ರಾಜಕಾರಣಿಗಳು ಮತದಾರರನ್ನು ಭ್ರಷ್ಟರನ್ನಾಗಿಸುತ್ತಿದ್ದಾರೆ: ಮಾಜಿ ಸಿಎಂ ಸಿದ್ದರಾಮಯ್ಯ

ಬೆಂಗಳೂರು, ಮಾ.7: ಇತ್ತೀಚಿನ ದಿನಗಳಲ್ಲಿ ಭ್ರಷ್ಟಾಚಾರ ರಹಿತ ರಾಜಕಾರಣ ಮರೆಯಾಗಿದ್ದು, ಮತದಾರರನ್ನು ರಾಜಕಾರಣಿಗಳು ಭ್ರಷ್ಟರನ್ನಾಗಿ ಮಾಡುತ್ತಿದ್ದಾರೆ ಎಂದು ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಗುರುವಾರ ನಗರದ ಕಸಾಪದಲ್ಲಿ ಶಾಂತವೇರಿ ಗೋಪಾಲಗೌಡ ವಿಚಾರ ಸಂಸ್ಥೆ ವತಿಯಿಂದ ಆಯೋಜಿಸಿದ್ದ ನಟರಾಜ್ ಹುಳಿಯಾರ್ ಅವರ ‘ಶಾಂತವೇರಿ ಗೋಪಾಲಗೌಡ’ ಜೀವನ ಚರಿತ್ರೆಯನ್ನು ಬಿಡುಗಡೆ ಮಾಡಿ ಅವರು ಮಾತನಾಡಿದರು.

ಹಿಂದಿನ ಕಾಲದಲ್ಲಿ ಶಾಂತವೇರಿ ಗೋಪಾಲಗೌಡರು ಚುನಾವಣೆ ಸ್ಪರ್ಧಿಸುವುದು ಎಂದರೆ ರಾಜಕಾರಣಿ ಹಾಗೂ ಮತದಾರರು ಇಬ್ಬರೂ ಭ್ರಷ್ಟರಾಗಬಾರದು ಎಂದು ನಂಬಿದ್ದ ವ್ಯಕ್ತಿ. ಅವರ ಮೊದಲ ಚುನಾವಣೆಯನ್ನು ಅತ್ಯಂತ ಪ್ರಭಾವಿ ವ್ಯಕ್ತಿಯ ವಿರುದ್ಧ ಕೇವಲ ಐದು ಸಾವಿರ ಹಣ ಖರ್ಚು ಮಾಡಿ ಗೆದ್ದವರು. ಆದರೆ, ಅವರ ನಂತರದ ಕಾಲಘಟ್ಟ ಅದಕ್ಕೆ ವಿರುದ್ಧವಾಗಿದೆ ಎಂದು ಹೇಳಿದರು.

ಗೋಪಾಲಗೌಡರು ಚುನಾವಣೆಗೆ ಸ್ಪರ್ಧಿಸಿದ 10 ವರ್ಷದ ಬಳಿಕ ನಾನು ಚುನಾವಣೆಗೆ ಸ್ಪರ್ಧೆ ಮಾಡಿದ್ದೆ. ಅಂದು ನಾನು 63 ಸಾವಿರ ಖರ್ಚು ಮಾಡಿದ್ದೆ. ಅಲ್ಲದೆ, ಅಂದಿನ ದಿನಗಳಲ್ಲಿ ಬೂತ್ ಮಟ್ಟದಲ್ಲಿ ಏಜೆಂಟ್‌ಗಳ ಖರ್ಚನ್ನೂ ಅವರೇ ನೋಡಿಕೊಳ್ಳುತ್ತಿದ್ದರು. ಆದರೆ, ಇಂದಿನ ಸ್ಥಿತಿ ಏನಾಗಿದೆ, ನಾಚಿಕೆಯಾಗುತ್ತದೆ ಎಂದ ಅವರು, ಇದನ್ನು ನೋಡಿದ್ದರೆ ಗೋಪಾಲಗೌಡರು ರಾಜಕೀಯ ನಿವೃತ್ತಿ ಪಡೆಯುತ್ತಿದ್ದರು. ನಾವಾಗಿರುವುದಕ್ಕೆ ರಾಜೀ ಮಾಡಿಕೊಂಡು ಹೋಗುತ್ತಿದ್ದೇವೆ ಎಂದರು.

ಇಂದಿನ ನಮ್ಮ ಚುನಾವಣಾ ವ್ಯವಸ್ಥೆಯಲ್ಲಿ ಪ್ರಾಮಾಣಿಕರು ಚುನಾವಣೆಗೆ ನಿಂತು ಗೆಲ್ಲುವುದು ಅತ್ಯಂತ ಕಷ್ಟದ ಪರಿಸ್ಥಿತಿಯಿದೆ. ಗೋಪಾಲಗೌಡರ ಬದುಕು ಇಂದಿನ ಎಲ್ಲ ರಾಜಕೀಯ ಪಕ್ಷಗಳು ಹಾಗೂ ರಾಜಕಾರಣಿಗಳು ಚಿಂತನೆ ಮಾಡಬೇಕು. ಈ ವ್ಯವಸ್ಥೆಯನ್ನು ಹೀಗೆ ಮುಂದುವರಿಸಿದರೆ ಪ್ರಾಮಾಣಿಕತೆ, ಬದ್ಧತೆ ಎಂಬುದೇ ಇಲ್ಲದಂತಾಗುತ್ತದೆ ಎಂದು ನುಡಿದರು.

