100ನೇ ಪ್ರಶಸ್ತಿ ಮೇಲೆ ಫೆಡರರ್ ಕಣ್ಣು
ದುಬೈ, ಫೆ.25: ಸ್ವಿಸ್ ಟೆನಿಸ್ ಸೂಪರ್ಸ್ಟಾರ್ ರೋಜರ್ ಫೆಡರರ್ 100ನೇ ಟೆನಿಸ್ ಪ್ರಶಸ್ತಿಯ ಹೊಸ್ತಿಲಲ್ಲಿದ್ದಾರೆ. ದುಬೈ ಟೆನಿಸ್ ಟೂರ್ನಿಯಲ್ಲಿ ಎರಡನೇ ಶ್ರೇಯಾಂಕ ಪಡೆದಿರುವ ಅವರು, ಮೊದಲ ಪಂದ್ಯದಲ್ಲಿ ಜರ್ಮನಿಯ ಫಿಲಿಪ್ ಕೊಹ್ಲ್ ಸ್ರೆಬರ್ ಅವರ ಸವಾಲನ್ನು ಎದುರಿಸಲಿದ್ದಾರೆ. ಈ ಟೂರ್ನಿಯನ್ನು ಫೆಡರರ್ ಗೆದ್ದರೆ ಅದು ಅವರ 100ನೇ ಪ್ರಶಸ್ತಿಯಾಗಲಿದೆ.
2019ರ ವರ್ಷದ ಮೊದಲ ಪ್ರಮುಖ ಟೂರ್ನಿಯಾದ ಆಸ್ಟ್ರೇಲಿಯನ್ ಓಪನ್ನ 16ರ ಸುತ್ತಿನ ಪಂದ್ಯದಲ್ಲಿ ಫೆಡರರ್ ಅವರು ಗ್ರೀಕ್ನ ಸಿಟ್ಸಿಪಾಸ್ಗೆ ಸೋತಿದ್ದರು.
35 ವರ್ಷದ ಕೊಹ್ಲ್ಸ್ರೆಬರ್ ಹಳೆಯ ಆಟಗಾರನಾಗಿದ್ದು, ಫೆಡರರ್ ವಿರುದ್ಧ ಹಲವು ನಿಕಟ ಪೈಪೋಟಿಗಳನ್ನು ನೀಡಿದ್ದಾರೆ. ವಿಶ್ವ ರ್ಯಾಂಕಿಂಗ್ನಲ್ಲಿ 33ನೇ ಸ್ಥಾನದಲ್ಲಿರುವ ಕೊಹ್ಲ್ಸ್ರೆಬರ್ ವಿರುದ್ಧ ಫೆಡರರ್ 13 ಪಂದ್ಯಗಳನ್ನು ಆಡಿದ್ದು ಒಂದರಲ್ಲಿಯೂ ಸೋತಿಲ್ಲ.
ರಾಮ್ಕುಮಾರ್ ಎದುರಾಳಿ ಅಗುಟ್: ಟೂರ್ನಿಯಹಾಲಿ ಚಾಂಪಿಯನ್ 18ನೇ ರ್ಯಾಂಕಿನ ಸ್ಪೇನ್ನ ರಾಬರ್ಟೊ ಅಗುಟ್ ಅವರು ತಮ್ಮ ಮೊದಲ ಪಂದ್ಯದಲ್ಲಿ ಭಾರತದ ವೈಲ್ಡ್ಕಾರ್ಡ್ ಪ್ರವೇಶ ಪಡೆದ ಆಟಗಾರ ರಾಮ್ಕುಮಾರ್ ರಾಮನಾಥನ್ ಅವರನ್ನು ಎದುರಿಸಲಿದ್ದಾರೆ. ರಾಮ್ನಾಥನ್ ವಿಶ್ವ ರ್ಯಾಂಕಿಂಗ್ನಲ್ಲಿ 128ನೇ ಸ್ಥಾನ ಪಡೆದಿದ್ದಾರೆ.
