ಮೂಡಿಗೆರೆ: ಭಾರೀ ಮಳೆಗೆ ಜನಜೀವನ ಅಸ್ತವ್ಯಸ್ತ; ನಿವಾಸಿಗಳ ಸ್ಥಳಾಂತರ

ಮೂಡಿಗೆರೆ, ಆ.9: ತಾಲೂಕಿನಾದ್ಯಂತ ಗುರುವಾರ ಸ್ವಲ್ಪ ಕಡಿಮೆಯಾಗಿದ್ದ ಮಳೆ ಗುರುವಾರ ಮಧ್ಯರಾತ್ರಿಯೆಂದ ಮತ್ತೆ ಆರ್ಭಟಿಸಲಾರಂಭಿಸಿದ್ದು, ಮಧ್ಯರಾತ್ರಿಯಿಂದ ಶುಕ್ರವಾರ ಸಂಜೆವರೆಗೂ ತಾಲೂಕಿನಾದ್ಯಂತ ಎಡಬಿಡದೇ ಭಾರೀ ಮಳೆ ಸುರಿದಿದೆ.

ತಾಲೂಕಿನಲ್ಲಿ ಈ ಬಾರಿ ಭತ್ತ ಬೆಳೆಯುವ ಸುಮಾರು 7 ಸಾವಿರ ಹೆಕ್ಟೇರ್ ಜಮೀನಿನಲ್ಲಿ ನಾಟಿ ಕಾರ್ಯ ಭರದಿಂದ ಸಾಗಿತ್ತು. ತಾಲೂಕಿನಲ್ಲಿ ಬಹುತೇಕ ರೈತರು ಭತ್ತದ ಸಸಿ ನಾಟಿ ಕೆಲಸ ಪೂರ್ಣಗೊಳಿಸಿದ್ದರೆ, ಇನ್ನು ಕೆಲ ರೈತರು ಭತ್ತದ ಹೂಟೆ ಕಾರ್ಯ ಪೂರ್ಣಗೊಳಿಸಿ ನಾಟಿ ಕಾರ್ಯ ಸಿದ್ಧತೆ ನಡೆಸಿದ್ದರು. ಆದರೆ ಈ ಬಾರಿಯ ಮಹಾಮಳೆಗೆ 7 ಸಾವಿರ ಹೆಕ್ಟೇರ್ ಭತ್ತದ ಗದ್ದೆ ಹಾಗೂ ಇದರೊಂದಿಗೆ ಬೆಳೆಯಲಾಗಿದ್ದ ಶುಂಠಿ, ಬಾಳೆ, ಕಾಫಿ, ಅಡಿಕೆ ತೋಟಗಳು ಸಂಪೂರ್ಣ ಜಲಸಮಾಧಿಯಾಗಿದೆ. ಈ ಗದ್ದೆಗಳಲ್ಲಿ ಇನ್ನು 4-5 ವರ್ಷ ಭತ್ತ ಬೆಳೆಯಲು ಸಾಧ್ಯವೇ ಇಲ್ಲ ಎಂದು ರೈತರು ಆತಂಕ ವ್ಯಕ್ತಪಡಿಸುತ್ತಿದ್ದಾರೆ.

ಸಕಲೇಶಪುರ ರಸ್ತೆಯ ಕಿರುಗುಂದ ಗ್ರಾಮದಲ್ಲಿ ಜಪಾವತಿ ನದಿ ಉಕ್ಕಿ ಅಪಾಯದ ಮಟ್ಟದಲ್ಲಿ ಹರಿಯುತ್ತಿದೆ. ಎಚ್.ಡಿ.ದೇವೇಗೌಡ ನೀರಾವರಿ ಸಚಿವರಾಗಿದ್ದಾಗ ನಿರ್ಮಿಸಲಾಗಿದ್ದ ಜಪಾವತಿ ಸೇತುವೆ ಮುಳುಗಡೆಯಾಗಲು ಇನ್ನು ಮೂರು ಅಡಿ ಮಾತ್ರ ಬಾಕಿ ಉಳಿದಿದೆ. ಶಿಥಿಲಾವಸ್ಥೆಯಲ್ಲಿರುವ ಈ ಸೇತುವೆ ನೀರಿನ ರಭಸಕ್ಕೆ ಭಾರೀ ಸದ್ದು ಮಾಡುತ್ತಿದ್ದು, ಕುಸಿಯುವ ಹಂತಕ್ಕೆ ತಲುಪಿದೆ. ಸೇತುವೆ ಕುಸಿದು ಬಿದ್ದರೆ ಮೂಡಿಗೆರೆ-ಸಕಲೇಶಪುರಕ್ಕೆ ಸಂಪರ್ಕ ಕಡಿತಗೊಳ್ಳಲಿದೆ.

