ಯೋಧರ ಬಗ್ಗೆ ದಿವ್ಯ ನಿರ್ಲಕ್ಷ್ಯ ತೋರಿದ್ದ ಕಾಂಗ್ರೆಸ್: ರಾಷ್ಟ್ರೀಯ ಯುದ್ಧ ಸ್ಮಾರಕ ಉದ್ಘಾಟನೆ ವೇಳೆ ಮೋದಿ

 ಹೊಸದಿಲ್ಲಿ, ಫೆ.25: ದೇಶದ ಕರ್ತವ್ಯ ನಿರ್ವಹಣೆಯ ಸಂದರ್ಭ ಮೃತಪಟ್ಟ ಧೀರ ಯೋಧರ ಸ್ಮರಣಾರ್ಥ ಇಂಡಿಯಾ ಗೇಟ್ ಬಳಿ ನಿರ್ಮಿಸಲಾಗಿರುವ ರಾಷ್ಟ್ರೀಯ ಯುದ್ಧ ಸ್ಮಾರಕವನ್ನು ಉದ್ಘಾಟಿಸಿದ ಪ್ರಧಾನಿ ನರೇಂದ್ರ ಮೋದಿ, ದೇಶದ ಧೀರಯೋಧರನ್ನು ಗೌರವಿಸುವ ಯೋಜನೆಯನ್ನೂ ಈ ಹಿಂದಿನ ಸರಕಾರ ವಿಳಂಬಿಸಿದೆ ಎಂದು ಟೀಕಿಸಿದರು.

ದೇಶದ ಕರ್ತವ್ಯ ನಿರ್ವಹಣೆಯ ಸಂದರ್ಭ ಹಾಗೂ ಇತ್ತೀಚೆಗೆ ಪುಲ್ವಾಮದಲ್ಲಿ ನಡೆದ ಆತ್ಮಾಹುತಿ ದಾಳಿಯಲ್ಲಿ ಮೃತಪಟ್ಟ ಧೀರ ಯೋಧರಿಗೆ ಶ್ರದ್ಧಾಂಜಲಿ ಸಲ್ಲಿಸಿ ಮಾತನಾಡಿದ ಅವರು, ಇಂತಹ ಸ್ಮಾರಕವನ್ನು ನಿರ್ಮಿಸಬೇಕೆಂಬ ಒತ್ತಾಯ ದಶಕಗಳಿಂದಲೂ ಕೇಳಿ ಬರುತ್ತಿತ್ತು. ಆದರೆ ತಮ್ಮ ಸರಕಾರ 2014ರಲ್ಲಿ ಈ ಯೋಜನೆಗೆ ಚಾಲನೆ ನೀಡಿದೆ ಎಂದು ಹೇಳಿದರು.

ರಫೇಲ್ ಒಪ್ಪಂದ ರದ್ದಾಗಬೇಕೆಂದು ಕಾಂಗ್ರೆಸ್ ಬಯಸುತ್ತಿದೆ. ಬೋಫೋರ್ಸ್‌ನಿಂದ ಹೆಲಿಕಾಪ್ಟರ್ ಒಪ್ಪಂದದವರೆಗಿನ ಹಗರಣದ ತನಿಖೆಯು ಒಂದು ಕುಟುಂಬದತ್ತ ಬೆರಳು ತೋರಿಸುತ್ತಿದೆ. ಇದೀಗ ಇವರು ರಫೇಲ್ ಯುದ್ಧವಿಮಾನ ಭಾರತಕ್ಕೆ ಬಾರದಂತೆ ಸರ್ವ ಪ್ರಯತ್ನಗಳನ್ನೂ ನಡೆಸುತ್ತಿದ್ದಾರೆ ಎಂದು ಆರೋಪಿಸಿದರು.

 ಕಾಂಗ್ರೆಸ್ ಸರಕಾರ ಯೋಧರ ಮೂಲಭೂತ ಅಗತ್ಯಗಳನ್ನು ಒದಗಿಸುವಲ್ಲೂ ನಿರ್ಲಕ್ಷ ತೋರಿತ್ತು. ರಕ್ಷಣಾ ಪಡೆಗಳಿಗೆ ಅಗತ್ಯವಿರುವ ಉಪಕರಣಗಳನ್ನು ಖರೀದಿಸುವ ಹಾಗೂ ರಕ್ಷಣಾ ಪಡೆಗಳನ್ನು ಬಲಿಷ್ಟಗೊಳಿಸುವ ಕುರಿತ ಯೋಜನೆಗಳನ್ನು ಈ ಹಿಂದಿನ ಸರಕಾರ ಬಾಕಿ ಇರಿಸಿತ್ತು. ಆದರೆ ಎನ್‌ಡಿಎ ಸರಕಾರ ಈ ಯೋಜನೆಗಳಿಗೆ ಆದ್ಯತೆ ನೀಡಿ ಪೂರ್ಣಗೊಳಿಸಿದೆ ಎಂದರು.

 2009ರಲ್ಲಿ 1,86,000 ಬುಲೆಟ್‌ಪ್ರೂಫ್ ಜಾಕೆಟ್‌ಗಳಿಗೆ ಸೇನಾಪಡೆಯಿಂದ ಬೇಡಿಕೆ ಇತ್ತು. ಆದರೆ 2009ರಿಂದ 2014ರವರೆಗೆ ಇವುಗಳನ್ನು ಖರೀದಿಸಲು ಯಾವುದೇ ಹಣವನ್ನು ನಿಗದಿಗೊಳಿಸಿರಲಿಲ್ಲ. ಆದರೆ ಎನ್‌ಡಿಎ ಸರಕಾರ ಅಧಿಕಾರಕ್ಕೆ ಬಂದೊಡನೆ ಸೇನಾಪಡೆಗಳಿಗೆ 2,30,000 ಬುಲೆಟ್‌ಪ್ರೂಫ್ ಜಾಕೆಟ್‌ಗಳನ್ನು ಒದಗಿಸಿತು ಎಂದರು.

