ಪಾರ್ಕಿಂಗ್ ಗಲಾಟೆಯನ್ನು 'ದೇವಸ್ಥಾನದ ಮೇಲಿನ ಉಗ್ರರ ದಾಳಿ'ಯಾಗಿ ಪರಿವರ್ತಿಸಿದ ಬಿಜೆಪಿ ಟ್ವಿಟರ್ ಪಡೆ !
ಹೊಸದಿಲ್ಲಿ: ಜುಲೈ ಒಂದರಂದು ಸಂಜೆ ಹಳೆ ದಿಲ್ಲಿಯಲ್ಲಿ ನಡೆದ ಪಾರ್ಕಿಂಗ್ ಜಾಗವೊಂದರ ಕುರಿತ ವಾಗ್ವಾದ ಜುಲೈ ಎರಡರಂದು ಮಧ್ಯಾಹ್ನ ದೇವಸ್ಥಾನದ ಮೇಲಿನ ಭಯೋತ್ಪಾದಕ ದಾಳಿಯಾಗಿ ಬದಲಾಗಿದೆ !
ದಿಲ್ಲಿಯ ಒಂದು ನಿರ್ದಿಷ್ಟ ಜಾಗದಲ್ಲಿ ನಡೆದ ಸ್ಥಳೀಯ ವಿವಾದವೊಂದನ್ನು ಟ್ವಿಟರ್ ನಲ್ಲಿರುವ ಕೆಲವು ಕೋಮುವಾದಿ ಅಜೆಂಡಾ ಇರುವ ಜನಪ್ರತಿನಿಧಿಗಳು, ಬಿಜೆಪಿಯ ಬೆಂಬಲಿಗರ ದೊಡ್ಡ ಪಡೆ, ಪಾವತಿ ಪಡೆದು ಟ್ವೀಟ್ ಮಾಡುವ ಅಕೌಂಟ್ ಗಳು ಹಾಗು ಬಾಟ್ ಅಕೌಂಟ್ ಗಳು ಟಾಪ್ ಟ್ರೆಂಡಿಂಗ್ ವಿಷಯವಾಗಿ ಪರಿವರ್ತನೆ ಮಾಡಿದೆ, ಅದೂ ದೇವಸ್ಥಾನದ ಮೇಲೆ ಉಗ್ರರ ದಾಳಿ ಎಂದು !
ಹಳೆ ದಿಲ್ಲಿಯ ಚಾಂದಿನಿ ಚೌಕ್ ಪ್ರದೇಶದಲ್ಲಿ ಸೋಮವಾರ ಸಂಜೆ ಪಾರ್ಕಿಂಗ್ ಕುರಿತು ಒಂದು ಜಗಳ ಹುಟ್ಟಿಕೊಂಡಿತು. ಬಳಿಕ ಸ್ಥಳೀಯ ದೇವಸ್ಥಾನದಲ್ಲಿ ದಾಂಧಲೆ ನಡೆಯಿತು ಎಂಬ ವರದಿಗಳು ಬಂದವು. ಪೊಲೀಸರು ಹಾಗು ಸ್ಥಳೀಯ ಜನಪ್ರತಿನಿಧಿಗಳು ಜನರನ್ನು ಶಾಂತಿ ಕಾಪಾಡುವಂತೆ ಮನವಿ ಮಾಡಿಕೊಂಡರು. ಪತ್ರಿಕೆಗಳೂ ಆ ವಿಷಯವನ್ನು ವೈಭವೀಕರಿಸದೆ ಒಳಗಿನ ಪುಟದಲ್ಲಿ ಪ್ರಕಟಿಸಿದವು.