ತಾಲೂಕಿನ ಕಿರುಗುಂದ ಗ್ರಾಪಂ ವ್ಯಾಪ್ತಿಯ ಕಿರುಗುಂದ ಗ್ರಾಮದಿಂದ ಪರಿಶಿಷ್ಟ ಕಾಲನಿ ಮತ್ತು ಸತ್ಕಲ್‍ಗೆ ಸಂಪರ್ಕ ಕಲ್ಪಿಸುವ ರಸ್ತೆ ಮುಹಮ್ಮದ್ ಎಂಬವರ ಮನೆಯ ಬಳಿ ಶುಕ್ರವಾರ ಬೆಳಗ್ಗೆ ಭಾರೀ ಪ್ರಮಾಣದಲ್ಲಿ ಭೂ ಕುಸಿತ ಉಂಟಾಗಿ ರಸ್ತೆ ಸಂಪರ್ಕ ಕಡಿತಗೊಂಡಿದೆ. ಗೋಣಿಬೀಡು ಹೋಬಳಿಯ ಉಗ್ಗೆಹಳ್ಳಿ ಪರಿಶಿಷ್ಟ ಕಾಲನಿಗೆ ಹೇಮಾವತಿ ನದಿ ನೀರು ಶುಕ್ರವಾರ ನುಗ್ಗಿದ್ದರಿಂದ ಅಲ್ಲಿನ ಸುಮಾರು 50 ಮನೆಗಳ ನಿವಾಸಿಗಳನ್ನು ಸುರಕ್ಷಿತ ಪ್ರದೇಶಕ್ಕೆ ಸ್ಥಳಾಂತರಿಸಲಾಗಿದೆ. ಗೋಣಿಬೀಡಿನ ಹಾಸ್ಟೆಲ್‍ನಲ್ಲಿ ಉಗ್ಗೆಹಳ್ಳಿ ಗ್ರಾಮದ ಸಂತ್ರಸ್ಥರಿಗೆ ಗಂಜಿ ಕೇಂದ್ರ ತೆರೆಯಲಾಗುವುದು ಎಂದು ತಹಶೀಲ್ದಾರ್ ರಮೇಶ್ ಮಾಹಿತಿ ನೀಡಿದ್ದಾರೆ.

ಮೂಡಿಗೆರೆಯಿಂದ ಚಿಕ್ಕಮಗಳೂರಿಗೆ ತೆರಳುವ ರಾ.ಹೆದ್ದಾರಿ 173ರಲ್ಲಿ ಕುದ್ರೆಗುಂಡಿ ಎಸ್ಟೇಟ್ ಬಳಿ ಭಾರೀ ಪ್ರಮಾಣದಲ್ಲಿ ಗುಡ್ಡ ಕುಸಿತಗೊಂಡು ರಸ್ತೆ ಸಂಚಾರ ಬಂದ್ ಆಗಿದೆ. ಮೂಡಿಗೆರೆ ಪಟ್ಟಣದಲ್ಲಿ ಗಂಗನಮಕ್ಕಿಯಿಂದ ಛತ್ರದ ಮೈದಾನದವರೆಗೂ ಭೂ ಕುಸಿತ ಉಂಟಾಗಿದ್ದು, ಸುಮಾರು 30 ಮನೆಗಳು ಕುಸಿಯುವ ಹಂತದಲ್ಲಿವೆ. ಪಟ್ಟಣದಲ್ಲಿ 4 ಮನೆಗಳು ಶುಕ್ರವಾರ ಕುಸಿದು ಬಿದ್ದಿದ್ದು, ಕೆಲ ಮನೆಯೊಳಗೆ ಚರಂಡಿ, ರಸ್ತೆ ಮೇಲಿನ ಮಳೆ ನೀರು ನುಗ್ಗಿದ್ದರಿಂದ ಸಾರ್ವಜನಿಕರು ಸಂಕಷ್ಟಕ್ಕೊಳಗಾಗಿದ್ದಾರೆ. ಪಟ್ಟಣದಿಂದ ಚಿಕ್ಕಹಳ್ಳಕ್ಕೆ ಸಂಪರ್ಕ ಕಲ್ಪಿಸುವ ಸೇತುವೆ ನದಿ ನೀರಿನಲ್ಲಿ ಕೊಚ್ಚಿಹೋಗಿದೆ. ಪಟ್ಟಣದ ಗಂಗನಮಕ್ಕಿ ಬಡಾವಣೆಯಲ್ಲಿ ರಸ್ತೆಯಲ್ಲಿ ಭಾರೀ ಪ್ರಮಾಣದ ನೀರು ಹರಿಯುತ್ತಿರುವುದರಿಂದ ಶುಕ್ರವಾರ ಒಂದು ಗಂಟೆಗೂ ಹೆಚ್ಚು ಕಾಲ ವಾಹನ ಸಂಚಾರ ಸ್ಥಗಿತಗೊಂಡಿತ್ತು. ತಾಲೂಕಿನ ಸರಕಾರಿ ಹಾಗೂ ಖಾಸಗಿ ಕೆರೆಗಳು ತುಂಬಿಹೋಗಿವೆ. ಕೆಲ ಕೆರೆಗಳ ಕೋಡಿ ಒಡೆದಿರುವ ಪರಿಣಾಮ ಕಾಫಿ, ಭತ್ತದ ಗದ್ದೆಗಳಿಗೆ ಹಾನಿ ಸಂಭವಿಸಿದೆ. 

