ, ಕರಗ ಸೆರಿದಂತೆ ಮತ್ತಿತರೆ ಸಾಂಸ್ಕೃತಿಕ ಹಬ್ಬಗಳನ್ನು ಉತ್ತೇಜಿಸಲು ಅನುದಾನ ನೀಡಲಾಗಿದೆ.

ಡಾ.ಜಗಜೀವನರಾಂ ಸಾರ್ವಜನಿಕ ಆಸ್ಪತ್ರೆಯಲ್ಲಿ ಕ್ಯಾನ್ಸರ್ ಚಿಕಿತ್ಸಾ ವಿಭಾಗ ಪ್ರಾರಂಭ, ಆರೋಗ್ಯ ಕವಚದಡಿ ಮಹಿಳೆಯರ ಆರೋಗ್ಯ ಕಾಪಾಡಲು ಆರೋಗ್ಯ ತಪಾಸಣೆಗಾಗಿ ಸಂಚಾರಿ ಬಸ್‌ಗಳ ಖರೀದಿ, ದಿವ್ಯಾಂಗ ಚೇತನ ಕಲ್ಯಾಣಕ್ಕಾಗಿ ಅನುದಾನ ನೀಡಲಾಗಿದೆ. ಕಿವುಡ, ಮೂಗ, ಅಂದರಿಗಾಗಿ ಶಾಲೆಗಳನ್ನು ನಡೆಸುತ್ತಿರುವ ದತ್ತಿ ಶಿಕ್ಷಣ ಸಂಸ್ಥೆಗಳಿಗೆ ಹಣಕಾಸು ನೆರವು, ಹಿರಿಯ ನಾಗರಿಕರ ಕಲ್ಯಾಣ ಕಾರ್ಯಕ್ರಮಕ್ಕೆ ಹಣಕಾಸು, ಟೈಲರಿಂಗ್ ಯಂತ್ರ ಸೇರಿದಂತೆ ಆಸ್ಪತ್ರೆಗಳಿಗೆ, ಸರಕಾರಿ ಶಾಲೆಗಳು, ಸಾರ್ವಜನಿಕ ಆಸ್ತಿ-ಪಾಸ್ತಿಗಳ ಅಭಿವೃದ್ಧಿಗಾಗಿ ಸಾಕಷ್ಟು ಅನುದಾನ ನೀಡುವ ಮೂಲಕ ಮತದಾರರನ್ನು ಓಲೈಸಿಕೊಳ್ಳಲು ಮುಂದಾಗಿದ್ದಾರೆ.

ಪ್ರಸಕ್ತ ಸಾಲಿನ ಬಜೆಟ್‌ನಲ್ಲಿ 10,691.82 ಕೋಟಿ ರೂ.ಒಟ್ಟು ಆದಾಯವನ್ನಿಟ್ಟುಕೊಂಡು, ಒಟ್ಟು ವೆಚ್ಚ 10,688.63 ಕೋಟಿಯಷ್ಟಾಗಿದ್ದು, 3.19 ಕೋಟಿಯ ಉಳಿತಾಯದ ಬಜೆಟ್ ಆಗಿದೆ. ಸಂಪನ್ಮೂಲ ಕ್ರೋಡೀಕರಣಕ್ಕೆ ಹಲವು ಸುಧಾರಣಾ ಕ್ರಮಗಳನ್ನು ಕೈಗೊಳ್ಳಲಾಗುತ್ತಿದೆ ಎಂದು ಸ್ಥಾಯಿ ಸಮಿತಿ ಅಧ್ಯಕ್ಷೆ ಹೇಮಲತಾ ಗೋಪಾಲಯ್ಯ ತಿಳಿಸಿದರು.

