ಅವಧಿಪೂರ್ವ ನಿವೃತ್ತಿ ನಿಯಮದಡಿ 5 ವರ್ಷಗಳಲ್ಲಿ 1.19 ಲಕ್ಷ.ಅಧಿಕಾರಿಗಳ ಸಾಧನೆಗಳ ಪುನರ್‌ಪರಿಶೀಲನೆ
ಹೊಸದಿಲ್ಲಿ,ಜು.24: ಅವಧಿಪೂರ್ವ ನಿವೃತ್ತಿ ನಿಯಮಕ್ಕೆ ಸಂಬಂಧಿಸಿದಂತೆ ಸರಕಾರವು 2014 ಮತ್ತು 2019ರ ನಡುವಿನ ಐದು ವರ್ಷಗಳ ಅವಧಿಯಲ್ಲಿ 1.19 ಲಕ್ಷಕ್ಕೂ ಅಧಿಕ ಗ್ರುಪ್-ಎ ಮತ್ತು ಗ್ರುಪ್-ಬಿ ಅಧಿಕಾರಿಗಳ ಸಾಧನೆಗಳನ್ನು ಪುನರ್‌ಪರಿಶೀಲಿಸಿದೆ ಮತ್ತು ಈ ವರ್ಗಗಳಿಗೆ ಸೇರಿದ 125 ಅಧಿಕಾರಿಗಳನ್ನು ಕಡ್ಡಾಯ ನಿವೃತ್ತಿಗೊಳಿಸಿದೆ ಎಂದು ಸಹಾಯಕ ಸಿಬ್ಬಂದಿ ಮತ್ತು ತರಬೇತಿ ಸಚಿವ ಜಿತೇಂದ್ರ ಸಿಂಗ್ ಅವರು ಬುಧವಾರ ಲೋಕಸಭೆಯಲ್ಲಿ ತಿಳಿಸಿದರು.
ಜುಲೈ 2014-ಮೇ 2019ರ ನಡುವಿನ ಅವಧಿಯಲ್ಲಿ ಒಟ್ಟು 36,756 ಗ್ರುಪ್-ಎ ಮತ್ತು 82,654 ಗ್ರುಪ್-ಬಿ ಅಧಿಕಾರಿಗಳ ಸಾಧನೆಗಳನ್ನು ನಿಯಮ ಎಫ್‌ಆರ್ 56(ಜೆ) ಮತ್ತು ಇಂತಹದೇ ನಿಯಮಗಳಡಿ ಮರುಪರಿಶೀಲಿಸಲಾಗಿದೆ ಎಂದರು.
ಮೂಲಭೂತ ನಿಯಮಗಳ (ಎಫ್‌ಆರ್) ನಿಯಮ 56(ಜೆ),ಕೇಂದ್ರೀಯ ನಾಗರಿಕ ಸೇವೆಗಳ (ಪಿಂಚಣಿ) ನಿಯಮಾವಳಿಗಳ ನಿಯಮ 48 ಹಾಗೂ ಅಖಿಲ ಭಾರತ ಸೇವೆಗಳ(ಮರಣ ಮತ್ತು ನಿವೃತ್ತಿ ಸೌಲಭ್ಯ) ನಿಯಮಾವಳಿಗಳ ನಿಯಮ 16(3) ಇವುಗಳಡಿ ಸಾರ್ವಜನಿಕ ಹಿತಾಸಕ್ತಿ ದೃಷ್ಟಿಯಿಂದ ಪ್ರಾಮಾಣಿಕತೆಯ ಕೊರತೆ ಮತ್ತು ಅದಕ್ಷತೆಗಳ ಆಧಾರದಲ್ಲಿ ಅಧಿಕಾರಿಗಳನ್ನು ಅವಧಿಪೂರ್ವ ನಿವೃತ್ತಿಗೊಳಿಸಲು ಸರಕಾರಕ್ಕೆ ಸಂಪೂರ್ಣ ಹಕ್ಕು ಇದೆ ಎಂದು ಸಚಿವರು ತಿಳಿಸಿದರು.
