ಸೌದಿ ತೈಲ ಕಂಪೆನಿಗಳ ಶೇರು ಮೌಲ್ಯ ಕುಸಿತ

ಜಿದ್ದಾ,ಸೆ.15: ಶಂಕಿತ ಹೌಥಿ ಬಂಡುಕೋರರ ಡ್ರೋನ್ ದಾಳಿಯಿಂದಾಗಿ ಹಾನಿಗೀಡಾದ ಆರಾಮ್ಕೊ ತೈಲ ಸ್ಥಾವರಗಳಲ್ಲಿ ತೈಲ ಉತ್ಪಾದನೆಯನ್ನು ಪುನಾರಂಭಿಸುವ ನಿಟ್ಟಿನಲ್ಲಿ ಸೌದಿ ಆಡಳಿತವು ಕಾರ್ಯೋನ್ಮುಖವಾಗಿರುವಂತೆಯೇ ಜಾಗತಿಕ ಶೇರು ಮಾರುಕಟ್ಟೆಯಲ್ಲಿ ಆರಾಮ್ಕೊ ಸಂಸ್ಥೆಯ ಶೇರುಗಳಲ್ಲಿ ಶೇ.3ರಷ್ಟು ಕುಸಿತವುಂಟಾಗಿದೆ.

   ಶನಿವಾರ ಸೌದಿ ಹಾಗೂ ಯೆಮೆನ್ ಗಡಿಪ್ರದೇಶವಾದ ಖುರೈಸ್‌ಗೆ  ಸಮೀಪದಲ್ಲಿರುವ ಅಬ್ಕೈಕ್ ತೈಲ ಸ್ಥಾವರದ ಮೇಲೆ ಹೌಥಿ ಬಂಡುಕೋರರು ಡ್ರೋನ್ ದಾಳಿ ನಡೆಸಿದ್ದರಿಂದ ಭಾರೀ ಬೆಂಕಿ ಅನಾಹುತವುಂಟಾಗಿತ್ತು. ಈ ಪ್ರದೇಶದಲ್ಲಿ ಬೃಹತ್ ತೈಲ ನಿಕ್ಷೇಪವೂ ಇದೆ.

 ಸೌದಿ ಇಂಧನ ಮೂಲಸೌಕರ್ಯಗಳ ಮೇಲೆ ಹುದಿ ಬಂಡುಕೋರರು ಈ ಹಿಂದೆಯೂ ದಾಳಿ ನಡೆಸಿದ್ದರು. ಆದರೆ ಈ ಬಾರಿ ಅರ್ಮಾಕೊ ಕೈಲ ಘಟಕದ ಮೇಲೆ ನಡೆದ ದಾಳಿಯಲ್ಲಿ ದಿನಕ್ಕೆ 5.7 ದಶಲಕ್ಷ ಬ್ಯಾರೆಲ್ ತೈಲ ಉತ್ಪಾದನೆ ಸ್ಥಗಿತಗೊಂಡಿದ್ದು, ಇದು ಜಗತ್ತಿನ ಒಟ್ಟು ತೈಲ ಉತ್ಪಾದನೆಯ ಶೇ.6ರಷ್ಟಾಗಿದೆ.

► ಟ್ರಂಪ್ ಖಂಡನೆ

ಸೌದಿ ಅರೇಬಿಯದ ಆರಾಮ್ಕೊ ತೈಲ ಘಟಕದ ಮೇಲೆ ನಡೆದ ದಾಳಿಯನ್ನು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಪ್ರಬಲವಾಗಿ ಖಂಡಿಸಿದ್ದಾರೆ. ಯುವರಾಜ ಮುಹಮ್ಮದ್ ಬಿನ್ ಸಲ್ಮಾನ್ ಅವರಿಗೆ ದೂರವಾಣಿ ಕರೆ ಮಾಡಿದ ಟ್ರಂಪ್, ದೇಶದ ಅರ್ಥಿಕತೆಗೆ ಅತ್ಯಂತ ಮಹತ್ವದ್ದಾಗಿರುವ ಸೌದಿಯ ತೈಲ ಮೂಲ ಸೌಕರ್ಯವನ್ನು ಶ್ವೇತಭವನ ಖಂಡಿಸಿದೆಯೆಂದು ಅವರು ಹೇಳಿದರು.

ಇರಾನ್ ತನ್ನ ಅಣ್ವಸ್ತ್ರ ಕಾರ್ಯಕ್ರಮವನ್ನು ಮೊಟಕುಗೊಳಿಸಿದಲ್ಲಿ, ಆ ದೇಶದ ಮೇಲೆ ವಿಧಿಸಿರುವ ನಿರ್ಬಂಧಗಳನ್ನು ಸಡಿಲಗೊಳಿಸುವ ಕುರಿತಾದ 2015ರ ಒಪ್ಪಂದದಿಂದ ಅಮೆರಿಕವು ಹೊರಬಂದ ಬಳಿಕ ಉಭಯದೇಶಗಳ ನಡುವಿನ ಬಾಂಧವ್ಯ ಹಳಸಿತ್ತು.

 ಆರ್ಮಾಕೊ ಸ್ಥಾವರದ ಮೇಲೆ ಡ್ರೋನ್ ದಾಳಿಯ ಬಳಿಕ ಮುಂಬರುವ ವಿಶ್ವಸಂಸ್ಥೆಯ ಅಧಿವೇಶನದ ಸಂದರ್ಭದಲ್ಲಿ ಇರಾನ್ ಅಧ್ಯಕ್ಷ ಹಸ್ಸನ್ ರೂಹಾನಿ ಜೊತೆ ಮಾತುಕತೆ ನಡೆಸಲು ಟ್ರಂಪ್ ನಡೆಸಿದ್ದ ಪ್ರಯತ್ನಗಳು ಕ್ಷೀಣಿಸಿವೆ ಎಂದು ವಿಶ್ಲೇಷಕರು ತಿಳಿಸಿದ್ದಾರೆ.