ನಗರದಲ್ಲಿ 19 ಲಕ್ಷಕ್ಕೂ ಹೆಚ್ಚು ಆಸ್ತಿಗಳನ್ನು ಗುರುತಿಸಲಾಗಿದ್ದು, 2019-20 ನೆ ಸಾಲಿನ ಬಜೆಟ್‌ನಲ್ಲಿ 3,500 ಕೋಟಿ ಆಸ್ತಿ ತೆರಿಗೆಯನ್ನು ನಿರೀಕ್ಷೆ ಮಾಡಲಾಗಿದೆ. ಮುದ್ರಾಂಕ ಶುಲ್ಕದ ಮೇಲೆ ಶೇ. 2 ರಷ್ಟು ಅಧಿಬಾರ ಶುಲ್ಕವನ್ನು ವಸೂಲಿ ಮಾಡಲು ನಿರ್ಧರಿಸಲಾಗಿದ್ದು, ಈ ಬಾರಿ 100 ಕೋಟಿ ರೂ. ಬರಬಹುದು ಎಂದು ಬಜೆಟ್‌ನಲ್ಲಿ ಪ್ರಸ್ತಾಪಿಸಲಾಗಿದೆ.

ಪಾಲಿಕೆ ವ್ಯಾಪ್ತಿಯಲ್ಲಿರುವ ಬಹುಮಹಡಿ ಕಟ್ಟಡಗಳು ಹೈ-ರೈಸ್ ಕಟ್ಟಡಗಳು, ಮಾಲ್‌ಗಳು, ಟೆಕ್ ಪಾರ್ಕ್‌ಗಳು ವಾಣಿಜ್ಯ ಸಂಕೀರ್ಣಗಳು ಇತರೆ ಕಟ್ಟಡಗಳಿಂದ ಟೋಟಲ್ ಸರ್ವೆ ನಡೆಸಿ ತಪ್ಪು ಘೋಷಿಸಿಕೊಂಡಿರುವ ಮಾಲಕರಿಂದ 400 ಕೋಟಿ ಹಣವನ್ನು ಬಡ್ಡಿ ಸಮೇತ ವಸೂಲಿ ಮಾಡಲು ಉದ್ದೇಶಿಸಲಾಗಿದೆ. ಜಾಹೀರಾತು ವಲಯದಿಂದ 415 ಕೋಟಿ ರೂ. ಆದಾಯವನ್ನು ನಿರೀಕ್ಷಿಸುವುದರೊಂದಿಗೆ ತೆರಿಗೆಯೇತರ ಆದಾಯ ಮೂಲವಾದ ಸುಧಾರಣಾ ಶುಲ್ಕದಿಂದಲೂ 400 ಕೋಟಿ ಆದಾಯವನ್ನು ವಸೂಲಿ ಮಾಡಲು ನಿರ್ಧರಿಸಲಾಗಿದೆ ಎಂದು ತೆರಿಗೆ ಮತ್ತು ಆರ್ಥಿಕ ಸ್ಥಾಯಿ ಸಮಿತಿ ಅಧ್ಯಕ್ಷೆ ಹೇಮಲತಾ ಗೋಪಾಲಯ್ಯ ಹೇಳಿದರು.

ಓಎಫ್‌ಸಿ ಭಾಗದಿಂದ 175 ಕೋಟಿ, ಮೊಬೈಲ್ ಟವರ್ ಶುಲ್ಕದಿಂದ 50 ಕೋಟಿ, ನಗರ ಯೋಜನೆ ವಿಭಾಗದಿಂದ 841 ಕೋಟಿ ನಿರೀಕ್ಷಿಸಲಾಗಿದೆ ಎಂದು ಬಜೆಟ್ ಭಾಷಣದಲ್ಲಿ ಅವರು ಪ್ರಸ್ತಾಪಿಸಿದರು.

