ತನ್ನ ವಿರುದ್ಧ ಟ್ವೀಟ್ ಮಾಡುವ ಅಕ್ಷಯ್ ಪತ್ನಿ ಟ್ವಿಂಕಲ್ ಖನ್ನಾ ಬಗ್ಗೆ ಮೋದಿ ಪ್ರತಿಕ್ರಿಯಿಸಿದ್ದು ಹೀಗೆ…

ಹೊಸದಿಲ್ಲಿ, ಎ.24: ನಟ ಅಕ್ಷಯ್ ಕುಮಾರ್ ಜತೆ ಪ್ರಧಾನಿ ನರೇಂದ್ರ ಮೋದಿ ದಿಲ್ಲಿಯ ತಮ್ಮ ಅಧಿಕೃತ ನಿವಾಸದಲ್ಲಿ ‘ರಾಜಕೀಯೇತರ’ ಸಂದರ್ಶನ ನಡೆಸಿದರು.

ಈ ಸಂದರ್ಭ ಅಕ್ಷಯ್ ಪತ್ನಿ ಟ್ವಿಂಕಲ್ ಖನ್ನಾ ಬಗ್ಗೆ ಪ್ರಧಾನಿ ಮೋದಿ ಮಾತನಾಡಿದರು.

“ನಾನು ನಿಮ್ಮನ್ನು (ಅಕ್ಷಯ್ ಕುಮಾರ್) ಮತ್ತು ಟ್ವಿಂಕಲ್ ಖನ್ನಾ ಜಿ ಅವರನ್ನು ಟ್ವಿಟ್ಟರ್ ನಲ್ಲಿ ಫಾಲೋ ಮಾಡುತ್ತೇನೆ. ಆಕೆ ನನ್ನನ್ನು ಟಾರ್ಗೆಟ್  ಮಾಡುತ್ತಿರುವ ರೀತಿಯನ್ನು ನೋಡಿದಾಗ ನಿಮ್ಮ ಕುಟುಂಬ ಜೀವನದಲ್ಲಿ ಶಾಂತಿಯಿದೆ ಎಂದು ನನಗನಿಸುತ್ತದೆ. ಆಕೆಯ ಎಲ್ಲಾ ಕೋಪ ನನ್ನ ಮೇಲೆ ತೀರಿಸುತ್ತಾರೆಂದು ಅನಿಸುತ್ತದೆ. ಆದುದರಿಂದ ನಿಮಗೆ ಶಾಂತಿಯಿರಬಹುದು'' ಎಂದು ಪ್ರಧಾನಿ ಹೇಳಿದಾಗ ಅಕ್ಷಯ್ ನಕ್ಕು ಬಿಟ್ಟರು.

ಇದಕ್ಕೆ ತಮ್ಮ ಟ್ವಿಟರ್ ಹ್ಯಾಂಡಲ್ ಮೂಲಕ ಪ್ರತಿಕ್ರಿಯಿಸಿದ ಟ್ವಿಂಕಲ್ ``ಇದನ್ನು ಸಕಾರಾತ್ಮಕ ರೀತಿಯಲ್ಲಿ ನೋಡುವ ವಿಧಾನ ನನ್ನದು. ನನ್ನ ಹೆಸರಿನವಳೊಬ್ಬಳಿದ್ದಾಳೆ ಎಂಬುದು ಪ್ರಧಾನಿಗೆ ತಿಳಿದಿದೆಯಲ್ಲದೆ ನನ್ನ ಟ್ವೀಟ್ ಗಳನ್ನೂ ಅವರು ಓದುತ್ತಾರೆಂದು ತಿಳಿಯಿತು'' ಎಂದು ಪ್ರತಿಕ್ರಿಯಿಸಿದ್ದಾರೆ.

ತಮ್ಮ ಹಾಸ್ಯ ಲೇಪಿತ ಟ್ವೀಟ್ ಗಳಿಗೆ ಹಾಗೂ ಹಲವಾರು ಕೃತಿಗಳಿಗೆ ಹೆಸರು ಪಡೆದಿರುವ ಟ್ವಿಂಕಲ್ ಖನ್ನಾ ಎಪ್ರಿಲ್ 21ರಂದು ಬಿಜೆಪಿ ಕುರಿತಾಗಿ ಕಡೆಯ ಬಾರಿ ಒಂದು ಟ್ವೀಟ್ ಮಾಡಿದ್ದರು. ನಟಿ ಹಾಗೂ ಮಥುರಾ ಬಿಜೆಪಿ ಅಭ್ಯರ್ಥಿ ಹೇಮಾ ಮಾಲಿನಿ ಬಿಸಿಲಿನ ಬೇಗೆ ನಿವಾರಿಸಲು ಫ್ಯಾನ್ ಗಳಿದ್ದ ಟ್ರ್ಯಾಕ್ಟರ್ ನಲ್ಲಿ ಕುಳಿತು ಮತ ಯಾಚಿಸಿದ್ದ ಚಿತ್ರಗಳನ್ನು ಪೋಸ್ಟ್ ಮಾಡಿ ಅದಕ್ಕೆ ವಿಡಂಬನಾತ್ಮಕವಾಗಿ ಟ್ವಿಂಕಲ್ ಪ್ರತಿಕ್ರಿಯಿಸಿದ್ದರು.

“ಟ್ವಿಂಕಲ್ ಅವರ ಟ್ವಿಟ್ಟರ್ ಪೋಸ್ಟ್ ಗಳನ್ನು ಓದಿ ಖುಷಿ ಪಡುತ್ತೇನೆ'' ಎಂದು ಪ್ರಧಾನಿ ಹೇಳಿದರು. ನಂತರ ಅಕ್ಷಯ್ ದೊಡ್ಡ ಟ್ಯಾಬ್ ಹೊರತೆಗೆದು ಅದರಲ್ಲಿ ಮೋದಿ ಕುರಿತಾದ ಹಲವು ಮೀಮ್ಸ್ ತೋರಿಸಿ ಅದರ ಬಗ್ಗೆ ಏನನಿಸುತ್ತದೆ ಎಂದು ಕೇಳಿದರು ``ನನಗೆ ಖುಷಿಯಾಗುತ್ತದೆ. ನಾನು ಮೋದಿಯತ್ತ ಕಡಿಮೆ ನೋಡುತ್ತೇನೆ. ಅಲ್ಲಿನ ಕ್ರಿಯಾತ್ಮಕತೆಯತ್ತ ಹೆಚ್ಚು ಗಮನ ನೀಡುತ್ತೇನೆ. ಸಾಮಾಜಿಕ ಜಾಲತಾಣದ ದೊಡ್ಡ ಲಾಭವೆಂದರೆ ಜನಸಾಮಾನ್ಯರ ಮನಸ್ಸಿನ ಭಾವನೆಗಳನ್ನು ಅರಿಯಲು ಅದು ಸಹಾಯ ಮಾಡುತ್ತದೆ'' ಎಂದು ಮೋದಿ ಹೇಳಿದರು.