ಎಂ.ಎಂ.ಕಲಬುರ್ಗಿ ಹತ್ಯೆಗೆ ಮಂಗಳೂರಿನ ಅರಣ್ಯದಲ್ಲಿ ತರಬೇತಿ: ಕರ್ನಾಟಕ ಸಿಟ್

ಬೆಂಗಳೂರು, ಜೂ.5: ಪತ್ರಕರ್ತೆ ಗೌರಿ ಲಂಕೇಶ್ ಹಾಗೂ ವಿಚಾರವಾದಿ ಎಂ.ಎಂ. ಕಲಬುರ್ಗಿ ಹತ್ಯೆ ಪ್ರಕರಣದ ತನಿಖೆ ನಡೆಸುತ್ತಿರುವ ಕರ್ನಾಟಕ ವಿಶೇಷ ತನಿಖಾ ತಂಡ(ಸಿಟ್)ಇದೀಗ ಮಂಗಳೂರಿನತ್ತ ಪ್ರಯಾಣ ಬೆಳೆಸಲಿದೆ. ಈ ನಗರ ಕಲಬುರ್ಗಿ ಹತ್ಯೆಕೋರರ ಮತ್ತೊಂದು ತರಬೇತಿ ಕೇಂದ್ರವಾಗಿದೆ ಎಂದು ಸಿಟ್ ಗುರುತಿಸಿದೆ ಎಂದು 'ದಿ ಪ್ರಿಂಟ್' ವರದಿ ಮಾಡಿದೆ.

2016ರಲ್ಲಿ ಕಲಬುರ್ಗಿಯ ಹತ್ಯೆಗಿಂತ ಮೊದಲು ಆರೋಪಿಯು ಮಂಗಳೂರಿನ ಸಮೀಪದ ಕಾಡಿನಲ್ಲಿ ತರಬೇತಿ ಪಡೆದಿರುವುದಾಗಿ ನಿರಂತರ ವಿಚಾರಣೆಯ ವೇಳೆ ಓರ್ವ ಶಂಕಿತ ಬಹಿರಂಗಪಡಿಸಿದ್ದಾನೆ ಎಂದು ಮೂಲಗಳು ತಿಳಿಸಿವೆ. ಹತ್ಯೆಯಲ್ಲಿ ಸಂಚು ರೂಪಿಸಿದವರನ್ನು ಗುರುತಿಸಲು ಹಾಗೂ ತರಬೇತಿಯಲ್ಲಿ ಬಳಸಲಾಗಿದ್ದ ಶಸ್ತ್ರಾಸ್ತ್ರಗಳ ಗುರುತಿಸುವಿಕೆಗೆ ಮಂಗಳೂರಿನ ಅರಣ್ಯ ಪ್ರದೇಶ ನಿರ್ಣಾಯಕ ಮಾಹಿತಿ ಒದಗಿಸಲಿದೆ ಎಂದು ಸಿಟ್ ಅಧಿಕಾರಿಗಳು ನಂಬಿದ್ದಾರೆ.

ಸಿಟ್ ಈ ತನಕ ಲಂಕೇಶ್ ಹತ್ಯೆಯಲ್ಲಿ ಆರೋಪಿಗಳಾಗಿರುವ 18 ಜನರ ಪೈಕಿ 16 ಮಂದಿ ಹಾಗೂ ಕಲಬುರ್ಗಿ ಹತ್ಯೆಯಾಗಿ ಭಾಗಿಯಾಗಿದ್ದ ಇಬ್ಬರನ್ನು ಬಂಧಿಸಿದೆ. ಕರ್ನಾಟಕ ಸಿಐಡಿ, ಕಲಬುರ್ಗಿ ಪ್ರಕರಣಕ್ಕೆ ಸಂಬಂಧಿಸಿ ಇತರ ಮೂವರನ್ನು ಬಂಧಿಸಿದೆ. ಪುರುಷೋತ್ತಮ ವಾಘ್ಮೋರೆಯು ಗೌರಿ ಲಂಕೇಶ್‌ರನ್ನು ಹಾಗೂ ಕಲಬುರ್ಗಿ ಅವರನ್ನು ಗಣೇಶ್ ಮಿಸ್ಕಿನ್ ಗುಂಡಿಕ್ಕಿ ಕೊಂದ ಆರೋಪಿಗಳು ಎಂದು ಸಿಟ್ ಗುರುತಿಸಿದೆ.

ಗೌರಿ ಲಂಕೇಶ್ ಹತ್ಯೆಯಲ್ಲೂ ಇದೇ ರೀತಿಯ ತನಿಖೆ
2017ರ ಸೆ.5 ರಂದು ಪತ್ರಕರ್ತೆ ಗೌರಿ ಲಂಕೇಶ್ ಹತ್ಯೆಗೆ ಮೊದಲು ಸ್ವದೇಶಿ ನಿರ್ಮಿತ ಪಿಸ್ತೂಲ್ ಬಳಕೆಗೆ ತರಬೇತಿ ಪಡೆದಿರುವುದನ್ನು ಶೋಧಿಸಲು ಕರ್ನಾಟಕದ ಸಿಟ್ ಇದೇ ರೀತಿಯ ತನಿಖೆ ನೇತೃತ್ವ ವಹಿಸಿತ್ತು.