ಮಹಿಳೆಯರಿಗೆ ಭರಪೂರ ಯೋಜನೆಗಳು

ಪಾಲಿಕೆಯ 24 ಹೆರಿಗೆ ಆಸ್ಪತ್ರೆಗಳಲ್ಲಿ 2019 ರಿಂದ 2020 ರವರೆಗೆ ಜನಿಸುವ ಹೆಣ್ಣು ಮಗುವಿನ ಹೆಸರಿನಲ್ಲಿ ಒಂದು ಲಕ್ಷ ವೌಲ್ಯದ 15 ವರ್ಷ ಅವಧಿಯ ಬಾಂಡ್ ನೀಡುವ ‘ಮಹಾಲಕ್ಷ್ಮಿ’ ಯೋಜನೆ’ಗೆ 60 ಕೋಟಿ ನೀಡಲಾಗಿದೆ.

‘ಅನ್ನಪೂರ್ಣೇಶ್ವರಿ’ ಕಾರ್ಯಕ್ರಮದ ಅಂಗವಾಗಿ ಪಾಲಿಕೆ ವ್ಯಾಪ್ತಿಯಲ್ಲಿ ಹಿಂದುಳಿದ ಮಹಿಳೆಯರ ಸ್ವಯಂ ಉದ್ಯೋಗ ಕಲ್ಪಿಸಲು ಪ್ರತಿ ವಿಧಾನಸಭಾ ಕ್ಷೇತ್ರಕ್ಕೆ ತಲಾ 4 ಸಂಚಾರಿ ಕ್ಯಾಂಟೀನ್ ವಾಹನ ಸೌಲಭ್ಯಕ್ಕೆ 5 ಕೋಟಿ ನೀಡಲಾಗಿದೆ. ಕ್ಯಾನ್ಸರ್ ಖಾಯಿಲೆಯನ್ನು ಪ್ರಾಥಮಿಕ ಹಂತದಲ್ಲಿ ಕಾಪಾಡುವ ಸಲುವಾಗಿ ಸಂಚಾರಿ ಬಸ್ ಮೂಲಕ ಆರೋಗ್ಯ ತಪಾಸಣೆಗಾಗಿ ‘ಆರೋಗ್ಯ ಕವಚ’ ಯೋಜನೆಗೆ 3 ಕೋಟಿ ರೂ. ನೀಡಲಾಗಿದೆ.

ಡಾ.ಬಾಬು ಜಗಜೀವನ್‌ರಾಮ್ ಸಾರ್ವಜನಿಕ ಆಸ್ಪತ್ರೆಯಲ್ಲಿ ಕ್ಯಾನ್ಸರ್ ಚಿಕಿತ್ಸಾ ವಿಭಾಗ ಆರಂಭಿಸಲು 50 ಲಕ್ಷ ಮೀಸಲಿಟ್ಟಿದ್ದು, ಮಹಿಳೆಯರಿಗಾಗಿ ಸಾಮಾಜಿಕ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲು ಪ್ರತಿವಾರ್ಡ್‌ಗೆ 10 ಲಕ್ಷದಂತೆ 19.8 ಕೋಟಿ ಮೀಸಲಿಡಲಾಗಿದೆ.

‘ಬಡವರ ಬಂಧು’ ಯೋಜನೆ ಅಡಿಯಲ್ಲಿ ಗುರುತಿನ ಚೀಟಿ ನೀಡಿರುವ ಬೀದಿ ಬದಿ ವ್ಯಾಪಾರಿಗಳಿಗೆ ತಳ್ಳುವ ಗಾಡಿ ನೀಡುವ ಸಲುವಾಗಿ ಪ್ರತಿ ವಾರ್ಡ್‌ಗೆ 15 ಗಾಡಿಗಳಂತೆ ನೀಡಲು 4 ಕೋಟಿ ಮೀಸಲಿಡಲಾಗಿದೆ. ನಿರಾಶ್ರಿತರಿಗೆ ತಂಗುದಾಣ ನಿರ್ಮಾಣ ಮತ್ತು ನಿರ್ವಹಣೆಗಾಗಿ 1 ಕೋಟಿ, ದಿವ್ಯಾಂಗ ಚೇತನರ ಕಲ್ಯಾಣ ಕಾರ್ಯಕ್ರಮಕ್ಕಾಗಿ 75 ಕೋಟಿ ಅನುದಾನ ಹಾಗೂ ರಾಷ್ಟ್ರೀಯ ಮತ್ತು ಅಂತರ್‌ರಾಷ್ಟ್ರೀಯ ಕ್ರೀಡೆಯಲ್ಲಿ ಪಾಲ್ಗೊಳ್ಳುವವರ ಆರ್ಥಿಕ ಸಹಾಯಕ್ಕಾಗಿ 2 ಕೋಟಿ ನೀಡಲಾಗಿದೆ.

