ಯುಪಿಎ-ಎನ್‍ಡಿಎ ಆಡಳಿತದಲ್ಲಿ ಜಿಡಿಪಿಯನ್ನು ಹೆಚ್ಚು ತೋರಿಸಲಾಗಿತ್ತು

ಹೊಸದಿಲ್ಲಿ,ಜೂ.11: ಸರಕಾರದ ಅಂಕಿಅಂಶಗಳು ಭಾರತದ ಆರ್ಥಿಕ ಬೆಳವಣಿಗೆಯ ಕುರಿತು ಕಳೆದೊಂದು ದಶಕದಲ್ಲಿಯ ವಾಸ್ತವತೆಗಿಂತ ಭಿನ್ನವಾದ ಸುಂದರ ಚಿತ್ರಣವನ್ನು ಮುಂದಿರಿಸಿವೆ ಎಂಬ ಕಟುಸತ್ಯವನ್ನು ಮಾಜಿ ಮುಖ್ಯ ಆರ್ಥಿಕ ಸಲಹೆಗಾರ ಅರವಿಂದ ಸುಬ್ರಮಣಿಯನ್ ಅವರು ನಡೆಸಿರುವ ಅಧ್ಯಯನವು ಬೆಟ್ಟು ಮಾಡಿದೆ.

ತೀರ ಇತ್ತೀಚಿನವರೆಗೂ ಭಾರತವು ವಿಶ್ವದಲ್ಲಿಯೇ ಅತ್ಯಂತ ವೇಗವಾಗಿ ಬೆಳೆಯುತ್ತಿರುವ ಆರ್ಥಿಕತೆ ಎಂಬ ಮುಕುಟವನ್ನು ಧರಿಸಿತ್ತು. ಆದರೆ ಸುಬ್ರಮಣಿಯನ್ ಅವರ ಅಧ್ಯಯನವು 2011 ಮತ್ತು 2017ರ ನಡುವಿನ ಅವಧಿಯಲ್ಲಿನ ಆರ್ಥಿಕ ಬೆಳವಣಿಗೆಯನ್ನು ಅತಿಯಾಗಿ ಅಂದಾಜಿಸಲಾಗಿತ್ತು ಮತ್ತು ಆ ಅವಧಿಯಲ್ಲಿ ಬೆಳವಣಿಗೆಯ ದರವು ವಾರ್ಷಿಕ ಸುಮಾರು ಶೇ.7ರ ಬದಲು ಸುಮಾರು ಶೇ.4.5ರಷ್ಟು ಮಾತ್ರವೇ ಇತ್ತು ಎನ್ನುವುದನ್ನು ಬಹಿರಂಗಗೊಳಿಸಿದೆ. ಹಾರ್ವರ್ಡ್ ವಿವಿಯ ಸೆಂಟರ್ ಫಾರ್ ಇಂಟರ್‌ನ್ಯಾಷನಲ್ ಡೆವಲಪ್‌ಮೆಂಟ್ ಈ ವರದಿಯನ್ನು ಪ್ರಕಟಿಸಿದೆ.

 2012ರಲ್ಲಿ ಆಗಿನ ಕಾಂಗ್ರೆಸ್ ನೇತೃತ್ವದ ಯುಪಿಎ ಸರಕಾರವು ಒಟ್ಟು ದೇಶಿಯ ಉತ್ಪನ್ನ(ಜಿಡಿಪಿ)ವನ್ನು ಲೆಕ್ಕ ಹಾಕುವ ಪದ್ಧತಿಯನ್ನು ಬದಲಿಸಿದ ಬಳಿಕ ಈ ಅತಿಯಾದ ಅಂದಾಜನ್ನು ಮಾಡಲಾಗಿತ್ತು. ಮೊದಲಿನ ಪ್ರಮಾಣಾಧರಿತ ದತ್ತಾಂಶಗಳ ಬದಲು ಕಾರ್ಪೊರೇಟ್ ವ್ಯವಹಾರಗಳ ಸಚಿವಾಲಯವು ಸಂಕಲಿಸಿದ್ದ ವಿತ್ತೀಯ ಲೆಕ್ಕಪತ್ರ ಆಧರಿತ ದತ್ತಾಂಶಗಳನ್ನು ನೆಚ್ಚಿಕೊಂಡಿದ್ದು, ಪ್ರಮುಖ ಹೊಂದಾಣಿಕೆಗಳಲ್ಲೊಂದಾಗಿತ್ತು. ಇದು ಜಿಡಿಪಿ ಅಂದಾಜುಗಳನ್ನು ಬೆಲೆ ಬದಲಾವಣೆಗಳಿಗೆ ಹೆಚ್ಚು ಸಂವೇದನಾಶೀಲವಾಗಿಸಿತ್ತು ಮತ್ತು ಇದು ತಯಾರಿಕೆ ಬೆಳವಣಿಗೆಯನ್ನು ಅತಿಯಾಗಿ ಅಂದಾಜಿಸಿರಬಹುದು ಎಂದು ವರದಿಯು ಹೇಳಿದೆ.

