ಅಂಬೇಡ್ಕರ್ ವಿರೋಧಿಸಿದ ಸಿದ್ಧಾಂತ ಮರು ಪ್ರವೇಶಿಸುತ್ತಿದೆ: ಕೋಟಿಗಾನಹಳ್ಳಿ ರಾಮಯ್ಯ

ಬೆಂಗಳೂರು, ಮೇ 14: ಡಾ.ಬಿ.ಆರ್.ಅಂಬೇಡ್ಕರ್ ಅವರು ವಿರೋಧಿಸಿದ ಸಿದ್ಧಾಂತಗಳಿಂದು ದೇಶದ ಶೋಷಿತ ಸಮುದಾಯಗಳ ಮನೆಮನೆಗೆ ಮರು ಪ್ರವೇಶ ಪಡೆಯುತ್ತಿದ್ದು, ಅದರ ಕುರಿತು ಜಾಗೃತಗೊಳ್ಳಬೇಕಿದೆ ಎಂದು ಸಾಹಿತಿ ಕೋಟಿಗಾನಹಳ್ಳಿ ರಾಮಯ್ಯ ಹೇಳಿದ್ದಾರೆ.

ಮಂಗಳವಾರ ನಗರದ ಖಾಸಗಿ ಹೊಟೇಲ್‌ನಲ್ಲಿ ಸಮತಾ ಸೈನಿಕ ದಳದ ವತಿಯಿಂದ ಆಯೋಜಿಸಿದ್ದ ಪ್ರೊ.ಎಂ.ನಾರಾಯಣಸ್ವಾಮಿ ಅವರ ಭೀಮ ಅಂಬೇಡ್ಕರ್ ಡಾ.ಬಿ.ಆರ್.ಅಂಬೇಡ್ಕರ್ ಆದದ್ದು ‘ಮಹಾ ನದಿಯ ಉಗಮ’ ಕೃತಿಯ ಬಿಡುಗಡೆ ಸಮಾರಂಭದಲ್ಲಿ ಪಾಲ್ಗೊಂಡು ಅವರು ಮಾತನಾಡಿದರು.

ಇತ್ತೀಚಿಗೆ ಅಂಬೇಡ್ಕರ್‌ರನ್ನು ಪ್ರತಿಯೊಬ್ಬರೂ ತಮಗೆ ಬೇಕಾದ ರೀತಿಯಲ್ಲಿ ವ್ಯಾಖ್ಯಾನಿಸಿಕೊಳ್ಳುತ್ತಿದ್ದಾರೆ. ನಾವೇ ಅವರ ಸಿದ್ಧಾಂತದ ಅಡಿಯಲ್ಲಿ ಸಾಗುತ್ತಿರುವ ನಿಜವಾದವರು ಎಂದು ಬಿಂಬಿಸಿಕೊಳ್ಳಲಾಗುತ್ತಿದೆ. ಇದರ ನಡುವೆ ನೂರು ವರ್ಷಗಳ ಹಿಂದೆ ಅಂಬೇಡ್ಕರ್ ಯಾವ ಪ್ರಶ್ನೆಗಳನ್ನಿಟ್ಟುಕೊಂಡು ಹೋರಾಟ ಮಾಡಿದರೋ, ಯಾವ ಸಿದ್ಧಾಂತವನ್ನು ವಿರೋಧಿಸಿದರೋ ಅದುವೇ ನಮ್ಮ ಮನೆಗಳಿಗೆ ಪ್ರವೇಶಿಸುತ್ತಿವೆ ಎಂದು ಬೇಸರ ವ್ಯಕ್ತಪಡಿಸಿದರು.

