ಫೇಸ್‌ಬುಕ್‌ನ ಮತ್ತೊಂದು ಅವಾಂತರ: ಕೋಟ್ಯಂತರ ಬಳಕೆದಾರರ ಪೋನ್ ನಂಬರ್ ಆನ್‌ಲೈನ್‌ನಲ್ಲಿ ಬಯಲು

ಹೊಸದಿಲ್ಲಿ,ಸೆ.5: ಫೇಸ್‌ಬುಕ್ ಬಳಕೆದಾರರ ಫೋನ್ ನಂಬರ್‌ಗಳನ್ನೊಳಗೊಂಡ 419 ಮಿಲಿಯನ್‌ಗೂ ಅಧಿಕ ದಾಖಲೆಗಳಿರುವ ಮುಕ್ತ ದತ್ತಾಂಶ ಕೋಶವನ್ನು ಭದ್ರತಾ ಸಂಶೋಧಕರೋರ್ವರು ಪತ್ತೆ ಹಚ್ಚಿರುವುದನ್ನು ಟೆಕ್ ಕ್ರಂಚ್ ಗುರುವಾರ ವರದಿ ಮಾಡಿದೆ. ಈಗ ಆನ್‌ಲೈನ್‌ ನಿಂದ ಹಿಂದೆದುಕೊಳ್ಳಲಾಗಿರುವ ಈ ದತ್ತಾಂಶ ಕೋಶವನ್ನು ಯಾವುದೇ ಪಾಸ್‌ವರ್ಡ್ ರಕ್ಷಣೆಯಿಲ್ಲದಿದ್ದ ಸರ್ವರ್‌ನಲ್ಲಿರಿಸಲಾಗಿತ್ತು.

ಈ ಮಾಹಿತಿಗಳು ಹಳೆಯದಾಗಿವೆ ಎಂದು ಹೇಳಿರುವ ಫೇಸ್‌ಬುಕ್ ವಕ್ತಾರರು, ‘ ಇತರರ ಪೋನ್ ನಂಬರ್‌ಗಳನ್ನು ಬಳಸಿ ಅವರನ್ನು ಪತ್ತೆ ಹಚ್ಚಲು ಬಳಕೆದಾರರಿಗೆ ಅವಕಾಶವನ್ನು ತೆಗೆದುಹಾಕಲು ನಾವು ಕಳೆದ ವರ್ಷ ಮಾಡಿರುವ ಬದಲಾವಣೆಗಳ ಮೊದಲೇ ಈ ಮಾಹಿತಿಗಳನ್ನು ಪಡೆದುಕೊಂಡಿರುವಂತಿದೆ ’ ಎಂದು ಸಮಜಾಯಿಷಿ ನೀಡಿದ್ದಾರೆ. ಕಳೆದ ವರ್ಷದವರೆಗೂ ಯಾರೇ ಆದರೂ ಫೋನ್ ನಂಬರ್‌ಗಳನ್ನು ಬಳಸಿ ಖಾತೆಗಳನ್ನು ಹುಡುಕಾಡಲು ಫೇಸ್‌ಬುಕ್ ಅವಕಾಶ ನೀಡಿತ್ತು.

ಸರ್ವರ್‌ನ ಮಾಲಿಕ ಯಾರು ಎನ್ನುವುದನ್ನು ಕಂಡು ಹಿಡಿಯಲು ಟೆಕ್ ಕ್ರಂಚ್ ಮತ್ತು ಮುಕ್ತ ದತ್ತಾಂಶ ಕೋಶವನ್ನು ಪತ್ತೆ ಮಾಡಿದ್ದ ಸಂಯಮ ಜೈನ್ ಅವರಿಗೆ ಸಾಧ್ಯವಾಗಿಲ್ಲ. ಟೆಕ್‌ಕ್ರಂಚ್ ವೆಬ್ ಹೋಸ್ಟ್ ಅನ್ನು ಸಂಪರ್ಕಿಸಿದ ಬಳಿಕ ದತ್ತಾಂಶಕೋಶವನ್ನು ತೆಗೆಯಲಾಗಿದೆ. ಬಯಲಾಗಿರುವ ಮಾಹಿತಿಗಳಲ್ಲಿ ಹಲವಾರು ಸೆಲೆಬ್ರಿಟಿಗಳ ಫೋನ್ ನಂಬರ್‌ಗಳಿವೆ ಮತ್ತು ಕೆಲವು ದಾಖಲೆಗಳು ಬಳಕೆದಾರರ ಹೆಸರು,ಲಿಂಗ ಮತ್ತು ದೇಶ ಇತ್ಯಾದಿ ವಿವರಗಳನ್ನೂ ಒಳಗೊಂಡಿವೆ.

