ಶಾಲಾ ಸಮವಸ್ತ್ರವಾಗಿ ಖಾದಿ ಬಳಕೆಗೆ ನಿರ್ಧರಿಸಿದ ಉತ್ತರಪ್ರದೇಶ ಸರಕಾರ

ಕೋಲ್ಕತಾ, ಜೂ. 21: ಖಾದಿ ಬಳಕೆ ಉತ್ತೇಜಿಸುವ ಕ್ರಮವಾಗಿ ಉತ್ತರಪ್ರದೇಶದ ಮುಖ್ಯಮಂತ್ರಿ ಆದಿತ್ಯನಾಥ್ ಖಾದಿಯನ್ನು ಶಾಲಾ ಸಮವಸ್ತ್ರಕ್ಕೆ ಬಳಸಲು ನಿರ್ಧರಿಸಿದ್ದಾರೆ.

ಖಾದಿ ಬಳಕೆ ಉತ್ತೇಜಿಸುವ ಹಾಗೂ ಮಕ್ಕಳು ಇದರ ಪ್ರಾಮುಖ್ಯತೆ ಅರಿತುಕೊಳ್ಳುವ ಉದ್ದೇಶದಿಂದ ಪ್ರಾಯೋಗಿಕ ಯೋಜನೆಯಾಗಿ ರಾಜ್ಯದ ಪ್ರಾಥಮಿಕ ಶಾಲೆಗಳ (1ರಿಂದ 5) ಗಳಲ್ಲಿ ಖಾದಿ ಸಮವಸ್ತ್ರ ಪರಿಚಯಿಸಲು ನಿರ್ಧರಿಸಲಾಗಿದೆ ಎಂದು ರಾಜ್ಯ ಶಿಕ್ಷಣ ಸಚಿವ ಅನುಪಮ್ ಜೈಸ್ವಾಲ್ ತಿಳಿಸಿದ್ದಾರೆ. ಜುಲೈಯಲ್ಲಿ ಆರಂಭವಾಗಲಿರುವ ಪ್ರಸಕ್ತ ಶೈಕ್ಷಣಿಕ ವರ್ಷದಿಂದ ಬಹರಾಯಿಚ್ ಸಹಿತ ರಾಜ್ಯದ ನಾಲ್ಕು ಜಿಲ್ಲೆಗಳ ಪ್ರತಿ ಒಂದು ಬ್ಲಾಕ್‌ನಲ್ಲಿ ಈ ಯೋಜನೆಯನ್ನು ಅನುಷ್ಠಾನಗೊಳಿಸಲಾಗುವುದು ಎಂದು ಸಚಿವರು ತಿಳಿಸಿದ್ದಾರೆ. ಖಾದಿ ಗಟ್ಟಿಯಾದ ಬಟ್ಟೆ. ಇದಕ್ಕೆ ಕಡಿಮೆ ನಿರ್ವಹಣೆ ಸಾಕು. ಆದುದರಿಂದ ಖಾದಿಯನ್ನು ಶಾಲೆಯ ಸಮವಸ್ತ್ರವಾಗಿ ಪರಿಚಯಿಸಲು ಚಿಂತಿಸಲಾಯಿತು ಎಂದು ಜೈಸ್ವಾಲ್ ತಿಳಿಸಿದ್ದಾರೆ.

ಒಂದು ವೇಳೆ ಫಲಿತಾಂಶ ಉತ್ತೇಜನಕಾರಿಯಾಗಿದ್ದರೆ, ರಾಜ್ಯಾದ್ಯಂತದ ಶಾಲೆಗಳಲ್ಲಿ ಖಾದಿ ಸಮವಸ್ತ್ರವನ್ನು ಅನುಷ್ಠಾನಗೊಳಿಸಲಾಗುವುದು ಎಂದು ಅವರು ತಿಳಿಸಿದರು. ಪ್ರಸ್ತುತ ಉತ್ತರಪ್ರದೇಶದ ಸರಕಾರಿ ಶಾಲೆಯ ಸಮವಸ್ತ್ರ ಬಾಲಕರದ್ದು ಕಂದು ಚಡ್ಡಿ ಹಾಗೂ ನಸುಗೆಂಪು ಅಂಗಿ, ಬಾಲಕಿಯರದ್ದು ಕಂದು ಸ್ಕರ್ಟ್ ಹಾಗೂ ನಸುಗೆಂಪು ಟಾಪ್ ಬಾಲಕರು ಹಾಗೂ ಬಾಲಕಿಯರ ಸಮವಸ್ತ್ರದ ಕಾಲರ್ ಬಣ್ಣ ಕಂದು.