ಶೋಭಾರಿಂದ ದಾಖಲೆ ಅಂತರದ ಜಯಭೇರಿ

ಉಡುಪಿ, ಮೇ 23: ಬಿಜೆಪಿ ಅಭ್ಯರ್ಥಿ ಶೋಭಾ ಕರಂದ್ಲಾಜೆ ಇಂದು ಉಡುಪಿ-ಚಿಕ್ಕಮಗಳೂರು ಲೋಕಸಭಾ ಚುನಾವಣೆಯಲ್ಲಿ ತನ್ನ ಪ್ರತಿಸ್ಪರ್ಧಿ ಪ್ರಮೋದ್ ಮಧ್ವರಾಜ್ ಅವರ ವಿರುದ್ಧ ಪಡೆದ 3,49,599 ಮತಗಳ ಅಂತರದ ಗೆಲುವು, ಹಿಂದಿನ ಉಡುಪಿ ಹಾಗೂ ಚಿಕ್ಕಮಗಳೂರು ಲೋಕಸಭಾ ಕ್ಷೇತ್ರ ಹಾಗೂ ಈಗಿನ ಉಡುಪಿ-ಚಿಕ್ಕಮಗಳೂರು ಕ್ಷೇತ್ರದ ಮಟ್ಟಿಗೆ ಹೊಸ ದಾಖಲೆಯಾಗಿ ಮೂಡಿಬಂದಿದೆ.

2014ರ ಲೋಕಸಭಾ ಚುನಾವಣೆಯಲ್ಲಿ ಶೋಭಾ ಅವರೇ ತನ್ನ ಎದುರಾಳಿ ಯಾಗಿದ್ದ ಕೆ.ಜಯಪ್ರಕಾಶ್ ಹೆಗ್ಡೆ ವಿರುದ್ಧ ಪಡೆದ 1,81,643 ಮತಗಳ ಅಂತರದ ಜಯ, ಉಡುಪಿ ಹಾಗೂ ಚಿಕ್ಕಮಗಳೂರು ಜಿಲ್ಲೆಯ ಮಟ್ಟಿಗೆ ಹಿಂದಿನ ದಾಖಲೆ ಅಂತರದ ಜಯವೆನಿಸಿಕೊಂಡಿತ್ತು.

ಉಡುಪಿ-ಚಿಕ್ಕಮಗಳೂರು ಕ್ಷೇತ್ರ ಅಸ್ತಿತ್ವಕ್ಕೆ ಬಂದ ಬಳಿಕ ನಡೆದಿರುವ ನಾಲ್ಕನೇ ಚುನಾವಣೆ ಇದು. ಪ್ರತ್ಯೇಕ ಕ್ಷೇತ್ರಗಳಾಗಿದ್ದ ಉಡುಪಿ ಹಾಗೂ ಚಿಕ್ಕಮಗಳೂರನ್ನು ಕ್ಷೇತ್ರ ಪುನರ್ವಿಂಗಡಣೆಯ ವೇಳೆ ಒಂದು ಕ್ಷೇತ್ರವಾಗಿ ಪರಿವರ್ತಿಸಿದ ಬಳಿಕ 2009ರಲ್ಲಿ ನಡೆದ ಮೊದಲ ಚುನಾವಣೆಯಲ್ಲಿ ಬಿಜೆಪಿಯ ಡಿ.ವಿ.ಸದಾನಂದ ಗೌಡ ಅವರು ಕಾಂಗ್ರೆಸ್ ಅಭ್ಯರ್ಥಿಯಾಗಿದ್ದ ಕೆ.ಜಯಪ್ರಕಾಶ್ ಹೆಗ್ಡೆ ಅವರನ್ನು 27,018 ಮತಗಳ ಅಂತರದಿಂದ ಪರಾಭವಗೊಳಿಸಿದ್ದರು.

 2012ರಲ್ಲಿ ರಾಜ್ಯದ ಮುಖ್ಯಮಂತ್ರಿ ಗದ್ದುಗೆ ಏರುವ ಅವಕಾಶ ಡಿ.ವಿ. ಸದಾನಂದ ಗೌಡರಿಗೆ ದೊರೆತಾಗ ಅವರು ಸಂಸದ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದರು. ಇದರಿಂದ ಅನಿವಾರ್ಯವಾದ ಉಪಚುನಾವಣೆಯಲ್ಲಿ ಕಾಂಗ್ರೆಸ್ ನಿಂದ ಮತ್ತೆ ಸ್ಪರ್ಧಿಸಿದ ಜಯಪ್ರಕಾಶ್ ಹೆಗ್ಡೆ ತನ್ನ ಬಿಜೆಪಿ ಎದುರಾಳಿ ಸುನಿಲ್ ಕುಮಾರ್ ಅವರನ್ನು 45,724 ಮತಗಳ ಅಂತರದಿಂದ ಪರಾಭವಗೊಳಿಸಿದ್ದರು.