ಬಯಲಾಗಿರುವ ದಾಖಲೆಗಳಲ್ಲಿ ಅಮರಿಕದ ಫೇಸ್‌ಬುಕ್ ಬಳಕೆದಾರರಿಗೆ ಸಂಬಂಧಿಸಿದ 133 ಮಿ.,ಬ್ರಿಟನ್‌ನ 18 ಮಿ. ಮತ್ತು ವಿಯೆಟ್ನಾಮ್‌ನ 50 ಮಿಲಿಯನ್‌ಗೂ ಅಧಿಕ ದಾಖಲೆಗಳು ಸೇರಿವೆ. ಇತರ ದೇಶಗಳ ಪ್ರಜೆಗಳಿಗೆ ಸಂಬಂಧಿಸಿದ ಮಾಹಿತಿಗಳೂ ಬಯಲಾಗಿವೆಯೇ ಎನ್ನುವುದು ಸ್ಪಷ್ಟವಾಗಿಲ್ಲ.

ಫೇಸ್‌ಬುಕ್‌ನ ಪ್ರತಿ ದಾಖಲೆಯು ಬಳಕೆದಾರನ ಐಡಿ ಮತ್ತು ಖಾತೆಯೊಂದಿಗೆ ತಳುಕು ಹಾಕಿಕೊಂಡಿರುವ ಫೋನ್ ನಂಬರ್‌ನ್ನು ಒಳಗೊಂಡಿದೆ. ಬಳಕೆದಾರನ ಖಾತೆಯನ್ನು ಪ್ರವೇಶಿಸಲು ವಿಶಿಷ್ಟ ಐಡಿಯನ್ನು ಸುಲಭವಾಗಿ ಬಳಸಬಹುದು.

ಹಲವಾರು ಬಳಕೆದಾರರ ಮಾಹಿತಿಗಳನ್ನು ತಾನು ದೃಢೀಕರಿಸಿಕೊಂಡಿದ್ದೇನೆ,ಹೀಗಾಗಿ ಈ ದಾಖಲೆಗಳು ನಿಜವಾಗಿರುವಂತೆ ಕಂಡು ಬರುತ್ತಿದೆ ಎಂದು ಟೆಕ್ ಕ್ರಂಚ್ ಹೇಳಿದೆ.

ಮಾಹಿತಿಗಳನ್ನು ಆನ್‌ಲೈನ್‌ನಿಂದ ತೆಗೆಯಲಾಗಿದೆ ಮತ್ತು ಫೇಸ್‌ಬುಕ್ ಖಾತೆಗಳು ಸೋರಿಕೆಯಾಗಿವೆ ಎನ್ನುವುದಕ್ಕೆ ಯಾವುದೇ ಸಾಕ್ಷಾಧಾರವಿಲ್ಲ ಎಂದು ಫೇಸ್‌ಬುಕ್ ವಕ್ತಾರರು ಹೇಳಿದರು. ಕೆಲವು ದಾಖಲೆಗಳು ಡುಪ್ಲಿಕೇಟ್ ಆಗಿರಬಹುದಾದ್ದರಿಂದ ಸುಮಾರು 210 ಮಿ.ಬಳಕೆದಾರರ ಮಾಹಿತಿಗಳಷ್ಟೇ ಬಯಲಾಗಿವೆ ಎಂದಿದ್ದಾರೆ.