ಬಿಜೆಪಿ ಅಧಿಕಾರಕ್ಕೆ ಬಂದರೆ ಮುಂದಿನ ದಿನಗಳು ಭೀಕರ: ತೀಸ್ತಾ ಸೆಟಲ್ವಾಡ್

ಬೆಂಗಳೂರು, ಮೇ 18: ಪ್ರಧಾನಿ ನರೇಂದ್ರ ಮೋದಿ ಆಡಳಿತದ ಈ ಐದು ವರ್ಷಗಳಲ್ಲಿ ದಲಿತ, ಆದಿವಾಸಿ, ಅಲ್ಪಸಂಖ್ಯಾತ ಸಮುದಾಯದ ಮೇಲೆ ದೈಹಿಕ, ಸಾಮಾಜಿಕ, ಸಾಂಸ್ಕೃತಿಕವಾಗಿ ದಾಳಿ ನಡೆದಿವೆ. ಒಂದು ವೇಳೆ ಮುಂದಿನ ಬಾರಿಯೂ ಬಿಜೆಪಿಯೆ ಅಧಿಕಾರಕ್ಕೆ ಬಂದರೆ ಇಡೀ ಪ್ರಜಾಪ್ರಭುತ್ವ ವ್ಯವಸ್ಥೆ ತೀವ್ರತರವಾದ ಅಪಾಯಕ್ಕೆ ಸಿಲುಕಲಿದೆ ಎಂದು ಸಾಮಾಜಿಕ ಹೋರಾಟಗಾರ್ತಿ ತೀಸ್ತಾ ಸೆಟಲ್ವಾಡ್ ಆತಂಕ ವ್ಯಕ್ತಪಡಿಸಿದ್ದಾರೆ.

ಶನಿವಾರ ಕ್ರಿಯಾ ಪ್ರಕಾಶನದ ವತಿಯಿಂದ ನಗರದ ಕ್ಸೇವಿಯರ್ ಹಾಲ್‌ನಲ್ಲಿ ಆಯೋಜಿಸಿದ್ದ ಅವರೇ(ತೀಸ್ತಾ ಸೆಟಲ್ವಾಡ್) ಬರೆದಿರುವ ‘ಸಂವಿಧಾನದ ಕಾಲಾಳು’ ಕೃತಿಯ ಕನ್ನಡ ಅನುವಾದದ ಬಿಡುಗಡೆ ಹಾಗೂ ಪ್ರಜಾಪ್ರಭುತ್ವದ ರಕ್ಷಣೆಯಲ್ಲಿ ನಾವು-ನೀವು ವಿಚಾರ ಸಂಕಿರಣದಲ್ಲಿ ಭಾಗವಹಿಸಿ ಅವರು ಮಾತನಾಡಿದರು.

ಈ ಬಾರಿ ಬಿಜೆಪಿಯೇತರ ಪಕ್ಷಗಳು ಅಧಿಕಾರಕ್ಕೆ ಬರಲಿವೆ ಎಂಬ ಆಶಯವಿದೆ. ಒಂದು ವೇಳೆ ಬಿಜೆಪಿಯೇ ಅಧಿಕಾರಕ್ಕೆ ಬಂದರೆ ಸುಗ್ರೀವಾಜ್ಞೆಯ ಮೂಲಕ ಜನವಿರೋಧಿ ಕಾಯ್ದೆಗಳನ್ನು ರೂಪಿಸುವ ಎಲ್ಲ ಸಾಧ್ಯತೆಗಳಿವೆ. ಪ್ರಜಾಪ್ರಭುತ್ವದಡಿಯಲ್ಲಿಯೆ ಹಿಂಸೆಗಳು ನಡೆಯುವುದರಲ್ಲಿ ಸಂದೇಹವಿಲ್ಲ. ಇವೆಲ್ಲವನ್ನು ಎದುರಿಸಲು ಸಂಘಟನಾತ್ಮಕ ಹೋರಾಟಕ್ಕೆ ನಾವೆಲ್ಲರೂ ಸಿದ್ಧಗೊಳ್ಳಬೇಕಾದ ಅಗತ್ಯವಿದೆ ಎಂದು ಅವರು ಹೇಳಿದರು.

