ನಿಯಮ ಪಾಲಿಸಲು ಶಾಲಾ ವಾಹನಗಳಿಗೆ ಸೂಚನೆ: ಎಸ್ಪಿ ನಿಶಾ ಜೇಮ್ಸ್

 ಉಡುಪಿ, ಮೇ 31: ವಾಹನದ ಸಾಮರ್ಥ್ಯಕ್ಕಿಂತ ಹೆಚ್ಚಿನ ಮಕ್ಕಳನ್ನು ಸಾಗಿಸ ಬಾರದು ಸೇರಿದಂತೆ ಸುಪ್ರೀಂ ಕೋರ್ಟ್ ನಿರ್ದೇಶನವನ್ನು ಪಾಲಿಸಬೇಕೆಂದು ಶಾಲಾ ವಾಹನಗಳ ಚಾಲಕರಿಗೆ ಹಾಗೂ ಆಡಳಿತ ಮಂಡಳಿಯವರಿಗೆ ಸ್ಪಷ್ಟವಾದ ಸೂಚನೆ ನೀಡಲಾಗಿದೆ ಎಂದು ಉಡುಪಿ ಜಿಲ್ಲಾ ಪೊಲೀಸ್ ಅಧೀಕ್ಷಕಿ ನಿಶಾ ಜೇಮ್ಸ್ ತಿಳಿಸಿದ್ದಾರೆ.

ಉಡುಪಿ ಜಿಲ್ಲಾ ಎಸ್ಪಿ ಕಚೇರಿಯಲ್ಲಿಂದು ನಡೆದ ನೇರ ಫೋನ್ ಇನ್ ಕಾರ್ಯಕ್ರಮದಲ್ಲಿ ಅವರು ಮಾತನಾಡುತಿದ್ದರು. ರಸ್ತೆ ಸುರಕ್ಷತಾ ಸಪ್ತಾಹದ ಪ್ರಯುಕ್ತ ಶಾಲಾ ಆಡಳಿತ ಮಂಡಳಿ, ಶಾಲಾ ವಾಹನ ಚಾಲಕರು, ಮಕ್ಕಳನ್ನು ಕರೆದೊಯ್ಯುವ ರಿಕ್ಷಾ ಹಾಗೂ ಟ್ಯಾಕ್ಸಿ ಚಾಲಕರ ಸಭೆಯನ್ನು ಕರೆಯಲಾಗಿದ್ದು, ಕಾನೂನು, ನಿಯಮಗಳ ಕುರಿತು ತಿಳುವಳಿಕೆ ನೀಡಲಾಗಿದೆ ಎಂದರು.

ಅಜ್ಜರಕಾಡು ಆಸ್ಪತ್ರೆಯ ಗೇಟಿನ ಬಳಿಯೇ ಶಾಲಾ ಕಾಲೇಜು ಮಕ್ಕಳು ಹಾಗೂ ಸಾರ್ವಜನಿಕರು ಬಸ್ಸಿಗಾಗಿ ನಿಲ್ಲುವುದರಿಂದ ಆಸ್ಪತ್ರೆಗೆ ಹೋಗಿ ಬರು ವರರಿಗೆ, ರೋಗಿಗಳಿಗೆ ಸಮಸ್ಯೆ ಆಗುತ್ತಿದ್ದು, ಬಸ್ ನಿಲ್ದಾಣವನ್ನು ಬೇರೆ ಕಡೆಗೆ ವರ್ಗಾಯಿಸಬೇಕು ಎಂದು ಕರೆ ಮಾಡಿ ಮನವಿ ಮಾಡಲಾಯಿತು.

