ಖಾಸಗಿ ರೈಲ್ವೆ ಸೇವೆ ಆರಂಭ ಯಾವಾಗ ಗೊತ್ತೇ?
ಹೊಸದಿಲ್ಲಿ, ಸೆ.10: ಖಾಸಗಿಯವರಿಗೆ ರೈಲು ಸೇವೆ ನಿರ್ವಹಿಸಲು ಅವಕಾಶ ನೀಡುವ ಮುನ್ನ ಭಾರತೀಯ ರೈಲ್ವೆ, ಹಬ್ಬದ ಸಂದರ್ಭದಲ್ಲಿ ಪ್ರಯಾಣದರವನ್ನು ದಿಢೀರನೇ ಏರಿಸುವುದನ್ನು ತಡೆಯುವ ಸಂಬಂಧ ನಿರ್ಬಂಧಗಳನ್ನು ಹೇರಲಿದೆ ಎಂದು ಭಾರತೀಯ ರೈಲ್ವೆ ಪ್ರಕಟಿಸಿದೆ.
"ರೈಲು ಸೇವೆಯನ್ನು ಖಾಸಗಿಯವರು ನಿರ್ವಹಿಸುವ ವ್ಯವಸ್ಥೆ ಜಾರಿಗೆ ತರಲು ಸ್ವಲ್ಪ ಸಮಯಾವಕಾಶ ಬೇಕಾಗಬಹುದು. ನಿರ್ಬಂಧ ಸಂಸ್ಥೆಯೊಂದು ಪ್ರಯಾಣದರ, ಮಾರ್ಗಗಳ ಹಂಚಿಕೆ ಮತ್ತು ಸುರಕ್ಷತೆ ವಿಚಾರಗಳ ಬಗ್ಗೆ ನಿರ್ಧಾರ ಕೈಗೊಳ್ಳಲಿದೆ. ಪಾರದರ್ಶಕ ಬಿಡ್ಡಿಂಗ್ ಪ್ರಕ್ರಿಯೆ ಮೂಲಕ ರೈಲು ಹಾಗೂ ಮಾರ್ಗಗಳನ್ನು ಹಂಚಿಕೆ ಮಾಡಲಾಗುವುದು" ಎಂದು ರೈಲ್ವೆ ಮಂಡಳಿ ಅಧ್ಯಕ್ಷ ವೈ.ಕೆ.ಯಾದವ್ ಹೇಳಿದರು.
ರೈಲು ಸೇವೆ ಆರಂಭಿಸುವ ಬಗ್ಗೆ ಹಲವು ಖಾಸಗಿ ಸಂಘಸಂಸ್ಥೆಗಳು ಆಸಕ್ತಿ ವ್ಯಕ್ತಪಡಿಸಿವೆ ಎಂದು ಅವರು ಸ್ಪಷ್ಟಪಡಿಸಿದರು. ಹಲವು ವಿಮಾನಯಾನ ಸಂಸ್ಥೆಗಳು ಕೂಡಾ ಈ ಯೋಜನೆಗೆ ಉತ್ಸುಕವಾಗಿವೆ ಎಂದರು.
ಸದ್ಯ ಇರುವ ಪ್ರಮುಖ ರೈಲ್ವೆ ಮಾರ್ಗಗಳಲ್ಲಿ ಓಡಾಡುವ ಶೇಕಡ 90ರಷ್ಟು ಸರಕು ಸಾಗಣೆ ರೈಲುಗಳನ್ನು, ವಿಶೇಷವಾದ ಸರಕು ಸಾಗಣೆ ಕಾರಿಡಾರ್‌ಗಳಿಗೆ ವರ್ಗಾವಣೆ ಮಾಡಿದ ಬಳಿಕ ಖಾಸಗಿ ಸಂಸ್ಥೆಗಳಿಗೆ ಇದರ ನಿರ್ವಹಣೆಯನ್ನು ವಹಿಸಲಾಗುತ್ತದೆ. ಪೂರ್ವ ಮತ್ತು ಪಶ್ಚಿಮ ಸರಕು ಸಾಗಣೆ ಕಾರಿಡಾರ್ 2021ರ ಡಿಸೆಂಬರ್ ವೇಳೆಗೆ ಕಾರ್ಯಾರಂಭ ಮಾಡಲಿದೆ ಎಂದು ಯಾದವ್ ವಿವರಿಸಿದರು.
ಸದ್ಯ ಭಾರತೀಯ ರೈಲ್ವೆ ಎರಡು ತೇಜಸ್ ರ್ಯಾಕ್‌ಗಳನ್ನು ಐಆರ್‌ಸಿಟಿಸಿಗೆ ನೀಡಿದ್ದು, ಇದು ದಿಲ್ಲಿ- ಲಕ್ನೋ ಮತ್ತು ಅಹ್ಮದಾಬಾದ್- ಮುಂಬೈ ನಡುವೆ ಈ ಪರಿಕಲ್ಪನೆಯಡಿ ಓಡಲಿವೆ. "ನಾವು ಕಾರ್ಯಾಚರಣೆ ಸಂಸ್ಥೆಗಳಿಗೆ ಸಂಪೂರ್ಣ ಸ್ವಾತಂತ್ರ ನೀಡಲಿದ್ದೇವೆ. ಅವರು ಮನೋರಂಜನಾ ವ್ಯವಸ್ಥೆಗಳು, ವೈವಿಧ್ಯಮಯ ಶ್ರೇಣಿಯ ಆಹಾರ ಹಾಗೂ ಪಾನೀಯವನ್ನು ಒದಗಿಸಬಹುದಾಗಿದೆ. ಹೋಟೆಲ್ ಬುಕ್ಕಿಂಗ್, ಟ್ಯಾಕ್ಸಿ ಸೇವೆ, ಮನೆಯಿಂದ ಬ್ಯಾಗೇಜ್ ಒಯ್ಯುವುದು ಹಾಗೂ ಗಮ್ಯತಾಣಗಳಿಗೆ ಒಯ್ಯುವುದು, ಅಗತ್ಯವಿರುವ ಪ್ರಯಾಣಿಕರಿಗೆ ವೀಲ್‌ಚೇರ್ ಒದಗಿಸುವಂಥ ಸೇವೆಗಳನ್ನು ಐಆರ್‌ಸಿಟಿಸಿ ಆರಂಭಿಸಲಿದೆ" ಎಂದರು.