ಪ್ರಧಾನಿ ನರೇಂದ್ರ ಮೋದಿ ಆಡಳಿತದಲ್ಲಿ ದಲಿತ, ಆದಿವಾಸಿಗಳು, ಅಲ್ಪಸಂಖ್ಯಾತರನ್ನು ಹೇಗೆಲ್ಲಾ ತುಳಿಯಬೇಕೋ ಅದೆಲ್ಲವನ್ನು ಪ್ರಭುತ್ವದ ಮಾರ್ಗದರ್ಶನದಲ್ಲಿಯೇ ತುಳಿದಿದ್ದಾಗಿದೆ. ಒಂದು ಕಡೆ ಗುಂಪು ಹಲ್ಲೆಗಳ ಮೂಲಕ ಹಿಂಸೆ, ಹತ್ಯೆಗಳನ್ನು ನಡೆಸುತ್ತಿದ್ದಾರೆ, ಮತ್ತೊಂದೆಡೆ ಉನ್ನತ ಶಿಕ್ಷಣ ವ್ಯವಸ್ಥೆಯಲ್ಲಿ ಮುಂದುವರೆಯದಂತೆ ಶುಲ್ಕ ಹೆಚ್ಚಳ ಹಾಗೂ ದಲಿತರಿಗೆ, ಹಿಂದುಳಿದ ವರ್ಗಗಳಿಗೆ ಇರುವ ಸೀಟುಗಳ ಪ್ರಮಾಣವನ್ನು ಕಡಿತಗೊಳಿಸಲಾಗಿದೆ ಎಂದು ಅವರು ಹೇಳಿದರು.

ರಾಯಚೂರು ವಿಶ್ವವಿದ್ಯಾಲಯದ ವಿಶೇಷಾಧಿಕಾರಿ ಪ್ರೊ.ಮುಝಫರ್ ಅಸಾದಿ ಮಾತನಾಡಿ, ದೇಶದ ಪ್ರಜಾಪ್ರಭುತ್ವ ವ್ಯವಸ್ಥೆಗೆ ಸಾವಿರಾರು ವರ್ಷಗಳ ಭದ್ರಬುನಾದಿ ಇದೆ. ಅಂದಿನಿಂದಲೂ ಸದಾ ಸಂಘರ್ಷಗಳ ಮೂಲಕ ಇಲ್ಲಿಯವರೆಗೂ ಹಾದಿ ಬಂದಿದೆ. ಇವತ್ತು ಸಂಘಪರಿವಾರದ ಕೈಯಲ್ಲಿ ಸಿಲುಕಿ ಗಾಯಗೊಂಡಿದ್ದು, ಅದನ್ನು ಕಾಪಾಡುವಂತಹದ್ದು ನಮ್ಮೆಲ್ಲರ ಜವಾಬ್ದಾರಿ ಎಂದು ತಿಳಿಸಿದರು.

ದೇಶದ ಇತಿಹಾಸವನ್ನು ಮೆಲುಕು ಹಾಕಿದರೆ ಚಾರ್ವಾಕ ಮತ್ತು ಶೂನ್ಯ ಪಂಥಗಳು ಪ್ರಜಾಪ್ರಭುತ್ವ ವ್ಯವಸ್ಥೆಯನ್ನು ಗಟ್ಟಿಗೊಳಿಸಿಕೊಂಡು ಬಂದಿವೆ. ಬೌದ್ಧ ಹಾಗೂ ವೈದಿಕರ ಸಂಘರ್ಷ, ಶೈವ-ವೈಷ್ಣವರ ಸಂಘರ್ಷಗಳು, ವಚನ ಚಳವಳಿ, ರಾಷ್ಟ್ರೀಯ ಹೋರಾಟಗಳೆಲ್ಲವೂ ಪ್ರಜಾಪ್ರಭುತ್ವಕ್ಕೆ ಶಕ್ತಿ ನೀಡುತ್ತಾ ಸಾಗಿ ಬಂದಿವೆ. ಈ ಇತಿಹಾಸವನ್ನು ಸರಿಯಾಗಿ ತಿಳಿದುಕೊಂಡರೆ ಆಧುನಿಕ ಭಾರತದಲ್ಲಿ ಪ್ರಜಾಪ್ರಭುತ್ವವನ್ನು ಹೇಗೆ ಗಟ್ಟಿಗೊಳಿಸಬಹುದೆಂದು ತಿಳಿದು ಬರಲಿದೆ ಎಂದು ಅವರು ಹೇಳಿದರು.

