ಮಾನವ ಸಂಪನ್ಮೂಲ ಅಭಿವೃದ್ಧಿ ಸಚಿವಾಲಯಕ್ಕೆ ರಾಷ್ಟ್ರೀಯ ಶಿಕ್ಷಣ ನೀತಿಯ ಕರಡು ಸಲ್ಲಿಕೆ

ಹೊಸದಿಲ್ಲಿ,ಜೂ 1: ಮಾನವ ಸಂಪನ್ಮೂಲ ಅಭಿವೃದ್ಧಿ ಸಚಿವಾಲಯವು ರಾಷ್ಟ್ರಿಯ ಶಿಕ್ಷಣ ನೀತಿ 2019ರ ಕರಡನ್ನು ಬಿಡುಗಡೆಗೊಳಿಸಿದೆ. ಮಾಜಿ ಇಸ್ರೋ ಅಧ್ಯಕ್ಷ ಕೆ.ಕಸ್ತೂರಿ ರಂಗನ್ ಅವರ ನೇತೃತ್ವದಲ್ಲಿ ರಚಿಸಲಾಗಿದ್ದ ಸಮಿತಿಯು ಶುಕ್ರವಾರ ಮಾನವ ಸಂಪನ್ಮೂಲ ಅಭಿವೃದ್ಧಿ ಸಚಿವ ರಮೇಶ ಪೋಖ್ರಿಯಾಲ್ ಮತ್ತು ಸಹಾಯಕ ಸಚಿವ ಸಂಜಯ ಶಾಮರಾವ ಧೋತ್ರೆ ಅವರಿಗೆ ಕರಡು ವರದಿಯನ್ನು ಸಲ್ಲಿಸಿತ್ತು. ಮಾನವ ಸಂಪನ್ಮೂಲ ಅಭಿವೃದ್ಧಿ ಸಚಿವಾಲಯವನ್ನು ಶಿಕ್ಷಣ ಸಚಿವಾಲಯ ಎಂದು ಮರುನಾಮಕರಣಗೊಳಿಸುವಂತೆ ಸಮಿತಿಯು ತನ್ನ ವರದಿಯಲ್ಲಿ ಪ್ರಸ್ತಾಪಿಸಿದೆ.

ಮಕ್ಕಳ ಕಾಳಜಿ ಮತ್ತು ಶಿಕ್ಷಣವನ್ನು ಶಾಲಾ ಶಿಕ್ಷಣದ ಅಖಂಡ ಭಾಗವನ್ನಾಗಿಸಿಕೊಂಡು ಪಠ್ಯಕ್ರಮ ಮತ್ತು ಬೋಧನ ಕ್ರಮದಲ್ಲಿ ಆಮೂಲಾಗ್ರ ಬದಲಾವಣೆಗೆ ಸಮಿತಿಯು ಶಿಫಾರಸು ಮಾಡಿದೆ. 2009ರ ಶಿಕ್ಷಣ ಹಕ್ಕು ಕಾಯ್ದೆಯನ್ನು 3ರಿಂದ 18 ವರ್ಷದವರೆಗಿನ ಮಕ್ಕಳಿಗೆ ಅನ್ವಯವಾಗುವಂತೆ ವಿಸ್ತರಿಸಬೇಕು ಎಂದೂ ಸಮಿತಿಯು ಶಿಫಾರಸು ಮಾಡಿದೆ.