ಆದರೆ ಮಂಗಳವಾರ ಬೆಳಗ್ಗೆ ಇದ್ದಕ್ಕಿದ್ದಂತೆ ಟ್ವಿಟರ್ ನಲ್ಲಿ #TempleTerrorAttack ಹ್ಯಾಷ್ ಟ್ಯಾಗ್ ನಲ್ಲಿ ಟ್ವೀಟ್ ಗಳು ಹರಿದು ಬರಲಾರಂಭಿಸಿದವು. ಮಧ್ಯಾಹ್ನ ಕೇವಲ ಐದು ನಿಮಿಷದ ಅವಧಿಯಲ್ಲಿ ಈ ಹ್ಯಾಷ್ ಟ್ಯಾಗ್ ನ 500 ಟ್ವೀಟ್ ಗಳು ಸುಮಾರು ಮೂರು ಲಕ್ಷ ಟ್ವಿಟರ್ ಅಕೌಂಟ್ ಗಳನ್ನು ತಲುಪಿದವು. ಮಧ್ಯಾಹ್ನ ಈ ಹ್ಯಾಷ್ ಟ್ಯಾಗ್ 80,000 ಟ್ವೀಟ್ ಗಳೊಂದಿಗೆ ಟಾಪ್ ಟ್ರೆಂಡಿಂಗ್ ಆಯಿತು. ಇದರೊಂದಿಗೆ #ChandiniChowk , #TempleDestroyed, #TempleAttacked ಈ ಹ್ಯಾಷ್ ಟ್ಯಾಗ್ ಗಳೂ ಟ್ರೆಂಡಿಂಗ್ ಆಗತೊಡಗಿದವು.
ಇದರ ಬಗ್ಗೆ huffingtonpost.com ನಡೆಸಿದ ವಿಶ್ಲೇಷಣೆಯಲ್ಲಿ ಬಿಜೆಪಿಯ ಬೆಂಬಲಿಗರು ನಡೆಸಿದ ವ್ಯವಸ್ಥಿತ ಅಪಪ್ರಚಾರದ ಅಭಿಯಾನ ಇದು ಎಂಬುದು ಸ್ಪಷ್ಟವಾಗಿ ಕಂಡು ಬಂದಿತು. ದೊಡ್ಡ ಸಂಖ್ಯೆಯ ಫಾಲೋವರ್ಸ್ ಇರುವ ಟ್ವಿಟರ್ ಪ್ರಭಾವಿಗಳು ಹಾಗು ಹೆಚ್ಚು ಫಾಲೋವರ್ ಗಳೇ ಇಲ್ಲದ ಇಂತಹ ಅಭಿಯಾನ ನಡೆಸುವುದಕ್ಕಾಗಿಯೇ ಇರುವ ಅಕೌಂಟ್ ಗಳಿಂದ ನಡೆದ ಕೆಲಸ ಇದು. ಟ್ವಿಟರ್ ನಲ್ಲಿರುವ ಬಿಜೆಪಿಯ ಧಾರಾಳ ಸಂಖ್ಯೆಯ ಬೆಂಬಲಿಗರು, ಹಣಕ್ಕಾಗಿಯೇ ಟ್ವೀಟ್ ಮಾಡುವವರು, ರಾಜಕೀಯ ಕನ್ಸಲ್ಟೇನ್ಸಿಗಳು ಹಾಗು ಬಾಟ್ ಅಕೌಂಟ್ ಗಳು ಇದರಲ್ಲಿ ದೊಡ್ಡ ಪಾತ್ರ ವಹಿಸಿವೆ.