ಸ್ವತಂತ್ರ ಭಾರತದ ಪ್ರಾರಂಭದ ದಶಕಗಳು ಪ್ರಜಾಪ್ರಭುತ್ವಕ್ಕೆ, ಸಂವಿಧಾನಕ್ಕೆ ಯಾವುದೆ ಅಪಾಯ ಇರಲಿಲ್ಲ. ಆದರೆ, 1990ರ ನಂತರ ದೇಶದಾದ್ಯಂತ ಸಂಚರಿಸಿದ ಅಯೋಧ್ಯೆಯ ರಥ ಯಾತ್ರೆಯು ಪ್ರಜಾಪ್ರಭುತ್ವವನ್ನು ಗಾಯಗೊಳಿಸಲು ಪ್ರಾರಂಭಿಸಿತು. ಅಲ್ಲಿಂದ ನಡೆದ ಕೋಮು ಸಂಘರ್ಷಗಳು ಪ್ರಜಾಪ್ರಭುತ್ವದ ಆಶಯಗಳಾದ ಸಮಾಜವಾದ, ಸ್ವಾತಂತ್ರ, ಸಹೋದರತೆ, ವೈಚಾರಿಕತೆ, ವಿಮರ್ಶಾ ಪ್ರವೃತ್ತಿಗೆ ದೊಡ್ಡ ಪೆಟ್ಟು ಬಿದ್ದು ಅಪಾಯದ ಕಡೆಗೆ ಸಾಗಿತು ಎಂದು ಅವರು ಹೇಳಿದರು.

ಸಂಘಪರಿವಾರದ ನಿರಂತರವಾದ ದಾಳಿಗಳಿಂದಾಗಿ ಪ್ರಜಾಪ್ರಭುತ್ವಕ್ಕೆ ಧಕ್ಕೆ ಬಂದಿರುವುದು ವಾಸ್ತವ. ಆದರೆ, ಇದನ್ನು ಸರಿ ಪಡಿಸುವಂತಹ ಮಾರ್ಗೋಪಾಯಗಳು, ಜಾರಿಗೊಳಿಸಬೇಕಾದ ಅಂಶಗಳತ್ತ ಗಮನವಹಿಸಬೇಕಿದೆ. ದೇಶದಲ್ಲಿರುವ ಎಲ್ಲರಿಗೂ ಸಮಾನ ಪ್ರಾತಿನಿಧ್ಯ ಕೊಡುವಂತಹ ವ್ಯವಸ್ಥೆ, ಮೀಸಲಾತಿ ಪರಿಣಾಮಕಾರಿ ಅನುಷ್ಠಾನವನ್ನು ಎಲ್ಲ ಕ್ಷೇತ್ರಗಳಲ್ಲೂ ಜಾರಿಗೊಳಿಸುವಂತಹ ವಾತಾವರಣವನ್ನು ಮರು ರೂಪಿಸುವುದರತ್ತ ನಾವು ಕಾರ್ಯಪ್ರವೃತ್ತರಾದರೆ ಪ್ರಜಾಪ್ರಭುತ್ವವನ್ನು ಗಟ್ಟಿಗೊಳಿಸುವುದರತ್ತ ಸಾಗಬಹುದು ಎಂದು ಅವರು ಆಶಿಸಿದರು.

ಹಿರಿಯ ಪತ್ರಕರ್ತ ಶಿವಸುಂದರ್ ಸಂವಿಧಾನದ ಕಾಲಾಳು ಕೃತಿಯನ್ನು ಪರಿಚಯಿಸಿದರು. ಮಾಜಿ ಸಚಿವ ಬಿ.ಕೆ.ಚಂದ್ರಶೇಖರ್ ಅಧ್ಯಕ್ಷತೆ ವಹಿಸಿದ್ದರು. ಕೃತಿಯ ಕನ್ನಡ ಅನುವಾದಕಿ ಸತ್ಯಾ, ಕ್ರಿಯಾ ಪ್ರಕಾಶನದ ವಸಂತ್ ಉಪಸ್ಥಿತರಿದ್ದರು.

ಇತ್ತೀಚಿನ ದಿನಗಳಲ್ಲಿ ದಕ್ಷಿಣ ಕನ್ನಡದಲ್ಲಿ ಮರಗಳು, ಲೈಟ್‌ಕಂಬಗಳು, ಗೋಡೆಗಳು ಎಲ್ಲವಕ್ಕೂ ಬಣ್ಣಗಳನ್ನು ಬಳಿಯುವ ಮೂಲಕ ಒಂದು ಸಮುದಾಯದ ಪ್ರಾತಿನಿಧಿಕದಂತೆ ಮಾಡಲಾಗುತ್ತಿದೆ. ಇದು ಅತ್ಯಂತ ಅಪಾಯಕಾರಿಯಾದ ಚಿಂತನೆಯಾಗಿದೆ.

-ಮುಝಫರ್ ಅಸಾದಿ, ಆಡಳಿತಾಧಿಕಾರಿ ರಾಯಚೂರು ವಿವಿ