ಜಾಗತಿಕ ವಿವಿ ಶ್ರೇಯಾಂಕ ಪಟ್ಟಿ: ಅಗ್ರ 300 ವಿವಿಗಳ ಪಟ್ಟಿಯಿಂದ ಕೆಳಜಾರಿದ ಭಾರತ

ಹೊಸದಿಲ್ಲಿ, ಸೆ.12: ಟೈಮ್ಸ್ ಉನ್ನತ ಅಧ್ಯಯನ ಜಾಗತಿಕ ವಿಶ್ವವಿದ್ಯಾಲಯ ಶ್ರೇಯಾಂಕ ಪಟ್ಟಿಯ ಅಗ್ರ 300 ವಿವಿಗಳಲ್ಲಿ ಭಾರತದ ಯಾವುದೇ ವಿವಿಗಳು ಸ್ಥಾನ ಪಡೆದಿಲ್ಲ. ಕಳೆದ ಬಾರಿ ಈ ಪಟ್ಟಿಯಲ್ಲಿ ಸ್ಥಾನ ಪಡೆದಿದ್ದ ಬೆಂಗಳೂರಿನ ಭಾರತೀಯ ವಿಜ್ಞಾನ ಸಂಸ್ಥೆ ಈ ಬಾರಿ 301ರಿಂದ 350ರ ಹಂತಕ್ಕೆ ಕುಸಿದಿದೆ ಎಂದು ವರದಿ ತಿಳಿಸಿದೆ.

ಬ್ರಿಟನ್‌ನ ಆಕ್ಸ್‌ಫರ್ಡ್ ವಿವಿ ಮತ್ತೊಮ್ಮೆ ವಿಶ್ವದ ಅಗ್ರ ವಿಶ್ವವಿದ್ಯಾಲಯ ಎಂಬ ಹಿರಿಮೆಗೆ ಪಾತ್ರವಾಗಿದೆ. 2012ರ ಬಳಿಕ ಇದೇ ಮೊದಲ ಬಾರಿಗೆ ವಿಶ್ವದ ಅಗ್ರ 300 ವಿವಿಗಳ ಪಟ್ಟಿಯಲ್ಲಿ ಭಾರತದ ಶೂನ್ಯ ಸಾಧನೆಯಾಗಿದೆ. ಬೆಂಗಳೂರಿನ ಭಾರತೀಯ ವಿಜ್ಞಾನ ಸಂಸ್ಥೆ (ಐಐಎಸ್‌ಸಿ) ಕಳೆದ ಬಾರಿ 251ರಿಂದ 300ರ ಶ್ರೇಯಾಂಕ ಪಟ್ಟಿಯಲ್ಲಿ ಸ್ಥಾನ ಪಡೆದಿದ್ದ ಭಾರತದ ಏಕೈಕ ವಿವಿಯಾಗಿತ್ತು. ಈ ಬಾರಿ 301ರಿಂದ 350ರ ಗುಂಪಿಗೆ ಕುಸಿದಿದೆ. ಭಾರತದ ವಿವಿಗಳಲ್ಲಿ ಐಐಎಸ್‌ಸಿ ಬಳಿಕದ ಅತ್ಯುತ್ತಮ ಸಾಧನೆಯನ್ನು ಪಂಜಾಬ್‌ನ ರೋಪಾರ್‌ನಲ್ಲಿರುವ ಐಐಟಿ ಹಾಗೂ ಐಐಟಿ ಇಂದೋರ್ ದಾಖಲಿಸಿದ್ದು, 351ರಿಂದ 400ರ ಪಟ್ಟಿಯಲ್ಲಿದೆ.

 ಭಾರತದ ಅತ್ಯುತ್ತಮ ಸಂಸ್ಥೆಗಳು ಬೋಧನಾ ಪರಿಸರ ಹಾಗೂ ಉದ್ಯಮದ ಆದಾಯ ವಿಭಾಗದಲ್ಲಿ ಉತ್ತಮ ಸಾಧನೆ ತೋರಿದ್ದರೆ ಅಂತರಾಷ್ಟ್ರೀಯ ದೃಷ್ಟಿಕೋನ ವಿಭಾಗದಲ್ಲಿ ಕಳಪೆ ಸಾಧನೆ ತೋರಿವೆ ಎಂದು ಸಮೀಕ್ಷೆಯ ವರದಿಯಲ್ಲಿ ತಿಳಿಸಲಾಗಿದೆ. ಭಾರತದಲ್ಲಿ ಆರ್ಥಿಕತೆ ಹಾಗೂ ಯುವ ಜನಸಂಖ್ಯೆ ವೇಗವಾಗಿ ಹೆಚ್ಚುತ್ತಿದ್ದು ಇಂಗ್ಲಿಷ್ ಮಾಧ್ಯಮ ಶಿಕ್ಷಣದ ಬಳಕೆಯಿಂದಾಗಿ ಭಾರತವು ಜಾಗತಿಕ ಉನ್ನತ ಅಧ್ಯಯನ ಕ್ಷೇತ್ರದಲ್ಲಿ ಅಪಾರ ಅಂತಸ್ಸತ್ವ ಹೊಂದಿದೆ. ಆದರೂ ಈ ವರ್ಷ ವಿಶ್ವದ ಅಗ್ರ 300 ವಿವಿಗಳ ಪಟ್ಟಿಯಲ್ಲಿ ಭಾರತದ ವಿವಿಗಳು ಸ್ಥಾನ ಪಡೆಯದಿರುವುದು ಮತ್ತು ಕೆಲವೇ ವಿವಿಗಳು ಕಳೆದ ವರ್ಷಕ್ಕಿಂತ ಸ್ವಲ್ಪ ಮುನ್ನಡೆ ಸಾಧಿಸಿರುವುದು ನಿರಾಶೆ ತಂದಿದೆ ಎಂದು ಸಮೀಕ್ಷೆಯ ಸಂಪಾದಕಿ ಎಲೀ ಬಾಥ್ವೆಲ್ ಹೇಳಿದ್ದಾರೆ.