ಉಡುಪಿ ಗುಂಡಿಬೈಲು ಪರಿಸರದಲ್ಲಿ ರಸ್ತೆಯ ಮೇಲೆಯೇ ವಾಹನಗಳ ಪಾರ್ಕಿಂಗ್ ಮಾಡುವುದರಿಂದ ಸಂಚಾರಕ್ಕೆ ತೊಂದರೆ, ಹೆಲ್ಮೆಟ್ ಧರಿಸದೆ ವಾಹನ ಚಾಲನೆ, ಬಸ್ ನಿಲ್ದಾಣದಲ್ಲಿ ಬಸ್ ಹಾಗೂ ಇತರ ವಾಹನಗಳ ಅಡ್ಡಾದಿಡ್ಡಿ ಪಾರ್ಕಿಂಗ್, ಬ್ರಹ್ಮಾವರ ಕುಂಜಾಲು ಪರಿಸರದಲ್ಲಿ ದ್ವಿಚಕ್ರ ಮತ್ತು ಆಟೋರಿಕ್ಷಾಗಳು ಯಾವುದೇ ಸೂಚನೆ ನೀಡದೆ ಎಡಕ್ಕೆ ಅಥವಾ ಬಲಕ್ಕೆ ವಾಹನವನ್ನು ತಿರುಗಿಸುವ ಕುರಿತ ದೂರುಗಳು ಬಂದವು.

ಕಾರ್ಕಳ ಸಂತೆ ಮಾರ್ಕೆಟ್ ಬಳಿ ಎರಡೂ ಕಡೆಯಿಂದ ವಾಹನ ಚಲಾಯಿ ಸುವುದರಿಂದ ಸಂಚಾರಕ್ಕೆ ತೊಂದರೆ, ರಸ್ತೆಯ ಇಕ್ಕೆಲಗಳಲ್ಲಿ ಪಾರ್ಕಿಂಗ್, ಬ್ರಹ್ಮಾವರದಲ್ಲಿ ಟ್ಯಾಂಕರ್‌ಗಳು ವಿರುದ್ಧ ದಿಕ್ಕಿನಿಂದ ಬರುವುದರಿಂದ ದ್ವಿಚಕ್ರ ವಾಹನ ಸವಾರರಿಗೆ ತೊಂದರೆ, ಕಾರ್ಕಳದಲ್ಲಿ ಶಾಲಾ ಬಸ್‌ಗಳಿಂದ ಸಾರ್ವಜನಿಕ ಶುಭ ಸಮಾರಂಭಗಳಿಗೆ ವಿಶೇಷ ಟ್ರಿಪ್, ಮಲ್ಪೆಬಸ್ ನಿಲ್ದಾಣದ ಬಳಿ ಪಾರ್ಕಿಂಗ್ ಮಾಡುತ್ತಿರುವುದರಿಂದ ಸಂಚಾರ ಸಮಸ್ಯೆಗಳ ಕುರಿತು ಸಾರ್ವಜನಿಕರು ರೆ ಮಾಡಿ ಎಸ್ಪಿಗೆ ದೂರು ನೀಡಿದರು.

ಉಪ್ಪುಂದ ಬಳಿ ವಿರುದ್ಧ ಧಿಕ್ಕಿನಲ್ಲಿ ವಾಹನ ಚಾಲನೆ, ಪಾರ್ಕಿಂಗ್ ಸಮಸ್ಯೆ, ಅಪ್ರಾಪ್ತ ವಯಸ್ಕ ಶಾಲಾ ವಿದ್ಯಾರ್ಥಿಗಳಿಂದ ವಾಹನ ಚಲಾನೆ, ಕಾರ್ಕಳ ಮಾರ್ಕೆಟ್ ರಸ್ತೆಯ ಮೇಲೆಯೇ ರಿಕ್ಷಾ ಪಾರ್ಕಿಂಗ್, ಬೈಂದೂರು ಅಂಡರ್ ಪಾಸ್ ಬಳಿ ಹಗಲು ಇಡೀ ರಾತ್ರಿ ಚಲಿಸುವ ಬಸ್‌ಗಳ ನಿಲುಗಡೆ, ಉಡುಪಿ ನಗರದಲ್ಲಿ ರಿಕ್ಷಾದವರಿಂದ ನಿಗದಿತ ದರಕ್ಕಿಂತ ಹೆಚ್ಚಿನ ಬಾಡಿಗೆ ವಸೂಲಿ, ಬ್ರಹ್ಮಾವರಮದುವೆ ಹಾಲ್‌ಗಳ ಎದುರು ರಸ್ತೆಯ ಮೇಲೆಯೇ ಪಾರ್ಕಿಂಗ್, ಕಟಪಾಡಿ ಪೇಟೆಯ ಬಳಿ ಸರ್ವಿಸ್ ರಸ್ತೆಯಲ್ಲೇ ಪಾರ್ಕಿಂಗ್ ಬಗ್ಗೆ ಕರೆಗಳು ಬಂದವು.

