ಲೋಕಸಭಾ ಚುನಾವಣೆಗೆ ಆಯೋಗ ಸಕಲ ಸಿದ್ಧತೆ

ಬೆಂಗಳೂರು, ಎ.7: ರಾಜ್ಯದಲ್ಲಿ ಎ.18 ಹಾಗೂ 23 ರಂದು ಎರಡು ಹಂತದಲ್ಲಿ ನಡೆಯಲಿರುವ ಲೋಕಸಭಾ ಚುನಾವಣೆಗೆ ಚುನಾವಣಾ ಆಯೋಗ ಅಗತ್ಯವಾದ ಪೂರ್ವ ಸಿದ್ಧತೆಗಳನ್ನು ಮಾಡಿಕೊಂಡಿದ್ದು, ಸುಗಮವಾಗಿ ಚುನಾವಣೆ ನಡೆಸಲು ಹಾಗೂ ಹೆಚ್ಚು ಮತದಾನ ನಡೆಯುವಂತೆ ಹಲವು ಕಾರ್ಯಕ್ರಮಗಳನ್ನು ಹಮ್ಮಿಕೊಂಡಿದೆ.

ಯುವ ಮತದಾರರನ್ನು ಆಕರ್ಷಿಸಲು ನಾಮಪತ್ರ ಸಲ್ಲಿಕೆ ದಿನದವರೆಗೂ ಮತದಾರರ ಪಟ್ಟಿಯಲ್ಲಿ ಹೆಸರು ಸೇರ್ಪಡೆಗೆ ಅವಕಾಶ ನೀಡಲಾಗಿತ್ತು. ಚುನಾವಣೆ ದಿನದಂದು ವಿಕಲಚೇತನರಿಗೆ ಮತದಾನಕ್ಕೆ ಮನೆಯಿಂದ ಕರೆದುಕೊಂಡು ಹೋಗಲು ವ್ಯವಸ್ಥೆ ಕಲ್ಪಿಸಲಾಗುತ್ತಿದ್ದು, ದಿವ್ಯಾಂಗರನ್ನು ಕರೆದುಕೊಂಡು ಹೋಗಲು ಬರೋಬ್ಬರಿ 17 ಸಾವಿರ ವಾಹನಗಳನ್ನು ಈ ಬಾರಿ ಬಳಸಿಕೊಳ್ಳಲಾಗುತ್ತಿದೆ. ಕಳೆದ ವರ್ಷವಷ್ಟೆ ವಿಧಾನಸಭಾ ಚುನಾವಣೆ ನಡೆಸಿದ್ದ ರಾಜ್ಯ ಚುನಾವಣಾ ಆಯೋಗ ಇದೇ ಉತ್ಸಾಹದಲ್ಲಿ ಚುನಾವಣೆಗೆ ಸಕಲ ರೀತಿಯ ಕ್ರಮಗಳನ್ನು ಕೈಗೊಂಡಿದೆ.

ರಾಜ್ಯದಲ್ಲಿ ಒಟ್ಟು 5 ಕೋಟಿ ಮತದಾರರಿದ್ದಾರೆ. ಆ ಪೈಕಿ ದಿವ್ಯಾಂಗರು, ಹಿರಿಯ ನಾಗರಿಕರು ಬಂದು ಮತದಾನ ಮಾಡುವ ಕಾರಣಕ್ಕೆ ರಾಜ್ಯಾದ್ಯಂತ 58,186 ಮತಕೇಂದ್ರಗಳನ್ನು ನೆಲ ಅಂತಸ್ತಿನಲ್ಲೇ ಮಾಡಲಾಗುತ್ತದೆ. ಚುನಾವಣಾ ಆಯೋಗ ಪ್ರತಿ ಬಾರಿಯಂತೆ ಈ ಬಾರಿಯೂ ಮತದಾನದ ಪ್ರಮಾಣವನ್ನು ಹೆಚ್ಚಿಸಲು ಶಾಲಾ- ಕಾಲೇಜು ವಿದ್ಯಾರ್ಥಿಗಳಲ್ಲಿ ಮತದಾನ ಜಾಗೃತಿ ಕ್ಲಬ್, ಜಾಗತಿ ಕಾರ್ಯಕ್ರಮ, ಬೀದಿ ನಾಟಕ ಸೇರಿದಂತೆ ಹಲವಾರು ಕಾರ್ಯಕ್ರಮಗಳನ್ನು ಆಯೋಜಿಸಿದೆ.

