ವಿಶ್ವ ಕುಸ್ತಿ ಚಾಂಪಿಯನ್‌ಶಿಪ್: ಗುರುಪ್ರೀತ್ ಸಿಂಗ್ ವೀರೋಚಿತ ಸೋಲು

ಗ್ರೀಕೊ-ರೋಮನ್ 130 ಕೆಜಿ ವಿಭಾಗದಲ್ಲಿ ನವೀನ್ 2018ರ ಪಾನ್ ಅಮೆರಿಕ ಚಾಂಪಿಯನ್ ಆಸ್ಕರ್ ಪಿನೊ ಹಿಂಡ್ಸ್ ವಿರುದ್ಧ ಅರ್ಹತಾ ಸುತ್ತಿನಲ್ಲಿ ತಾಂತ್ರಿಕ ಶ್ರೇಷ್ಠತೆಯಲ್ಲಿ ಸೋಲುಂಡರು. ಕ್ಯೂಬಾದ ಕುಸ್ತಿಪಟು ಪಿನೊ ಫೈನಲ್‌ಗೆ ತಲುಪಿದ್ದಾರೆ. ಪಿನೊ ಫೈನಲ್‌ಗೆ ತಲುಪಿದ ಹಿನ್ನೆಲೆಯಲ್ಲಿ ನವೀನ್‌ಗೆ ರಿಪಿಚೇಜ್ ಸುತ್ತಿನಲ್ಲಿ ಕಂಚಿನ ಪದಕಕ್ಕಾಗಿ ಸ್ಪರ್ಧಿಸುವ ಅವಕಾಶ ಲಭಿಸಿದೆ. ಮಾತ್ರವಲ್ಲ ಟೋಕಿಯೊ ಒಲಿಂಪಿಕ್ಸ್ ಅರ್ಹತಾ ಸುತ್ತಿನಲ್ಲಿ ಆಡುವ ಅವಕಾಶವನ್ನು ಪಡೆಯಲಿದ್ದಾರೆ.

ಕಝಖ್‌ಸ್ತಾನ, ಸೆ.16: ವಿಶ್ವ ಕುಸ್ತಿ ಚಾಂಪಿಯನ್‌ಶಿಪ್‌ನಲ್ಲಿ ಸೋಮವಾರ ನಡೆದ ಅತ್ಯಂತ ಪೈಪೋಟಿಯಿಂದ ಕೂಡಿದ ಪಂದ್ಯದಲ್ಲಿ ಭಾರತದ ಕುಸ್ತಿಪಟು ಗುರುಪ್ರೀತ್ ಸಿಂಗ್ ವಿಶ್ವದ ನಂ.2ನೇ ಆಟಗಾರ ವಿಕ್ಟರ್ ನೇಮೆಸ್ ವಿರುದ್ಧ ಕಠಿಣ ಹೋರಾಟ ನೀಡಿದರೂ ಅಂತಿಮವಾಗಿ ವೀರೋಚಿತ ಸೋಲುಂಡಿದ್ದಾರೆ.

77 ಕೆಜಿ ವಿಭಾಗದಲ್ಲಿ 2017ರ ವಿಶ್ವ ಚಾಂಪಿಯನ್ ವಿರುದ್ಧ ಕಣಕ್ಕಿಳಿದ ಗುರುಪ್ರೀತ್ ಆರಂಭದಲ್ಲಿ 1-0 ಮುನ್ನಡೆ ಸಾಧಿಸಿದರು. ಮೊದಲ ಅವಧಿಯ ಅಂತ್ಯದ ತನಕ ಮುನ್ನಡೆ ಉಳಿಸಿಕೊಂಡರು. ಆದರೆ, ಎರಡನೇ ಅವಧಿಯಲ್ಲಿ ಗುರುಪ್ರೀತ್ ಸರ್ಬಿಯ ಕುಸ್ತಿಪಟು ವಿಕ್ಟರ್‌ಗೆ ಅಂಕ ಬಿಟ್ಟುಕೊಟ್ಟರು. ವಿಕ್ಟರ್, ಗುರುಪ್ರೀತ್‌ರನ್ನು ಮ್ಯಾಟ್‌ನಿಂದ ಹೊರದಬ್ಬಲು ಯತ್ನಿಸಿದ್ದು,ವೃತ್ತದ ತುದಿಯಲ್ಲಿ ಆಯ ತಪ್ಪಿದರು. ಆಗ ಗುರುಪ್ರೀತ್, ವಿಕ್ಟರ್ ಮೇಲೆ ಬಿದ್ದರು. ಆದರೆ, ರೆಫರಿ ವಿಕ್ಟರಿಗೆ ಎರಡು ಅಂಕ ನೀಡಿದರು.

