ಅಂಗವಿಕಲರ ಸ್ನೇಹಿ ಚುನಾವಣೆ: ಮತದಾನದ ಬಗ್ಗೆ ವಿಶೇಷ ತರಬೇತಿ

ಉಡುಪಿ, ಮಾ.22: ಜಿಲ್ಲೆಯಲ್ಲಿ ಶ್ರವಣದೋಷ, ಅಂಧ, ಬುದ್ದಿಮಾಂದ್ಯ ಸೇರಿದಂತೆ ಎಲ್ಲ ರೀತಿಯ ಅಂಗವಿಕಲತೆಯನ್ನು ಹೊಂದಿರುವ ಮತದಾರರು ಈ ಬಾರಿ ಹೆಚ್ಚಿನ ಸಂಖ್ಯೆಯಲ್ಲಿ ಮತದಾನ ನಿಟ್ಟಿನಲ್ಲಿ ಉಡುಪಿ ಜಿಲ್ಲಾ ಸ್ವೀಪ್ ಸಮಿತಿಯಿಂದ ಅವರಿಗೆ ವಿಶೇಷ ತರಬೇತಿಯನ್ನು ಹಮ್ಮಿಕೊಳ್ಳಲಾಗಿದೆ.
ವಿಕಲಚೇತನರಲ್ಲಿ ಮತದಾನದ ಬಗ್ಗೆ ಜಾಗೃತಿ, ಆತ್ಮವಿಶ್ವಾಸ ಹಾಗೂ ಯಾರ ಸಹಾಯವಿಲ್ಲದೆ ತಾವೇ ಮತದಾನ ಮಾಡುವ ರೀತಿಯಲ್ಲಿ ಮತದಾನ ಪ್ರಾತ್ಯಕ್ಷಿಕೆ ಹಾಗೂ ತರಬೇತಿ ನೀಡಲಾಗುತ್ತದೆ. ಈ ಕಾರ್ಯಕ್ರಮವನ್ನು ಮಾ.24ರಂದು ಬೆಳಗ್ಗೆ 10ಗಂಟೆಗೆ ಬ್ರಹ್ಮಗಿರಿಯ ಬಾಲಭವನದಲ್ಲಿ ಆಯೋಜಿಸಲಾಗಿದೆ.

ಅಂಗವಿಕಲರ ಕುರಿತು ನ್ಯಾಯಾಲಯದ ನೀಡಿದ ಆದೇಶದಲ್ಲಿರುವ ಅನರ್ಹರನ್ನು ಹೊರತುಪಡಿಸಿ ಉಳಿದ ಎಲ್ಲರು ಕೂಡ ಮತದಾನ ಮಾಡಲು ಅರ್ಹ ರಾಗಿರುತ್ತಾರೆ. ಅದರಲ್ಲಿ ಬುದ್ದಿಮಾಂಧ್ಯರು ಕೂಡ ಸೇರಿದ್ದಾರೆ. ಗುರುತಿನ ಚೀಟಿ ಹೊಂದಿರುವವರು ಮತ್ತು ಮತದಾರರ ಪಟ್ಟಿಯಲ್ಲಿರುವ ಎಲ್ಲರು ಕೂಡ ಮತ ದಾನ ಮಾಡಬಹುದು ಎಂಬುದು ಅಧಿಕಾರಿಗಳ ಅಭಿಪ್ರಾಯ.

7385 ಮತದಾರರು: ಉಡುಪಿ ಜಿಲ್ಲೆಯಲ್ಲಿ ಒಟ್ಟು 7385 ಅಂಗವಿಕಲತೆ ಯನ್ನು ಹೊಂದಿರುವ ಮತದಾರರಿದ್ದು, ಅದರಲ್ಲಿ 606 ಅಂಧರು, 700 ಶ್ರವಣದೋಷವುಳ್ಳವರು, 2208 ದೈಹಿಕ ವಿಕಲಚೇತನರು ಮತ್ತು 3871 ಬುದ್ದಿಮಾಂದ್ಯರು ಸೇರಿದಂತೆ ಇತರ ಅಂಗವಿಕಲರಿದ್ದಾರೆ.
ಅಂಧ ಮತದಾರರಿಗೆ ಅನುಕೂಲವಾಗುವಂತೆ ಎಲ್ಲ ಮತಯಂತ್ರದಲ್ಲಿ ಬ್ರೈಲ್ ಲಿಪಿಯನ್ನು ಅಳವಡಿಸಲಾಗಿರುತ್ತದೆ. ಅದರಂತೆ ಸಿರಿಯಲ್ ನಂಬರ್ ಗಳನ್ನು ಅಂಧರು ಸ್ಪರ್ಶಿಸುವ ಮೂಲಕ ಮತದಾನ ಮಾಡಬಹುದಾಗಿದೆ. ಅವರಿಗೆ ಯಾವ ಸಿರಿಯಲ್ ನಂಬರ್‌ನಲ್ಲಿ ಯಾವ ಪಕ್ಷದ ಚಿಹ್ನೆ ಇವೆ ಎಂಬು ದರ ಬಗ್ಗೆ ತರಬೇತಿಯಲ್ಲಿ ಬಾಯಿಪಾಠ ಮಾಡಿಸಲಾಗುತ್ತದೆ.