ಶಾಲಾ ಶಿಕ್ಷಣ ವ್ಯವಸ್ಥೆಯನ್ನು ಈಗಿನ 10+2ರ ಬದಲಿಗೆ 5+3+3+4ರ ವಿನ್ಯಾಸದಲ್ಲಿ ಬದಲಿಸಿ ಶಾಲಾ ಪಠ್ಯಕ್ರಮ ಮತ್ತು ಬೋಧನ ಕ್ರಮವನ್ನು ಪುನರ್‌ರೂಪಿಸುವಂತೆ ಸಮಿತಿಯು ಸಲಹೆ ನೀಡಿದೆ. ಅದು ತನ್ನ ವರದಿಯಲ್ಲಿ ಹೇಳಿರುವಂತೆ ಐದು ವರ್ಷಗಳು ಪ್ರಾಥಮಿಕ ಪೂರ್ವ,ಗ್ರೇಡ್ 1 ಮತ್ತು ಗ್ರೇಡ್ 2 ಸೇರಿದಂತೆ ಬುನಾದಿ ಹಂತವಾಗಿದ್ದು, ನಂತರದ ಮೂರು ವರ್ಷ ಗ್ರೇಡ್ 3,4 ಮತ್ತು 5 ಸೇರಿದಂತೆ ಸಿದ್ಧತಾ ಹಂತವಾಗಿರುತ್ತದೆ. ನಂತರದ ಮೂರು ವರ್ಷ ಗ್ರೇಡ್ 6,7 ಮತ್ತು 8ರೊಂದಿಗೆ ಮಧ್ಯದ ಹಂತವಾಗಿರುತ್ತದೆ ಮತ್ತು ಗ್ರೇಡ್ 9ರಿಂದ ಗ್ರೇಡ್ 12ರ ವರೆಗಿನ ನಾಲ್ಕು ವರ್ಷ ಉನ್ನತ ಹಂತವಾಗಿರುತ್ತದೆ.

ಶಾಲಾ ಶಿಕ್ಷಣ ಪಠ್ಯಕ್ರಮದಲ್ಲಿ ವಿಷಯಗಳ ಹೊರೆಯನ್ನು ಕಡಿಮೆ ಮಾಡುವಂತೆಯೂ ವರದಿಯು ಶಿಫಾರಸು ಮಾಡಿದೆ.

ಬೋಧನ ಶಿಕ್ಷಣದಲ್ಲಿ ಬೃಹತ್ ಪರಿವರ್ತನೆಗೆ ಶಿಫಾರಸು ಮಾಡಿರುವ ನೂತನ ನೀತಿಯು ಕಳಪೆ ಗುಣಮಟ್ಟದ ಶಿಕ್ಷಕ ಶಿಕ್ಷಣ ತರಬೇತಿ ಸಂಸ್ಥೆಗಳನ್ನು ಮುಚ್ಚುವಂತೆ ಮತ್ತು ಎಲ್ಲ ಬೋಧನ ಶಿಕ್ಷಣ ಕಾರ್ಯಕ್ರಮಗಳನ್ನು ಬೃಹತ್ ಬಹುವಿಭಾಗೀಯ ವಿವಿಗಳು ಮತ್ತು ಕಾಲೇಜುಗಳಿಗೆ ವರ್ಗಾಯಿಸುವಂತೆ ಸೂಚಿಸಿದೆ. ನಾಲ್ಕು ವರ್ಷಗಳ ಸಮಗ್ರ ಹಂತ-ನಿದಿರ್ಷ್ಟ ಬಿ.ಎಡ್ ಕಾರ್ಯಕ್ರಮವು ಅಂತಿಮವಾಗಿ ಶಿಕ್ಷಕರಿಗೆ ಕನಿಷ್ಠ ಪದವಿ ವಿದ್ಯಾರ್ಹತೆಯಾಗಲಿದೆ.

ಉನ್ನತ ಶಿಕ್ಷಣ ಕ್ಷೇತ್ರದಲ್ಲಿ ಉನ್ನತ ಶಿಕ್ಷಣ ಸಂಸ್ಥೆಗಳನ್ನು ಮೂರು ವಿಧಗಳಲ್ಲಿ ಪುನರ್‌ರಚಿಸುವಂತೆ ವರದಿಯು ಪ್ರಸ್ತಾಪಿಸಿದೆ. ಈ ಪುನರ್‌ರಚನೆಗೆ ಮಿಷನ್ ನಲಂದಾ ಮತ್ತು ಮಿಷನ್ ತಕ್ಷಶಿಲಾ ಚಾಲಕ ಶಕ್ತಿಯಾಗಲಿವೆ.

