ಮೆಹಬೂಬ ಬಿಡುಗಡೆ ಬಗ್ಗೆ ಯಾವುದೇ ಮಾಹಿತಿಯಿಲ್ಲ: ಕುಟುಂಬದ ಅಳಲು

 ಶ್ರೀನಗರ,ಆ.27: ಜಮ್ಮು-ಕಾಶ್ಮೀರದ ಇಬ್ಬರು ಮಾಜಿ ಮುಖ್ಯಮಂತ್ರಿಗಳಾದ ಒಮರ್ ಅಬ್ದುಲ್ಲಾ ಮತ್ತು ಮೆಹಬೂಬ ಮುಫ್ತಿ ಅವರು ಕಳೆದ ಸುಮಾರು ಒಂದು ತಿಂಗಳಿನಿಂದಲೂ ಪೊಲೀಸರ ವಶದಲ್ಲಿದ್ದು,ಅವರನ್ನು ಯಾವಾಗ ಬಿಡುಗಡೆಗೊಳಿಸಬಹುದು ಎಂಬ ಬಗ್ಗೆ ಯಾವುದೇ ಮಾಹಿತಿಯಿಲ್ಲ.

ಮೆಹಬೂಬ ಬಂಧನದ ಬಳಿಕ ಒಂದು ಬಾರಿಯೂ ಅವರನ್ನು ಭೇಟಿಯಾಗಲು ತಮಗೆ ಅವಕಾಶ ನೀಡಲಾಗಿಲ್ಲ ಎಂದು ಅವರ ಕುಟುಂಬ ಸದಸ್ಯರು ಆರೋಪಿಸಿದ್ದಾರೆ. ಆದರೆ ಬಂಧಿತರ ಕುಟುಂಬಗಳಿಂದ ಇಂತಹ ಯಾವುದೇ ಕೋರಿಕೆ ತನಗೆ ಬಂದಿಲ್ಲ ಎಂದು ರಾಜ್ಯ ಆಡಳಿತವು ಹೇಳಿದೆ ಎಂದು ಬಲ್ಲ ಮೂಲಗಳು ತಿಳಿಸಿವೆ.

  “ಪದೇ ಪದೇ ಮನವಿಗಳನ್ನು ಮಾಡಿಕೊಂಡಿದ್ದರೂ ಅವರನ್ನು ನೋಡಲು ನಮಗೆ ಅನುಮತಿ ನೀಡಲಾಗಿಲ್ಲ. ನಮ್ಮ ವಯೋವೃದ್ಧ ತಾಯಿ ಪುತ್ರಿಯ ಕ್ಷೇಮದ ಬಗ್ಗೆ ಆತಂಕಗೊಂಡಿದ್ದಾರೆ” ಎಂದು ಮೆಹಬೂಬರ ಸೋದರಿ ರುಬಿಯಾ ಸಯೀದ್ ಅವರು ಆ.21ರಂದು ಭದ್ರತಾ ನಿರ್ದೇಶಕರಿಗೆ ಬರೆದಿರುವ ಪತ್ರದಲ್ಲಿ ತಿಳಿಸಿದ್ದಾರೆ.

“ನಾವು ಹೆಚ್ಚುಕಡಿಮೆ ಪ್ರತಿದಿನವೂ ಅವರನ್ನು ಕೋರುತ್ತಲೇ ಇದ್ದೇವೆ. ಭದ್ರತಾ ಸಿಬ್ಬಂದಿಗಳು ಮೌಖಿಕ ಮನವಿಗಳಿಗೆ ಸ್ಪಂದಿಸುತ್ತಿಲ್ಲವಾದ್ದರಿಂದ ಲಿಖಿತ ಪತ್ರವನ್ನು ನೀಡಿದ್ದೆವು,ಆದರೆ ಅದಕ್ಕೂ ಅವರು ಸ್ಪಂದಿಸಿಲ್ಲ. ನನಗೆ ಲಿಖಿತವಾಗಿ ಯಾವುದೇ ಮಾಹಿತಿಯನ್ನು ನೀಡಲಾಗಿಲ್ಲ. ತಾವೇನು ಮಾಡುತ್ತಿದ್ದೇವೆ ಎನ್ನುವುದರ ಕಾನೂನು ಮಗ್ಗಲನ್ನು ಅವರು ಸಂಪೂರ್ಣವಾಗಿ ಕಡೆಗಣಿಸುತ್ತಿದ್ದಾರೆ” ಎಂದು ಮೆಹಬೂಬರ ಪುತ್ರಿ ಇಲ್ತಿಜಾ ಜಾವೇದ್ ತಿಳಿಸಿದರು.

ಕೇಂದ್ರವು ಜಮ್ಮು-ಕಾಶ್ಮೀರದ ವಿಶೇಷ ಸ್ಥಾನಮಾನವನ್ನು ಹಿಂದೆಗೆದುಕೊಂಡು,ರಾಜ್ಯವನ್ನು ಎರಡು ಕೇಂದ್ರಾಡಳಿತ ಪ್ರದೇಶಗಳನ್ನಾಗಿ ವಿಭಜಿಸಿದಾಗಿನಿಂದ ರಾಜ್ಯಾದ್ಯಂತ 40 ಮುಖ್ಯವಾಹಿನಿ ರಾಜಕೀಯ ನಾಯಕರನ್ನು ಬಂಧಿಸಲಾಗಿದೆ. ಈ ಪೈಕಿ ಅರ್ಧದಷ್ಟು ನಾಯಕರನ್ನು ಜಮ್ಮುವಿನಲ್ಲಿ ಗೃಹಬಂಧನದಲ್ಲಿರಿಸಲಾಗಿದ್ದರೆ,ಇತರರನ್ನು ಕಾಶ್ಮೀರದಲ್ಲಿರಿಸಲಾಗಿದೆ ಎಂದು ಹಿರಿಯ ಸರಕಾರಿ ಅಧಿಕಾರಿಯೋರ್ವರು ಸುದ್ದಿಸಂಸ್ಥೆಗೆ ತಿಳಿಸಿದರು.

