ನಾನು ಅಕ್ರಮ ಸಂಪತ್ತು ಗಳಿಸಿದ್ದರೆ ಸಾಬೀತು ಮಾಡಿ: ಪ್ರತಿಪಕ್ಷಗಳಿಗೆ ಮೋದಿ ಸವಾಲು

ಬಲ್ಲಿಯಾ(ಉ.ಪ್ರ),ಮೇ 14: ಪ್ರತಿಪಕ್ಷಗಳ ವಿರುದ್ಧ ಮಂಗಳವಾರ ಕಟು ಟೀಕಾಪ್ರಹಾರ ನಡೆಸಿದ ಪ್ರಧಾನಿ ನರೇಂದ್ರ ಮೋದಿ ಅವರು, ತಾನು ಅಕ್ರಮವಾಗಿ ಆಸ್ತಿಯನ್ನು ಗಳಿಸಿದ್ದರೆ ಅಥವಾ ವಿದೇಶಿ ಬ್ಯಾಂಕುಗಳಲ್ಲಿ ಹಣವನ್ನಿಟ್ಟಿದ್ದರೆ ಅದನ್ನು ಸಾಬೀತುಗೊಳಿಸುವಂತೆ ಅವುಗಳಿಗೆ ಬಹಿರಂಗ ಸವಾಲು ಒಡ್ಡಿದರು.

ಇಲ್ಲಿ ಚುನಾವಣಾ ಪ್ರಚಾರ ಸಭೆಯಲ್ಲಿ ಮಾತನಾಡುತ್ತಿದ್ದ ಅವರು,”ಮಹಾ ಮಿಲಾವಟ್(ಮಹಾ ಕಲಬೆರಕೆ)’ ಜನರಿಗೆ ನಾನು ಸವಾಲನ್ನು ಹಾಕುತ್ತಿದ್ದೇನೆ. ಧೈರ್ಯವಿದ್ದರೆ ನನ್ನನ್ನು ನಿಂದಿಸುವ ಬದಲು ಅವರು ನನ್ನ ಸವಾಲನ್ನು ಸ್ವೀಕರಿಸಬೇಕು. ನಾನು ಯಾವುದೇ ಬೇನಾಮಿ ಆಸ್ತಿಯನ್ನು ಖರೀದಿಸಿದ್ದರೆ,ಯಾವುದೇ ತೋಟದ ಮನೆಯನ್ನು ನಿರ್ಮಿಸಿದ್ದರೆ, ವಿದೇಶಿ ಬ್ಯಾಂಕ್‌ನಲ್ಲಿ ಹಣವನ್ನು ಠೇವಣಿಯಾಗಿ ಇಟ್ಟಿದ್ದರೆ,ವಿದೇಶಗಳಲ್ಲಿ ಆಸ್ತಿಗಳನ್ನು ಖರೀದಿಸಿದ್ದರೆ, ಲಕ್ಷಾಂತರ ಮತ್ತು ಕೊಟ್ಯಂತರ ರೂ.ವೌಲ್ಯದ ಕಾರುಗಳನ್ನು ಖರೀದಿಸಿದ್ದರೆ ಅದನ್ನು ಅವರು ಸಾಬೀತು ಮಾಡಲಿ” ಎಂದರು.

“ನಾನೆಂದೂ ಶ್ರೀಮಂತನಾಗುವ ಕನಸು ಕಂಡಿರಲಿಲ್ಲ, ಬಡವರ ಹಣವನ್ನು ದೋಚುವ ಪಾಪವನ್ನೂ ಮಾಡಿಲ್ಲ. ಬಡವರ ಕಲ್ಯಾಣ, ನಮ್ಮ ಮಾತ್ರಭೂಮಿಯ ಗೌರವ ಮತ್ತು ಭದ್ರತೆ ನಮ್ಮ ಉನ್ನತ ಆದ್ಯತೆಗಳಾಗಿವೆ” ಎಂದ ಅವರು, ಇದೇ ಕಾರಣದಿಂದ ಪಾಕಿಸ್ತಾನ ಮತ್ತು ಅದರ ಭಯೋತ್ಪಾದಕರ ದುರಹಂಕಾರ ಮಾಯವಾಗಿದೆ. ಪಾಕಿಸ್ತಾನದಲ್ಲಿ ಬಹಿರಂಗವಾಗಿ ಶಸ್ತ್ರಾಸ್ತ್ರಗಳನ್ನು ಝಳಪಿಸುತ್ತಿದ್ದ ಭಯೋತ್ಪಾದಕರು ಈಗ ಭೂಗತರಾಗಿದ್ದಾರೆ ಮತ್ತು ಮೋದಿಯನ್ನು ತೆಗೆಯಲು ಪ್ರಾರ್ಥನೆ ಮಾಡುತ್ತಿದ್ದಾರೆ. ಅವರು ಚಡಪಡಿಸುತ್ತಿದ್ದಾರೆ ಮತ್ತು ತಮ್ಮ ನಿದ್ರೆಯನ್ನು ಕಳೆದುಕೊಂಡಿದ್ದಾರೆ. ನಾನು ದೇಶದ ಸೇನೆಗೆ ಪೂರ್ಣ ಸ್ವಾತಂತ್ರ್ಯವನ್ನು ನೀಡಿದ್ದೇನೆ. ಹೀಗಾಗಿಯೇ ಮೊದಲು ಸರ್ಜಿಕಲ್, ನಂತರ ವಾಯುದಾಳಿ ನಡೆದವು. ನಾವಿಂದು ಭಯೋತ್ಪಾದನೆಯ ವಿರುದ್ಧದ ಯುದ್ಧವನ್ನು ಗಡಿಯಾಚೆಗೆ ಒಯ್ದಿದ್ದೇವೆ” ಎಂದರು.

