ಇಸ್ರೋ ಕ್ವಿಝ್ ವಿಜೇತರಿಗೆ ಮೋದಿ ಜೊತೆಗೆ ಚಂದ್ರಯಾನ-2ರ ಲ್ಯಾಂಡಿಂಗ್ ವೀಕ್ಷಣೆಗೆ ಅವಕಾಶ

ಹೊಸದಿಲ್ಲಿ,ಸೆ.4: ಶನಿವಾರ ಬೆಂಗಳೂರಿನ ಇಸ್ರೋ ಮುಖ್ಯ ಕಾರ್ಯಾಲಯದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರೊಂದಿಗೆ ಚಂದ್ರಯಾನ-2ರ ಲ್ಯಾಂಡಿಂಗ್ ವೀಕ್ಷಣೆಗೆ ದೇಶಾದ್ಯಂತದಿಂದ ಆಯ್ಕೆ ಮಾಡಲಾಗಿರುವ 60 ವಿದ್ಯಾರ್ಥಿಗಳು ಆ ಕ್ಷಣಕ್ಕಾಗಿ ಕಾತುರದಿಂದ ಕಾಯುತ್ತಿದ್ದಾರೆ.

ತನ್ನ ಬಾಹ್ಯಾಕಾಶ ಕಾರ್ಯಕ್ರಮಗಳ ಬಗ್ಗೆ ಅರಿವನ್ನು ಹೆಚ್ಚಿಸಲು ಇಸ್ರೋ ಕಳೆದ ಆಗಸ್ಟ್‌ನಲ್ಲಿ 8ರಿಂದ 10ನೇ ತರಗತಿಯವರೆಗಿನ ಮಕ್ಕಳಿಗಾಗಿ ಆನ್‌ಲೈನ್ ಕ್ವಿಝ್ ಏರ್ಪಡಿಸಿತ್ತು. ಈ ಪೈಕಿ ಅತ್ಯುನ್ನತ ಸ್ಥಾನ ಗಳಿಸಿರುವ 60 ವಿದ್ಯಾರ್ಥಿಗಳನ್ನು ಐತಿಹಾಸಿಕ ಕ್ಷಣದ ವೀಕ್ಷಣೆಗಾಗಿ ಇಸ್ರೋ ಆಯ್ಕೆ ಮಾಡಿದೆ.

ಜುಲೈ 22ರಂದು ಬಾಹ್ಯಾಕಾಶಕ್ಕೆ ಉಡಾವಣೆಗೊಂಡಿದ್ದ ಭಾರತದ ಮಹತ್ವಾಕಾಂಕ್ಷೆಯ ಅಂತರಿಕ್ಷ ನೌಕೆ ಚಂದ್ರಯಾನ-2 ಸೆ.7ರಂದು ಚಂದ್ರನ ಮೇಲ್ಮೈನಲ್ಲಿ ತನ್ನ ಲ್ಯಾಂಡರ್‌ನ್ನು ಇಳಿಸಲಿದೆ.

ತಾನು ಗಗನಯಾತ್ರಿಯಾಗಲು ಬಯಸಿದ್ದೇನೆ ಮತ್ತು ಬೆಂಗಳೂರಿನಲ್ಲಿಯ ಇಸ್ರೋ ಮುಖ್ಯ ಕಚೇರಿಯನ್ನು ನೋಡಲು ಕಾತುರನಾಗಿದ್ದೇನೆ ಎಂದು ಹೇಳಿದ ದಿಲ್ಲಿ ಕಂಟೋನ್ಮಂಟ್‌ನ ಕೇಂದ್ರಿಯ ವಿದ್ಯಾಲಯದ 9ನೇ ತರಗತಿಯ ವಿದ್ಯಾರ್ಥಿ ಮನೋಜ್ಞ ಸಿಂಗ್ ಸುಯಂಶ್,ಕ್ವಿಝ್‌ನಲ್ಲಿ ಪ್ರಶ್ನೆಗಳು ಕಠಿಣವಾಗಿರಲಿಲ್ಲ,ಆದರೆ ಉತ್ತರಿಸಲು ನೀಡಿದ್ದ ಸಮಯ ನಿರ್ಣಾಯಕ ಅಂಶವಾಗಿತ್ತು ಎಂದು ತಿಳಿಸಿದ.

 ಆಂಧ್ರಪ್ರದೇಶದ 10ನೇ ತರಗತಿಯ ವಿದ್ಯಾರ್ಥಿನಿ ಪ್ರಗಡ ಕಾಂಚನಾ ಬಾಲರಸಿ ವಾಸವಿ ಕೂಡ ಚಂದ್ರಯಾನ-2ರ ಲ್ಯಾಂಡಿಂಗ್ ವೀಕ್ಷಣೆಗಾಗಿ ಕಾತುರಳಾಗಿದ್ದಾಳೆ. ತಾನು ಸ್ಪರ್ಧೆಯಲ್ಲಿ ಗೆದ್ದು ಕಾರ್ಯಕ್ರಮದಲ್ಲಿ ಭಾಗವಹಿಸಲು ಅವಕಾಶ ಪಡೆದಿರುವ ರಾಜ್ಯದ ಏಕೈಕ ಅಭ್ಯರ್ಥಿಯಾಗಿರುವುದು ತನ್ನಲ್ಲಿ ಪುಳಕವನ್ನುಂಟು ಮಾಡಿದೆ ಎಂದು ಹೇಳಿದಳು.

ಕಾರ್ಯಕ್ರಮದಲ್ಲಿ ಭಾವಹಿಸಲು ಅವಕಾಶ ಪಡೆದಿರುವ ಇತರ ಹಲವಾರು ವಿದ್ಯಾರ್ಥಿಗಳೂ ಆ ಕ್ಷಣಕ್ಕಾಗಿ ಕಾತುರದಿಂದ ಕಾಯುತ್ತಿದ್ದಾರೆ. ಈ 60 ವಿದ್ಯಾರ್ಥಿಗಳ ಪೈಕಿ 16 ವಿದ್ಯಾರ್ಥಿಗಳು ಕೇಂದ್ರೀಯ ವಿದ್ಯಾಲಯಗಳಿಗೆ ಸೇರಿದವರಾಗಿದ್ದಾರೆ.

ಕ್ವಿಝ್‌ನಲ್ಲಿ ಪಾಲ್ಗೊಂಡಿದ್ದ ಪ್ರತಿಯೊಬ್ಬ ವಿದ್ಯಾರ್ಥಿಗೂ ಇಸ್ರೋ ಪ್ರಮಾಣಪತ್ರವನ್ನು ನೀಡಲಿದೆ. 10 ನಿಮಿಷಗಳ ಅವಧಿಯ ಕ್ವಿಝ್‌ನಲ್ಲಿ 20 ಪ್ರಶ್ನೆಗಳನ್ನು ಕೇಳಲಾಗಿತ್ತು.