ಇದೀಗ ನಡೆದ ನಾಲ್ಕನೇ ಚುನಾವಣೆಯಲ್ಲಿ ಶೋಭಾ ಕರಂದ್ಲಾಜೆ ಅವರು ಕೊನೆಯ ಕ್ಷಣದಲ್ಲಿ ಉಡುಪಿಯಿಂದ ಸ್ಪರ್ಧಿಸುವ ಅವಕಾಶಗಿಟ್ಟಿಸಿ ಕೊಂಡು ದಾಖಲೆಯ ಅಂತರದ ಜಯ ಪಡೆಯುವಲ್ಲಿ ಯಶಸ್ವಿಯಾಗಿದ್ದಾರೆ. ಇದು ಉಡುಪಿ ಮತ್ತು ಚಿಕ್ಕಮಗಳೂರು ಪ್ರತ್ಯೇಕ ಲೋಕಸಭಾ ಕ್ಷೇತ್ರಗಳಾಗಿದ್ದಾಗಲೂ ಯಾವುದೇ ಅಭ್ಯರ್ಥಿ ಪಡೆದ ದಾಖಲೆ ಮತಗಳ ಅಂತರದ ಜಯವಾಗಿದೆ.

ಉಡುಪಿಯಿಂದ ಕೇಂದ್ರ ಸಚಿವ ಆಸ್ಕರ್ ಫೆರ್ನಾಂಡೀಸ್ ಅವರು 1989ರ ಚುನಾವಣೆಯಲ್ಲಿ ಜೆಡಿಎಸ್‌ನ ಎಂ.ಸಂಜೀವ ವಿರುದ್ಧ ಪಡೆದ 1,64,136 ಮತಗಳ ಅಂತರದ ಜಯವೇ ಉಡುಪಿ ಮಟ್ಟಿಗೆ ದಾಖಲೆಯಾಗಿದೆ. ಇನ್ನು 1980ರಲ್ಲಿ ಆಸ್ಕರ್ ಫೆರ್ನಾಂಡೀಸ್ ಅವರೇ, ಜನತಾ ಪಾರ್ಟಿಯ ಡಾ.ವಿ. ಎಸ್. ಆಚಾರ್ಯರ ವಿರುದ್ಧ 1.60 ಲಕ್ಷ, 1984ರಲ್ಲಿ ಬಿಜೆಪಿಯ ಕೆ.ಎಸ್.ಹೆಗ್ಡೆ ವಿರುದ್ಧ 1.42 ಲಕ್ಷ ಮತಗಳ ಅಂತರದ ಜಯ ಪಡೆದಿದ್ದರು.

ಚಿಕ್ಕಮಗಳೂರು ಕ್ಷೇತ್ರದ ವಿಷಯಕ್ಕೆ ಬಂದಾಗ, 1980ರಲ್ಲಿ ಕಾಂಗ್ರೆಸ್‌ನ ಡಿ.ಎಂ.ಪುಟ್ಟೇಗೌಡ ಅವರು ಜನತಾ ಪಾರ್ಟಿಯ ಕೆ.ಎಂ.ತಿಮ್ಮಯ್ಯ ವಿರುದ್ಧ ಪಡೆದ 1.64 ಲಕ್ಷ ಮತಗಳ ಅಂತರದ ಜಯ ಈವರೆಗಿನ ದಾಖಲೆಯಾಗಿದೆ. 1988ರಲ್ಲಿ ಡಿ.ಎಂ.ಪುಟ್ಟೇಗೌಡ ಅವರೇ ಸಿಪಿಐನ ಬಿ.ಕೆ.ಸುಂದರೇಶ್‌ರನ್ನು 1.61 ಲಕ್ಷ ಮತಗಳಿಂದ ಹಿಮ್ಮೆಟ್ಟಿಸಿದ್ದರು.