ವಿಶೇಷಚೇನರಿಗೆ ಸಹಾಯ ಕ್ರಮಗಳು: ರಾಜ್ಯದಲ್ಲಿ 4.21 ಲಕ್ಷ ಅಂಧರಿದ್ದು, ಮತದಾನದ ಸಂದರ್ಭದಲ್ಲಿ ಸುಗಮವಾಗಿ ಮತದಾನ ಮಾಡಲು 40,823 ವೀಲ್ ಚೇರ್ ವ್ಯವಸ್ಥೆ, ದಿವ್ಯಾಂಗರನ್ನು ಕರೆದುಕೊಂಡು ಹೋಗಲು 17,189 ವಾಹನ ವ್ಯವಸ್ಥೆ, ಕಿವುಡ- ಮೂಗರ ಸಹಾಯಕ್ಕೆ 405 ಸನ್ನೆನುಡಿ ತಜ್ಞರ ಬಳಕೆ, ದಿವ್ಯಾಂಗ ಮತಗಟ್ಟೆ ಅಧಿಕಾರಿಗಳೇ ಇರುವ 90 ಮತಕೇಂದ್ರಗಳ ಸ್ಥಾಪನೆ, ಮಹಿಳಾ ಸಿಬ್ಬಂದಿಯಿರುವ 639 ಮತಕೇಂದ್ರ ಸ್ಥಾಪನೆ, ಬುಡಕಟ್ಟು ಮತದಾರರು ಹೆಚ್ಚಿರುವ ಕಡೆ 39 ಸಾಂಪ್ರದಾಯಿಕ ಮತಕೇಂದ್ರ ಹಾಗೂ ಇವಿಎಂ ಯಂತ್ರದಲ್ಲಿ ಬ್ರೈಲ್ ಲಿಪಿ ಅಳವಡಿಕೆ ಕ್ರಮಗಳನ್ನು ಅಳವಡಿಸಲಾಗುತ್ತಿದೆ.

ಮತದಾರರ ಅನುಕೂಲಕ್ಕಾಗಿ ಪ್ರತಿ ಮತಕೇಂದ್ರದಲ್ಲೂ ಸಹಾಯಕರ ನೆರವಿನಿಂದ ವೀಲ್ ಚೇರ್‌ನಲ್ಲಿ ಬರಲು ರ್ಯಾಂಪ್ ಸೌಕರ್ಯ ಕಲ್ಪಿಸಲಿದೆ. ಮನೆ ಮನೆಗೆ ಆಯೋಗದ ಸಿಬ್ಬಂದಿ ವೋಟರ್‌ಸ್ಲಿಪ್ ವಿತರಣೆ ಆರಂಭಗೊಂಡಿದ್ದು, ಅದರ ಜತೆಗೆ ವೋಟರ್ ಗೈಡ್‌ಗಳನ್ನು ಪೂರೈಕೆ ಮಾಡಲಾಗುತ್ತಿದೆ. ಮತದಾನದ ದಿನ ಚುನಾವಣೆ ಕುರಿತಂತೆ ಚುನಾವಣಾ ಆಯೋಗ ಭಿತ್ತಿಪತ್ರಗಳಲ್ಲಿ ಮಾಹಿತಿಯನ್ನು ಒದಗಿಸಲಿದೆ. ಚುನಾವಣಾ ಆಯೋಗ ಸಾಕಷ್ಟು ಜಾಗೃತಿ ಕಾರ್ಯಕ್ರಮ ಕೈಗೊಂಡಿದ್ದು, ಈ ಬಾರಿ ಶೇ. 80ರಷ್ಟು ಮತದಾನವಾಗುವ ನಿರೀಕ್ಷೆಯಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಮತಕೇಂದ್ರದ ಸಿಬ್ಬಂದಿಯ ಶೌಚಾಲಯ, ಪ್ರಥಮ ಚಿಕಿತ್ಸಾ ಪೆಟ್ಟಿಗೆ, ಮತದಾರರಿಗೆ ಕುಡಿಯುವ ನೀರಿನ ವ್ಯವಸ್ಥೆ, ದೃಷ್ಟಿದೋಷವಿರುವವರಿಗೆ ಅಭ್ಯರ್ಥಿಗಳ ಪಟ್ಟಿ ವೀಕ್ಷಣೆಗೆ ಭೂತಗನ್ನಡಿ ಹೀಗೆ ಹಲವು ಸೌಲಭ್ಯಗಳನ್ನು ಚುನಾವಣಾ ಆಯೋಗ ಮತದಾರರಿಗೆ ಕಲ್ಪಿಸಿಕೊಟ್ಟಿದೆ.