ಐಸಿಸಿ ವಿಶ್ವಕಪ್: ಪಿಸಿಬಿಯಿಂದ ಮನೋವೈದ್ಯನ ನೇಮಕ

ಕರಾಚಿ, ಎ.10: ವಿಶ್ವಕಪ್ ಅಭಿಯಾನ ಮುಂದಿರುವಂತೆ ಪಾಕಿಸ್ತಾನ ಕ್ರಿಕೆಟ್ ಮಂಡಳಿಯ (ಪಿಸಿಬಿ) ಅಧಿಕಾರಿಗಳು ರಾಷ್ಟ್ರೀಯ ತಂಡಕ್ಕೆ ಕ್ರೀಡಾ ಮನೋವೈದ್ಯರನ್ನಾಗಿ ತೈಮೂರ್ ಅಲಿ ಖಾನ್‌ರನ್ನು ನೇಮಿಸಲು ನಿರ್ಧರಿಸಿದ್ದಾರೆ.

ಪಾಕಿಸ್ತಾನ ತಂಡದ ಬೌಲಿಂಗ್ ಕೋಚ್ ಅಝರ್ ಮಹ್ಮೂದ್ , ಅಲಿ ಹೆಸರನ್ನು ಶಿಫಾರಸು ಮಾಡಿದ್ದಾರೆ.

ಮೇ 11ರವರೆಗೆ ಅವರ ನೇಮಕದ ಗುತ್ತಿಗೆ ಇರಲಿದೆ. ಪಾಕಿಸ್ತಾನ ತಂಡ ಎಪ್ರಿಲ್ 23ರಂದು ಇಂಗ್ಲೆಂಡ್‌ಗೆ ತೆರಳಲಿದ್ದು ಅಲ್ಲಿಯ ಕೌಂಟಿ ತಂಡಗಳೊಂದಿಗೆ ಅಭ್ಯಾಸ ಪಂದ್ಯಗಳನ್ನು ಆಡಲಿದೆ. ಅಲ್ಲದೆ ವಿಶ್ವಕಪ್‌ನ ಅಭ್ಯಾಸ ಪಂದ್ಯಗಳು ಆರಂಭವಾಗುವ ಮುನ್ನ ಇಂಗ್ಲೆಂಡ್ ವಿರುದ್ಧ ಒಂದು ಟಿ20 ಹಾಗೂ ಐದು ಏಕದಿನ ಪಂದ್ಯಗಳನ್ನು ಪಾಕ್ ತಂಡ ಆಡಲಿದೆ.

‘‘ವಿಶ್ವಕಪ್‌ನಂತಹ ಮಹಾ ಟೂರ್ನಿಗಳಿಗೆ ಸಿದ್ಧವಾಗಲು ಮಾನಸಿಕ ಅಂಶಗಳ ಕುರಿತು ಆಟಗಾರರೊಂದಿಗೆ ತೈಮೂರ್ ಕೆಲಸ ಮಾಡಲಿದ್ದಾರೆ. ಅಗತ್ಯ ಬಿದ್ದರೆ ಮಂಡಳಿಯು ಅವರ ಗುತ್ತಿಗೆಯನ್ನು ವಿಶ್ವಕಪ್‌ವರೆಗೆ ಮುಂದುವರಿಸಬಹುದು ಆದರೆ ಸದ್ಯ ಅವರು ಮೇ 11ರವರೆಗೆ ಮಾತ್ರ ತಂಡದೊಂದಿಗೆ ಇರಲಿದ್ದಾರೆ’’ ಎಂದು ಪಾಕಿಸ್ತಾನ ಕ್ರಿಕೆಟ್ ಮಂಡಳಿಯ ವಿಶ್ವಾಸಾರ್ಹ ಮೂಲಗಳು ತಿಳಿಸಿವೆ. ಇತ್ತೀಚೆಗೆ ಆಸ್ಟ್ರೇಲಿಯ ವಿರುದ್ಧ ಯುಎಇನಲ್ಲಿ ನಡೆದ ಏಕದಿನ ಸರಣಿಯಲ್ಲಿ ಪಾಕ್ ತಂಡದೊಂದಿಗೆ ಅಲಿ ಕೆಲಸ ಮಾಡಿದ್ದರು.

​