ಸುಬ್ರಮಣಿಯನ್ ಅವರ ಅಧ್ಯಯನವು ಭಾರತದ ಆರ್ಥಿಕ ಅಂಕಿಸಂಖ್ಯೆಗಳ ಬಗ್ಗೆ ಹೆಚ್ಚಿನ ಶಂಕೆಯನ್ನು ಮೂಡಿಸಿದೆ. ಪ್ರಧಾನಿ ನರೇಂದ್ರ ಮೋದಿಯವರ ಸರಕಾರದಡಿ ಭಾರತದ ಅತಿಯಾದ ಬೆಳವಣಿಗೆ ಅಂದಾಜುಗಳನ್ನು ಹೆಚ್ಚುತ್ತಿರುವ ಟೀಕಾಕಾರರು ಪ್ರಶ್ನಿಸಿದ್ದಾರೆ. ವಿಳಂಬಿತ ನಿರುದ್ಯೋಗ ವರದಿಯು ಈ ವರ್ಷದ ಆರಂಭದಲ್ಲಿ ವಿವಾದಕ್ಕೆ ಸಿಲುಕಿತ್ತು,ಇಬ್ಬರು ಅಂಕಿಅಂಶ ಅಧಿಕಾರಿಗಳು ದತ್ತಾಂಶಗಳ ಬಗ್ಗೆ ಕಳವಳ ವ್ಯಕ್ತಪಡಿಸಿ ಹುದ್ದೆಗಳನ್ನು ತೊರೆದಿದ್ದರು. ರಾಜಕಾರಣಿಗಳು ಅಂಕಿಸಂಖ್ಯೆಗಳ ಮೇಲೆ ಪ್ರಭಾವ ಬೀರಲು ಪ್ರಯತ್ನಿಸುತ್ತಿದ್ದಾರೆಯೇ ಎಂದು ವಿಶ್ವಾದ್ಯಂತದ 108 ಆರ್ಥಿಕ ತಜ್ಞರ ಗುಂಪೊಂದು ಪ್ರಶ್ನಿಸಿತ್ತು.

ಜಿಡಿಪಿಯಿಂದ ಹಿಡಿದು ಉದ್ಯೋಗ ಮತ್ತು ಸರಕಾರಿ ಲೆಕ್ಕಗಳವರೆಗೆ ಅಂಕಿಅಂಶಗಳನ್ನು ಕಂಡುಕೊಳ್ಳುವ ಕಾರ್ಯಪ್ರಣಾಲಿಯ ವರ್ಚಸ್ಸಿಗೆ ಉಂಟಾಗಿರುವ ಹಾನಿಯನ್ನು ಭಾರತವು ನಿವಾರಿಸುವ ಅಗತ್ಯವಿದೆ. ಇದೇ ವೇಳೆ ಜಿಡಿಪಿ ಅಂದಾಜಿಗಾಗಿ ಇಡೀ ಕಾರ್ಯವಿಧಾನ ಮತ್ತು ಅನುಷ್ಠಾನವನ್ನು ಸ್ವತಂತ್ರ ಕಾರ್ಯಪಡೆಯೊಂದು ಪುನರ್‌ಪರಿಶೀಲಿಸಬೇಕಿದೆ ಎಂದು ಸುಬ್ರಮಣಿಯನ್ ಹೇಳಿದ್ದಾರೆ. ಈ ವರ್ಷದ ಮೊದಲ ಮೂರು ತಿಂಗಳುಗಳಲ್ಲಿ ಭಾರತದ ಬೆಳವಣಿಗೆಯು ಐದು ವರ್ಷಗಳ ಕನಿಷ್ಠ ಮಟ್ಟಕ್ಕೆ ನಿಧಾನಗೊಂಡಿದೆ ಎಂದು ತೀರ ಇತ್ತೀಚಿನ ದತ್ತಾಂಶಗಳು ತೋರಿಸಿವೆ.