ನಾಲ್ಕು ವರ್ಷಗಳ ಸಂಯೋಜಿತ ಬಿ.ಎಡ್ ಕೋರ್ಸ್ ರಚನೆ: ಸಚಿವ

ಹೊಸದಿಲ್ಲಿ, ಜು.25: ನಾಲ್ಕು ವರ್ಷಗಳ ನೂತನ ಸಂಯೋಜಿತ ಬಿ.ಎಡ್ ಕೋರ್ಸನ್ನು ರಚಿಸಲಾಗಿದ್ದು, ಈ ಶೈಕ್ಷಣಿಕ ವರ್ಷದಿಂದಲೇ ಆರಂಭವಾಗಲಿದೆ ಮತ್ತು ಅದಕ್ಕಾಗಿ ಈಗಾಗಲೇ ಅಧಿಸೂಚನೆ ಹೊರಡಿಸಲಾಗಿದೆ ಎಂದು ಸರಕಾರ ಗುರುವಾರ ರಾಜ್ಯಸಭೆಯಲ್ಲಿ ತಿಳಿಸಿದೆ.

ಪ್ರಶ್ನಾವಳಿ ವೇಳೆಯಲ್ಲಿ ಈ ಕುರಿತು ಮಾಹಿತಿ ನೀಡಿದ ಮಾನವ ಸಂಪನ್ಮೂಲ ಸಚಿವ ರಮೇಶ್ ಪೊಕ್ರಿಯಾಲ್ ನಿಶಂಕ್, ಈ ನೂತನ ಕೋರ್ಸ್‌ನಿಂದಾಗಿ ವಿದ್ಯಾರ್ಥಿಗಳು ಒಂದು ವರ್ಷವನ್ನು ಉಳಿಸಬಹುದಾಗಿದೆ. ಇದಕ್ಕಾಗಿ ಪಠ್ಯವನ್ನು ಅಂತಿಮಗೊಳಿಸಲಾಗಿದೆ ಮತ್ತು ಈ ಕೋರ್ಸನ್ನು ಅಳವಡಿಸಲು ಆಸಕ್ತಿಯುಳ್ಳ ಸಂಸ್ಥೆಗಳು ಹಾಗೆ ಮಾಡಬಹುದು ಎಂದು ತಿಳಿಸಿದ್ದಾರೆ.

ಈ ಕೋರ್ಸ್ ಮೂರು ರೀತಿಯಲ್ಲಿದ್ದು ವಿದ್ಯಾರ್ಥಿಗಳು, ಬಿ.ಎ-ಬಿ.ಎಡ್, ಬಿಎಸ್ಸಿ-ಬಿ.ಎಡ್ ಅಥವಾ ಬಿ.ಕಮ್-ಬಿ.ಎಡ್‌ನಲ್ಲಿ ಯಾವುದಾದರೂ ಕೋರ್ಸನ್ನು ಆಯ್ಕೆ ಮಾಡಬಹುದಾಗಿದೆ. ಶಿಕ್ಷಕರಿಗೆ ತರಬೇತಿ ಭರವಸೆ ನೀಡುವ, ಶಿಕ್ಷಣ ಹಕ್ಕಿನ ತಿದ್ದುಪಡಿಯ ನಂತರ ಹೊರಗುಳಿದಿರುವ ಎಲ್ಲ ಶಿಕ್ಷಕರು ಅಕ್ಟೋಬರ್ 31, 2019ರವರೆಗೆ ತರಬೇತಿ ಪಡೆಯಬಹುದು ಎಂದು ಸಚಿವರು ತಿಳಿಸಿದ್ದಾರೆ. 2015ರವರೆಗೆ ಏಳು ಲಕ್ಷ ಶಿಕ್ಷಕರು ತರಬೇತಿ ಪಡೆದಿದ್ದಾರೆ ಆದರೆ ಇನ್ನೂ ಬಹಳಷ್ಟು ಶಿಕ್ಷಕರು ತರಬೇತಿ ಪಡೆಯಲು ಬಾಕಿಯಿದ್ದಾರೆ ಎಂದು ಅವರು ತಿಳಿಸಿದ್ದಾರೆ.