ಕ್ರಾಂತಿಕಾರಿ ಹಾಡಿನ ಮೂಲಕ ಜಗತ್ಪ್ರಸಿದ್ಧವಾದ ಅಲಾಸಲಾಹ್

ಸುಡಾನ್ ಎ. 11: ಸುಡಾನ್ ನಲ್ಲಿ ತೀವ್ರ ಸರಕಾರಿ ವಿರೋಧಿ ಪ್ರತಿಭಟನೆಗಳ ಫಲವಾಗಿ ಅಧ್ಯಕ್ಷ ಉಮರ್ ಅಲ್-ಬಶೀರ್ ಅಧಿಕಾರದಿಂದ ಹೊರಬಿದ್ದಿದ್ದಾರೆ. ವಾರಾಂತ್ಯದಲ್ಲಿ ನಡೆದ ಚಳವಳಿಗೆ ಸಂಬಂಧಿಸಿದ ಚಿತ್ರವೊಂದು ಜಗತ್ತಿನ ಗಮನವನ್ನು ಸೆಳೆದಿರುವುದನ್ನು ಸ್ಮರಿಸಬಹುದಾಗಿದೆ.

ಒಟ್ಟಾರೆ ಚಳವಳಿಯ ಸಂಕೇತವಾಗಿ ಹೊರಹೊಮ್ಮಿರುವ ಚಿತ್ರದಲ್ಲಿ ಕಾಣಿಸಿಕೊಂಡಿರುವ ಯುವತಿಯನ್ನು ಅಲಾ ಸಲಾಹ್ ಎಂಬುದಾಗಿ ಗುರುತಿಸಲಾಗಿದೆ. 22 ವರ್ಷದ ಅವರು ಸುಡಾನ್ ರಾಜಧಾನಿ ಖಾರ್ಟೂಮ್ನಲ್ಲಿ ಆರ್ಕಿಟೆಕ್ಚರ್ ವಿದ್ಯಾರ್ಥಿಯಾಗಿದ್ದಾರೆ. ಅವರು ಪ್ರತಿಭಟನಾ ಸಭೆಗಳಲ್ಲಿ ಕ್ರಾಂತಿಕಾರಿ ಹಾಡುಗಳನ್ನು ಹಾಡುತ್ತಾ ಜನರಲ್ಲಿ ಉತ್ಸಾಹ ತುಂಬಿಸುತ್ತಿದ್ದರು.

ಸೋಮವಾರ ಸಂಜೆ ಖಾರ್ಟೂಮ್ನಲ್ಲಿ ನಡೆದ ಪ್ರತಿಭಟನೆಯ ವೇಳೆ ತೆಗೆಯಲಾದ ಚಿತ್ರವು ವ್ಯಾಪಕವಾಗಿ ಹರಡಿರುವ ಬಗ್ಗೆ ನನಗೆ ಸಂತೋಷವಾಗಿದೆ ಎಂದು

ಬ್ರಿಟನ್  ನ ‘ಗಾರ್ಡಿಯನ್’ ಪತ್ರಿಕೆಗೆ ಅಲಾ ಹೇಳಿದ್ದಾರೆ. ‘‘ಸುಡಾನ್ ನಲ್ಲಿ ನಡೆಯುತ್ತಿರುವ ಕ್ರಾಂತಿಯನ್ನು ನೋಡಲು ಜಗತ್ತಿನಾದ್ಯಂತ ಇರುವ ಜನರಿಗೆ ನನ್ನ ಚಿತ್ರ ಸಹಾಯ ಮಾಡಿರುವ ಬಗ್ಗೆ ನನಗೆ ತುಂಬಾ ಸಂತೋಷವಾಗಿದೆ. ಪ್ರತಿಭಟನಾ ಚಳವಳಿ ಆರಂಭವಾದಂದಿನಿಂದ, ನಾನು ಪ್ರತಿ ದಿನ ಚಳವಳಿಗಳಲ್ಲಿಭಾಗವಹಿಸುತ್ತಿದ್ದೆ. ಯಾಕೆಂದರೆ, ನನ್ನ ದೇಶವನ್ನು ಪ್ರೀತಿಸುವಂತೆ ನನ್ನ ಹೆತ್ತವರು ನನ್ನನ್ನು ಬೆಳೆಸಿದ್ದಾರೆ’’ ಎಂದು ಅವರು ನುಡಿದರು.

ಸುಡಾನ್ ಅಧ್ಯಕ್ಷ ಉಮರ್ ಅಲ್-ಬಶೀರ್ರ 30 ವರ್ಷಗಳ ಆಡಳಿತದ ವಿರುದ್ಧ ಪ್ರತಿಭಟನೆಗಳು ಡಿಸೆಂಬರ್‌ ನಲ್ಲಿ ಆರಂಭಗೊಂಡಿದ್ದವು. ಆದರೆ, ಕಳೆದ ವಾರಾಂತ್ಯದಲ್ಲಿ ತೀವ್ರಗೊಂಡವು. ಖಾರ್ಟೂಮ್‌ ನ ಮಧ್ಯದಲ್ಲಿರುವ ಅತಿ ಭದ್ರತೆಯ ಸೇನಾ ಸಂಕೀರ್ಣದಎದುರಿನ ರಸೆಗಳಲ್ಲಿ ಭಾರೀ ಸಂಖ್ಯೆಯ ಪ್ರತಿಭಟನಕಾರರು ವಾರಾಂತ್ಯದಲ್ಲಿ ಜಮಾಯಿಸಿದ್ದರು.

‘‘ನಾನು ಯಾವುದೇ ರಾಜಕೀಯ ಹಿನ್ನೆಲೆಯಿಂದ ಬಂದವಳಲ್ಲ. ಉತ್ತಮ ಸುಡಾನ್‌  ಗಾಗಿ ಹೋರಾಟ ನಡೆಸಲು ನಾನು ಬೀದಿಗಿಳಿದೆ. ನಮ್ಮ ದೇಶ ಯಾವುದೇ ರಾಜಕೀಯ ಪಕ್ಷಗಳು ಮತ್ತು ಯಾವುದೇ ಪಂಥಗಳಿಗಿಂತ ಮೇಲಿದೆ’’ ಎಂದರು.
‘‘ಅವರು ಚಿತ್ರವನ್ನು ತೆಗೆದ ದಿನ, ನಾನು 10 ವಿವಿಧ ಪ್ರತಿಭಟನೆಗಳಲ್ಲಿ ಭಾಗವಹಿಸಿದ್ದೆ ಹಾಗೂ ಕ್ರಾಂತಿಕಾರಿ ಕವನವನ್ನು ವಾಚಿಸಿದ್ದೆ. ಅದು ಜನರಲ್ಲಿ ಉತ್ಸಾಹ ತುಂಬಿಸುತ್ತದೆ. ಆರಂಭದಲ್ಲಿ ನಾನು ಆರು ಮಹಿಳೆಯರ ಗುಂಪಿನ ಎದುರು ಹಾಡಿದೆ. ಅವರುನನ್ನೊಂದಿಗೆ ಹಾಡಿದರು. ಆ ಗುಂಪು ಬಳಿಕ ದೊಡ್ಡದಾಯಿತು’’ ಎಂದು ಅಲಾ ಹೇಳಿದರು.