ಎಸ್‌ಪಿ-ಬಿಎಸ್‌ಪಿ ಕೂಟವನ್ನು ‘ಮಹಾಮಿಲಾವಟ್’ ಎಂದು ಬಣ್ಣಿಸಿದ ಮೋದಿ, ಯೋಧರ ಧೈರ್ಯವನ್ನು ಪ್ರಶ್ನಿಸಿದ್ದಕ್ಕಾಗಿ ಕಾಂಗ್ರೆಸ್ ವಿರುದ್ಧವೂ ದಾಳಿ ನಡೆಸಿದರು.

ಸ್ಥಳೀಯ ಗೂಂಡಾಗಳನ್ನು ನಿಯಂತ್ರಿಸಲಾಗದವರು ಭಯೋತ್ಪಾದನೆಗೆ ಕಡಿವಾಣ ಹಾಕಲು ಹೇಗೆ ಸಾಧ್ಯ?, ಇಡೀ ಜಗತ್ತು ಭೀತಿವಾದದಿಂದ ಪೀಡಿತವಾಗಿದೆ ಮತ್ತು ಅದರ ವಿರುದ್ಧ ಹೋರಾಡಲು ದಿಲ್ಲಿಯಲ್ಲಿ ಪ್ರಬಲ, ತುಷ್ಟೀಕರಣ ಮತ್ತು ವೋಟ್ ಬ್ಯಾಂಕ್ ರಾಜಕೀಯದಲ್ಲಿ ನಂಬಿಕೆಯಿರದ ಮತ್ತು ಧೈರ್ಯದಿಂದ ನಿರ್ಧಾರಗಳನ್ನು ತೆಗೆದುಕೊಳ್ಳುವ ಸರಕಾರ ಬೇಕು ಎಂದ ಅವರು, ಈ ಮಹಾಮಿಲಾವಟ್ ಪಕ್ಷಗಳಿಗೆ ಜನತೆ ಮತಗಳ ಮೂಲಕ ತಕ್ಕ ಉತ್ತರ ನೀಡಲಿದೆ ಎಂದರು,

ಪ್ರತಿಪಕ್ಷ ನಾಯಕರು ಜಾತಿ ರಾಜಕೀಯದಲ್ಲಿ ತೊಡಗಿದ್ದಾರೆ ಮತ್ತು ತಮ್ಮ ಬೊಕ್ಕಸಗಳನ್ನು ತುಂಬಿಕೊಂಡಿದ್ದಾರೆ, ಬಂಗಲೆಗಳು ಮತ್ತು ಅರಮನೆಗಳನ್ನು ನಿರ್ಮಿಸಿಕೊಂಡಿದ್ದಾರೆ ಎಂದು ಮೋದಿ ಆರೋಪಿಸಿದರು.

ತನ್ನ ಜಾತಿಯನ್ನು ಪ್ರಶ್ನಿಸುವವರ ವಿರುದ್ಧ ದಾಳಿ ನಡೆಸಿದ ಅವರು, ತಾನು ಹಲವಾರು ಚುನಾವಣೆಗಳಲ್ಲಿ ಸ್ಪರ್ಧಿಸಿದ್ದೇನೆ, ಇತರರೂ ಸ್ಪರ್ಧಿಸುವಂತೆ ಮಾಡಿದೇನೆ. ಆದರೆ ಜಾತಿಯನ್ನೆಂದಿಗೂ ನೆಚ್ಚಿಕೊಂಡಿರಲಿಲ್ಲ. ತಾನು ತೀರ ಹಿಂದುಳಿದ ಜಾತಿಯ ಕುಟುಂಬದಲ್ಲಿ ಹುಟ್ಟಿರಬಹುದು, ಆದರೆ ಭಾರತವನ್ನು ವಿಶ್ವದಲ್ಲಿ ಮುಂಚೂಣಿಯ ರಾಷ್ಟ್ರವನ್ನಾಗಿಸುವುದು ತನ್ನ ಗುರಿಯಾಗಿದೆ ಎಂದರು.