ಚಿತ್ರನಟಿಗೆ ಲೈಂಗಿಕ ಹಲ್ಲೆ ಪ್ರಕರಣ: ದಿಲೀಪ್ ವಿರುದ್ಧ ವಿಚಾರಣೆಗೆ ಸುಪ್ರೀಂ ತಡೆಯಾಜ್ಞೆ
ಹೊಸದಿಲ್ಲಿ,ಎ.4: ಮಲಯಾಳಂ ಚಿತ್ರನಟಿಯೊಬ್ಬರನ್ನು ಅಪಹರಿಸಿದ ಹಾಗೂ ಲೈಂಗಿಕ ಹಲ್ಲೆ ನಡೆಸಿದ ಪ್ರಕರಣಕ್ಕೆ ಸಂಬಂಧಿಸಿ ನಟ ದಿಲೀಪ್‌ನನ್ನು ವಿಚಾರಣೆಗೊಳಪಡಿಸುವುದಕ್ಕೆ ಸುಪ್ರೀಂಕೋರ್ಟ್ ಶುಕ್ರವಾರ ತಡೆಯಾಜ್ಞೆ ನೀಡಿದೆ.ನಟಿಯ ಮೇಲೆ ಲೈಂಗಿಕ ಹಲ್ಲೆಯ ವಿಡಿಯೋ ಚಿತ್ರಿಕೆಯನ್ನು ಒಳಗೊಂಡಿದೆಯೆನ್ನಲಾದ ಮೆಮೊರಿಕಾರ್ಡ್ ಅನ್ನು ಕಾನೂನಿನಡಿ ದಾಖಲೆಯಾಗಿ ಪರಿಗಣಿಸಬಹುದೇ ಎಂಬುದನ್ನು ಪರಿಶೀಲಿಸಲು ಕೇರಳ ಸರಕಾರವು ಕಾಲಾವಕಾಶ ಕೋರಿದ್ದರಿಂದ ನ್ಯಾಯಾಲಯವು ವಿಚಾರಣೆಗೆ ತಡೆಯಾಜ್ಞೆ ನೀಡಿದೆ.
ಸರಕಾರವು ಮೆಮೊರಿ ಕಾರ್ಡ್ ಅನ್ನು ಭೌತಿಕ ಪುರಾವೆಯಾಗಿ ಪರಿಗಣಿಸಬಹುದೆಂದು ಸರಕಾರವು ಪ್ರತಿಪಾದಿಸುತ್ತದೆ. ಆದರೆ ಈ ವಾದವನ್ನು ನ್ಯಾಯಾಲಯದ ಮುಂದೆ ಮಂಡಿಸಲು ನಮಗೆ ಹೆಚ್ಚು ಕಾಲಾವಕಾಶ ಬೇಕಿದೆ’’ ಎಂದು ಕೇರಳ ಪಬ್ಲಿಕ್ ಪ್ರಾಸಿಕ್ಯೂಟ್ ಪ್ರಕಾಶ್ ಸುದ್ದಿಸಂಸ್ಥೆಯೊಂದಕ್ಕೆ ತಿಳಿಸಿದ್ದಾರೆ.
ಮೆಮೊರಿ ಕಾರ್ಡ್‌ನಲ್ಲಿರುವ ವಿಡಿಯೋ ನಕಲಿಯೆಂದು ದಿಲೀಪ್ ಆರೋಪಿಸಿದ್ದರು ಹಾಗೂ ಪರಿಶೀಲನೆಗಾಗಿ ಅದನ್ನು ತನಗೆ ಒದಗಿಸಬೇಕೆಂದು ಅವರು ನ್ಯಾಯಾಲಯವನ್ನು ಕೋರಿದ್ದರು. ಕಳೆದ ವರ್ಷವೂ ದಿಲೀಪ್ ಮೆಮೊರಿ ಕಾರ್ಡ್ ಪರಿಶೀಲಿಸಲು ಹೈಕೋರ್ಟ್ ಅವಕಾಶ ನಿರಾಕರಿಸಿತ್ತು. ಕಾನೂನಿನಡಿ ಅದನ್ನು ದಾಖಲೆಯಾಗಿ ಪರಿಗಣಿಸಲು ಅವಕಾಶವಿಲ್ಲವೆಂದು ಅದು ಅಭಿಪ್ರಾಯಿಸಿತ್ತು.