ಮತದಾನ ದಿನ ಅಂಗವಿಕಲರಿಗೆ ಹಾಗೂ ಹಿರಿಯ ನಾಗರಿಕರಿಗೆ ಅನು ಕೂಲವಾಗುವಂತೆ ಜಿಲ್ಲೆಯ ಮತಗಟ್ಟೆಗಳಿರುವ ಒಂದು ಕಟ್ಟಡಕ್ಕೆ ಒಂದು ಗಾಲಿ ಕುರ್ಚಿಯಂತೆ ಒಟ್ಟು 701 ಗಾಲಿಕುರ್ಚಿಗಳನ್ನು ಒದಗಿಸಲಾಗುತ್ತದೆ. ಇದನ್ನು ಸಮೀಪದ ಗ್ರಾಪಂ ಕಚೇರಿಗಳಿಂದ ಹಾಗೂ ಪ್ರಾಥಮಿಕ ಆರೋಗ್ಯ ಕೇಂದ್ರಗಳಿಂದ ಪಡೆದುಕೊಳ್ಳಲಾಗುತ್ತಿದೆ. ದೃಷ್ಠಿ ಸಮಸ್ಯೆ ಇರುವವರಿಗೆ ಬಳಸಲು ಎಲ್ಲ ಮತಗಟ್ಟೆಗಳಿಗೆ ಭೂತಗನ್ನಡಿ ಹಾಗೂ ವಾಕರ್‌ಗಳನ್ನು ನೀಡಲಾಗುತ್ತದೆ. ಅದೇ ರೀತಿ ಇವರಿಗೆ ಮತದಾನ ದಿನ ಮತಗಟ್ಟೆಗಳಿಗೆ ಬರಲು ಅನುಕೂಲವಾಗುವಂತೆ ಜಿಲ್ಲಾಡಳಿತದಿಂದ ಉಚಿತ ವಾಹನದ ವ್ಯವಸ್ಥೆ ಕೂಡ ಮಾಡಲಾಗುತ್ತದೆ.

ಅಂಕಿಅಂಶ ಸಂಗ್ರಹ: ಈ ಬಾರಿಯ ಚುನಾವಣೆಯಲ್ಲಿ ಮತದಾನ ಮಾಡಿದ ಅಂಗವಿಕಲ ಮತದಾರರ ಮಾಹಿತಿಯನ್ನು ಕಲೆಹಾಕಲು ವ್ಯವಸ್ಥಿತ ಯೋಜನೆಯನ್ನು ಜಿಲ್ಲಾಡಳಿತ ಹಾಕಿಕೊಂಡಿದೆ.

ಮತದಾನದ ಮುನ್ನ ದಿನ ಮಸ್ಟರಿಂಗ್ ಕೇಂದ್ರದಿಂದ ಹೊರಡುವ ಮತಗಟ್ಟೆ ಅಧಿಕಾರಿಗಳಿಗೆ ಫಾರ್ಮಟ್‌ನ್ನು ನೀಡಲಾಗುತ್ತದೆ. ಅಧಿಕಾರಿಗಳು ಅದರಲ್ಲಿ ಆಯಾ ಮತಗಟ್ಟೆಗಳಿಗೆ ಮತದಾನ ಮಾಡುವ ಅಂಧ, ಶ್ರವಣದೋಷ, ವಿಕಲಚೇತನ ಮತದಾರರ ವಿವರ, ಭೂತಗನ್ನಡಿ, ಗಾಲಿಕುರ್ಚಿ, ವಾಕರ್ ಬಳಸಿದ ಮತದಾರರ ವಿವರಗಳನ್ನು ನಮೂದಿಸಬೇಕಾಗುತ್ತದೆ.