ಬಿಜೆಪಿ ಘಟಕದ ಐಟಿ ಸೆಲ್ ಮುಖ್ಯಸ್ಥ ಪುನೀತ್ ಅಗರ್ವಾಲ್, ಮಾಜಿ ಆಪ್ ಶಾಸಕ ಈಗ ಬಿಜೆಪಿಯಲ್ಲಿರುವ ಕಪಿಲ್ ಮಿಶ್ರಾ ಈ ಅಭಿಯಾನದಲ್ಲಿ ಮುಂಚೂಣಿಯಲ್ಲಿದ್ದಾರೆ. ನೇರವಾಗಿ ಏನನ್ನೂ ಮಾಡದ ಪುನೀತ್ ಅಗರ್ವಾಲ್ ಈ ಕುರಿತ ಟ್ವೀಟ್ ಗಳು ಹೆಚ್ಚೆಚ್ಚು ಸಂಖ್ಯೆಯಲ್ಲಿ ರಿಟ್ವೀಟ್ ಆಗುವಂತೆ ನೋಡಿಕೊಂಡರೆ ಕಪಿಲ್ ಮಿಶ್ರಾ ನೇರವಾಗಿಯೇ ಪ್ರಚೋದನಕಾರಿ ಹೇಳಿಕೆಗಳನ್ನು ಟ್ವೀಟ್ ಮಾಡುತ್ತಿದ್ದಾರೆ. " ಪೊಲೀಸರು ಜನರ ಸಹನೆ ಪರೀಕ್ಷಿಸಬೇಡಿ ", " ದೇವಸ್ಥಾನ ಭಗ್ನ ಮಾಡಿದವರು ಆರಾಮವಾಗಿ ಓಡಾಡಿಕೊಂಡಿದ್ದಾರೆ " ಇತ್ಯಾದಿ ಘೋಷಣೆಗಳ ಹೇಳಿಕೆಗಳನ್ನು , ವೀಡಿಯೊಗಳನ್ನು ಕಪಿಲ್ ಟ್ವೀಟ್ ಮಾಡುತ್ತಲೇ ಇದ್ದಾರೆ. ಅವು ದೊಡ್ಡ ಸಂಖ್ಯೆಯ ಜನರನ್ನು ತಲುಪುತ್ತಿವೆ.
ಆದರೆ ಈ ಸುಳ್ಳಿನ ಅಭಿಯಾನದಲ್ಲಿ ಟ್ವೀಟ್ ಮಾಡುತ್ತಿರುವ ಇತರ ಕೆಲವು ಅಕೌಂಟ್ ಗಳನ್ನು ಪರಿಶೀಲಿಸಿದರೆ ಬೆಚ್ಚಿ ಬೀಳಿಸುವ ಅಂಶಗಳು ಹೊರಬೀಳುತ್ತವೆ. #Chandichowk ಹ್ಯಾಷ್ ಟ್ಯಾಗ್ ನ ಟಾಪ್ ಟ್ವಿಟರ್ ಗಳಲ್ಲಿ ಮೂರನೇ ಅಕೌಂಟ್ ಗೆ ಪ್ರೊಫೈಲ್ ಪಿಕ್ಚರ್ ಕೂಡ ಇಲ್ಲ , ಇರುವುದು ಕೇವಲ ಮೂರು ಫಾಲೋವರ್ ಗಳು ಆದರೆ ಇದರ ಟ್ವೀಟ್ ಸಾವಿರಕ್ಕೂ ಹೆಚ್ಚು ಬಾರಿ ರಿಟ್ವೀಟ್ ಆಗಿವೆ ! ಇನ್ನೊಂದು 32 ಫಾಲೋವರ್ ಗಳಿರುವ ಅಕೌಂಟ್ ಮಾಡಿರುವ ಇದೇ ಹ್ಯಾಷ್ ಟ್ಯಾಗ್ ನ ಟ್ವೀಟ್ ಕೂಡ ಸಾವಿರಕ್ಕೂ ಹೆಚ್ಚು ಬಾರಿ ರಿಟ್ವೀಟ್ ಆಗಿವೆ ! ಈ ಸರಣಿಯಲ್ಲಿ 1400 ಬಾರಿ ರಿಟ್ವೀಟ್ ಆಗಿರುವ ಟ್ವೀಟ್ ನ ಅಕೌಂಟ್ ಗೆ ಇರುವುದು ಕೇವಲ 205 ಫಾಲೋವರ್ ಗಳು !