 ಮಾಜಿ ಸೈನಿಕರಿಗಾಗಿ ತಮ್ಮ ಸರಕಾರ ಮೂರು ಸೂಪರ್ ಸ್ಪೆಷಾಲಿಟಿ ಆಸ್ಪತ್ರೆಗಳನ್ನು ನಿರ್ಮಿಸಲಿದೆ ಎಂದ ಅವರು, ರಾಷ್ಟ್ರದ ಭದ್ರತೆಯಲ್ಲಿ ಸಮಾಜದ ಎಲ್ಲಾ ಕ್ಷೇತ್ರಗಳ ಜನರ ಸಹಕಾರವೂ ಅತ್ಯಗತ್ಯವಾಗಿದೆ. ಈ ಚಿಂತನೆಗೆ ಪೂರಕವಾಗಿ ಪ್ರಪ್ರಥಮ ಬಾರಿಗೆ ಮಹಿಳೆಯರಿಗೂ ಯುದ್ಧವಿಮಾನದ ಪೈಲಟ್‌ಗಳಾಗಿ ಕಾರ್ಯ ನಿರ್ವಹಿಸಲು ಅವಕಾಶ ಮಾಡಿಕೊಡಲಾಗಿದೆ. ಸೇನಾ ಪಡೆಗಳಲ್ಲಿ ಮಹಿಳೆಯರ ಪಾಲ್ಗೊಳ್ಳುವಿಕೆ ಹೆಚ್ಚಾಗಿಸಲು ಕ್ರಮ ಕೈಗೊಳ್ಳಲಾಗಿದೆ ಎಂದರು.

ಸುಮಾರು 40 ಎಕರೆ ಪ್ರದೇಶದಲ್ಲಿ ವಿಸ್ತರಿಸಿರುವ ಯುದ್ಧಸ್ಮಾರಕ ಸ್ಥಳದಲ್ಲಿ - ಅಮರ ಚಕ್ರ ವೃತ್ತ, ವೀರತ ಚಕ್ರ ವೃತ್ತ, ತ್ಯಾಗ ಚಕ್ರ ವೃತ್ತ ಮತ್ತು ರಕ್ಷಕ ಚಕ್ರ ವೃತ್ತ ಎಂಬ ನಾಲ್ಕು ವೃತ್ತಗಳಿವೆ. ಇಲ್ಲಿ 25,942 ಯೋಧರ ಹೆಸರನ್ನು ಅಮೃತಶಿಲೆಯಲ್ಲಿ ಸ್ವರ್ಣಾಕ್ಷರಗಳಲ್ಲಿ ಕೆತ್ತಲಾಗಿದೆ. ಕೇಂದ್ರದಲ್ಲಿರುವ ಸ್ಥಂಭದಲ್ಲಿ ನಂದಾದೀಪ ಹಾಗೂ ಕಂಚಿನ ಭಿತ್ತಿಚಿತ್ರದಲ್ಲಿ ಭಾರತೀಯ ವಾಯುಪಡೆ, ನೌಕಾಪಡೆ ಮತ್ತು ಸೇನಾ ಪಡೆ ನಡೆಸಿದ ಪ್ರಸಿದ್ಧ ಯುದ್ಧಗಳ ಚಿತ್ರಣ ಮೂಡಿಸಲಾಗಿದೆ.

  ಪ್ರಮುಖ ನಿವೇಶನದ ಬದಿಯಲ್ಲಿ, ಇಂಡಿಯಾ ಗೇಟ್‌ನ ಉತ್ತರ ಭಾಗದಲ್ಲಿ ಪರಮಯೋಧ ಸ್ಥಳ ಎಂಬ ಪಾರ್ಕ್ ನಿರ್ಮಿಸಲಾಗಿದೆ. ಇಲ್ಲಿ ಯುದ್ಧದಲ್ಲಿ ಧೈರ್ಯ ಪ್ರದರ್ಶಿಸುವ ಯೋಧರಿಗೆ ನೀಡಲಾಗುವ ದೇಶದ ಪರಮೋಚ್ಛ ಶೌರ್ಯ ಪ್ರಶಸ್ತಿಯಾಗಿರುವ ಪರಮವೀರ ಚಕ್ರ ಪಡೆದ 21 ಯೋಧರ ಗೌರವಾರ್ಥ 21 ಕಂಚಿನ ಸಣ್ಣ ಪ್ರತಿಮೆಯನ್ನು (ಸೊಂಟದ ಮೇಲ್ಬಾಗದ ದೇಹ) ಸ್ಥಾಪಿಸಲಾಗಿದೆ.

ಬ್ರಿಟಿಷರ ಆಳ್ವಿಕೆಯ ಕಾಲದಲ್ಲಿ ನಿರ್ಮಿಸಲಾಗಿರುವ ಇಂಡಿಯಾ ಗೇಟ್ ಎಂಬುದೇ ಒಂದು ಯುದ್ಧ ಸ್ಮಾರಕದ ಸ್ಥಳವಾಗಿದೆ. 1914-18ರವರೆಗಿನ ಪ್ರಥಮ ವಿಶ್ವಯುದ್ಧದಲ್ಲಿ ಮತ್ತು 1919ರ ಮೂರನೇ ಆಂಗ್ಲೊ-ಅಪಘಾನ್ ಯುದ್ಧದಲ್ಲಿ ಮೃತಪಟ್ಟ ಭಾರತೀಯ ಯೋಧರ ಸ್ಮಾರಕ ಇದಾಗಿದೆ.