ಪ್ರತಿ ವಾರ್ಡ್‌ಗೆ 10 ತ್ರಿಚಕ್ರ ವಾಹನ ನೀಡಲು 10 ಕೋಟಿ, ಪ್ರತಿ ವಾರ್ಡ್‌ಗೆ 50 ರಂತೆ ಬೈಸಿಕಲ್ ನೀಡಲು 4 ಕೋಟಿ ಹಾಗೂ 50 ಟೈಲರಿಂಗ್ ಯಂತ್ರ ನೀಡಲು 8 ಕೋಟಿ ಮೀಸಲಿಡಲಾಗಿದೆ. ಮಂಗಳಮುಖಿಯರಿಗೆ ವಿಶೇಷ ಕಾರ್ಯಕ್ರಮಕ್ಕಾಗಿ 1 ಕೋಟಿ, ಬೀದಿ ಬದಿ ವ್ಯಾಪಾರಿಗಳ ಕಲ್ಯಾಣಕ್ಕಾಗಿ 25 ಲಕ್ಷ, ಹಿರಿಯ ನಾಗರಿಕರ ಕಲ್ಯಾಣ ಕಾರ್ಯಕ್ರಮಕ್ಕೆ 5 ಕೋಟಿ ಮೀಸಲಿಡಲಾಗಿದೆ.

ಪಿಯುಸಿವರೆಗೂ ಬಿಸಿಯೂಟ ವಿಸ್ತರಣೆ

ವಿದ್ಯಾರ್ಥಿಗಳ ಶೈಕ್ಷಣಿಕ ಪ್ರವಾಸಕ್ಕಾಗಿ 1.50 ಕೋಟಿ, ಪಾಲಿಕೆ ವ್ಯಾಪ್ತಿಯ ವಿದ್ಯಾರ್ಥಿಗಳಿಗೆ ಉಚಿತ ಬಸ್‌ಪಾಸ್‌ಗಾಗಿ 1 ಕೋಟಿ, ಪಿಯುಸಿ ವಿದ್ಯಾರ್ಥಿಗಳಿಗೂ ಮಧ್ಯಾಹ್ನದ ಬಿಸಿಯೂಟಕ್ಕಾಗಿ 1 ಕೋಟಿ ಮೀಸಲಿಡಲಾಗಿದೆ.

ಪಾಲಿಕೆ ವ್ಯಾಪ್ತಿಯಲ್ಲಿನ ಪ್ರೌಢಶಾಲೆ ಹಾಗೂ ಕಾಲೇಜುಗಳಲ್ಲಿ ಎಸೆಸ್ಸೆಲ್ಸಿಯಲ್ಲಿ ಅತಿ ಹೆಚ್ಚು ಅಂಕಗಳಿಸಿದ ಮೊದಲ 150 ವಿದ್ಯಾರ್ಥಿಗಳಿಗೆ ತಲಾ 25 ಸಾವಿರ ಹಾಗೂ ಪಿಯುಸಿಯ ಮೊದಲ 100 ವಿದ್ಯಾರ್ಥಿಗಳಿಗೆ ತಲಾ 35 ಸಾವಿರ ನಗದು ಬಹುಮಾನ ನೀಡಲಿಕ್ಕಾಗಿ 1 ಕೋಟಿ ಅನುದಾನ ನೀಡಿದೆ.

