ವಿವಾದಾತ್ಮಕ ಟ್ವೀಟ್ ಡಿಲೀಟ್ ಮಾಡಿ ಕ್ಷಮೆ ಕೋರಿದ ವಿವೇಕ್ ಒಬೆರಾಯ್

ಮುಂಬೈ, ಮೇ 21: ಎಕ್ಸಿಟ್ ಪೋಲ್ ಗಳಿಗೆ ನಟಿ ಐಶ್ವರ್ಯಾ ರೈ ಜೀವನವನ್ನೂ ಹೋಲಿಸಿ ನಿಂದನಾತ್ಮಕ ಮೀಮ್ ಶೇರ್ ಮಾಡಿ ಭಾರೀ ಟೀಕೆಗೊಳಗಾಗಿದ್ದ ನಟ ವಿವೇಕ್ ಒಬೆರಾಯ್ ತಮ್ಮ ಟ್ವೀಟ್ ಡಿಲೀಟ್ ಮಾಡಿದ್ದಾರಲ್ಲದೆ, ತಮ್ಮ ಕೃತ್ಯವನ್ನು ಸಮರ್ಥಿಸಿ ಹೇಳಿಕೆ ನೀಡಿದ ಕೆಲವೇ ಗಂಟೆಗಳಲ್ಲಿ ಕ್ಷಮೆ ಕೋರಿ ಟ್ವೀಟ್ ಮಾಡಿದ್ದಾರೆ.

‘‘ಮೀಮ್ ಗೆ ನನ್ನ ಉತ್ತರದಿಂದ ಒಬ್ಬರೇ ಒಬ್ಬರು ಮಹಿಳೆಗೂ ನೋವುಂಟಾಗಿದ್ದರೆ ಅದಕ್ಕೆ ಪರಿಹಾರೋಪಾಯ ಅಗತ್ಯ. ಕ್ಷಮೆ ಕೋರುತ್ತಿದ್ದೇನೆ, ಟ್ವೀಟ್ ಡಿಲೀಟ್ ಮಾಡಲಾಗಿದೆ’’ ಎಂದು ವಿವೇಕ್ ಇಂದು ಬೆಳಗ್ಗೆ ಟ್ವೀಟ್ ಮಾಡಿದ್ದಾರೆ.

‘‘ಕೆಲವೊಮ್ಮೆ ಒಬ್ಬರಿಗೆ ತಮಾಷೆ ಹಾಗೂ ನಿರುಪದ್ರವಿ ಎಂದು ಅನಿಸುವ ವಿಚಾರ ಇನ್ನೊಬ್ಬರಿಗೆ ಹಾಗಾಗಲು ಸಾಧ್ಯವಿಲ್ಲ. ಕಳೆದ 10 ವರ್ಷಗಳಲ್ಲಿ 2000ಕ್ಕೂ ಅಧಿಕ ದುರ್ಬಲ ವರ್ಗಗಳ ಬಾಲಕಿಯರ ಸಬಲೀಕರಣ ಕಾರ್ಯದಲ್ಲಿ ನಾನು ನಿರತನಾಗಿದ್ದೇನೆ. ಯಾವುದೇ ಮಹಿಳೆಗೂ ಅಗೌರವ ತೋರಿಸುವ ಬಗ್ಗೆ ನನಗೆ ಯೊಚಿಸಲೂ ಸಾಧ್ಯವಿಲ್ಲ,’’ ಎಂದು ಅವರು ಬರೆದಿದ್ದಾರೆ.

ಐಶ್ವರ್ಯಾ ರೈಯವರು ಮೊದಲು ಸಲ್ಮಾನ್ ಖಾನ್, ನಂತರ ವಿವೇಕ್ ಒಬೆರಾಯ್ ಹಾಗೂ ತಮ್ಮ ಪತಿ ಅಭಿಷೇಕ್ ಬಚ್ಚನ್ ಮತ್ತು ಪುತ್ರಿ ಆರಾಧ್ಯಾ ಜತೆಗಿರುವ ಫೋಟೋಗಳಿರುವ ಮೀಮ್ ಅನ್ನು ವಿವೇಕ್ ಶೇರ್ ಮಾಡಿದ್ದರು. ಈ ಫೋಟೋಗಳಿಗೆ ಒಪಿನಿಯನ್ ಪೋಲ್ಸ್, ಎಕ್ಸಿಟ್ ಪೋಲ್ಸ್ ಮತ್ತು ರಿಸಲ್ಟ್ಸ್ ಎಂಬ ಶೀರ್ಷಿಕೆ ನೀಡಲಾಗಿತ್ತು. ಈ ಮೀಮ್ ಜತೆಗೆ ವಿವೇಕ್ ತಮ್ಮದೇ ವಿವರಣೆ ನೀಡಿ ‘‘ಹ ಹ್ಹಾ ? ಕ್ರಿಯೇಟಿವ್! ನೋ ಪೊಲಿಟಿಕ್ಸ್ ಹಿಯರ್... ಜಸ್ಟ್ ಲೈಫ್’’ ಎಂದು ಬರೆದಿದ್ದರು.

ಕಳೆದ ಸಂಜೆ ವಿವೇಕ್ ಒಬೆರಾಯ್ ಪ್ರತಿಕ್ರಿಯಿಸಿ ತಾವು ಕ್ಷಮೆ ಕೇಳಬೇಕಾದ ಅವಶ್ಯಕತೆಯೇ ಇಲ್ಲವೆಂದು ತಮ್ಮನ್ನು ಸಮರ್ಥಿಸಿಕೊಂಡಿದ್ದರು.