ವೈವಾಹಿಕ ಅತ್ಯಾಚಾರವನ್ನು ವಿಚ್ಛೇದನಕ್ಕೆ ಕಾರಣವಾಗಿಸಲು ಕೋರಿದ್ದ ಅರ್ಜಿಗೆ ದಿಲ್ಲಿ ಹೈಕೋರ್ಟ್ ನಿರಾಕರಣೆ
ಹೊಸದಿಲ್ಲಿ,ಜು.9: ವೈವಾಹಿಕ ಅತ್ಯಾಚಾರಕ್ಕಾಗಿ ಎಫ್‌ಐಆರ್ ದಾಖಲಿಸಿಕೊಳ್ಳಲು ಮಾರ್ಗಸೂಚಿಗಳು ಮತ್ತು ಅದನ್ನು ವಿವಾಹ ವಿಚ್ಛೇದನಕ್ಕೆ ಕಾರಣವನ್ನಾಗಿಸಲು ಕಾನೂನುಗಳನ್ನು ರೂಪಿಸುವಂತೆ ಕೇಂದ್ರಕ್ಕೆ ನಿರ್ದೇಶ ಕೋರಿ ಸಲ್ಲಿಸಿದ್ದ ಸಾರ್ವಜನಿಕ ಹಿತಾಸಕ್ತಿ ಅರ್ಜಿ(ಪಿಐಎಲ್)ಯನ್ನು ವಿಚಾರಣೆಗೆ ಅಂಗೀಕರಿಸಲು ದಿಲ್ಲಿ ಉಚ್ಚ ನ್ಯಾಯಾಲಯವು ಮಂಗಳವಾರ ನಿರಾಕರಿಸಿದೆ.
ಪಿಐಎಲ್ ಅನ್ನು ವಿಲೇವಾರಿಗೊಳಿಸಿದ ಮುಖ್ಯ ನ್ಯಾಯಾಧೀಶ ಡಿ.ಎನ್.ಪಟೇಲ್ ಮತ್ತು ನ್ಯಾ.ಸಿ.ಹರಿಶಂಕರ ಅವರ ಪೀಠವು,ಕಾನೂನುಗಳನ್ನು ರೂಪಿಸುವುದು ಶಾಸಕಾಂಗದ ಕೆಲಸವೇ ಹೊರತು ನ್ಯಾಯಾಂಗದ್ದಲ್ಲ,ಹೀಗಾಗಿ ಕಾನೂನುಗಳನ್ನು ರೂಪಿಸುವಂತೆ ನ್ಯಾಯಾಲಯವು ನಿರ್ದೇಶ ನೀಡುವಂತಿಲ್ಲ ಎಂದು ಹೇಳಿತು.
ಸಂಬಂಧಿಸಿದ ಅಧಿಕಾರಿಗಳ ಉತ್ತರದಾಯಿತ್ವ, ಹೊಣೆಗಾರಿಕೆ ಮತ್ತು ಬಾಧ್ಯತೆಗಳನ್ನು ನಿಗದಿಗೊಳಿಸಲು ರಚನೆಯಾಗಬೇಕಿರುವ ಇಂತಹ ಕಾನೂನುಗಳಡಿ ವೈವಾಹಿಕ ಅತ್ಯಾಚಾರಕ್ಕೆ ಸಂಬಂಧಿಸಿದ ಪ್ರಕರಣಗಳನ್ನು ದಾಖಲಿಸಿಕೊಳ್ಳಲು ಸ್ಪಷ್ಟ ಮಾರ್ಗಸೂಚಿಯ ಅಗತ್ಯವಿದೆ ಎಂದು ಅರ್ಜಿಯು ಕೋರಿತ್ತು.
ಅರ್ಜಿಯನ್ನು ಅಂಗೀಕರಿಸಲು ನಿರಾಕರಿಸಿದ್ದ ಸರ್ವೋಚ್ಚ ನ್ಯಾಯಾಲಯವು ಪರಿಹಾರಕ್ಕಾಗಿ ಉಚ್ಚ ನ್ಯಾಯಾಲಯವನ್ನು ಸಂಪರ್ಕಿಸುವಂತೆ ಅರ್ಜಿದಾರರಾದ ನ್ಯಾಯವಾದಿ ಅನುಜಾ ಕಪೂರ್ ಅವರಿಗೆ ಸೂಚಿಸಿದ ಬಳಿಕ ಈ ಪಿಐಎಲ್‌ನ್ನು ದಿಲ್ಲಿ ಉಚ್ಚ ನ್ಯಾಯಾಲಯದಲ್ಲಿ ಸಲ್ಲಿಸಲಾಗಿತ್ತು.