ಡಿಮಸ್ಟರಿಂಗ್ ಮಾಡುವ ಸಂದರ್ಭ ಆ ವಿವರವನ್ನು ಆಯಾ ಮತಗಟ್ಟೆ ಅಧಿಕಾರಿಗಳು ಹಿರಿಯ ಅಧಿಕಾರಿಗಳಿಗೆ ಒಪ್ಪಿಸಲಿದ್ದಾರೆ. ಹೀಗೆ ವಿಕಲ ಚೇತನರ ಕುರಿತು ಸಂಗ್ರಹಿಸಿ ಅಂಕಿಅಂಶಗಳನ್ನು ಚುನಾವಣಾ ಆಯೋಗಕ್ಕೆ ನೀಡಲಾಗು ತ್ತದೆ. ಇದೇ ರೀತಿಯ ಪ್ರಯತ್ನ ಕಳೆದ ಬಾರಿ ಮಾಡಿದ್ದರೂ ಅದು ವ್ಯವಸ್ಥಿತ ವಾಗಿರದ ಕಾರಣ ಸಂಪೂರ್ಣ ಮಾಹಿತಿ ಲಭ್ಯವಾಗಿರಲಿಲ್ಲ. ಆದರೆ ಕಳೆದ ಶಿವಮೊಗ್ಗ ಉಪಚುನಾವಣೆ ಸಂದರ್ಭದಲ್ಲಿ ಜಿಲ್ಲೆಯ ಬೈಂದೂರು ಕ್ಷೇತ್ರದಲ್ಲಿ ಈ ಅಂಕಿಅಂಶಗಳನ್ನು ಯಶಸ್ವಿಯಾಗಿ ಸಂಗ್ರಹಿಸಲಾಗಿತ್ತು. ಅದರಂತೆ ಈ ಬಾರಿ ಜಿಲ್ಲೆಯಲ್ಲಿ ವ್ಯವಸ್ಥಿತವಾಗಿ ವಿಕಲಚೇತನರ ಮಾಹಿತಿ ಸಂಗ್ರಹಿಸುವ ಕೆಲಸ ಮಾಡಲಾಗುತ್ತದೆ ಎನ್ನುತ್ತಾರೆ ಜಿಲ್ಲಾ ವಿಕಲಚೇತನ ಸಬಲೀಕರಣ ಅಧಿಕಾರಿ ನಿರಂಜನ್ ಭಟ್.

ವಿಕಲಚೇತನರ ವಿಶೇಷ ಮತಗಟ್ಟೆ
ಉಡುಪಿ ತಾಲೂಕಿನ ಕುಂದಾಪುರ ವಿಧಾನಸಭಾ ಕ್ಷೇತ್ರದ ಕೋಡಿಕನ್ಯಾಣ ದಲ್ಲಿರುವ 217ನೆ ಮತಗಟ್ಟೆಯನ್ನು ವಿಕಲಚೇತನರ ವಿಶೇ ಮತಗಟ್ಟೆಯಾಗಿ ಗುರುತಿಸಲಾಗಿದೆ.

ಈ ಮತಗಟ್ಟೆಯೊಂದರಲ್ಲಿ ಸುಮಾರು 45 ವಿಕಲಚೇತನ ಮತದಾರರು ಇರುವುದರಿಂದ ಈ ಮತಗಟ್ಟೆಯನ್ನು ವಿಕಲಚೇತನ ಮತಗಟ್ಟೆಯಾಗಿ ಪರಿ ಗಣಿಸಲಾಗಿದೆ. ಅಲ್ಲಿ ವಿಕಲಚೇತರ ಸ್ನೇಹಿ ಶೌಚಾಲಯ, ರ್ಯಾಂಪ್‌ಗಳನ್ನು ನಿರ್ಮಿಸಲಾಗುತ್ತದೆ. ಅಲ್ಲದೆ ಗಾಲಿಕುರ್ಚಿ, ವಾಕರ್, ಭೂತಗನ್ನಡಿ ಸೇರಿದಂತೆ ವಿಕಲಚೇತನರಿಗೆ ಅವಶ್ಯಕವಾಗಿರುವ ಎಲ್ಲ ವ್ಯವಸ್ಥೆಯನ್ನು ಮಾಡಲಾಗುತ್ತದೆ. ಇದಕ್ಕೆ ಸ್ಥಳೀಯ ಗ್ರಾಮ ಪಂಚಾಯತ್‌ನ ಶೇ.3ರ ಅನುದಾನವನ್ನು ಬಳಸಿಕೊಳ್ಳ ಲಾಗುತ್ತದೆ ಎಂದು ಜಿಲ್ಲಾ ವಿಕಲಚೇತನರ ಸಬಲೀಕರಣ ಅಧಿಕಾರಿ ನಿರಂಜನ್ ಭಟ್ ತಿಳಿಸಿದ್ದಾರೆ.