ಕಾನೂನು ವಿದ್ಯಾರ್ಥಿನಿಯ ಅತ್ಯಾಚಾರ ಆರೋಪ: ಚಿನ್ಮಯಾನಂದನ 7 ಗಂಟೆ ವಿಚಾರಣೆ ನಡೆಸಿದ ಸಿಟ್
ಹೊಸದಿಲ್ಲಿ, ಸೆ.13: ಬಿಜೆಪಿ ನಾಯಕ ಹಾಗೂ ಕಾನೂನು ವಿದ್ಯಾರ್ಥಿನಿಯ ಅತ್ಯಾಚಾರ ಆರೋಪಿ ಚಿನ್ಮಯಾನಂದನನ್ನು ವಿಶೇಷ ತನಿಖಾ ತಂಡ ಗುರುವಾರ ಸುಮಾರು 7 ಗಂಟೆಗಳ ಕಾಲ ವಿಚಾರಣೆ ನಡೆಸಿದೆ.
ವಿಚಾರಣೆಯನ್ನು ಸಂಜೆ 6:20ರಿಂದ ರಾತ್ರಿ 1.00ರ ತನಕ ನಡೆಸಲಾಗಿದೆ ಎಂದು ಸಿಟ್ ಮೂಲಗಳು ತಿಳಿಸಿವೆ. ಆದರೆ, ಪೊಲೀಸರು ಇನ್ನಷ್ಟೇ ಮಾಜಿ ಕೇಂದ್ರ ಸಚಿವ ಚಿನ್ಮಯಾನಂದನ ವಿರುದ್ಧ ಅತ್ಯಾಚಾರ ಪ್ರಕರಣವನ್ನು ದಾಖಲಿಸಬೇಕಾಗಿದೆ.
ತನ್ನ ಪುತ್ರಿ ಮಾಡಿರುವ ಆರೋಪಕ್ಕೆ ಪೂರಕವಾಗಿರುವ ನಿರ್ಣಾಯಕ ದಾಖಲೆಗಳು ನಾಪತ್ತೆಯಾಗಿವೆ. ಆರೋಪಿಯ ವಿರುದ್ಧ ಪುರಾವೆಗಳನ್ನು ನನ್ನ ಪುತ್ರಿ ತನ್ನ ಹಾಸ್ಟೆಲ್ ರೂಮ್‌ನಲ್ಲಿ ಸುರಕ್ಷಿತವಾಗಿ ಇಟ್ಟಿದ್ದಳು. ನ್ಯಾಯಾಲಯದ ಆದೇಶದ ಬಳಿಕ ಇದನ್ನು ಸೀಲ್ ಮಾಡಲಾಗಿತ್ತು. ವಿಶೇಷ ತನಿಖಾ ತಂಡ(ಸಿಟ್)ಸೆ.9 ರಂದು ನ್ಯಾಯಾಲಯದಲ್ಲಿ ಸೀಲ್ ತೆರೆದು ನೋಡಿದಾಗ ಕೆಲವು ದಾಖಲೆಗಳು ಹಾಸ್ಟೆಲ್ ರೂಮ್‌ನಿಂದ ಕಳವಾಗಿರುವುದು ಪತ್ತೆಯಾಗಿದೆ ಎಂದು ಕಾನೂನು ವಿದ್ಯಾರ್ಥಿನಿಯ ತಂದೆ ಆರೋಪಿಸಿದ್ದಾರೆ.
12 ವಿಡಿಯೋಗಳು ರಾಜಕಾರಣಿಯಾಗಿ ಪರಿವರ್ತಿತನಾಗಿರುವ ಸಂತ ಚಿನ್ಮಯಾನಂದನ ಕರಾಳ ಮುಖಕ್ಕೆ ಸಾಕ್ಷಿಯಾಗಿದ್ದವು. ಚಿನ್ಮಯಾನಂದ ಮುಖ್ಯಮಂತ್ರಿ ಆದಿತ್ಯನಾಥನ ಆತ್ಮೀಯ ಸ್ನೇಹಿತನಾಗಿರುವ ಕಾರಣ ಪೊಲೀಸರು ಚಿನ್ಮಯಾನಂದನನ್ನು ರಕ್ಷಿಸಲು ಹಗಲಿರುಳು ಶ್ರಮಿಸುತ್ತಿದ್ದಾರೆ ಎಂದು ಕಾನೂನು ವಿದ್ಯಾರ್ಥಿನಿಯ ತಂದೆ ಹೇಳಿದ್ದಾರೆ.
23ರ ಹರೆಯದ ಕಾನೂನು ವಿದ್ಯಾರ್ಥಿನಿ ಶಹಜಾನ್ಪುರದಲ್ಲಿ ಚಿನ್ಮಯಾನಂದ ನಡೆಸುತ್ತಿರುವ ಸ್ವಾಮಿ ವಿವೇಕಾನಂದ ಸ್ನಾತಕೋತ್ತರ ಕಾಲೇಜಿನಲ್ಲಿ ವಿದ್ಯಾಭಾಸ ಮಾಡುತ್ತಿದ್ದಳು. ಬಿಜೆಪಿ ನಾಯಕ ಚಿನ್ಮಯಾನಂದ ತನ್ನನ್ನು ಬ್ಲಾಕ್‌ಮೇಲ್ ಮಾಡಿ, ಪದೇ ಪದೇ ಅತ್ಯಾಚಾರ ನಡೆಸಿದ್ದಲ್ಲದೆ, ಇದನ್ನು ಚಿತ್ರೀಕರಿಸಿದ್ದ ಎಂದು ಯುವತಿ ಆರೋಪಿಸಿದ್ದಾಳೆ.
