ಕಳೆದ ವರ್ಷ ಭಾರತವನ್ನು ತೊರೆದ 5,000 ಮಿಲಿಯಾಧಿಪತಿಗಳು

 ಹೊಸದಿಲ್ಲಿ,ಮೇ 10: ಅಂಕಿಅಂಶಗಳಂತೆ 2008ರಿಂದಲೂ ಭಾರತವು ಸಂಪತ್ತು ಸೃಷ್ಟಿಸುವ ವಿಶ್ವದ ಅಗ್ರ ರಾಜ್ಯಗಳಲ್ಲಿ ಒಂದಾಗಿದೆ. ಆದರೆ ಇದು ಕಥೆಯ ಅರ್ಧ ಭಾಗ ಮಾತ್ರ. ದೇಶವು ವಲಸೆಯ ಮೂಲಕ ಭಾರೀ ಶ್ರೀಮಂತರನ್ನೂ ಕಳೆದುಕೊಳ್ಳುತ್ತಿದೆ. ಕಳೆದ ವರ್ಷವೊಂದರಲ್ಲೆ 5,000 ಮಿಲಿಯಾಧಿಪತಿಗಳು ಭಾರತವನ್ನು ತೊರೆದು ವಿದೇಶಗಳನ್ನು ತಮ್ಮ ಮನೆಗಳನ್ನಾಗಿಸಿಕೊಂಡಿದ್ದಾರೆ.

 ಈ ವಿದ್ಯಮಾನ ಭಾರತದಲ್ಲಿ ಮಾತ್ರ ಸಂಭವಿಸುತ್ತಿರುವುದಲ್ಲ. ಭಾರೀ ಶ್ರೀಮಂತರ ಜಾಗತಿಕ ವಲಸೆಯು ಕಳೆದ ಕೆಲವು ವರ್ಷಗಳಿಂದ ಹೆಚ್ಚುತ್ತಿರುವ ಪ್ರವೃತ್ತಿಯಾಗಿದೆ. ಚೀನಾ,ರಷ್ಯಾ ಮತ್ತು ಭಾರತ ಮೊದಲ ಮೂರು ಅಗ್ರ ರಾಷ್ಟ್ರಗಳಾಗಿದ್ದರೆ ಬ್ರಿಟನ್ ಮತ್ತು ಫ್ರಾನ್ಸ್ ನಂತರದ ಸ್ಥಾನಗಳಲ್ಲಿವೆ.

ಭಾರೀ ಶ್ರೀಮಂತರ ಪಾಲಿಗೆ ಆಸ್ಟ್ರೇಲಿಯಾ ಅತ್ಯಂತ ನೆಚ್ಚಿನ ದೇಶವಾಗಿದ್ದರೆ,ಅಮೆರಿಕ ನಂತರದ ಸ್ಥಾನದಲ್ಲಿದೆ. 2008ರಿಂದ 12000ಕ್ಕೂ ಹೆಚ್ಚಿನ ಶ್ರೀಮಂತರು ಆಸ್ಟ್ರೇಲಿಯಾಕ್ಕೆ ತೆರಳಿದ್ದರೆ,ಅಮೆರಿಕಕ್ಕೆ 10,000 ಮತ್ತು ಕೆನಡಾಕ್ಕೆ 4,000 ಜನರು ವಲಸೆ ಹೋಗಿದ್ದಾರೆ.

 ಕಳೆದ 10 ವರ್ಷಗಳಲ್ಲಿ ಶೇ.130ರಷ್ಟು ಬೆಳವಣಿಗೆಯನ್ನು ಸಾಧಿಸುವ ಮೂಲಕ ಚೀನಾ ಸಂಪತ್ತು ಸೃಷ್ಟಿ ವಿಷಯದಲ್ಲಿ ಅತ್ಯುತ್ತಮ ಸಾಧನೆಯನ್ನು ಮಾಡಿದ್ದರೆ.ಶೇ.96ರಷ್ಟು ಬೆಳವಣಿಗೆಯೊಂದಿಗೆ ಭಾರತ ನಾಲ್ಕನೇ ಸ್ಥಾನದಲ್ಲಿದೆ. 2 ಮತ್ತು 3ನೇ ಸ್ಥಾನಗಳು ಮಾರಿಷಿಯಸ್ ಮತ್ತು ಇಥಿಯೋಪಿಯಾ ಪಾಲಾಗಿವೆ. ಇದೇ ವೇಳೆ ಇಟಲಿ ಮತ್ತು ವೆನಿಝುವೆಲಾ ಶೇ.14 ಮತ್ತು ಶೇ.68ರಷ್ಟು ಕುಸಿತವನ್ನು ಕಂಡಿವೆ.

ಅಂದಾಜುಗಳಂತೆ 2028ರ ವೇಳೆಗೆ ಭಾರತವು ನಾಲ್ಕನೇ ಬೃಹತ್ ಸಂಪತ್ತು ಮಾರುಕಟ್ಟೆಯಾಗಲಿದೆ. ಅಮೆರಿಕ,ಚೀನಾ ಮತ್ತು ಜಪಾನ್ ಮೊದಲ ಮೂರು ಸ್ಥಾನಗಳಲ್ಲಿದ್ದರೆ,ಬ್ರಿಟನ್ ಮತ್ತು ಜರ್ಮನಿ ಭಾರತದ ನಂತರದ ಸ್ಥಾನಗಳಲ್ಲಿರಲಿವೆ.

 ಆದರೆ ಭಾರತದಲ್ಲಿ ಸಂಪತ್ತು ವಿತರಣೆಯ ವಾಸ್ತವಿಕ ಚಿತ್ರಣವು ಅಷ್ಟೇನೂ ಖುಷಿ ನೀಡುವುದಿಲ್ಲ. ಭಾರತದ ಶೇ.48ರಷ್ಟು ಸಂಪತ್ತು ಭಾರೀ ಶ್ರೀಮಂತರ ಮುಷ್ಠಿಯಲ್ಲಿದೆ. ಜಾಗತಿಕ ಸರಾಸರಿ ಶೇ.36ರಷ್ಟಿದೆ.