ಇದಕ್ಕೆಲ್ಲ ಪ್ರತಿಕ್ರಿಯಿಸಿದ ಎಸ್ಪಿ, ಈ ಕುರಿತು ಸ್ಥಳ ಪರಿಶೀಲನೆ ಮಾಡಿ, ಸಂಚಾರ ನಿಯಮ ಉಲ್ಲಂಘಿಸುವವರ ವಿರುದ್ದ ಕಾನೂನು ಕ್ರಮ ಜರಗಿಸಲಾಗುವುದು ಎಂದು ದೂರುದಾರರಿಗೆ ಭರವಸೆ ನೀಡಿದರು.

ಅದೇ ರೀತಿ ಗಂಗೊಳ್ಳಿಯಲ್ಲಿ ಅಕ್ರಮ ಮರಳುಗಾರಿಕೆ, ಉಡುಪಿಯಲ್ಲಿ ಸೆಕ್ಯೂರಿಟಿ ಏಜೆನ್ಸಿಯಿಂದ ಮಾಸಿಕ ಸಂಬಳ ನೀಡದಿರುವ, ಬೈಂದೂರು ಪರಿಸರ ದಲ್ಲಿ ವೈನ್ ಸ್ಟೋರ್‌ಗಳು ನಿಗದಿತ ಸಮಯಕ್ಕಿಂತ ಮೊದಲೇ ತೆರೆಯುವುದು, ಮಟ್ಕಾ ಹಾವಳಿ, ಕುಂದಾಪುರದ ಕೆಲವೊಂದು ಬಾರ್‌ಗಳಲ್ಲಿ ಸಾರ್ವಜನಿಕವಾಗಿ ಧೂಮಪಾನ ಮಾಡುತ್ತಿರುವುದು ಮತ್ತು ಮೂಳೂರು ಮತ್ತು ಉಚ್ಚಿಲ ಪರಿಸರ ದಲ್ಲಿ ನಾಯಿಗಳ ಹಾವಳಿಗಳ ಕುರಿತು ಸಾರ್ವಜನಿಕರು ದೂರು ನೀಡಿದರು.

ಕಾರ್ಯಕ್ರಮದಲ್ಲಿ ಡಿವೈಎಸ್ಪಿಗಳಾದ ಜೈಶಂಕರ್, ಪಿ.ಬಿ.ದಿನೇಶ್, ವೃತ್ತ ನಿರೀಕ್ಷಕರಾದ ಮಂಜುನಾಥ್, ಶಾಂತಾರಾಮ್, ನಗರ ಸಂಚಾರ ಠಾಣಾಧಿಕಾರಿ ನಿತ್ಯಾನಂದ ಗೌಡ ಹಾಜರಿದ್ದರು.

ಕಳೆದ ಮೂರು ತಿಂಗಳ ಒಟ್ಟು ಪ್ರಕರಣಗಳು

ಮಾ.1ರಿಂದ ಮೇ 30ರವರೆಗೆ ಉಡುಪಿ ಜಿಲ್ಲೆಯ ವಿವಿಧ ಪೊಲೀಸ್ ಠಾಣೆ ಗಳ ವ್ಯಾಪ್ತಿಯಲ್ಲಿ 67 ಮಟ್ಕಾ ಪ್ರಕರಣಗಳಲ್ಲಿ 80 ಮಂದಿ, 16 ಜುಗಾರಿಯಲ್ಲಿ 135 ಮಂದಿ, 4 ಅಕ್ರಮ ಮದ್ಯ ಮಾರಾಟದಲ್ಲಿ ಎಂಟು ಮಂದಿ, 7 ಗಾಂಜಾ ಸೇವನೆ ಪ್ರಕರಣಗಳಲ್ಲಿ 8 ಮಂದಿ ಬಂಧಿಸಲಾಗಿದೆ