ರಾಜ್ಯದಲ್ಲಿ ಶಾಂತಿಯನ್ನು ಕಾಯ್ದುಕೊಳ್ಳಲು ಮುನ್ನೆಚ್ಚರಿಕೆ ಕ್ರಮಗಳ ಅಂಗವಾಗಿ ಈ ಬಂಧನಗಳನ್ನು ಮಾಡಲಾಗಿದೆ ಮತ್ತು ಸಹಜ ಸ್ಥಿತಿ ಮರಳಿದ ಬಳಿಕ ಈ ಕ್ರಮಗಳನ್ನು ಹಿಂದೆಗೆದುಕೊಳ್ಳಲಾಗುವುದು ಎಂದು ಸರಕಾರವು ಹೇಳಿದೆ. ಆದರೆ ಸುಮಾರು ಒಂದು ತಿಂಗಳಾಗುತ್ತ ಬಂದಿದ್ದರೂ ಯಾವುದೇ ಕ್ರಮವನ್ನು ಪೂರ್ಣವಾಗಿ ಹಿಂದೆಗೆದುಕೊಳ್ಳಲಾಗಿಲ್ಲ.

ಮೆಹಬೂಬ ಮತ್ತು ಉಮರ್ ಅವರ ಸಂಪುಟಗಳಲ್ಲಿದ್ದ 70 ವರ್ಷಕ್ಕೂ ಕಡಿಮೆ ಪ್ರಾಯದ ಎಲ್ಲ ಮಾಜಿ ಸಚಿವರು ಗೃಹಬಂಧನದಲ್ಲಿದ್ದಾರೆ ಎಂದು ಅಧಿಕಾರಿ ತಿಳಿಸಿದರು.

ಮಾಜಿ ಮುಖ್ಯಮಂತ್ರಿ ಹಾಗೂ ಸಂಸದ ಫಾರೂಕ್ ಅಬ್ದುಲ್ಲಾ, ಪೀಪಲ್ಸ್ ಕಾನ್ಫರೆನ್ಸ್ ನಾಯಕ ಸಜ್ಜಾದ್ ಲೋನ್,ಮತ್ತು ಮಾಜಿ ಐಎಎಸ್ ಅಧಿಕಾರಿ ಶಾ ಫೈಸಲ್ ಅವರು ಬಂಧಿತರಲ್ಲಿ ಸೇರಿದ್ದಾರೆ. ಜಮ್ಮುವಿನಲ್ಲಿ ಬಂಧನದಲ್ಲಿರುವವರಲ್ಲಿ ಕೇಂದ್ರ ಸಚಿವ ಜಿತೇಂದ್ರ ಸಿಂಗ್ ಅವರ ಸೋದರ ದೇವೆಂದರ್ ಸಿಂಗ್ ರಾಣಾ ಕೂಡ ಸೇರಿದ್ದಾರೆ. ರಾಣಾ ತನ್ನ ನಿವಾಸದಲ್ಲಿಯೇ ಬಂಧನದಲ್ಲಿದ್ದು,ಕುಟುಂಬ ಸದಸ್ಯರು ಅವರನ್ನು ಭೇಟಿಯಾಗುತ್ತಿರುತ್ತಾರೆ ಎಂದು ಅಧಿಕಾರಿ ತಿಳಿಸಿದರು.

ಬಂಧಿತರಲ್ಲಿ ಹೆಚ್ಚಿನವರು ಶ್ರೀನಗರದ ಸೆಂಟಾರ್ ಹೋಟೆಲ್‌ನಲ್ಲಿದ್ದಾರೆ. ಒಮರ್ ಅವರು ಸರಕಾರಿ ಅತಿಥಿ ಗೃಹವಾದ ಹರಿನಿವಾಸ ಪ್ಯಾಲೇಸ್‌ನಲ್ಲಿದ್ದರೆ,ಮೆಹಬೂಬ ಶ್ರೀನಗರದಲ್ಲಿಯ ಅತ್ಯಂತ ಸುಂದರ ಸಾರ್ವಜನಿಕ ಉದ್ಯಾನಗಳಲ್ಲೊಂದಿರುವ ಚಷ್ಮಾ ಶಾಹಿಯಲ್ಲಿದ್ದಾರೆ.

ಈ ನಾಯಕರ ಬಿಡುಗಡೆ ಶೀಘ್ರವೇ ಆಗುತ್ತದೆ ಎನ್ನುವುದರಲ್ಲಿ ಅನುಮಾನವಿದೆ ಎಂದು ಜಮ್ಮು-ಕಾಶ್ಮೀರದಲ್ಲಿಯ ಇನ್ನೋರ್ವ ಅಧಿಕಾರಿ ತಿಳಿಸಿದರು.