ಸದ್ಯಕ್ಕೆ ದಿಲೀಪ್ ವಿರುದ್ಧ ಯಾವುದೇ ಆರೋಪವನ್ನು ಹೊರಿಸಲು ತಾನು ಬಯಸುವುದಿಲ್ಲವೆಂದು ಕೇರಳ ಸರಕಾರವು ಎಪ್ರಿಲ್ 9ರಂದು ಸುಪ್ರೀಂಕೋರ್ಟ್‌ಗೆ ತಿಳಿಸಿತ್ತು. ಲೈಂಗಿಕ ದೌರ್ಜನ್ಯದ ವಿಡಿಯೋ ಇರುವ ಮೆಮೊರಿಕಾರ್ಡ್ ಕಾನೂನುಬದ್ಧ ದಾಖಲೆಯೇ ಎಂಬುದನ್ನು ನಿರ್ಧರಿಸಲು ತನಗೆ ಕಾಲಾವಕಾಶ ನೀಡುವಂತೆಯೂ ಅದು ನ್ಯಾಯಾಲಯವನ್ನು ಕೋರಿದೆ.
ಪ್ರಕರಣದ ವಿಚಾರಣೆಯ ಕಲಾಪಗಳು ಸುಪ್ರೀಂಕೋರ್ಟ್‌ನಲ್ಲಿ ಪೂರ್ಣಗೊಳ್ಳುವವರೆಗೆ ವಿಚಾರಣಾ ನ್ಯಾಯಾಲಯ ಅದರ ಅಲಿಕೆ ನಡೆಸುವಂತಿಲ್ಲವೆಂದು ಸುಪ್ರೀಂಕೋರ್ಟ್ ತಿಳಿಸಿದೆ. ಪ್ರಕರಣದ ಮುಂದಿನ ವಿಚಾರಣೆಯು ಜುಲೈ ತಿಂಗಳ ಮೂರನೆ ವಾರ ನಡೆಯಲಿದೆಯೆಂದು ನ್ಯಾಯಾಲಯ ತಿಳಿಸಿದೆ.
ಚಿತ್ರನಟಿಯನ್ನು ಎರ್ನಾಕುಲಂ ಸಮೀಪದ ಅಂಗಮಾಲಿಯಲ್ಲಿ ಫೆಬ್ರವರಿ 17,2017ರ ರಾತ್ರಿಯಂದು ದುಷ್ಕರ್ಮಿಗಳ ಗುಂಪೊಂದು ಅಪಹರಿಸಿತ್ತು ಹಾಗೂ ಲೈಂಗಿಕ ಹಲ್ಲೆ ನಡೆಸಿತ್ತು. ಈ ದಾಳಿಯ ಹಿಂದಿನ ಸೂತ್ರಧಾರಿ ದಿಲೀಪ್ ಎಂದು ಪೊಲೀಸರು ಆರೋಪಿಸಿ, ಮೊಕದ್ದಮೆ ದಾಖಲಿಸಿದ್ದರು. ದುಷ್ಕರ್ಮಿಗಳ ಗುಂಪಿನಲ್ಲಿದ್ದ ಪಲ್ಸರ್ ಸುನಿ ಪ್ರಕರಣದ ಪ್ರಮುಖ ಆರೋಪಿಯಾಗಿದ್ದು, ದಿಲೀಪ್ ಸೇರಿದಂತೆ ಇತರ ಐವರನ್ನು ಆರೋಪಿಗಳೆಂದು ಪೊಲೀಸರು ಪೂರಕ ದೋಷರೋಪಪಟ್ಟಿಯಲ್ಲಿ ಹೆಸರಿಸಿದ್ದರು.
