ಲೋಕಸಭೆ ಚುನಾವಣೆಯಲ್ಲಿ ವಿವಿಪ್ಯಾಟ್ ಹೊಂದಾಣಿಕೆಯಾಗದಿರುವ ಬಗ್ಗೆ ತನಿಖೆಗೆ ತಂಡಗಳನ್ನು ರಚಿಸಿದ ಚು. ಆಯೋಗ

ಹೊಸದಿಲ್ಲಿ, ಜು.26: ಲೋಕಸಭೆ ಚುನಾವಣೆಯ ಸಮಯದಲ್ಲಿ ಎಂಟು ಪ್ರಕರಣಗಳಲ್ಲಿ ವಿವಿಪ್ಯಾಟ್ ಸ್ಲಿಪ್‌ಗಳು ಮತ್ತ ಇವಿಎಂ ಮತ ಎಣಿಕೆಯ ಮಧ್ಯೆ ತಾಳೆಯಾಗದಿರುವ ಹಿನ್ನೆಲೆಯಲ್ಲಿ ಈ ಬಗ್ಗೆ ಏಳು ಪ್ರಕರಣಗಳ ತನಿಖೆ ನಡೆಸಲು ಭಾರತದ ಚುನಾವಣಾ ಆಯೋಗ ತಂಡಗಳನ್ನು ರಚಿಸಿದೆ. ಎಣಿಕೆ ಮಾಡಲಾದ 1.25 ಕೋಟಿ ವಿವಿಪ್ಯಾಟ್ ಸ್ಲಿಪ್‌ಗಳ ಪೈಕಿ 51 ಅಥವಾ ಶೇ.0.0004ರ ಒಟ್ಟು ಮತಗಳಲ್ಲಿ ಹೊಂದಾಣಿಕೆಯಾಗಿಲ್ಲ ಎಂದು ಚುನಾವಣಾ ಆಯೋಗ ಜುಲೈ 21ರಂದು ಬಹಿರಂಗಪಡಿಸಿದೆ. ಈ ಲೋಪಗಳ ವಿಶ್ಲೇಷಣೆ ನಡೆಸುವಂತೆ ಆಯೋಗ ಬುಧವಾರ ಮುಖ್ಯ ಚುನಾವಣಾ ಅಧಿಕಾರಿಗಳಿಗೆ ಸೂಚಿಸಿತ್ತು. ಒಂದು ಪ್ರಕರಣದಲ್ಲಿ, ಮಣಿಪುರದಲ್ಲಿ ಚುನಾವಣಾ ಮೇಲ್ಮನವಿ ದಾಖಲಿಸಲಾಗಿರುವ ಹಿನ್ನೆಲೆಯಲ್ಲಿ ತನಿಖಾ ತಂಡವನ್ನು ರಚಿಸಿಲ್ಲ ಎಂದು ಆಯೋಗ ತಿಳಿಸಿದೆ. ಲೋಪಗಳ ವಿಶ್ಲೇಷಣೆ ನಡೆಸಲು ಈ ತಂಡಗಳಿಗೆ ಹತ್ತು ದಿನಗಳ ಕಾಲಾವಕಾಶ ನೀಡಲಾಗಿದೆ ಎಂದು ಆಯೋಗ ತಿಳಿಸಿದೆ. ಅನುಸರಣೆಯಲ್ಲಿ ತಾಂತ್ರಿಕ, ಪ್ರಕ್ರಿಯಾತ್ಮಕ, ವ್ಯವಸ್ಥಿತ ಮತ್ತು ಮಾನವ ಲೋಪಗಳು ನಡೆದಿದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಲು ವಿವಿಪ್ಯಾಟ್ ಸ್ಲಿಪ್‌ಗಳು ಮತ್ತು ಮತಯಂತ್ರಗಳ ಫಲಿತಾಂಶ ಹೊಂದಾಣಿಕೆಯಾಗದಿರುವ ಪ್ರಕರಣಗಳ ಕೂಲಂಕುಶ ತನಿಖೆ ನಡೆಸಲಾಗುವುದು ಎಂದು ಚುನಾವಣಾ ಆಯೋಗ ಮೇ 21ರಂದು ತಿಳಿಸಿತ್ತು.