ಚಾರ್ಮಾಡಿ ಘಾಟ್ ರಸ್ತೆಯಲ್ಲಿ ಪದೇ ಪದೇ ಭೂ ಕುಸಿತ ಉಂಟಾಗುತ್ತಿದ್ದು, ಭಾರೀ ಗಾತ್ರದ ಮರಗಳು ರಸ್ತೆಗೆ ಉರುಳಿ ಬಿದ್ದಿವೆ. ಚಾರ್ಮಾಡಿ ಹೆದ್ದಾರಿಯಲ್ಲಿ ವಾಹನ ಸಂಚಾರ ನಿಷೇಧ ಮುಂದುವರಿದಿದೆ. ಕೊಟಿಗೆಹಾರ ಬಣಕಲ್, ತ್ರಿಪುರ, ಫಲ್ಗುಣಿ, ಬೆಟ್ಟಗೆರೆ, ದಾರದಹಳ್ಳಿ, ಊರುಬಗೆ, ಹಂತೂರು, ಚಿನ್ನಿಗ, ಗೋಣಿಬೀಡು, ಕಿರುಗುಂದ ಗ್ರಾಪಂ ವ್ಯಾಪ್ತಿಯಲ್ಲಿ ಉಕ್ಕಿ ಹರಿಯುತ್ತಿರುವ ಹೇಮಾವತಿ ನದಿ ನೀರು ಬಹುತೇಕ ಎಲ್ಲ ರಸ್ತೆಗಳನ್ನು ಮುಳುಗಿಸಿ ತಾಲೂಕಿನ ಎಲ್ಲ ರಸ್ತೆಗಳಲ್ಲಿ ಸಂಚಾರವೇ ಸ್ಥಗಿತವಾಗುವಂತೆ ಮಾಡಿದೆ. 

ಭಾರೀ ಪ್ರಮಾಣದ ಪ್ರವಾಹದಲ್ಲಿ ಸಿಲುಕಿ ಜನತತ್ತರಿಸುತ್ತಿದ್ದರೂ ಜಿಲ್ಲಾಡಳಿತ ಅಥವಾ ಜನಪ್ರತಿನಿಧಿಗಳು ನೆರೆ ಪರಿಹಾರಕ್ಕೆ ಅಗತ್ಯ ಕ್ರಮಕೈಗೊಳ್ಳುತ್ತಿಲ್ಲ ಎಂದು ಸಾರ್ವಜನಿಕರು ದೂರಿದ್ದಾರೆ. ಗುರುವಾರ ಸಂಸದೆ ಶೋಭಾ ಕರಂದ್ಲಾಜೆ, ಶಾಸಕ ಕುಮಾರಸ್ವಾಮಿ ಮತ್ತು ಅಧಿಕಾರಿಗಳು ಕಾಟಾಚಾರಕ್ಕೆ ಹಂತೂರು ಗ್ರಾಮಕ್ಕೆ ಬಂದು ಹೋಗಿದ್ದಾರೆ. ಆದರೆ ಇದರಿಂದ ಯಾವುದೇ ಪ್ರಯೋಜನವಾಗಿಲ್ಲ, ಕೇಂದ್ರ ಅಥವಾ ರಾಜ್ಯ ಸರಕಾರದಿಂದ ಯಾವುದೇ ನೆರವು ಸಿಗುತ್ತಿಲ್ಲ. ಕನಿಷ್ಟ ಗಂಜಿ ಕೇಂದ್ರವನ್ನೂ ತೆರೆದಿಲ್ಲ. ನೆರೆಯಲ್ಲಿ ಸಿಲುಕಿದವರನ್ನು ರಕ್ಷಿಸಲು ಯಾವುದೇ ಕ್ರಮಕೈಗೊಳ್ಳದ ಸರಕಾರ ಮತ್ತು ಜನಪ್ರತಿನಿಧಿಗಳು ಹಾಗೂ ಅಧಿಕಾರಿಗಳು ಇದ್ದರೆಷ್ಟು, ಬಿಟ್ಟರೆಷ್ಟು ಎಂದು ಸಾರ್ವಜನಿಕರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.