ಈ 15 ಪಕ್ಷಗಳಿಗೆ ಲಭಿಸಿದ್ದು ನೋಟಾ ಮತಗಳಿಗಿಂತಲೂ ಕಡಿಮೆ ಮತಗಳು !

ಹೊಸದಿಲ್ಲಿ, ಜೂ.7: ಭಾರತದ 17ನೇ ಲೋಕಸಭೆಗೆ 36 ರಾಜಕೀಯ ಪಕ್ಷಗಳ ಪ್ರತಿನಿಧಿಗಳು ಆಯ್ಕೆಯಾಗಿದ್ದರೆ, ಈ ಪಕ್ಷಗಳ ಪೈಕಿ 15 ಪಕ್ಷಗಳಿಗೆ ದೊರೆತ ಮತಗಳು ನೋಟಾ ಮತಗಳಿಗಿಂತಲೂ ಕಡಿಮೆ. ಈ 15 ಪಕ್ಷಗಳು ಕೆಲವೇ ಕೆಲವು ಸ್ಥಾನಗಳಲ್ಲಿ ಸ್ಪರ್ಧಿಸಿದ್ದವು. ಈ ವರ್ಷ ಒಟ್ಟು ಚಲಾವಣೆಯಾದ ಮತಗಳ ಪೈಕಿ ಶೇ.1.06ರಷ್ಟು ಮತಗಳು ನೋಟಾ ಮತಗಳಾಗಿವೆ.

ಕೇಂದ್ರ ಸಚಿವ ರಾಮ್ ವಿಲಾಸ್ ಪಾಸ್ವಾನ್ ಆವರ ಲೋಕ್ ಜನಶಕ್ತಿ ಪಾರ್ಟಿ ಆರು ಲೋಕಸಭಾ ಸ್ಥಾನಗಳನ್ನು ಬಿಹಾರದಲ್ಲಿ ಗಳಿಸಿವೆಯಾದರೂ ಒಟ್ಟು ಚಲಾಯಿಸಲ್ಪಟ್ಟ ಮತಗಳ ಪೈಕಿ ಕೇವಲ 0.52 ಮತಗಳಷ್ಟೇ ಈ ಪಕ್ಷದ ಪಾಲಿಗೆ ಬಂದಿವೆ.

ಅಂತೆಯೇ ಕೇವಲ ಮೂರು ಸ್ಥಾನಗಳನ್ನು ಪಡೆದಿರುವ ಸಿಪಿಐ(ಎಂ) ಶೇ. 0.10 ಮತಗಳನ್ನು ಪಡೆದಿದ್ದರೆ, ಜಮ್ಮು - ಕಾಶ್ಮೀರ ನ್ಯಾಷನಲ್ ಕಾನ್ಫರೆನ್ಸ್ ಶೇ. 0.05 ಮತಗಳನ್ನು ಗಳಿಸಿದೆ. ಇಂಡಿಯನ್ ಯೂನಿಯನ್ ಮುಸ್ಲಿಂ ಲೀಗ್ ಕೂಡ 0.26 ಮತಗಳನ್ನಷ್ಟೇ ಪಡೆದು ನೋಟಾ ಮತಗಳಿಗಿಂತಲೂ ಕಡಿಮೆ ಮತಗಳನ್ನು ಪಡೆದಿದೆ.

ಶಿರೋಮಣಿ ಅಕಾಲಿ ದಳ ಹಾಗೂ ಆಲ್ ಇಂಡಿಯಾ ಮಜ್ಲಿಸ್-ಇ-ಇತ್ತೆಹಾದುಲ್ ಮುಸ್ಲಿಮೀನ್, ಸಿಪಿಐ ಹಾಗೂ ಅಪ್ನಾ ದಳ್ ತಲಾ ಎರಡು ಸ್ಥಾನಗಳನ್ನು ಪಡೆದಿದ್ದು, ಈ ಪಕ್ಷಗಳೂ ಪ್ರತ್ಯೇಕವಾಗಿ ಒಟ್ಟು ಚಲಾವಣೆಯಾದ ಮತಗಳ ಪೈಕಿ ಶೇ.1ಕ್ಕಿಂತಲೂ ಕಡಿಮೆ ಮತಗಳನ್ನು ಪಡೆದಿವೆ.

ಲೋಕಸಭಾ ಚುನಾವಣೆಯಲ್ಲಿ ಕೇವಲ ಒಂದು ಸ್ಥಾನ ಪಡೆದ ಏಳು ರಾಜಕೀಯ ಪಕ್ಷಗಳು ಒಟ್ಟು ಮತಗಳ ಪೈಕಿ ಶೇ. 0.5ಕ್ಕಿಂತಲೂ ಕಡಿಮೆ ಮತಗಳನ್ನು ಪಡೆದಿವೆ. ಆಲ್ ಜಾರ್ಖಂಡ್ ಸ್ಟೂಡೆಂಟ್ಸ್ ಯೂನಿಯನ್ (0.11 ಶೇ.), ರೆವೊಲ್ಯೂಷನರಿ ಸೋಶಿಯಲಿಸ್ಟ್ ಪಾರ್ಟಿ (ಶೇ. 0.12) ಶೇ. 0.10ಕ್ಕಿಂತ ಹೆಚ್ಚು ಮತಗಳನ್ನು ಪಡೆದರೆ, ಐದು ಪಕ್ಷಗಳು ಅದಕ್ಕಿಂತಲೂ ಕಡಿಮೆ ಮತಗಳನ್ನು ಪಡೆದಿವೆ.

ಕೇರಳ ಕಾಂಗ್ರೆಸ್ (ಮಣಿ) ಒಟ್ಟು ಮತಗಳ ಪೈಕಿ ಶೇ. 0.07 ಮತಗಳನ್ನು ಪಡೆದಿದ್ದರೆ, ಮಿಝೋ ನ್ಯಾಷನಲ್ ಫ್ರಂಟ್ ಶೇ. 0.04 ಮತಗಳು ಹಾಗೂ ನಾಗಾ ಪೀಪಲ್ಸ್ ಫ್ರಂಟ್ ಶೇ. 0.06 ಮತಗಳನ್ನು ಪಡೆದಿವೆ.

ಒಂದೇ ಸ್ಥಾನ ಗೆದ್ದಿರುವ ನ್ಯಾಷನಲಿಸ್ಟ್ ಡೆಮಾಕ್ರಟಿಕ್ ಪ್ರೋಗ್ರೆಸ್ಸಿವ್ ಪಾರ್ಟಿ ಶೇ. 0.08 ಮತಗಳು ಹಾಗೂ ಸಿಕ್ಕಿಂ ಕ್ರಾಂತಿಕಾರಿ ಮೋರ್ಚಾ ಒಟ್ಟು ಮತಗಳ ಪೈಕಿ ಶೇ. 0.03 ಮತಗಳನ್ನು ಪಡೆದಿದೆ.