ತಮಿಳುನಾಡು: ಸರಕಾರಿ ಕಚೇರಿ, ವಿಮಾನ ನಿಲ್ದಾಣದ ಹಿಂದಿ ನಾಮಫಲಕಗಳಗೆ ಕಪ್ಪು ಬಣ್ಣ

ಚೆನ್ನೈ, ಜೂ.9: ಕೇಂದ್ರ ಸರಕಾರದ ರಾಷ್ಟ್ರೀಯ ಶಿಕ್ಷಣ ನೀತಿಯ ಕರಡು ಪ್ರಸ್ತಾವಕ್ಕೆ ತೀವ್ರ ವಿರೋಧ ವ್ಯಕ್ತವಾಗಿರುವ ತಮಿಳುನಾಡಿನ ವಿವಿಧೆಡೆ ಸರಕಾರಿ ಕಚೇರಿ ಹಾಗೂ ವಿಮಾನ ನಿಲ್ದಾಣದ ನಾಮಫಲಕದಲ್ಲಿರುವ ಹಿಂದಿ ಪದಗಳಿಗೆ ಕಪ್ಪು ಬಣ್ಣ ಬಳಿಯಲಾಗಿದೆ ಎಂದು ವರದಿಯಾಗಿದೆ.

 ತಿರುಚಿಯಲ್ಲಿರುವ ಬಿಎಸ್ಸೆಎನ್ನೆಲ್ ಕಚೇರಿ, ಅಂಚೆ ಕಚೇರಿ, ತಿರುಚಿ ವಿಮಾನ ನಿಲ್ದಾಣದ ನಾಮಫಲಕದಲ್ಲಿರುವ ಹಿಂದಿ ಪದಗಳಿಗೆ ಅಪರಿಚಿತರು ಶನಿವಾರ ಕಪ್ಪು ಬಣ್ಣ ಬಳಿದಿದ್ದಾರೆ.

ಕೇಂದ್ರದ ತ್ರಿಭಾಷಾ ಸೂತ್ರವನ್ನು ತೀವ್ರವಾಗಿ ವಿರೋಧಿಸಿರುವ ತಮಿಳುನಾಡಿನ ರಾಜಕೀಯ ಪಕ್ಷಗಳು, ಇದು ಹಿಂದಿ ಮಾತನಾಡದ ಪ್ರದೇಶಗಳ ಮೇಲೆ ಹಿಂದಿ ಭಾಷೆಯನ್ನು ಹೇರುವ ಕೇಂದ್ರ ಸರಕಾರದ ಪಿತೂರಿಯಾಗಿದೆ ಎಂದು ಆರೋಪಿಸಿವೆ.

ಆದರೆ ಈ ಆರೋಪವನ್ನು ನಿರಾಕರಿಸಿರುವ ಕೇಂದ್ರ ಸರಕಾರ, ಇದು ಸರಕಾರದ ಅಂತಿಮ ನಿರ್ಧಾರವಲ್ಲ, ಕರಡು ಪ್ರಸ್ತಾವ ಅಷ್ಟೇ. ಸಾರ್ವಜನಿಕ ಚರ್ಚೆಗಾಗಿ ಇದನ್ನು ಜನರ ಮುಂದಿರಿಸಲಾಗಿದೆ ಎಂದು ಸ್ಪಷ್ಟಪಡಿಸಿದೆ.