ಕಾಶ್ಮೀರ, ಅಸ್ಸಾಂನಲ್ಲಿ ಮಾನವ ಹಕ್ಕುಗಳ ಉಲ್ಲಂಘನೆ : ವಿಶ್ವಸಂಸ್ಥೆ ಕಳವಳ
ಹೊಸದಿಲ್ಲಿ, ಸೆ.9: ಜಮ್ಮು ಕಾಶ್ಮೀರಕ್ಕೆ ಹಲವು ದಶಕಗಳಿಂದ ನೀಡಲಾಗಿದ್ದ ವಿಶೇಷ ಸ್ಥಾನಮಾನ ರದ್ದುಗೊಳಿಸಿದ ಬಳಿಕ ಭಾರತದ ಸರಕಾರ ಅಲ್ಲಿ ವಿಧಿಸಿರುವ ಕಠಿಣ ನಿರ್ಬಂಧ ಕ್ರಮಗಳಿಂದ ಮಾನವ ಹಕ್ಕು ಉಲ್ಲಂಘನೆಯಾಗುವ ಬಗ್ಗೆ ತಾನು ತೀವ್ರ ಕಳವಳಗೊಂಡಿರುವುದಾಗಿ ವಿಶ್ವಸಂಸ್ಥೆಯ ಮಾನವ ಹಕ್ಕುಗಳ ಸಮಿತಿಯ ಹೈಕಮಿಷನರ್ ಮಿಶೆಲ್ ಬ್ಯಾಚೆಲೆಟ್ ಹೇಳಿದ್ದಾರೆ.
ಕಾಶ್ಮೀರದ ಜನತೆಯ ಭವಿಷ್ಯದ ಮೇಲೆ ಪರಿಣಾಮ ಬೀರುವ ಯಾವುದೇ ನಿರ್ಧಾರ ಕೈಗೊಳ್ಳುವ ಮೊದಲು ಅಲ್ಲಿಯ ಜನರೊಂದಿಗೆ ಚರ್ಚಿಸುವ ಅಗತ್ಯವಿದೆ ಎಂದವರು ಹೇಳಿದ್ದಾರೆ. ಅಲ್ಲದೆ ಅಸ್ಸಾಂನಲ್ಲಿ ರಾಷ್ಟ್ರೀಯ ಪೌರತ್ವ ನೋಂದಣಿಯ ಪರಿಷ್ಕರಣೆಯ ಬಳಿಕ ಯಾವುದೇ ವ್ಯಕ್ತಿ ರಾಷ್ಟ್ರರಹಿತನಾಗದಂತೆ ಖಾತರಿಪಡಿಸುವಂತೆ ಭಾರತ ಸರಕಾರವನ್ನು ಆಗ್ರಹಿಸಿದ್ದಾರೆ.
ಇಂಟರ್‌ನೆಟ್ ಸಂವಹನ ವ್ಯವಸ್ಥೆಯ ಮೇಲೆ ನಿರ್ಬಂಧ, ಜನತೆ ಶಾಂತರೀತಿಯಲ್ಲಿ ಒಂದೆಡೆ ಸೇರುವುದಕ್ಕೂ ನಿರ್ಬಂಧ ವಿಧಿಸಿರುವುದು, ಸ್ಥಳೀಯ ರಾಜಕೀಯ ಮುಖಂಡರನ್ನು ಹಾಗೂ ಕಾರ್ಯಕರ್ತರನ್ನು ಬಂಧಿಸಿರುವ ಕ್ರಮಗಳಿಂದ ಕಾಶ್ಮೀರದ ಜನರ ಮಾನವ ಹಕ್ಕುಗಳ ಮೇಲೆ ಆಗಬಹುದಾದ ಪರಿಣಾಮಗಳ ಬಗ್ಗೆ ತೀವ್ರ ಆತಂಕಕ್ಕೆ ಒಳಗಾಗಿದ್ದೇನೆ ಎಂದು ಮಾನವ ಹಕ್ಕು ಸಮಿತಿಯ 42ನೇ ಅಧಿವೇಶನದ ಉದ್ಘಾಟನಾ ಸಮಾರಂಭದಲ್ಲಿ ಮಾತನಾಡಿದ ಬ್ಯಾಚೆಲೆಟ್ ಹೇಳಿದರು. ಮಾನವ ಹಕ್ಕುಗಳನ್ನು ಗೌರವಿಸಿ ರಕ್ಷಿಸುವುದನ್ನು ಖಾತರಿಗೊಳಿಸುವಂತೆ ಭಾರತ ಹಾಗೂ ಪಾಕಿಸ್ತಾನ ಸರಕಾರವನ್ನು