“ಮೋದಿ ಸರಕಾರದ ಆಡಳಿತದಲ್ಲಿ ದೇಶದ ಮೇಲಿನ ಸಾಲ 30 ಲ.ಕೋ.ರೂ. ಏರಿಕೆ”

ಹೊಸದಿಲ್ಲಿ,ಎ.30: ಬಿಜೆಪಿ ನೇತೃತ್ವದ ಸರಕಾರವು ಭಾರತದ ಆರ್ಥಿಕತೆಯನ್ನು ನಾಶಗೊಳಿಸುತ್ತಿದೆ ಎಂದು ಮಂಗಳವಾರ ಆರೋಪಿಸಿದ ಕಾಂಗ್ರೆಸ್,ಮೋದಿ ಸರಕಾರದ ಆಡಳಿತದ 57 ತಿಂಗಳುಗಳಲ್ಲಿ ದೇಶದ ಮೇಲಿನ ಸಾಲದ ಹೊರೆಯಲ್ಲಿ 30 ಲ.ಕೋ.ರೂ.ಗೂ ಅಧಿಕ ಏರಿಕೆಯಾಗಿದೆ ಮತ್ತು ದೇಶವನ್ನು ಅಂತ್ಯವಿಲ್ಲದ ಸಾಲದ ಸುಳಿಯಲ್ಲಿ ಸಿಲುಕಿಸಿದೆ ಎಂದು ಹೇಳಿದೆ.

ಮಾ.2014 ಮತ್ತು ಡಿ.2018ರ ನಡುವೆ ದೇಶದ ಸಾಲವು ಶೇ.57ರಷ್ಟು ಏರಿಕೆಯಾಗಿದ್ದು,83,40,026 ಕೋ.ರೂ.ಗೆ ತಲುಪಿದೆ ಎಂದು ವಿತ್ತ ಸಚಿವಾಲಯದ ದಾಖಲೆಗಳನ್ನು ಉಲ್ಲೇಖಿಸಿ ತಿಳಿಸಿದ ಕಾಂಗ್ರೆಸ್‌ ನ ಮುಖ್ಯ ವಕ್ತಾರ ರಣದೀಪ ಸುರ್ಜೆವಾಲಾ ಅವರು,ಈ ಅವಧಿಯಲ್ಲಿ ಮೋದಿ ಸರಕಾರವು 30,28,945 ಕೋ.ರೂ.ಗಳ ಸಾಲವನ್ನೆತ್ತಿದೆ ಎನ್ನುವ ಆಘಾತಕಾರಿ ಅಂಶವನ್ನು ವಿತ್ತಸಚಿವಾಲಯದ ದಾಖಲೆಗಳು ಪ್ರತಿಫಲಿಸಿವೆ. 70 ವರ್ಷಗಳಲ್ಲಿ ಮಾ.2014ರವರೆಗೆ ದೇಶದ ಮೇಲಿನ ಒಟ್ಟು ಸಾಲದ ಮೊತ್ತ 53,11,081 ಕೋ.ರೂ.ಗಳಾಗಿದ್ದವು. ಮೋದಿಯವರು ಭಾರತದ ಸಂಪನ್ಮೂಲಗಳ ಮೇಲೆ ಸಾಲಗಳನ್ನೆತ್ತಿದ್ದಾರೆ ಮತ್ತು ಭಾರತದ ಆರ್ಥಿಕತೆಯನ್ನು ಸಂಪೂರ್ಣವಾಗಿ ನಾಶಗೊಳಿಸಿದ್ದಾರೆ ಎನ್ನವುದು ಸ್ಪಷ್ಟವಾಗಿದೆ ಎಂದರು.

ಮೋದಿ ಮತ್ತು ಅವರ ಸರಕಾರದ ಆರ್ಥಿಕ ದುರಾಡಳಿತದಿಂದಾಗಿ ಈ ದೇಶದ 130 ಕೋ.ಜನರು ಈ ಸರಕಾರದ ನಾಲ್ಕು ವರ್ಷ ಒಂಭತ್ತು ತಿಂಗಳ ಅಧಿಕಾರಾವಧಿಯಲ್ಲಿ ತಲಾ 23,300 ಕೋ.ರೂ.ಗಳ ಹೆಚ್ಚುವರಿ ಸಾಲದ ಹೊರೆಯನ್ನು ಹೊರುವಂತಾಗಿದೆ. ಮಾ.2014ರವರೆೆಗಿನ 70 ವರ್ಷಗಳಲ್ಲಿ ಜನರ ಮೇಲಿನ ಸಾಲದ ಹೊರೆ ತಲಾ 40,854 ರೂ.ಮಾತ್ರ ಆಗಿತ್ತು. ಅದೀಗ 64,154 ರೂ.ಗೇರಿದೆ ಎಂದ ಸುರ್ಜೆವಾಲಾ,ಮಾಹಿತಿಗಳನ್ನು ಬಚ್ಚಿಡುವುದು ಮೋದಿ ಸರಕಾರದ ಅಭ್ಯಾಸವಾಗಿದೆ. ಡಿ.2018ರಿಂದ ಮಾ.2019ರವರೆಗೆ ತಾನು ಎತ್ತಿರುವ ಹೆಚ್ಚುವರಿ ಸಾಲವನ್ನು ಬಹಿರಂಗಗೊಳಿಸಲು ಅದು ನಿರಾಕರಿಸಿದೆ ಎಂದರು.

ಸಾಲದ ದಾಖಲೆಗಳನ್ನು ತಡಕಾಡಿದಾಗ ಮಾ.2019ರವರೆಗೆ ಈ ಸರಕಾರವು ತೆಗೆದುಕೊಂಡಿರುವ ಹೆಚ್ಚುವರಿ ಸಾಲ 7,16,700 ಕೋ.ರೂ.ಆಗಲಿದೆ ಎನ್ನುವುದನ್ನು ಅವು ಸೂಚಿಸಿವೆ. ಇದರೊಂದಿಗೆ ದೇಶದ ಮೇಲಿನ ಸಾಲದ ಹೊರೆಯು 90,56,000 ಕೋ.ರೂ.ಗೆ ಏರುತ್ತದೆ ಎಂದ ಅವರು,ಬಿಜೆಪಿ ಸರಕಾರವು ಬಿಎಸ್‌ಎನ್‌ಎಲ್, ಎಂಟಿಎನ್‌ಎಲ್, ಎಚ್‌ಎಎಲ್,ಒಎನ್‌ಜಿಸಿ ಮತ್ತು ಸೇಲ್‌ನಂತಹ ಸಂಸ್ಥೆೆಗಳನ್ನೂ ಸಾಲದ ಸುಳಿಯಲ್ಲಿ ಸಿಲುಕಿಸುತ್ತಿದೆ ಎಂದು ಆರೋಪಿಸಿದರು.