ಬಡವರು, ದಲಿತರ, ರೈತರ ಪರವಾದ ಕಾಳಜಿಯಿದ್ದ ಗೋಪಾಲಗೌಡರು ಅತ್ಯುತ್ತಮ ಸಂಸದೀಯ ಪಟುವಾಗಿದ್ದರು. ಅವರು ವಿಧಾನಸೌಧದೊಳಗೆ ಮಾತನಾಡಿದರೆ ಸರಕಾರಕ್ಕೆ ನಡುಕ ಶುರುವಾಗುತ್ತಿತ್ತು. ಇಂದು ಶಾಸಕರು ಸದನದೊಳಗೆ ಬಾವಿಗಿಳಿದು ಹೋರಾಡುವ ಸ್ಥಿತಿಗೆ ತಲುಪಿದೆ. ಜತೆಗೆ, ಶಾಸಕರನ್ನು, ಸಚಿವರನ್ನು ಕರೆದು ತಂದು ಕೂರಿಸಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ ಎಂದು ಬೇಸರ ವ್ಯಕ್ತಪಡಿಸಿದರು.

ರಾಜ್ಯಸಭಾ ಸದಸ್ಯ ಎಲ್.ಹನುಮಂತಯ್ಯ ಮಾತನಾಡಿ, ಶಾಲೆಯ ದಿನಗಳಲ್ಲಿಯೇ ಸ್ವಾತಂತ್ರ ಚಳವಳಿಗೆ ಬಂದಿದ್ದ ಗೋಪಾಲಗೌಡರು ದೇಶದಲ್ಲಿಯೇ ಅತ್ಯುತ್ತಮ ರಾಜಕಾರಣಿಯಾಗಿ ಗುರುತಿಸಿಕೊಂಡಿದ್ದು ಒಂದು ಪವಾಡದಂತಿದೆ. ಅವರ ಜೀವನದ ಕುರಿತು ನಟರಾಜ್ ಹುಳಿಯಾರ್ ಸಂಶೋಧನೆಯ ರೀತಿಯಲ್ಲಿ ಆಳವಾಗಿ ಅವರ ಹೋರಾಟದ ಸಂಘರ್ಷದ ಸಾಹಸವನ್ನು ಪುಸ್ತಕದಲ್ಲಿ ಕಟ್ಟಿಕೊಟ್ಟಿದ್ದಾರೆ ಎಂದು ಬಣ್ಣಿಸಿದರು.

ರೈತ ಚಳವಳಿಯ ಮೂಲಕ ಬೆಳೆದ ಗೋಪಾಲಗೌಡರು ಗೇಣಿದಾರರ ವಿರುದ್ಧ ಪ್ರಬಲ ಚಳವಳಿಯನ್ನು ಕಟ್ಟಿದ್ದಾರೆ. ಅವರು ಜನ ನಾಯಕರಾಗಿ ಬೆಳೆದು ಹಣಬಲ, ತೋಳ್ಬಲವಿದ್ದ ಅಂದಿನ ಕಾಂಗ್ರೆಸ್ ನಾಯಕ ಬದರಿ ನಾರಾಯಣರ ವಿರುದ್ಧ ಗೆದ್ದು ಇತಿಹಾಸ ನಿರ್ಮಿಸಿದ್ದರು. ಮೊದಲ ಚುನಾವಣೆಯಲ್ಲಿ ಗೆದ್ದರು, ಎರಡನೇ ಚುನಾವಣೆಯಲ್ಲಿ ಸೋತು, ಮೂರನೇ ಚುನಾವಣೆಯಲ್ಲಿ ಗೆದ್ದಿದ್ದರು. ಆದರೆ, ಇಂದು ಹಣವಿದ್ದವರಷ್ಟೇ ಚುನಾವಣೆಗೆ ನಿಲ್ಲಲು ಸಾಧ್ಯವಾಗುತ್ತಿದೆ. ಪ್ರಜಾಪ್ರಭುತ್ವ ಎಲ್ಲಿಗೆ ಬಂದು ನಿಂತಿದೆ ಎಂದರು. ಕಾರ್ಯಕ್ರಮದಲ್ಲಿ ಲೇಖಕ ನಟರಾಜ್ ಹುಳಿಯಾರ್ ಹಾಗೂ ಸೋನಕ್ಕ ಗೋಪಾಲಗೌಡ ಉಪಸ್ಥಿತರಿದ್ದರು.

ಇಂದಿನ ಚುನಾವಣಾ ವ್ಯವಸ್ಥೆ ಹಾಗೂ ಜನರನ್ನು ಕೆಡಿಸಿದ್ದೇವೆ. ಹೋರಾಟದ ಜೀವನದ ಮೂಲಕ ರಾಜಕೀಯಕ್ಕೆ ಬಂದ ಗೋಪಾಲಗೌಡರು ಎರಡಕ್ಕೂ ಪರಸ್ಪರ ಸಂಬಂಧ ಹೊಂದಿದ್ದರು. ಆದರೆ, ಇಂದು ರಿಯಲ್ ಎಸ್ಟೇಟ್ ಮಾಡುವವರು ರಾಜಕಾರಣಕ್ಕೆ ಬರುತ್ತಿದ್ದಾರೆ. ಪ್ರಾಮಾಣಿಕತೆಗೆ ಬೆಲೆಯೇ ಇಲ್ಲದಂತಾಗಿದೆ.

-ಸಿದ್ದರಾಮಯ್ಯ, ಮಾಜಿ ಮುಖ್ಯಮಂತ್ರಿ