ಸಿಟ್ ಈ ಹಿಂದೆ ಬೆಳಗಾವಿ ಸಮೀಪ ಅರಣ್ಯ ಪ್ರದೇಶದಲ್ಲಿ ಕಾರ್ಯಾಚರಣೆ ನಡೆಸಿ ಮರಗಳಲ್ಲಿ ಬುಲೆಟ್‌ಗಳನ್ನು ಅಡಗಿಸಿಟ್ಟಿರುವುದನ್ನು ಪತ್ತೆ ಹಚ್ಚಿತ್ತು. ಅಲ್ಲಿ ಸಿಕ್ಕ ಬುಲೆಟ್‌ಗಳನ್ನು ಕರ್ನಾಟಕದ ಎಫ್‌ಎಸ್‌ಎಲ್‌ಗೆ ನೀಡಲಾಗಿತ್ತು. ಇದೇ ಸಂದರ್ಭದಲ್ಲಿ ವಿಚಾರವಾದಿಗಳಾದ ಗೋವಿಂದ ಪನ್ಸಾರೆ ಹಾಗೂ ನರೇಂದ್ರ ದಾಭೋಲ್ಕರ್ ಹತ್ಯೆಯ ತನಿಖೆ ನಡೆಸುತ್ತಿದ್ದ ಮಹಾರಾಷ್ಟ್ರ ಉಗ್ರ ನಿಗ್ರಹ ತಂಡ(ಎಟಿಎಸ್)ನಲಸೋಪಾರ ಹಾಗೂ ಪುಣೆಯಲ್ಲಿ ನಡೆಸಿದ ದಾಳಿಯಲ್ಲಿ 16 ಅಕ್ರಮ ನಿರ್ಮಿತ ಪಿಸ್ತೂಲ್‌ಗಳನ್ನು ವಶಕ್ಕೆ ಪಡೆದಿತ್ತು.

ವಶಪಡಿಸಿಕೊಂಡಿರುವ ಪಿಸ್ತೂಲ್‌ಗಳನ್ನು ಪರಿಶೀಲನೆ ನಡೆಸಲು, ಪನ್ಸಾರೆ ಹಾಗೂ ದಾಭೋಲ್ಕರ್ ಹತ್ಯೆಯಲ್ಲಿ ಸಂಭಾವ್ಯ ಲಿಂಕ್ ಇರುವುದನ್ನು ಪರಿಶೀಲಿಸಲು ಮೊದಲಿಗೆ ಮಹಾರಾಷ್ಟ್ರ ಎಫ್‌ಎಸ್‌ಎಲ್, ಬಳಿಕ ಕರ್ನಾಟಕ ಎಫ್‌ಎಸ್‌ಎಲ್‌ಗೆ ಹಸ್ತಾಂತರಿಸಲಾಗಿತ್ತು. ಆದರೆ, ಇದರಲ್ಲಿ ಯಾವುದೇ ಮಹತ್ವದ ಸುಳಿವು ಲಭಿಸಿರಲಿಲ್ಲ.

ಹತ್ಯೆಗಳ ಮೊದಲು ಶೂಟಿಂಗ್ ಕ್ಯಾಂಪ್:
ಹತ್ಯೆಯ ಮೊದಲು ಆರೋಪಿಗಳು ಶೂಟಿಂಗ್ ಕ್ಯಾಂಪ್ ನಡೆಸುತ್ತಿದ್ದರು ಎಂದು ಕರ್ನಾಟಕದ ಸಿಟ್ ಹೇಳಿದೆ. ಲಂಕೇಶ್ ಹತ್ಯೆಗೆ ಸಂಬಂಧಿಸಿ ಸಲ್ಲಿಸಿರುವ ಚಾರ್ಜ್‌ಶೀಟ್‌ನಲ್ಲಿ 2011ಹಾಗೂ 2017ರ ಮಧ್ಯೆ ಒಟ್ಟು 13 ಶೂಟಿಂಗ್ ಕ್ಯಾಂಪ್‌ಗಳನ್ನು ನಡೆಸಲಾಗಿತ್ತು ಎಂದು ಹೇಳಿದೆ. ಕರ್ನಾಟಕದ ಸಿಟ್ ಕಲಬುರ್ಗಿ ಹತ್ಯೆ ಪ್ರಕರಣಕ್ಕೆ ಪೂರಕವಾಗಿ ಮಂಗಳೂರಿನಲ್ಲಿ ಸಾಕ್ಷಿಗಳು ಸಿಗುವ ವಿಶ್ವಾಸದಲ್ಲಿದೆ.