ಶಾಲಾ-ಕಾಲೇಜುಗಳಲ್ಲಿ ಶುದ್ಧ ಕುಡಿಯುವ ನೀರಿಗಾಗಿ ಆರ್.ಓ ಪ್ಲಾಂಟ್‌ಗಳ ಸ್ಥಾಪನೆಗೆ 1 ಕೋಟಿ, ಶಾಲಾ ಕಾಲೇಜು ಕಟ್ಟಡಗಳ ದುರಸ್ಥಿಗಾಗಿ 15 ಕೋಟಿ ಹಾಗೂ ಮೂಲಭೂತ ಸೌಕರ್ಯಗಳಿಗಾಗಿ 10 ಕೋಟಿ ಮೀಸಲಿಡಲಾಗಿದೆ.

ಬೈಕ್ ಆಂಬ್ಯುಲೆನ್ಸ್‌ಗಳ ಸಂಚಾರಕ್ಕೆ ಒತ್ತು

ಪಾಲಿಕೆ ವ್ಯಾಪ್ತಿಯಲ್ಲಿ ಬೈಕ್ ಆಂಬ್ಯುಲೆನ್ಸ್ ಖರೀದಿಸಲು 2 ಕೋಟಿ ಹಾಗೂ ಪ್ರಸ್ತುತ ಡಯಾಲಿಸಿಸ್ ಕೇಂದ್ರಗಳಿರುವ ವಿಧಾನಸಭಾ ಕ್ಷೇತ್ರಗಳನ್ನು ಬಿಟ್ಟು ಉಳಿದ ಕಡೆ ಡಯಾಲಿಸಿಸ್ ಕೇಂದ್ರ ಸ್ಥಾಪನೆ ಮತ್ತು ನಿರ್ವಹಣೆಗಾಗಿ 25 ಕೋಟಿ ಪಾಲಿಕೆಯ ಬಜೆಟ್‌ನಲ್ಲಿ ಘೋಷಣೆ ಮಾಡಲಾಗಿದೆ.

ದಾಸಪ್ಪ ಹೆರಿಗೆ ಆಸ್ಪತ್ರೆಯಲ್ಲಿ ಜೀರಿಯಾಟ್ರಿಕ್ ಹೊರ ವಿಭಾಗ ಡೇಕೇರ್ ಕೇಂದ್ರ ಆರಂಭಿಸಲು 50 ಲಕ್ಷ , ಕಿದ್ವಾಯಿ ಆಸ್ಪತ್ರೆಯಲ್ಲಿರುವ ಧರ್ಮಶಾಲೆ ನವೀಕರಣಕ್ಕೆ 5 ಕೋಟಿ.ಎಸ್‌ಡಿಎಸ್ ರಾಜೀವ್‌ಗಾಂಧಿ ಇನ್ಸ್‌ಸ್ಟಿಟ್ಯೂಟ್ ಆಫ್ ಚೆಸ್ಟ್ ಡಿಸಿಸಸ್ ಆಸ್ಪತ್ರೆಯಲ್ಲಿ ಧರ್ಮಶಾಲೆ ಆರಂಭಿಸಲು 5 ಕೋಟಿ, ವಾಯು ಶುದ್ಧೀಕರಣ ಯಂತ್ರ ಅಳವಡಿಕೆಗಾಗಿ 5 ಕೋಟಿ, ದುಶ್ಚಟ ನಿವಾರಣಾ ಕೇಂದ್ರ ಸ್ಥಾಪನೆಗೆ 2 ಕೋಟಿ, ತಾಯಿ ಮಡಿಲು ಯೋಜನೆಗಾಗಿ 1.50 ಅನುದಾನ ನೀಡಲಾಗಿದೆ.