ತನ್ನ ಪ್ರಮುಖ ವಿವಿಗಳ ಜಾಗತಿಕ ಶ್ರೇಯಾಂಕವನ್ನು ಹೆಚ್ಚಿಸಿ ವಿದೇಶದ ವಿದ್ಯಾರ್ಥಿಗಳನ್ನು ಆಕರ್ಷಿಸಬೇಕೆಂಬ ಬಲವಾದ ಮಹಾತ್ವಾಕಾಂಕ್ಷೆ ಭಾರತ ಸರಕಾರಕ್ಕಿದೆ. ಹೆಚ್ಚುತ್ತಿರುವ ಜಾಗತಿಕ ಸ್ಪರ್ಧೆಯ, ಅದರಲ್ಲೂ ಪ್ರಮುಖವಾಗಿ ಏಶ್ಯಾದ ಇತರ ರಾಷ್ಟ್ರಗಳಿಂದ ಎದುರಾಗಿರುವ ಸ್ಪರ್ಧೆಯ ಹಿನ್ನೆಲೆಯಲ್ಲಿ ವಿವಿಗಳಿಗೆ ಹೆಚ್ಚಿನ ಅನುದಾನ ಒದಗಿಸುವ ಮೂಲಕ ಈ ಆಕಾಂಕ್ಷೆಗೆ ಬೆಂಬಲ ನೀಡುವುದು ಈಗಿನ ಅಗತ್ಯವಾಗಿದೆ ಎಂದವರು ಅಭಿಪ್ರಾಯಪಟ್ಟಿದ್ದಾರೆ. ಬ್ರಿಟನ್‌ನ ಆಕ್ಸ್‌ಫರ್ಡ್ ವಿವಿ ಸತತ ನಾಲ್ಕನೇ ವರ್ಷ ಅಗ್ರಸ್ಥಾನ ಕಾಯ್ದುಕೊಂಡಿದೆ. ಅಮೆರಿಕದ ಕ್ಯಾಲಿಫೋರ್ನಿಯಾ ಐಟಿ ದ್ವಿತೀಯ, ಕ್ಯಾಂಬ್ರಿಡ್ಜ್ ವಿವಿ, ಸ್ಟಾನ್‌ಫೋರ್ಡ್ ವಿವಿ ಮತ್ತು ಮ್ಯಾಸಚೂಸಿಟ್ಸ್ ಐಟಿ ಕ್ರಮವಾಗಿ ನಂತರದ ಸ್ಥಾನ ಗಳಿಸಿವೆ. ಪ್ರಿನ್ಸೆಟನ್ ವಿವಿ, ಹಾರ್ವರ್ಡ್ ವಿವಿ, ಯೇಲ್ ವಿವಿ, ಚಿಕಾಗೋ ವಿವಿ ಮತ್ತು ಲಂಡನ್‌ನ ಇಂಪೀರಿಯಲ್ ಕಾಲೇಜು ಕ್ರಮವಾಗಿ ಆರರಿಂದ 10ರವರೆಗಿನ ಸ್ಥಾನ ಗಳಿಸಿವೆ.

ಭಾರತಕ್ಕೆ 5ನೇ ಸ್ಥಾನ ಜಾಗತಿಕ ಪಟ್ಟಿಯಲ್ಲಿ ಈ ಬಾರಿ ಭಾರತದ 56 ವಿವಿಗಳು ಸ್ಥಾನ ಪಡೆದಿದ್ದು(ಕಳೆದ ವರ್ಷ 49) ವಿಶ್ವದಲ್ಲಿ 5ನೇ ಸ್ಥಾನ ಗಳಿಸಿದ್ದರೆ ಜರ್ಮನಿ ಆರನೇ ಸ್ಥಾನದಲ್ಲಿದೆ. ಏಶ್ಯ ವಿಭಾಗದಲ್ಲಿ ಭಾರತ 3ನೇ ಸ್ಥಾನ ಗಳಿಸಿದೆ. ಜಪಾನ್ ಮೊದಲ ಸ್ಥಾನದಲ್ಲಿದ್ದರೆ ಚೀನಾ ದ್ವಿತೀಯ ಸ್ಥಾನದಲ್ಲಿದೆ.