ಇನ್ನು ಮುಂದೆ ಟ್ರಾಫಿಕ್ ನಿಯಮ ಉಲ್ಲಂಘಿಸಿದರೆ ಕಾದಿದೆ ಕಠಿಣ ಶಿಕ್ಷೆ

ಹೊಸದಿಲ್ಲಿ, ಆ.1: ಬುಧವಾರ ರಾಜ್ಯಸಭೆಯಲ್ಲಿ ಅನುಮೋದನೆ ಪಡೆದ ಹಾಗೂ ಇಂದು ಲೋಕಸಭೆಯಲ್ಲಿ ಅಂಗೀಕಾರಗೊಳ್ಳಲು ಸಜ್ಜಾಗಿರುವ ಮೋಟಾರ್ ವಾಹನಗಳ ತಿದ್ದುಪಡಿ ಮಸೂದೆ ಸಂಚಾರ ನಿಯಮ ಉಲ್ಲಂಘಕರಿಗೆ ಸಿಂಹಸ್ವಪ್ನವಾಗಲಿದೆ. ನಿಯಮ ಉಲ್ಲಂಘಿಸುವವರಿಗೆ  ದಂಡದ ಹೊರತಾಗಿ ಸಾಮಾನ್ಯ ಉಲ್ಲಂಘನೆಗಳಾದ ರಾಂಗ್ ಸೈಡ್ ಚಾಲನೆ, ವಾಹನ ಚಲಾಯಿಸುವಾಗ ಮೊಬೈಲ್ ಫೋನ್ ನಲ್ಲಿ ಮಾತನಾಡುವುದು ಹಾಗೂ  ಟ್ರಾಫಿಕ್ ಸಿಗ್ನಲ್  ಉಲ್ಲಂಘನೆ ಪ್ರಕರಣಗಳನ್ನು ಅಪಾಯಕಾರಿ ವಾಹನ ಚಾಲನೆ ಎಂದು ಪರಿಗಣಿಸಲಾಗುವುದು.

ದೇಶದಲ್ಲಿ ವಾರ್ಷಿಕವಾಗಿ ರಸ್ತೆ ಅಪಘಾತಗಳಿಗೆ 1.5 ಲಕ್ಷಕ್ಕೂ ಹೆಚ್ಚು ಜೀವಗಳು ಬಲಿಯಾಗುವುದರಿಂದ ಈ ಸಂಖ್ಯೆಯನ್ನು ಕಡಿಮೆಗೊಳಿಸುವ ಉದ್ದೇಶ ಈ ಮಸೂದೆಗಿದೆ.

►ಸಂಚಾರ ನಿಯಮ ಉಲ್ಲಂಘನೆಗಾಗಿ ದಂಡ ಮೊತ್ತ ಹತ್ತು ಪಟ್ಟು ಏರಿಕೆ ಜತೆಗೆ ವಾಹನ ಚಾಲನಾ ಪರವಾನಗಿ ನೀಡುವ ಪ್ರಕ್ರಿಯೆಯನ್ನು ಯಾಂತ್ರೀಕೃತಗೊಳಿಸುವುದು ಕೂಡ ಸರಕಾರದ ಉದ್ದೇಶವಾಗಿದೆ.

►ವಾಹನಗಳಲ್ಲಿ ದೋಷಗಳು ಕಂಡು ಬಂದಲ್ಲಿ ವಾಹನ ತಯಾರಕರನ್ನು ಜವಾಬ್ದಾರರನ್ನಾಗಿಸಲಾಗುವುದಲ್ಲದೆ ಈ ತಪ್ಪಿಗೆ ದಂಡ ರೂ 100 ಕೋಟಿಯಷ್ಟು ಹಾಗೂ ಒಂದು ವರ್ಷದ   ತನಕ ಜೈಲು ಶಿಕ್ಷೆ ವಿಧಿಸಬಹುದಾಗಿದೆ.

►ಅಪ್ರಾಪ್ತರು ವಾಹನ ಚಲಾಯಿಸಿದಲ್ಲಿ ಅವರ ಹೆತ್ತವರಿಗೆ ರೂ 25,000 ದಷ್ಟು ದಂಡ ಹಾಗೂ ಮೂರು ವರ್ಷ ಜೈಲು, ಒಂದು ವರ್ಷದ ತನಕ ವಾಹನ ರಿಜಿಸ್ಟ್ರೇಶನ್ ರದ್ದತಿ, ಜತೆಗೆ ಅಪ್ರಾಪ್ತರಿಗೆ 25 ವರ್ಷ ವಯಸ್ಸಿನ ತನಕ ಚಾಲನಾ ಪರವಾನಿಗೆ ದೊರೆಯುವುದಿಲ್ಲ.

►ಸಾಮಾನ್ಯ ಟ್ರಾಫಿಕ್ ನಿಯಮ ಉಲ್ಲಂಘನೆಗಳಿಗಾಗಿ ದಂಡ ಮೊತ್ತ ರೂ 1000ದಿಂದ ರೂ 5,000ಕ್ಕೆ ಏರಿಸಲಾಗುವುದಲ್ಲದೆ ಉಲ್ಲಂಘಕರು ಆರು ತಿಂಗಳ ತನಕ ಜೈಲು ಶಿಕ್ಷೆಗೆ ಕೂಡ ಒಳಗಾಗಬಹುದಾಗಿದೆ. ಈ ಕಾಯಿದೆಯನ್ವಯ ದಂಡ ಮೊತ್ತವನ್ನು ವಾರ್ಷಿಕ ಶೇ 10ರಷ್ಟು ಏರಿಕೆ ಮಾಡುವ ಸಾಧ್ಯತೆಯಿದೆ.

►ಮದ್ಯ ಸೇವಿಸಿ ವಾಹನ ಚಲಾಯಿಸಿದವರಿಗೂ ರೂ 10,000ದ ವರೆಗೆ ದಂಡ ಹಾಗೂ ಆರು ತಿಂಗಳ ತನಕ ಜೈಲು ಸಿಕ್ಷೆ ವಿಧಿಸಲಾಗುವುದು.

►ತುರ್ತು ಸೇವೆಗಳ ವಾಹನಕ್ಕೆ ಅಡ್ಡಿಯುಂಟು ಮಾಡಿದರೆ ರೂ 10,000ದವರೆಗೆ ದಂಡ ಅಥವಾ ಆರು ತಿಂಗಳು ಜೈಲು ಶಿಕ್ಷೆ ಅಥವಾ ಎರಡು ಕೂಡ.

►ಅತಿ ವೇಗದ ವಾಹನ ಚಲಾವಣೆಗೆ ರೂ 5,000ದಷ್ಟು ದಂಡ  ಅಥವಾ ಮೂರು ತಿಂಗಳು  ಜೈಲು. ಎರಡನೇ ಬಾರಿ ಸಿಕ್ಕಿ ಬಿದ್ದರೆ ರೂ 10,000ದಷ್ಟು ದಂಡ  ಅಥವಾ  ಒಂದು ವರ್ಷದ ತನಕ ಜೈಲು ಶಿಕ್ಷೆ ಅಥವಾ ಎರಡು ಕೂಡ.