ಟ್ರಾಫಿಕ್ ನಿಯಮ ಉಲ್ಲಂಘಿಸಿದ ಸಿಎಂ ಕಾರು: ನಾಲ್ಕು ತಿಂಗಳು ಕಳೆದರೂ ಕಟ್ಟಿಲ್ಲ ದಂಡ !

ಬೆಂಗಳೂರು, ಜೂ.29: ಮುಖ್ಯಮಂತ್ರಿ ಎಚ್.ಡಿ.ಕುಮಾರಸ್ವಾಮಿ ಬಳಸುವ ಕಾರು ಟ್ರಾಫಿಕ್ ನಿಯಮವನ್ನು ಉಲ್ಲಂಘಿಸಿದ್ದು, ನಾಲ್ಕು ತಿಂಗಳು ಕಳೆದರೂ ಇದುವರೆಗೂ ದಂಡ ಕಟ್ಟದಿರುವುದು ಬೆಳಕಿಗೆ ಬಂದಿದೆ.

ಸರಕಾರಿ ವಾಹನ ಬಳಸದೇ ಸ್ವಂತ ವಾಹನ ಬಳಸುತ್ತಿರುವ ಸಿಎಂ ಅವರ ರೇಂಜ್ ರೋವರ್ ಕಾರಿನ ಮೇಲೆ 4 ತಿಂಗಳಿನಿಂದ ನಿಯಮ ಉಲ್ಲಂಘನೆ ಆರೋಪವಿದೆ.

ಕಳೆದ ಫೆ.10 ರಂದು ಸದಾಶಿವನಗರ ಠಾಣಾ ವ್ಯಾಪ್ತಿಯಲ್ಲಿ ನಿಯಮ ಉಲ್ಲಂಘನೆಯಾಗಿತ್ತು. ಕಾರು ಚಾಲಕ ಮೊಬೈಲ್ ಬಳಕೆ ಮಾಡಿದ್ದು ಆಟೋಮೇಟೆಡ್ ಕ್ಯಾಮೆರಾದಲ್ಲಿ ಸೆರೆಯಾಗಿತ್ತು. ಈ ಬಗ್ಗೆ ಸಂಚಾರಿ ಪೊಲೀಸರು ನೋಟಿಸ್ ಕಳಿಸಿದ್ದರು. ಆಟೋಮೇಟೆಡ್ ಚಲನ್ ಜನರೇಟ್ ಆಗಿ ಈಗಾಗಲೇ ಎರಡು ವಾರಗಳಾಗಿದೆ. ಸಂಚಾರ ನಿಯಮದ ಪ್ರಕಾರ ಚಲನ್ ಜನರೇಟ್ ಆದ 7 ದಿನಗಳಲ್ಲಿ ದಂಡ ಪಾವತಿಸಬೇಕು. ಇಲ್ಲವಾದಲ್ಲಿ ಪೊಲೀಸರೇ ತಡೆ ಹಿಡಿದು ದಂಡ ವಸೂಲಿ ಮಾಡಬಹುದು. ಆದರೆ ಇನ್ನೂ ದಂಡ ಕಟ್ಟಿಲ್ಲ. ಆದಷ್ಟು ಬೇಗ ದಂಡ ವಸೂಲಿ ಮಾಡುವುದಾಗಿ ಸಂಬಂಧಪಟ್ಟ ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.