ದೇಶದಲ್ಲಿಂದು ಅಂಬೇಡ್ಕರ್‌ರನ್ನು ನಾಯಕನನ್ನಾಗಿಸಿಕೊಂಡು ಚಳವಳಿ ಮುಂದುವರಿಸುತ್ತಿರುವ ದಲಿತ ನಾಯಕರು ಅವರನ್ನು ಸರಿಯಾದ ದಾರಿಯಲ್ಲಿ ನಡೆಸುತ್ತಿಲ್ಲ. ಹೀಗಾಗಿ, ಅಂಬೇಡ್ಕರ್‌ರ ಬಗ್ಗೆ ಪ್ರತಿಯೊಬ್ಬರೂ ಅವರ ಸಣ್ಣ ಸಣ್ಣ ನೋಟಗಳಿಂದ ಅರ್ಥ ಮಾಡಿಕೊಳ್ಳಬೇಕು. ನಿಜವಾಗಿ ಅಂಬೇಡ್ಕರ್ ಎಲ್ಲಿ ಬದುಕಿದ್ದಾರೆ ಎಂದು ಅರ್ಥೈಸಿಕೊಂಡು, ಅವರ ಹೋರಾಟದ ದಿಕ್ಕನ್ನು ಸರಿದಾರಿಯಲ್ಲಿ ನಡೆಸುವಂತಾಗಬೇಕು ಎಂದು ಹೇಳಿದರು.

ಡಾ.ಬಿ.ಆರ್.ಅಂಬೇಡ್ಕರ್ ಹಚ್ಚಿದ ಬೆಳಕಿನ ದೀಪವನ್ನು ಕೆಲವರು ಮುಂದುವರಿಸಿಕೊಂಡು ಸಾಗಿದ್ದರು. ಅವರ ಬಳಿಕ ಬಂದ ಯಾರೂ ಅದನ್ನು ಮುಂದುವರಿಸುತ್ತಿಲ್ಲ ಎಂದ ಅವರು, ಬೌದ್ಧಿಕ ದಿವಾಳಿತನ ಹಾಗೂ ಆಮಿಷಗಳಿಗೆ ಬಲಿಯಾಗಿ ದಲಿತ ಸಮುದಾಯವಿಂದು ನಮ್ಮ ಮನೆಯಲ್ಲಿರುವ ಬೆಳಕಿನ ದೀಪವನ್ನು ಆರಿಸಿ, ಕತ್ತಲಾಗಿಸಿಕೊಳ್ಳುವ ಕಡೆಗೆ ಸಾಗಿದೆ. ಈ ಸಂದರ್ಭದಲ್ಲಿ ಹೊಸ ರೀತಿಯ ಪರ್ಯಾಯ ರಾಜಕಾರಣವನ್ನು ಕಟ್ಟುವ ಕಡೆ ಸಾಗಬೇಕು. ಪ್ರತಿಯೊಬ್ಬರ ಮನೆಯಲ್ಲಿಯೂ ಅಂಬೇಡ್ಕರ್‌ರ ಚಿಂತನೆಗಳ ಚರ್ಚೆ ನಡೆಯಬೇಕು ಎಂದು ಕರೆ ನೀಡಿದರು. ದೇಶದಲ್ಲಿರುವ ಅಂಬೇಡ್ಕರ್ ಅಧ್ಯಯನ ಪೀಠಗಳು, ವಿದ್ಯಾಸಂಸ್ಥೆಗಳಿಂದ ಅಂಬೇಡ್ಕರ್‌ರ ವಿಚಾರಗಳನ್ನು ಪಸರಿಸಲು ವಿಫಲವಾಗಿವೆ ಎಂದ ಅವರು, ಈ ಆಡಳಿತಾತ್ಮಕ ಸಂಸ್ಥೆಗಳಲ್ಲಿರುವ ಶೇ.99 ರಷ್ಟು ಸಿಬ್ಬಂದಿಗೆ ಅಂಬೇಡ್ಕರ್ ಕುರಿತ ಬೌದ್ಧಿಕ ಜ್ಞಾನವೇ ಇಲ್ಲ. ಇಂತಹ ಸಂಸ್ಥೆಗಳಿಂದ ಅವರ ಬಗ್ಗೆ ತಿಳಿಯಲು ಸಾಧ್ಯವಿಲ್ಲ ಎಂದು ತಿಳಿಸಿದರು.