ಆಗ್ರಹಿಸುತ್ತೇನೆ. ಮತ್ತು ಕಾಶ್ಮೀರದಲ್ಲಿ ಈಗ ವಿಧಿಸಿರುವ ನಿರ್ಬಂಧ, ಕರ್ಫ್ಯೂವನ್ನು ಸಡಿಲಿಸುವಂತೆ , ರಾಜ್ಯದ ಜನತೆಗೆ ಸಂವಹನ ವ್ಯವಸ್ಥೆ ಹಾಗೂ ಮೂಲಭೂತ ಸೌಕರ್ಯ ಮರು ಲಭ್ಯವಾಗಿಸುವಂತೆ ಮತ್ತು ಬಂಧನಲ್ಲಿರುವ ವ್ಯಕ್ತಿಗಳ ಮಾನವ ಹಕ್ಕನ್ನು ಗೌರವಿಸುವಂತೆ ಭಾರತ ಸರಕಾರವನ್ನು ನಿರ್ದಿಷ್ಟವಾಗಿ ಕೇಳಿಕೊಳ್ಳುತ್ತೇನೆ . ಗಡಿ ನಿಯಂತ್ರಣ ರೇಖೆಯ ಎರಡೂ ಬದಿಗಳಲ್ಲಿ ಮಾನವ ಹಕ್ಕುಗಳ ಉಲ್ಲಂಘನೆಯಾಗುತ್ತಿರುವ ಬಗ್ಗೆ ತನ್ನ ಕಚೇರಿಗೆ ನಿರಂತರ ವರದಿ ಬರುತ್ತಿದೆ ಎಂದರು.
ಜಮ್ಮು ಕಾಶ್ಮೀರಕ್ಕೆ ವಿಶೇಷ ಸ್ಥಾನಮಾನ ನೀಡಿರುವ 370ನೇ ವಿಧಿಯನ್ನು ರದ್ದುಗೊಳಿಸಿರುವುದು ತನ್ನ ಆಂತರಿಕ ವಿಷಯವಾಗಿದೆ ಎಂದು ಹೇಳಿರುವ ಭಾರತ, ಈ ವಿಷಯವನ್ನು ಅಂತರಾಷ್ಟ್ರೀಯ ವೇದಿಕೆಯಲ್ಲಿ ಪ್ರಸ್ತಾಪಿಸುವ ಪಾಕಿಸ್ತಾನದ ನಡೆಯನ್ನು ತೀವ್ರವಾಗಿ ಟೀಕಿಸಿದೆ.
ಎನ್‌ಆರ್‌ಸಿಯಿಂದ ಅನಿಶ್ಚಿತತೆ: ಮಿಶೆಲ್ ಅಸ್ಸಾಂನಲ್ಲಿ ಅಕ್ರಮ ವಲಸಿಗರನ್ನು ಹೊರಹಾಕುವ ಉದ್ದೇಶದಿಂದ ರೂಪಿಸಲಾಗಿರುವ ರಾಷ್ಟ್ರೀಯ ಪೌರತ್ವ ನೋಂದಣಿ(ಎನ್‌ಆರ್‌ ಸಿ)ಯಿಂದ ಭಾರೀ ಆತಂಕ ಹಾಗೂ ಅನಿಶ್ಚಿತತೆ ಮೂಡಿದೆ. ಅಗಸ್ಟ್ 31ರಂದು ಪ್ರಕಟಿಸಲಾದ ಅಂತಿಮ ಪಟ್ಟಿಯಲ್ಲಿ ಸುಮಾರು 19 ಲಕ್ಷ ಜನರ ಹೆಸರು ಸೇರಿಲ್ಲ ಎಂದು ಉಲ್ಲೇಖಿಸಿದ ಮಿಶೆಲ್ ಬ್ಯಾಚೆಲೆಟ್, ಗಡೀಪಾರು ಮಾಡದೆ ಅಥವಾ ಬಂಧಿಸದೆ ಮೇಲ್ಮನವಿ ಪ್ರಕ್ರಿಯೆಯನ್ನು ಸೂಕ್ತವಾಗಿ ನಡೆಸುವಂತೆ ಭಾರತ ಸರಕಾರವನ್ನು ಒತ್ತಾಯಿಸಿದರು. ಯಾವುದೇ ವ್ಯಕ್ತಿ ರಾಷ್ಟ್ರರಹಿತನಾಗದಂತೆ ಖಾತರಿಪಡಿಸಬೇಕು ಎಂದು ಆಗ್ರಹಿಸಿದ್ದಾರೆ.
