ಸೇನಾ ಅಧಿಕಾರಿಗಳು ಇನ್ನು ದುಬಾರಿ ಕಾರು ಖರೀದಿಸುವಂತಿಲ್ಲ..

ಹೊಸದಿಲ್ಲಿ: ಸೇನೆಯ ಅಧಿಕಾರಿಗಳು ಇನ್ನು ಹೈಫೈ ಎಸ್‌ಯುವಿಗಳನ್ನು ಮಿಲಿಟರಿ ಕ್ಯಾಂಟಿನ್‌ಗಳಲ್ಲಿ ರಿಯಾಯಿತಿ ದರದಲ್ಲಿ ಖರೀದಿಸುವಂತಿಲ್ಲ. ಸೇನೆಯ ಕ್ಯಾಂಟಿನ್ ವಿಭಾಗದಿಂದ ಖರೀದಿಸಬಹುದಾದ ಚತುಶ್ಚಕ್ರ ವಾಹನಗಳ ಮೇಲೆ 12 ಲಕ್ಷ ರೂಪಾಯಿ ಗರಿಷ್ಠ ಮಿತಿ ನಿಗದಿಪಡಿಸಲಾಗಿದ್ದು, ಈ ಸಂಬಂಧ ಆದೇಶ ಹೊರಡಿಸಲಾಗಿದೆ.

ಇದರಿಂದಾಗಿ ಸಶಸ್ತ್ರ ಪಡೆಗಳಿಗೆ ನೀಡಿದ ಮತ್ತೊಂದು ಸೌಲಭ್ಯವನ್ನು ಕಿತ್ತುಕೊಂಡಂತಾಗಿದೆ. ಸೇವೆಯಲ್ಲಿರುವವರು ಹಾಗೂ ನಿವೃತ್ತರು ಎಂಟು ವರ್ಷಗಳಿಗೊಮ್ಮೆ ಮಾತ್ರ ವಾಹನ ಖರೀದಿಸಬಹುದಾಗಿದೆ.

ಸೇನೆಯ ಕ್ವಾರ್ಟರ್ ಮಾಸ್ಟರ್ ಜನರಲ್ ಶಾಖೆ ಮೇ 24ರಂದು ಎಲ್ಲ ಕಚೇರಿಗಳಿಗೆ ಈ ಸಂಬಂಧ ನಿರ್ದೇಶನ ನೀಡಿದೆ. ಅಧಿಕಾರಿಗಳು ಜಿಎಸ್‌ಟಿ ಹೊರತುಪಡಿಸಿ 12 ಲಕ್ಷ ರೂ. ವರೆಗಿನ ಕಾರುಗಳನ್ನಷ್ಟೇ ಖರೀದಿಸಲು ಅವಕಾಶವಿದೆ. ಜೂನ್ 1ರಿಂದ ಹೊಸ ಆದೇಶ ಜಾರಿಗೆ ಬರಲಿದ್ದು, 2500 ಸಿಸಿ ಸಾಮರ್ಥ್ಯದ ವಾಹನಗಳನ್ನಷ್ಟೇ ಖರೀದಿಸಬಹುದು.

ರಕ್ಷಣಾ ಸಂಸ್ಥೆಗಳಲ್ಲಿ ಕಾರ್ಯ ನಿರ್ವಹಿಸುವ ನಾಗರಿಕ ಅಧಿಕಾರಿಗಳಿಗೂ ಇಂಥದ್ದೇ ಮಾನದಂಡ ಅನುಸರಿಸಲಾಗುತ್ತದೆ. ಜವಾನರು 1400 ಸಿಸಿ ವರೆಗಿನ ಮತ್ತು ಜಿಎಸ್‌ಟಿ ಹೊರತುಪಡಿಸಿ 5 ಲಕ್ಷ ರೂಪಾಯಿ ಮೀರದ ವಾಹನಗಳನ್ನಷ್ಟೇ ಸೇವಾ ಅವಧಿಯಲ್ಲಿ ಒಂದು ಬಾರಿ ಮಾತ್ರ ಖರೀದಿಸಬಹುದು. ನಿವೃತ್ತಿಯ ಬಳಿಕ ಮತ್ತೊಮ್ಮೆ ಖರೀದಿಸಲು ಅವಕಾಶವಿದೆ.

ಸಿಎಸ್‌ಡಿಯಿಂದ ವಾಹನ ಖರೀದಿಸಿದಲ್ಲಿ 50 ಸಾವಿರದಿಂದ 1.5 ಲಕ್ಷ ರೂಪಾಯಿಯವರೆಗೂ ಉಳಿಸಬಹುದಾಗಿದೆ. ಉತ್ಪಾದಕರ ಜತೆ ಕಡಿಮೆ ದರಕ್ಕೆ ಒಪ್ಪಂದ ಮಾಡಿಕೊಳ್ಳುವ ಜತೆಗೆ ಸರ್ಕಾರದ ಜಿಎಸ್‌ಟಿ ದರದಲ್ಲಿ ಶೇಕಡ 50ರಷ್ಟು ರಿಯಾಯಿತಿ ಇರುತ್ತದೆ.

ಸರ್ಕಾರದ ಈ ಕ್ರಮದ ವಿರುದ್ಧ ಯುವ ಅಧಿಕಾರಿಗಳು ಹಾಗೂ ನಿವೃತ್ತರು ವ್ಯಾಪಕ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಬಹಳಷ್ಟು ಹಿರಿಯ ಅಧಿಕಾರಿಗಳಂತೆ 15-16 ಲಕ್ಷ ರೂಪಾಯಿ ಆರಂಭಿಕ ಬೆಲೆ ಇರುವ ಜೀಪ್ ಕಾಂಪಾಸ್‌ಗಳನ್ನು ನಾವೇಕೆ ಖರೀದಿಸಬಾರದು ಎಂದು ಮೇಜರ್ ಒಬ್ಬರು ಪ್ರಶ್ನಿಸಿದ್ದಾರೆ. ಹೊಸ ಆದೇಶ ಅತಾರ್ಕಿಕ; ಇದುವರೆಗೆ ಬೆಲೆ ಅಥವಾ ಎಂಜಿನ್ ಸಾಮರ್ಥ್ಯಕ್ಕೆ ನಿರ್ಬಂಧವೂ ಇರಲಿಲ್ಲ. ಅಧಿಕಾರಿಗಳು ನಾಲ್ಕರಿಂದ ಐದು ವರ್ಷಕ್ಕೆ ಹೊಸ ಕಾರು ಖರೀದಿಸಲು ಅವಕಾಶವಿದೆ. ಕೆಲವೊಂದು ದುರ್ಬಳಕೆ ಪ್ರಕರಣಗಳು ಪತ್ತೆಯಾಗಿವೆ ನಿಜ; ಆದರೆ ಕಣ್ಗಾವಲು ವ್ಯವಸ್ಥೆಯನ್ನು ಬಲಪಡಿಸಬೇಕೇ ವಿನಃ ಇಂಥ ಆದೇಶ ಸರಿಯಲ್ಲ ಎಂದು ಬ್ರಿಗೇಡಿಯರ್ ಒಬ್ಬರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.