ಭಾರತದ ಕೋಚ್ ಹರ್‌ಗೋವಿಂದ್ ಸಿಂಗ್ ರೆಫರಿ ತೀರ್ಪನ್ನು ಪ್ರಶ್ನಿಸಿದರು. ಆದರೆ, ಅದರಿಂದ ಏನೂ ಪ್ರಯೋಜನವಾಗದೇ ಒಂದು ಅಂಕ ನಷ್ಟವಾಯಿತು. ಮುನ್ನಡೆಯನ್ನು ಉಳಿಸಿಕೊಂಡ ವಿಕ್ಟರ್ ಮುಂದಿನ ಸುತ್ತಿಗೆ ತೇರ್ಗಡೆಯಾದರು.

ವಿಕ್ಟರ್ ಕ್ವಾರ್ಟರ್ ಫೈನಲ್‌ನಲ್ಲಿ ಕಝಖ್‌ಸ್ತಾನದ ಅಸ್ಖತ್ ಡಿಲ್‌ಮುಖಾಮೆಡೊವ್ ವಿರುದ್ಧ ಸೋತರು.ಹೀಗಾಗಿ ಗುರುಪ್ರೀತ್‌ಗೆ ರಿಪಿಚೇಜ್ ಸುತ್ತಿಗೇ ರುವ ಅವಕಾಶವೂ ತಪ್ಪಿಹೋಯಿತು. 60 ಕೆಜಿ ವಿಭಾಗದಲ್ಲಿ ಫಿನ್‌ಲ್ಯಾಂಡ್‌ನ ಲೌರಿ ಜೊಹಾನ್ನೆಸ್ ವಿರುದ್ಧ ಆರಂಭದಲ್ಲಿ 0-3 ಹಿನ್ನಡೆಯಲ್ಲಿದ್ದ ಮನೀಶ್ ಸತತ 11 ಅಂಕ ಗಳಿಸಿ ತಾಂತ್ರಿಕ ಶ್ರೇಷ್ಠತೆಯ ಮೂಲಕ ಮುಂದಿನ ಸುತ್ತಿಗೆ ತೇರ್ಗಡೆಯಾದರು.

ಮನೀಶ್ ಕುಸ್ತಿ ಮ್ಯಾಟ್‌ನಲ್ಲಿ ಹೆಚ್ಚು ಆಕ್ರಮಣಕಾರಿ ಹಾಗೂ ವೇಗದ ಆಟದ ಮೂಲಕ ಗಮನ ಸೆಳೆದರು. ಮುಂದಿನ ಸುತ್ತಿನಲ್ಲಿ ಮೊಲ್ಡೊವಾದ ವಿಶ್ವದ ನಂ.3ನೇ ಆಟಗಾರ ವಿಕ್ಟರ್ ಸಿಯೊಬನು ವಿರುದ್ಧ ತಾಂತ್ರಿಕ ಶ್ರೇಷ್ಠತೆಯಲ್ಲಿ ಸೋಲುಂಡರು. ಮೊಲ್ಡೊವಾದ ವಿಕ್ಟರ್ ಜಪಾನ್‌ನ ಕೆನಿಚಿರೊ ಫುಮಿಟಾ ವಿರುದ್ಧ ಸೋತ ಹಿನ್ನೆಲೆಯಲ್ಲಿ ಮನೀಶ್ ಟೂರ್ನಿಯಿಂದ ನಿರ್ಗಮಿಸಿದರು.