ರಫೇಲ್ ಹಾರಾಟ ತರಬೇತಿ ಪಡೆದ ಪಾಕ್ ಪೈಲಟ್ ಗಳು?: ಭಾರತಕ್ಕೆ ಆತಂಕ
‘ನಮಗೆ ಗೊತ್ತಿಲ್ಲ’ ಎಂದ ಡಸಾಲ್ಟ್ ಅಧಿಕಾರಿಗಳು
ಹೊಸದಿಲ್ಲಿ, ಎ.11: ಕತರ್ ವಾಯುಪಡೆ ಖರೀದಿಸಿರುವ ಹಾಗೂ ಫೆಬ್ರವರಿಯಲ್ಲಿ ಆ ದೇಶಕ್ಕೆ ಹಸ್ತಾಂತರಿಸಲಾಗಿರುವ ರಫೇಲ್ ಯುದ್ಧ ವಿಮಾನಗಳ ಹಾರಾಟ ನಡೆಸಲು ಪಾಕಿಸ್ತಾನಿ ವಿನಿಮಯ ಪೈಲಟ್ ಗಳಿಗೆ ಫ್ರಾನ್ಸ್ ನಲ್ಲಿ ತರಬೇತಿ ನೀಡಲಾಗಿದೆ ಎಂಬ ವರದಿಗಳು ಆತಂಕಕ್ಕೆಡೆ ಮಾಡಿರುವಂತೆಯೇ, ರಫೇಲ್ ಯುದ್ಧ ವಿಮಾನದ ಫ್ರೆಂಚ್ ತಯಾರಿಕಾ ಸಂಸ್ಥೆಯಾಗಿರುವ ಡಸಾಲ್ಟ್ ಏವಿಯೇಷನ್ ನ ಭಾರತದ ಅಧಿಕಾರಿಗಳು ತಮಗೆ ಈ ಬಗ್ಗೆ ತಿಳಿದಿಲ್ಲ ಎಂದಿದ್ದಾರೆ.
“ನವೆಂಬರ್ 2017ರಲ್ಲಿ ಕತರ್ ದೇಶಕ್ಕಾಗಿ ತರಬೇತಿ ಪಡೆದ ಮೊದಲ ಬ್ಯಾಚಿನ ಪೈಲಟ್ ಗಳು ಪಾಕಿಸ್ತಾನಿ ವಿನಿಮಯ ಅಧಿಕಾರಿಗಳಾಗಿದ್ದರು'' ಎಂದು ವಾಯುಯಾನ ಕ್ಷೇತ್ರದ ಸ್ವತಂತ್ರ ಮಾಧ್ಯಮವೊಂದು ವರದಿ ಮಾಡಿತ್ತು.
ಡಸಾಲ್ಟ್ ಸಂಸ್ಥೆಯ ಮೆರಿಗ್ನಾಕ್ ಕಾರ್ಖಾನೆಯಿಂದ ಫೆಬ್ರವರಿ 6ರಂದು ಕತರ್ ತನ್ನ ಮೊದಲ ರಫೇಲ್ ಯುದ್ಧ ವಿಮಾನ ಪಡೆದುಕೊಂಡಿತ್ತು. ಒಟ್ಟು 24 ರಫೇಲ್ ಯುದ್ಧ ವಿಮಾನಗಳಿಗಾಗಿ ಮೇ 2015ರಲ್ಲಿ ಕತರ್ ಒಪ್ಪಂದಕ್ಕೆ ಸಹಿ ಹಾಕಿದ್ದು ಡಿಸೆಂಬರ್ 2017ರಲ್ಲಿ ಅದು ಹೆಚ್ಚುವರಿ 12 ವಿಮಾನಗಳಿಗೆ ಬೇಡಿಕೆ ಸಲ್ಲಿಸಿತ್ತು ಎಂದು ಡಸಾಲ್ಟ್ ಹೇಳಿತ್ತು. 24 ಯುದ್ಧ ವಿಮಾನಗಳನ್ನು 6.3 ಬಿಲಿಯನ್ ಯುರೋಗೆ ಖರೀದಿಸುವ ಒಪ್ಪಂದಕ್ಕೆ ಬರಲಾಗಿತ್ತು.
ವಿವಿಧ ಮಧ್ಯ ಪೂರ್ವ ದೇಶಗಳ ಸೇನಾ ಪಡೆಗಳ ಜತೆ ಕಾರ್ಯಾಚರಿಸಲು ಪಾಕ್ ಮಿಲಿಟರಿ ಸಿಬ್ಬಂದಿಯನ್ನು ದಶಕಗಳಿಂದ ನಿಯೋಜಿಸಲಾಗುತ್ತಿದೆ. ಪಾಕಿಸ್ತಾನವು ಜೋರ್ಡಾನ್ ದೇಶದಿಂದಲೂ ಮಿಲಿಟರಿ ಉಪಕರಣಗಳನ್ನು ಪಡೆದಿದ್ದು ಅದು ಪಾಕಿಸ್ತಾನಕ್ಕೆ 13 ಹೆಚ್ಚುವರಿ ಎಫ್-16 ಯುದ್ಧ ವಿಮಾನಗಳನ್ನು ನೀಡಿದ್ದು, ಇವುಗಳಲ್ಲಿ ಕೆಲವನ್ನು ಫೆಬ್ರವರಿಯಲ್ಲಿ ಭಾರತದ ವಿರುದ್ಧದ ಸಂಘರ್ಷಮಯ ಪರಿಸ್ಥಿತಿಯಲ್ಲಿ ಪಾಕ್ ಬಳಸಿತ್ತು.
ಭಾರತ ತನ್ನ ಮೊದಲ ರಫೇಲ್ ವಿಮಾನವನ್ನು ಈ ವರ್ಷದ ಸೆಪ್ಟೆಂಬರ್ ತಿಂಗಳಿನಲ್ಲಿ ಪಡೆಯಲಿರುವುದರಿಂದ ಅದಕ್ಕಿಂತ ಮೊದಲೇ ಪಾಕ್ ಪೈಲಟ್ ಗಳಿಗೆ ಈ ವಿಮಾನ ಹಾರಾಟದ ಅನುಭವವಿರುವುದು ಭಾರತಕ್ಕೆ ಸಮಸ್ಯೆಯಾಗಬಹುದು. ಭಾರತಕ್ಕೆ ವಿಶಿಷ್ಟವಾದ ಕೆಲವೊಂದು ನಿರ್ದಿಷ್ಟ ಉನ್ನತೀಕರಣ ಸೌಲಭ್ಯಗಳನ್ನು ಈ ವಿಮಾನ ಹೊಂದಿದೆಯಾದರೂ ಪ್ರಮುಖವಾಗಿ ವಿಮಾನದ ರಾಡಾರ್ (ಅರ್ಬಿಇ-2 ಎಇಎಸ್ಎ) ಒಂದೇ ಆಗಿದೆ.