ಕಾರ್ಯಕ್ರಮದಲ್ಲಿ ಬೆಂಗಳೂರು ವಿಶ್ವವಿದ್ಯಾಲಯದ ಪ್ರಾಧ್ಯಾಪಕಿ ಎಂ.ಸುಮಿತ್ರಾ, ವಕೀಲ ಸಣ್ಣ ನಾಯ್ಕ, ಸಮತಾ ಸೈನಿಕ ದಳದ ಅಧ್ಯಕ್ಷ ಎಂ.ವೆಂಕಟಸ್ವಾಮಿ, ಲೇಖಕ ಪ್ರೊ.ಎಂ.ನಾರಾಯಣಸ್ವಾಮಿ ಉಪಸ್ಥಿತರಿದ್ದರು. 

ರಾಜ್ಯ ಸರಕಾರ ಹಾಗೂ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ವತಿಯಿಂದ ಅಂಬೇಡ್ಕರ್‌ರ ಬದುಕು ಮತ್ತು ಬರಹ, ಭಾಷಣಗಳನ್ನು ಮುದ್ರಣ ಮಾಡಿ ಮಾರಾಟ ಮಾಡಲಾಗುತ್ತಿದೆ. ಆದರೆ, ಪುಸ್ತಕ ಎಂದ ಕೂಡಲೇ ದೂರ ಸರಿಯುವ ದಲಿತ ಸಮುದಾಯ, ಅವರ ವಿಚಾರಗಳಿಂದ ದೂರ ಸರಿಯುತ್ತಿದೆ. ಹೀಗಾಗಿ, ಸಣ್ಣ ಸಣ್ಣ ಪುಸ್ತಕಗಳ ಮೂಲಕ ವಿಚಾರಗಳನ್ನು ಹಂಚುವ ಕೆಲಸವಾಗಬೇಕು. ಅವರ ವಿಚಾರಗಳನ್ನು ಪ್ರತಿಯೊಂದು ಪದವನ್ನೂ ಅರ್ಥ ಮಾಡಿಕೊಳ್ಳುವಂತಾಗಬೇಕು.

-ಕೋಟಿಗಾನಹಳ್ಳಿ ರಾಮಯ್ಯ, ಸಾಹಿತಿ

ರಾಜ್ಯದಲ್ಲಿ 80 ರ ದಶಕದಲ್ಲಿ ಭೂಮಾಲಕರ ಊಳಿಗಮಾನ್ಯ ಪದ್ಧತಿಯನ್ನು ಯಾರೂ ವಿರೋಧಿಸಲಿಲ್ಲ. ಈ ಸಂದರ್ಭದಲ್ಲಿ ದಲಿತ ನಾಯಕತ್ವ ಅದನ್ನು ಖಂಡಿಸಿ ವ್ಯಾಪಕವಾಗಿ ಬೀದಿಗಿಳಿಯಿತು. ಈ ವೇಳೆ ಪ್ರತಿಭಟಿಸಿದವರ ಮೇಲೆ ನಿರಂತರವಾದ ದಾಳಿ, ದೌರ್ಜನ್ಯಗಳು ನಡೆದವು. ಅದರಿಂದ ಮುಕ್ತಿ ಹೊಂದಬೇಕಾದರೆ, ಪ್ರತಿಭಟಿಸಬೇಕಾದರೆ ಸಂಘಟನೆ ಮುಖ್ಯವೆಂದು ಭಾವಿಸಿ ಅಂದು ಸಾವಿರಾರು ಜನರು ಸೇರಿ ಅಂಬೇಡ್ಕರ್ ಜಯಂತಿ ಆಚರಿಸಿದರು. ಆದರೆ, ಇದೇ ಜಯಂತಿಗಳಿಂದು ಸ್ವಾರ್ಥಕ್ಕಾಗಿ ನಡೆಯುತ್ತಿವೆ.

-ಕೋಟಿಗಾನಹಳ್ಳಿ ರಾಮಯ್ಯ, ಸಾಹಿತಿ