ರಚಿಸಲಾಗುವ ಮಾರ್ಗಸೂಚಿಗಳು ಮತ್ತು ಕಾನೂನುಗಳ ಉಲ್ಲಂಘನೆಗಾಗಿ ಸೂಕ್ತ ಶಿಕ್ಷೆ/ದಂಡಗಳನ್ನು ನಿಗದಿಗೊಳಿಸುವಂತೆಯೂ ಕಪೂರ್ ಕೋರಿದ್ದರು.
ವೈವಾಹಿಕ ಅತ್ಯಾಚಾರವು ಕೊಲೆ, ದಂಡನೀಯ ನರಹತ್ಯೆ ಅಥವಾ ವಾಸ್ತವಿಕ ಅತ್ಯಾಚಾರಕ್ಕಿಂತ ಕಡಿಮೆ ಅಪರಾಧವೇನಲ್ಲ. ಅದು ಮಹಿಳೆಯ ಗೌರವ ಮತ್ತು ಘನತೆಗೆ ಹಾನಿಯನ್ನುಂಟು ಮಾಡುತ್ತದೆ ಮತ್ತು ಆಕೆಯನ್ನು ಪತಿಯ ಸ್ವಯಂಸುಖಕ್ಕೆ ಮತ್ತು ಅನುಕೂಲಕ್ಕೆ ಬಳಕೆಯಾಗುವ ಚರಾಸ್ತಿಯ ಮಟ್ಟಕ್ಕಿಳಿಸುತ್ತದೆ. ಅದು ಆಕೆಯನ್ನು ದೈಹಿಕ ಹಿಂಸೆಯ ನಿರಂತರ ಭೀತಿಯಲ್ಲಿ ಬದುಕುತ್ತಿರುವ ಶವದಂತಾಗಿಸುತ್ತದೆ. ಅತ್ಯಾಚಾರವು ಮಹಿಳೆಯರ ಮೇಲೆ ಗಂಭೀರ ಮತ್ತು ದೀರ್ಘಕಾಲಿಕ ಪರಿಣಾಮಗಳನ್ನು ಬೀರುತ್ತದೆ ಎನ್ನುವುದನ್ನು ವೈದ್ಯಕೀಯ ಸಾಕ್ಷಗಳು ರುಜುವಾತುಗೊಳಿಸಿವೆ ಎಂದು ಅರ್ಜಿಯಲ್ಲಿ ಹೇಳಲಾಗಿತ್ತು.
ಹಾಲಿ ವೈವಾಹಿಕ ಅತ್ಯಾಚಾರವು ಅಪರಾಧವಾಗಿಲ್ಲ, ಯಾವುದೇ ಪೊಲೀಸ್ ಠಾಣೆಯಲ್ಲಿಯೂ ಪತ್ನಿ ತನ್ನ ಪತಿಯ ವಿರುದ್ಧ ದಾಖಲಿಸಿದ ಎಫ್‌ಐಆರ್‌ಗಳಿಲ್ಲ. ಇದಕ್ಕೆ ಬದಲಾಗಿ ಸಂತ್ರಸ್ತೆ ಮತ್ತು ಆಕೆಯ ಪತಿಯ ವಿವಾಹದ ಪಾವಿತ್ರವನ್ನುಳಿಸಲು ಪೊಲೀಸ್ ಅಧಿಕಾರಿಗಳು ರಾಜಿಯನ್ನು ಮಾಡಿಸುತ್ತಿದ್ದಾರೆ. ಹಿಂದೂ ವಿವಾಹ ಕಾಯ್ದೆ 1955,ಮುಸ್ಲಿಂ ವೈಯಕ್ತಿಕ ಕಾನೂನು(ಶರೀಯತ್) 1937 ಮತ್ತು ವಿಶೇಷ ವಿವಾಹ ಕಾಯ್ದೆ 1954 ಅಡಿ ವೈವಾಹಿಕ ಅತ್ಯಾಚಾರವು ವಿವಾಹ ವಿಚ್ಛೇದನಕ್ಕೆ ಕಾರಣವಾಗಿಲ್ಲ, ಹೀಗಾಗಿ ಅದನ್ನು ಪತಿಯ ವಿರುದ್ಧ ವಿಚ್ಛೇದನ ಮತ್ತು ಕ್ರೌರ್ಯದ ಕಾರಣವನ್ನಾಗಿಸಲು ಸಾಧ್ಯವಾಗುತ್ತಿಲ್ಲ ಎಂದು ಅರ್ಜಿಯು ಬೆಟ್ಟುಮಾಡಿತ್ತು.