ಮುನ್ನಡೆ ಹೆಚ್ಚಿಸಿಕೊಂಡು ಸಾಗಿದ ಶೋಭಾ

ಶೋಭಾ ಕರಂದ್ಲಾಜೆ ಮತಗಳ ಎಣಿಕೆಯ ಮೊದಲ ಸುತ್ತಿನಿಂದಲೇ ತನ್ನ ಮುನ್ನಡೆಯನ್ನು ಹೆಚ್ಚಿಸಿಕೊಳ್ಳುತ್ತಾ ಸಾಗಿದರು. ಮೊದಲ ಸುತ್ತಿನಲ್ಲಿ 20933 ಮತಗಳ ಮುನ್ನಡೆ ಪಡೆದ ಅವರು ಎರಡನೇ ಸುತ್ತಿನಲ್ಲಿ ಇದನ್ನು 46,235ಕ್ಕೇರಿಸಿದರು.

ಮುಂದೆ ಪ್ರತಿ ಸುತ್ತಿನಲ್ಲಿ ಶೋಭಾ, ತನ್ನ ನಿಕಟ ಪ್ರತಿಸ್ಪರ್ಧಿ ಪ್ರಮೋದ್ ಮಧ್ವರಾಜ್‌ರ ಮುನ್ನಡೆ ಅಂತರವನ್ನು 20ರಿಂದ 22000ಗಳಷ್ಟು ಹೆಚ್ಚಿಸಿಕೊಳ್ಳುತ್ತಾ ಸಾಗಿದರು. ಪ್ರತಿ ಸುತ್ತಿನ ಕೊನೆಗೆ ಅವರ ಮುನ್ನಡೆಯ ಅಂತರ ಹೀಗಿದೆ.

ಮೊದಲ ಸುತ್ತು-20,933, 2ನೇ ಸುತ್ತು- 46,235, 3ನೇ ಸುತ್ತು- 69,751, 4-92,956, 5-1,15,528, 6-1,35,307, 7-1,54,520, 8-1,72,618, 9-1,92,183, 10-2,17,833, 11-2,38,628, 12-2,59,918, 13-2,77,505, 14-2,99,573, 15-3,22,750, 16-3,34,446, 17-3,40,593, 18-3,46,117, 19-3,47,096, 20- 3,48,550, 21-(ಅಂಚೆ ಮತಗಳು ಸೇರಿ) ಒಟ್ಟು ಮುನ್ನಡೆ- 3,49,599.

ಪ್ರಮೋದ್‌ಗೆ 3 ಸಲ ಸಿಕ್ಕಿದ್ದು ಅಲ್ಪ ಮುನ್ನಡೆ

ಒಟ್ಟು 20 ಸುತ್ತುಗಳಲ್ಲಿ ನಡೆದ ಮತ ಎಣಿಕೆ ಸಂದರ್ಭದಲ್ಲಿ ಪ್ರಮೋದ್ ಮಧ್ವರಾಜ್‌ಗೆ ಮೂರು ಸುತ್ತುಗಳಲ್ಲಿ ತಲಾ ಒಂದು ವಿಧಾನಸಭಾ ಕ್ಷೇತ್ರಗಳಲ್ಲಿ ಅಲ್ಪ ಮುನ್ನಡೆ ಸಾಧಿಸಿದ್ದು ಬಿಟ್ಟರೆ ಮತ್ತೆಲ್ಲೂ ಮುನ್ನಡೆ ಪಡೆಯಲು ಸಾಧ್ಯವಾಗಲಿಲ್ಲ.

ಪ್ರಮೋದ್ ಅವರು ಎರಡನೇ ಸುತ್ತಿನಲ್ಲಿ ಶೃಂಗೇರಿ ಕ್ಷೇತ್ರದಲ್ಲಿ 208 (4174-3966) ಮತಗಳ ಮುನ್ನಡೆ ಪಡೆದರೆ, ಮತ್ತೆ ಆರನೇ ಸುತ್ತಿನಲ್ಲಿ ಉಡುಪಿ ಕ್ಷೇತ್ರದಲ್ಲಿ 252 (4386-4134) ಮತಗಳ ಲೀಡ್ ಪಡೆದರು. ಕೊನೆಯದಾಗಿ ಅವರಿಗೆ ಮುನ್ನಡೆ ಸಿಕ್ಕಿದ್ದು 13ನೇ ಸುತ್ತಿನಲ್ಲಿ ಚಿಕ್ಕಮಗಳೂರು ಕ್ಷೇತ್ರದಲ್ಲಿ. ಇಲ್ಲಿ ಪ್ರಮೋದ್ 5094 ಮತ ಪಡೆದರೆ, ಶೋಭಾ 2560 ಮತಗಳನ್ನು ಗಳಿಸಿ 2534 ಮತಗಳ ಮುನ್ನಡೆಯನ್ನು ಎದುರಾಳಿ ಬಿಟ್ಟು ಕೊಟ್ಟಿದ್ದರು.