ಎಲ್ಲ ಶೈಕ್ಷಣಿಕ ಉಪಕ್ರಮಗಳ ಸಮಗ್ರಅನುಷ್ಠಾನಕ್ಕಾಗಿ ಮತ್ತು ಕೇಂದ್ರ ಹಾಗೂ ರಾಜ್ಯಗಳ ನಡುವೆ ಪ್ರಯತ್ನಗಳ ಸಮನ್ವಯಕ್ಕಾಗಿ ರಾಷ್ಟ್ರೀಯ ಶಿಕ್ಷಣ ಆಯೋಗದ ಸ್ಥಾಪನೆಯನ್ನೂ ವರದಿಯು ಶಿಫಾರಸು ಮಾಡಿದೆ. ಉನ್ನತ ಶಿಕ್ಷಣ ಕ್ಷೇತ್ರದಲ್ಲಿ ಸದೃಢ ಸಂಶೋಧನಾ ಸಂಸ್ಕೃತಿಯನ್ನು ಸೃಷ್ಟಿಸಲು ಮತ್ತು ಸಂಶೋಧನಾ ಸಾಮರ್ಥ್ಯವನ್ನು ಬೆಳೆಸಲು ರಾಷ್ಟ್ರೀಯ ಸಂಶೋಧನಾ ಪ್ರತಿಷ್ಠಾನದ ಸ್ಥಾಪನೆಯನ್ನೂ ಪ್ರಸ್ತಾಪಿಸಲಾಗಿದೆ.

ಉನ್ನತ ಶಿಕ್ಷಣ ನಿಯಂತ್ರಣ ವ್ಯವಸ್ಥೆಯಲ್ಲ್ಲಿ ಪ್ರಮುಖ ಬದಲಾವಣೆಗಳನ್ನು ಸೂಚಿಸಿರುವ ವರದಿಯು,ವೃತ್ತಿಪರ ಶಿಕ್ಷಣ ಸೇರಿದಂತೆ ಉನ್ನತ ಶಿಕ್ಷಣದ ಏಕೈಕ ನಿಯಂತ್ರಣ ಸಂಸ್ಥೆಯಾಗಿ ರಾಷ್ಟ್ರೀಯ ಉನ್ನತ ಶಿಕ್ಷಣ ನಿಯಂತ್ರಣ ಪ್ರಾಧಿಕಾರವನ್ನು ಸ್ಥಾಪಿಸುವಂತೆಯೂ ಶಿಫಾರಸು ಮಾಡಿದೆ.

ವೃತ್ತಿಪರ ಶಿಕ್ಷಣ ಸೇರಿದಂತೆ ಇಡೀ ಉನ್ನತ ಶಿಕ್ಷಣ ಕ್ಷೇತ್ರದಾದ್ಯಂತ ಅಭಿವೃದ್ಧಿ ಅನುದಾನಗಳು ಮತ್ತ್ತು ಫೆಲೋಷಿಪ್‌ಗಳನ್ನು ವಿತರಿಸಲು ವಿಶ್ವವಿದ್ಯಾನಿಲಯ ಅನುದಾನ ಆಯೋಗ(ಯುಜಿಸಿ)ವನ್ನು ಉನ್ನತ ಶಿಕ್ಷಣ ಅನುದಾನ ಮಂಡಳಿಯನ್ನಾಗಿ ಪರಿವರ್ತಿಸುವಂತೆ ನೂತನ ನೀತಿಯಲ್ಲಿ ಸೂಚಿಸಲಾಗಿದೆ.

ಖಾಸಗಿ ಮತ್ತು ಸರಕಾರಿ ಶಿಕ್ಷಣ ಸಂಸ್ಥೆಗಳನ್ನು ಸಮಾನವಾಗಿ ಪರಿಗಣಿಸಲಾಗುವುದು ಮತ್ತು ಶಿಕ್ಷಣವು ಲಾಭರಹಿತ ಚಟುವಟಿಕೆಯಾಗಿ ಉಳಿಯಲಿದೆ ಎಂದೂ ವರದಿಯು ಹೇಳಿದೆ.