ಅದೇ ರೀತಿ ಕೋಟ್ಪಾ 365, ಕುಡಿದು ವಾಹನ ಚಾಲನೆ 374, ಕರ್ಕಶ ಹಾರ್ನ್ 623, ಚಾಲನೆಯಲ್ಲಿ ಮೊಬೈಲ್ ಬಳಕೆ 390, ಹೆಲ್ಮೆಟ್ ಧರಿಸದೆ ವಾಹನ ಚಾಲನೆ 14,348, ಅತಿ ವೇಗ 721 ಹಾಗೂ ಇತರ ಮೋಟಾರು ನಿಯಮ ಉಲ್ಲಂಘನೆ 36,062 ಪ್ರಕರಣಗಳು ದಾಖಲಾಗಿವೆ.

ಮೇ 25ರಿಂದ ಹಮ್ಮಿಕೊಳ್ಳಲಾಗಿರುವ ರಸ್ತೆ ಸುರಕ್ಷತಾ ಸಪ್ತಾಹದಡಿಯಲ್ಲಿ ಸೀಟ್ ಬೆಲ್ಟ್ ಧರಿಸದ ಬಗ್ಗೆ 4428, ಹೆಲ್ಮೆಟ್ ರಹಿತ ಚಾಲನೆ 3368 ಸೇರಿ ದಂತೆ ಒಟ್ಟು 11736 ಪ್ರಕರಣಗಳನ್ನು ಜಿಲ್ಲೆಯಾದ್ಯಂತ ದಾಖಲಿಸಲಾಗಿವೆ. ಇದರಲ್ಲಿ ಉಡುಪಿ ನಗರ ಸಂಚಾರ ಪೊಲೀಸ್ ಠಾಣೆ ಒಂದರಲ್ಲೇ 4318 ಪ್ರಕರಣಗಳು ದಾಖಲಾಗಿವೆ.

ಅಕ್ರಮ ಮರಳುಗಾರಿಕೆ: 44 ಪ್ರಕರಣ ದಾಖಲು

ಉಡುಪಿ ಜಿಲ್ಲೆಯ ವಿವಿಧ ಪೊಲೀಸ್ ಠಾಣೆಗಳಲ್ಲಿ ಅಕ್ರಮ ಮರಳುಗಾರಿಕೆ ಸಂಬಂಧ ಮಾರ್ಚ್ ತಿಂಗಳಲ್ಲಿ 17, ಎಪ್ರಿಲ್‌ನಲ್ಲಿ 8 ಹಾಗೂ ಮೇ ತಿಂಗಳಲ್ಲಿ 19 ಸೇರಿದಂತೆ ಒಟ್ಟು ಒಟ್ಟು 44 ಪ್ರಕರಣಗಳು ದಾಖಲಾಗಿವೆ. ಈ ಕುರಿತು ಹಲವರನ್ನು ಬಂಧಿಸಿ, ವಾಹನ, ಮರಳು ವಶಪಡಿಸಿಕೊಳ್ಳಲಾಗಿದೆ ಎಂದು ಎಸ್ಪಿ ನಿಶಾ ಜೇಮ್ಸ್ ತಿಳಿಸಿದ್ದಾರೆ.

ಅಕ್ರಮ ಮರಳು ಸಾಗಾಟದ ವಿಚಾರದಲ್ಲಿ ಕಂಡ್ಲೂರಿನಲ್ಲಿರುವ ಕುಂದಾಪುರ ಗ್ರಾಮಾಂತರ ಪೊಲೀಸ್ ಠಾಣೆಗೆ ಕಲ್ಲೆಸೆದ ಪ್ರಕರಣದಲ್ಲಿ ಈವರೆಗೆ 8 ಮಂದಿ ಯನ್ನು ಬಂಧಿಸಲಾಗಿದ್ದು, ಅವರೆಲ್ಲ ಜಾಮೀನಿನ ಮೇಲೆ ಬಿಡುಗಡೆ ಹೊಂದಿ ದ್ದಾರೆ. ತಲೆಮರೆಸಿಕೊಂಡಿರುವವರ ಶೋಧ ಕಾರ್ಯ ಮುಂದುವರೆಸಲಾಗಿದೆ ಎಂದರು.